Read Apatani PILIPIA 1 Bible Online

PILIPIA 1 - Apatani bible

PILIPIA 1

¹ Pol la Timoti, Kristo Jisu ka miira kokii, Hikha piniimiyu atañ Kristo Jisu ko hutiina Pilipi ho dunii, bisop[1] la deakon atañ agiñho:

² Aroh-aya lulyi ho chimie nunumi Pinii ngunu Aba ho Attoh Jisu Kristo kokii.

³Ngo ngiika Pinii mi payapacho ludu hikha nunumika ngiika hempa lyiho,

⁴kiirañ kapane ngiika kuniiñ ho nunupa ngiika kuniiñ mi hempyo biidola kubidu,

⁵payapacho nunuka miibyuñ monko hopa ayapuyu ho allo lotu jaho hokii siilo lohepa.

⁶ Ho ngo hentiñ do mo huna niiko aya miigo miiri biitii nii miija menda hemi miinedo Jisu Kristo ka allo lohe.

⁷ Siikasi ngiipa hendiko hiila hendo hikha nunupaka heniiñsi, niimpalukoda ngo nunumi ngiika ahha ho atii biidu, nunu hikha ngiika agiñho aroh-aya mika labo monii, anyeruho ngiika patiihtunko kotrḛ ho ayapuyu mika lutrḛ ko ho jijeke hiila luko ko.

⁸Niimpalukoda Pinii ngiika haki ke, niihtañ ngo hikha nunumi hento Jisu Kristo ka henju agiñho.

⁹Ho siikasi ngiika kuniiñ ke nunuka hensunii abuyaya ho abuyaya dokiñcho, chila ho chilananiiñ agiñho,

¹⁰Niimpalukoda nunu taliikoladopa niihna hempḛr ayadonii, ho darii ho pahañhansa giima dopa Kristo ka allo ho,

¹¹denki ka ahee atañmi hinyato niihna Jisu Kristo kokii ahdonii, tatukatu ho Pinii mi assañ naniiñpa.

¹² Ngo nunumi chinke nenna do, anubarmii atañ, niihna ngiiko lyitiinii jijeloda ayapuyu ka aya kiipa siike,

¹³ niimpalukoda siika siimi chimpa ladopa hikha ganda daka dagur biinii atañmi ho hikha khiibe atañ miilañmi ngiika patiihtunko niisi Kristo pasu hiila;

¹⁴ho abuya anubarmii atañmi hatii dopa miitii Attoh ko ngiika patiihtunko kopa, ho uroyaya harola Pinii ka aguñmi ludo hang biiso mapa.

¹⁵Tangenii Kristo ka piigo mi tonsḛrkhenyoda kariñbiidola ho lulila, hojalo tongehii aya henjulo.

¹⁶Kamidakii miido hensu niilo, chimbii tola ngiimi so ayapuyu mi lugur niipa atiitii hiila;

¹⁷kapyo dakii Kristo mi gyukoda khiichekhiihe siiniiñ ka henju mi giitola, denki pamapa hojalo herumiipa dupa ngiimika patiihtuntii so.

¹⁸Nii hokoda? Niitañdojalo kapakohe miigoho, amuh malo jije hojalo, Kristo mi gyukodo; ho hiikahiipa ngo hempyodo.

¹⁹ Ḛh, ho ngo hempyo talyi. Niimpalukoda ngo chindo nunuka kuniiñ lo ho Jisu Kristo ka Yajiyallo ka hembyuñ niilo siikasi ngiimika tupya naniiñpa lyigii kendo,

²⁰ siikasi ngiika hempḛr uro heniiñpa lyidota ho hengiñ naniipa niimpalukoda ngo iche hetrḛ hiinyañmohi kema, hojalo poteje harola siisi kiirañ ngiika ahuapo lo Kristo mike assañ giikiñ donii, turla jalo malo shiijalo.

²¹ Niimpalukoda ngiipa koda saniiñsi Kristopa, ho shiiniiñsi ngiipa ayayado.

²²Siikasi asiialyo matiirḛ sango giido koda, hiika hii ngiiko hoka ayamiigo miina naniiñpa. Hojalo niihmi kahe talyi ngo luko lakiñma.

²³Ngiimi anyeruso hendḛr lama miibiido. Ngiika heniiñ yadiñ inkula ho Kristo ka agiñho dubo nandoku hiila, niimpalukoda hiika hii hempḛr aya yakiñdo.

²⁴Hojalo asiialyo hoka duniiñsi nunuka drihpa ano aya yakiñdo.

²⁵Siika so taliimola, ngo chindo niimpalukoda ngo dulya talyi ho miikañtalyi hikha nunuka agiñho, niimpalukoda nunuka hatachagola ho hempyo kiipa henjeho,

²⁶niimpalukoda ngiiko nunu abuje piigo assañ saniiñ kapa kendoke Kristo Jisuko, niimpalukoda ngiika nunukoka hiira ahti kopa.

²⁷Nunuka sango ka henjumiiju miya Kristo ka ayapuyu ka khiiniiñ kiipa atiito, niimpalukoda ngo ahla ho nunumi kapajalo malo kapa majalo, ngo tapa dupa nunu alḛrpa dasudake yajiyallo konepa, ahha puhepa giila henje ka ayapuyu miihiñ nyasuda hiila,

²⁸ ho biisomapa hangdrihpa nunumika cheriinii atañmi. Siikasi mohlumi didḛrpa kamyo kuniiñke mohluka pyadu loko saniimi, hojalo nunuka sangopyako hii, ho hiikahii Pinii kokiike.

²⁹Niimpalukoda siikasi nunumi miidopa bitii niimpalukoda Kristo ka kiipa nunumi henje kontii henje mapa hojalo herutiirḛ hembi dopa mohkiipa,

³⁰ siika ahiñ chesuresu koso miiboto nii mina nunu kapa donii ho siisi tapa donii ngiikii hiila.