Read Apatani KOLOSIA 3 Bible Online

KOLOSIA 3 - Apatani bible

KOLOSIA 3

¹Hokoda nunu matiirḛ Kristo ka agiñho turiturku tiiku koda, meto drih atañmi niihna hahoho donii, nohna Kristo dunii, Pinii ka lahbi alah ho du.

²Nunuka henju mi haho hoka drih atañ ho hengato, kiiddiapiñ hoka drih donii atañ mimapa.

³Niimpalukoda nunu shiine ku, ho nunuka sango mi achuñ tiiku Kristo ka agiñho Pinii ko.

⁴Niida Kristo huna ngunuka sango ahchinii, hiiko nunu tiirḛ ahbo mokiñdo mo agiñho tatukatu ka ho.

⁵Mentoku, niihna kiiddiapiñ kii nunuko giidonii: datuapu, miibḛrnii, helyihembyo, diimmah henju, ho kalyikabyo, niihna puchiniimi ka heriinii.

⁶Siika piigorago pa Pinii ka hadii hii ahdo.

⁷Sitañpa nunu ronge ila dane, nunuka mohluko hoka salyiho.

⁸Hojalo siisi hikha siika atañmi apatoku: hadii, urohadiinii, kanatana manii, nipasiiniiñ, ho lusamanii luniiñ nunuka aguñ hokii.

⁹Kone anyañmi gollu siilya yo, kakatolya nunu khu henju muju mi apatiiku hiimika miinyo nii hokii

¹⁰ho niti henjumiiju mi giito, nii mina nitidopa miidonii chiniiñho puniiboka kapupa.

¹¹So Grik ho Jew hiila lyila kema, mitupikonii ho mitupikomanii, moreymiyu, dimpiirapii, miira, dasḛrmiyu, hojalo Kristoke hikharu, ho hikharuko hoke.

¹² Hopa giinyato, Pinii ka kahenii kone hiilyañ, darii ho heniiñja, aroh siiniiñ mi, helakala, chimeeñ, yanu, ho ahhakeyiñ,

¹³kone anyañ mi pigii siibii dola ho, kone matiirḛ koneyami halii lyimilo, kone anyañ mi hello siito lya; niihtañpa Attoh nunumi hellotii; hopa nunu tiirḛ hello to loda.

¹⁴Ho hikha siika atañ siimika hahoho hensu niimi atii tolya, niihna kapanemi ngapo tola atii dunii tongepa ahiñ hehiñ dopa.

¹⁵Ho Kristo ka chimie mi nunuka ahha ho sangii kiineto , jijelusu dokoda niihpana nunumi gyotii nii ahuapo konepa. Ho payapacho luto.

¹⁶ Kristo ka aguñmi uropa nunuko doha kiineto, tonsḛrsiito ho lulyañ luda siito kone anyañ mi hikha chilalo, ho assañbiisie mi sito ho bariebiisie mi ho yajiyallo ka biisie atañmi payapacho hiila nunu ahha ho lubii dola Pinii mi.

¹⁷Ho niijalo nunu miichi, aguñ pajalo malo miilajalo, kapanemi Attoh Jisu ka armyañ pa miitolya, Pinii Aba mi payapacho lubiidola mohkiilo.

¹⁸ Mihie atañ, tiilii siinyato nunuka milloko, hiikahii Attoh ko miiju ke.

¹⁹Millo atañ, nunuka mihie atañmi henyato, ho mohlumi miisimiihayo.

²⁰Himme atañ, nunuka annii-aba ka luniiñmi tanyato kapaneho, niimpalukoda siikasi Attohmi hempyo miipado.

²¹Aba atañ, nunuka himme atañmi hadii dopa luhuluha nyayo, hiila miikoda mohlu hame kendoke.

²²Miira atañ, kapanemi luniiñ tanyato huna nunuka kiiddiapiñ ka attoh nyanii, amee kataho kontii mapa, miyu mika hempyo miipa dupa hiila mapa, hojalo ahha puhepa hembiidola, Attoh mi biiso biidola.

²³ Niitañjalo nunuka miigo, ahha henga biidola miito, Attoh mika miiho doniiñ hiilyañpa ho miyu mimapa,

²⁴chimbiitola Attoh kokii nunu pensikokiñdo nunuka ahmiñayiñ mi; nunu Attoh Kristo mike miiho donii.

²⁵Niimpalukoda ayamapa ka miinii atañmi miijomi bikur kendoke mohluka ayamapa ka miiniiñpa, ho hiiko hang hengu here nyikiñma.