Read Apatani PILIPIA 2 Bible Online

PILIPIA 2 - Apatani bible

PILIPIA 2

¹ Hopa hiiko matiirḛ hang haro lupasiisanii Kristo ko dokoda, hang hensu niilo hembyuñ siisa dokoda, hang Yajiyallo ho miibolubo saniiñ dokoda, hang hensu myasu ho arohsiisa nii dokoda,

²ngiika hempyo niimi hempe kiinepe ahha puhepa giihiñ biidola, ahiñsiida hensu niimi giila, luniiñ talii siila ho ahha puhe pa giila.

³ Hang miilyayo atohpa kontii hensu biidola malo hengiñhentii siibii dola, hojalo yanugiibii dola khiibemiyu mi atohmi kayeyapa khiito lya.

⁴Kone abi atohka miina niimi kontii miilya yo, hojalo mihka miina niimi tiirḛ katolya.

⁵ Siika henju siimi nunu punkoho giitolya, niihna nunukii Kristo Jisu kokii giidonii,

⁶huna, mo Pinii chulipa lyisu dotrḛ, Pinii kalyañpa khiisuma drih khiisu saniiñmi,

⁷hojalo atohmi ara miisu tii, miira ka henju mi giila, miyu kapupa buko biidola.

⁸Ho miyu pa lyisutii, mo atohmi atu miisu lala denki loda luniiñ tatii shiihi menda hemi, pogyañ lohepaka leda laka shiisa niimi.

⁹ Hopa Pinii mohmi assañtii ho myantii mohka armyañ mi koneabi armyañ mi kahe yadopa,

¹⁰niimpalukoda Jisu ka armyañ pa koneabi ka liibañ khanga kendo, dariiganda la kiiddiapiñ nyiho ho kiiddi ka ura lohe,

¹¹ho aguñ gonge abi khako kendo Jisu Kristo Attoh hiila, Pinii Aba mika assañ naniiñpa.

¹²Hopa, ngiika heniiñja, kiirañ nunu luniiñ taliine, hopa siisi tiirḛ, ngiika daho kontiimapa hojalo uroyapa ngiika nyima lyiho hotiirḛ, nunuka sangopyako ka miigomi biiso biidola ho alye biidola miitolya;

¹³ niimpalukoda Pinii nunuko miigo miila doke, anyeruho heladopa ho mohka hempyo kiipa miigo miidopa.

¹⁴Hikha drih atañmi budubudu malo niimpape hiila taka mapa miito,

¹⁵ niimpalukoda nunumi pahañhansa ho lusagiima dopa, Pinii ka oho atañ hang haliisanii giilyayo siika sulyi ho lulyilume santuñ ka punko so, huka punko hona nunu hutoh chikañ byohu donii dohadolo so,

¹⁶sango ka puyu mi uropa lukoto, niimpalukoda Kristo ka allo ho ngiimi hentii siidopa ngo piigo ama pa hama malo piigo giimapa miima hiila.

¹⁷Ngiimi siipuñ ponchañ ho pombii siilyi jalo membi sako nunuka henjepa, ngo hempyo talyi ho sobo talyi hikha nunuka agiñho.

¹⁸Hiichulipa nunu tiirḛ hempyoto ho sobongarbo monto ngiika agiñho.

¹⁹Ngo hentiñdo Attoh Jisu ko Timoti mi nunuko nyibya kiiniñ bichi ke, niimpalukoda ngo nunuka puyu lo hempyo dupa.

²⁰Ngiiko mo chuli kone hetrḛ nyima, huna hendiko jaho nunuka ayakiipa hena bida nii.

²¹Mohlu miilañru mohluka atohpasu hensu nyadonii, Jisu Kristo pama.

²²Hojalo Timoti niimkane khiiniiñ miyu nunu chindo, niihtañpa mo oho ka aba mika miiho miichañ ho ngiika agiñho ayapuyupa miiho mone.

²³Ngo hentiñdo hopa mohmi nyibya loda kiiniñ talyike ngo kapa dalyi niitañpana hiika hii ngiika agiñho inchinii;

²⁴ho ngo Attoh mi henjedo ngotiirḛ nyibya loda rongkoda ahbo monto diike.

²⁵Ngo hentola do Ipaproditas ngiika anu ho miigo miihiñnii ho sipahi ahiñ mi nunuko kiiniñ dopa lyikiñdo hiila, ho nunumika puyu bakobo ho ngiika anna lyiho hoka ngiimi miiho bo,

²⁶niimpalukoda mo hikha nunumi kapa nala do, ho henga henkhala do niimpalukoda nunu mohmi achihla do hiila tapa biine.

²⁷Jijeloda mo achihne, shiipa miineku. Hojalo Pinii mohmi aroh biine, ho mohmi kontiima ngiimi tiirḛ, hiilamatii koda ngo heru ka ayoh ho heru hemba montiido.

²⁸Ngo mohmi uroyapa kiiniñ nala helado, hopa, niimpalukoda nunumi hempyo kiine dupa mohmi hiira kapa lala, ho ngiiko hena iche papo yakiñdo.

²⁹Hopa mohmi karii tolya Attoh ko hempḛr hempyo biidola; ho sitañ miyu mi khiito lya,

³⁰niimpalukoda mo Kristo ka miigopa shiida tasanii, mohka sangomi hempa siibiidola nunupaka miigomi ngiipa miipe bitii.