Read Apatani KOLOSIA 1 Bible Online

KOLOSIA 1 - Apatani bible

KOLOSIA 1

¹Pol, Kristo Jisu ka kiiniñkonii kone Pinii ka henko jaho, ho Timoti ngunuka anu,

² Kristo ka piniimiyu atañ la lotii anubarmii Kolosia hoka dunii atañ mi: Nunumi aroh-aya la chimie Pinii Aba kokii.

³ Ngunu kiirañ Pinii mi payapacho ludu, ngunuka Attoh Jisu Kristo ka aba, niida ngunu nunupa kuchi,

⁴niimpalukoda ngunu nunuka henje mi tapatii Kristo Jisu ko ho hensunii nunuka hikha piniimiyu atañ paka heniiñmi,

⁵niimpalukoda nunupaka hentiñ naniiñ doko hopa dariiganda ho. Siika siimi nunu kapyo ho tapa biine jije ka aguñpa, ayapuyumi

⁶niihna nunuko ahtii nii, jijelusu dokoda hikha dohadolo ho siikasi ahee hila do ho sancha la do-hiichuli nunuka punko hotiirḛ, nunuka tapabii allo hokii ho Pinii ka aroh-aya mi chindo jije ho,

⁷ nunu chintii Epaphras ngunuka heniiñja miira ahiñ kokii. Mo lotii Kristo mika miihonii kone ngunu kiipa

⁸ho ngunumi chindopa miitii nunuka hensuniimi Yajiyallo lo.

⁹ Ho hopa, ngunuka siimi tapabii allo jaho hokii, ngunu nunupa kungu make, kulado nunumi poteje chilananiiñ bikiñcho hiila mohka heniiñmi hikha yajiyallo ka chiniiñlo ho talananiiñlo,

¹⁰sango mi Attoh lo khiiko dopa sankiñ cho hiila, mohmi hempyo miipa dopa, kapane aya miigo ho ahee hibi dopa ho Pinii ka drih mi abu yapa chila dopa.

¹¹Nunumi hikha harchichike ka alḛr naniiñmi bikiñcho, mohka tatukatu harchichikelo, hikha pigiinaniiñlo ho yanu hempyo ka agiñho,

¹²Aba mi payapacho lubii dola, huna ngunumi miiladopa bitiinii piniimiyu atañ mika pensikoniiñ mi biibo dopa hutoh ho.

¹³ Mo ngunumi tupya tiiku kamo ka hamiñbiiniiñ hokii ho nengu tiiku ngunumi mohka heniiñja Oho ka raddeganda ho,

¹⁴hukohona ngunukii tupyabiniiñ dokunii, hiikahii ingyamiigya niimika hello kuniiñ.

¹⁵ Mo Kapalamanii Pinii mika kagiñnanii, butu japa ka bukonii hikha puliñnii atañ hokii;

¹⁶niimpalukoda mohko hikha drih atañmi puliñtii, dariiganda la kiiddiapiñ nyiho, kapalaniiñho ho kapalama niiho, raddeduko malo domiñ biiniibo malo sangiinii malo otority atañ-hikha drih atañ mi puliñtii mohpa ho mohkiilo.

¹⁷Mo hikha drih atañmi kapyo yapa dune, ho mohko hikha drih atañ hii tongepa gatu biiko tola do.

¹⁸ Mo apo ka attoh, gyoliñkonii; mo kapyoja, butu japa ka bukonii shiinii hokii, kapane drihho mo limpyo japaka linnii.

¹⁹Niimpalukoda mohko hikha Pinii ka henju hii poteje hempyo biidola dohatii,

²⁰ho mohkiilo hikha drih atañmi mohko yardiñ liigii dupa, dariiganda malo kiiddiapiñ hoka dunii mi, mohka pogyañ daka ai lo chimie dopa miido.

²¹Ho nunu, huna ronge kasumapa ho ahha baniipa lyine henjuho, diimmah miiju mi miila,

²²mo siisi yardiñ liitii ku apo ka asiialyo lo mohka shiiniiñlo, nunumi darii ho pahañhansa ho mohka hataho khiilii saniiñ giima pa kakiñ ladopa,

²³nunumi henjeho dakañ kiine dupa, abyumapa bilo henju ho henkañdopa, ayapuyu ka hentiñ nii hokii hengu madopa nii mina nunu tapa tiinii, nii mina pukonii kone abimi tonsḛr khenyo tiinii dariiganda ka ura hoka daniimi, ho niihpana, ngo, Pol miihoniipa lyitiinii.

²⁴Siisi ngo hempyodo ngiika nunukiipa ka heru biniiñpa, ho ngiika asiialyoho ngo miipe tiiku niihna miipe mapa donenii Kristo ka achih chibi niiho mohka apo kiipa, hiikahii, gyoliñkonii atañ,

²⁵ niihpana ngo miihoniipa lyidonii piniimiigopa nii mina ngiimi bitiinii nunupa, Pinii ka aguñmi aya loda chinke nendupa,

²⁶ michilamapa achuñ tola ka dotiinii kolyuñkolo hokii ho santuñ atañ hokii[1] hojalo siisi mohka piniimiyu atañmi kakiñ biido ku.

²⁷Mohlumi Pinii kahetii chinke nendupa Midomiyu atañka punkoho niimkane kahe na siika mingo tatukatu michimaniisi, niihna Kristo nunuko donii, hentiñ naniiñ ka tatukatu.

²⁸Mohmi ngunu gyukodu, luluñ du miyu kone abimi ho tonsḛr du miyu kone abimi hikha chilalo, niimpalukoda ngunu miyu kone abimi Kristo ko hengḛr dopa kakiñ dupa.

²⁹Siika sipa ngo khendu, hikha ngiika harchichikelo niilona mo ngiika ura ho tamoloda miila donii.