Read Apatani PILIPIA 4 Bible Online

PILIPIA 4 - Apatani bible

PILIPIA 4

¹Hopa, ngiika anubarmii atañ, humina ngo hendunii ho hentu dunii, ngiika hempyo ho tahiñbyopa, alḛrpa datolya Attoh ko, ngiika heniiñja.

²Ngo Yudia mi yartii ho Sinteke mi yartii Attoh ko talii to hiila.

³ Ho nunu mitrḛ ngo kulyi ke, jije ajiñ atañ, siika annii akha atañmi hembyuñ to, niimpalukoda mohlu ngiika agiñho ngiimi miibyuñ montiike ayapuyu lukoko Klement ka agiñho ho khiibe ngiika miigo miihiñ agiñho, huka armyañ na sango ka kheta ho ketola donii.

⁴Kiirañ Attoh ko hempyo to; hiira ngo luchi, Hempyoto.

⁵Hikha miyu atañmi chinke nento nunuka yanupaka pigii niimi. Attoh nyibya ahkiñ doke.

⁶ Hang hena yo kapane drihpa, hojalo kuniiñ mi kapane drihpa kuto ho tiiliibito payapacho hiibii dola nunuka lyarniiñ mi Pinii mi chinke nento.

⁷Ho Pinii ka chimie, niihna hikha chila mi kayeyadonii, nunuka ahha ho nunuka henju mi atii kendo Kristo Jisu ko.

⁸Kamijapa, anubarmii atañ, niihna jijenii, niihna khiisaniiñ, niihna miidikonii, niihna dariinii, niihna kapyo doniiñ, niihna aroh-aya doniiñ, hiiko matiirḛ hempḛr ayado hiila hendo milo, hiiko matiirḛ hangdrih jalo khiila assañdopa lyido milo, hiika drih atañka piigo mi henka nyato.

⁹ Niina nunu chingii tiinii ho lariitiinii ho tapatiinii ho ngiiko kapatiinii, miito; ho chimie ka Pinii hii nunuka agiñho dolyi diike.

¹⁰ Ngo Attoh ko uropa hempyodu niimpalukoda siisi hiimkane myodu hiiba nunu herinyadoku nunuka ngiipaka hena biniiñ mi; nunu jijeloda ngiipa henabitii; hojalo nunuko ayamyodu nyimatii.

¹¹Hiilamake ngo annala ludu hiila; niimpalukoda ngo chingii doku, ngo niihtañ siijalo, ngo hembyañ siibii kendo hiila.

¹²Ngo chindo niihtañpa hembyañ biikiñdo, ho ngo chindo niihtañpa abudopa hembii kendo; niijalo ho hikha myodu myolo mi ngo chingii tiiku michimaniimi niihtañpa kariikendo abujemi ho haya mi, abuje doniimi ho anna niimi.

¹³ Ngo hikha drih atañ mi mohko miila kendo huna ngiimi alḛr giidonii.

¹⁴Hojalo siikasi nunuka helakala ke nunu ngiika ahiare mika henche monii si.

¹⁵Ho nunu Pilipia daka miyu dunii atañ nunu atohpa chinto ayapuyu mika luri biilyi ho, ngiika Masedonia hokii iri lyiho, gyoliñkonii kone hetrḛ ngiika agiñho hengiñ mola nyimane biniiñ hotiirḛ ho larii kotrḛ nunumi kontii apalala;

¹⁶ niimpalukoda Tesolonika lohepa nunu ngiimi hembyuñtii ronge ho hiira.

¹⁷Hiilamaje ngo ahmiñayiñ medu hiila; hojalo ngo ahee mi medu niihna nunuko abuyapa dori kendo nii.

¹⁸Ngo poteje ngiika injomi labiitiiku, ho abuyapa; ngiikii potedoku, Ipaproditas mika nunuka ahmiñayiñ bilii niimi lariikiile, narunempyo biniiñ hiilyañdo, membiniimi lariitii ho Pinii mi hempyo miipatii.

¹⁹Ho ngiika Pinii hikha nunuka anna niimi bikiñ doke mohka abuje tatukatu Kristo Jisu kokii.

²⁰Ngunu ka Pinii ho Aba mi assañ kencho ayudahepa. Amen.

²¹Ayahelyi koneabi piniimiyu mi Kristo Jisu ko. Anubarmii huna ngiika agiñho dabo danii nunumi ayahelyi ke.

²²Hikha piniimiyu atañ nunumi ayahelyi ke, luchila Kesar ka uruatañ kokii.

²³ Attoh Jisu Kristo ka aroh-aya nunuka yajiyallo ka agiñho dokiñ cho.