Read Apatani TAITAS 1 Bible Online

TAITAS 1 - Apatani bible

TAITAS 1

¹Pol, Pinii ka miira ho Jisu Kristo ka kiiniñkonii kone, hiimi uro yapa hembyuñ kiine dupa Pinii ka kahe konii atañka henje mi ho mohluka jije ka chila mi niihna piniisanju jaho donii,

²santḛrlamanii sango ka hentiñ naniiñho nii mina Pinii, huna pema gollu manii, ayu kolyuñkolo hoka hemme biniiñ

³ho myodu aya mi kabiidola kakiñdu mohka aguñmi tonsḛrkhenyo niilo nii pana ngiimi kahe tiinii Pinii ngunuka Lyangur boka lukoho;

⁴Taitas mi, jije ngiika wiinga henje hehiñ ho: Aroh-aya ho chimie Pinii Aba la Kristo Jisu ngunu mika lyangur boko hokii.

⁵Siika sipa niihna ngo niimi Kret ho apa tenii, niimpalukoda niimi miilyañ kiine dupa niihna ayamanii, ho amiabañ kahe kiine dupa taun kone abi ho ngiika niimi ka luko luchañ ho,

⁶hujalo matiirḛ pahañhansa giima, mihie ako ka millo, mohka wiinga atañ henje niimilo ho piigoama miinii malo luniiñ tamanii mamilo.

⁷Bisop pakoda, Pinii kiimi ka kalya biniipa, pahañhansa giikiñma loda; mo hentii siikiñma malo ohepada hadii niikiñma malo ow taniikema malo pasugasu niikiñma malo paser miiliñ biidupa hiila chahi niikiñma,

⁸hojalo hapumibya kendo, aya mika heminii, atoh mika miilyañ siiniiñ, lotii, darii, ho hendi-miidi niikiñdo;

⁹mo alḛrpa dakiñdo jije aguñ lukonii hiilyañpa, niimpalukoda mo luko lusi ladopa jije tonsḛr tonjuho ho lukoludḛr niipa huna chekho donii hiimi.

¹⁰Niimpalukoda abuje luniiñ tamanii miyu da, lusu ara luniiñ ho talubalonii, luchila mitupipakoniiñ atañ;

¹¹mohlumi adukiineyo loda, niimpalukoda mohlu hikha uru atañmi herumiipa biido paser miiliñ biidu paka tonsḛr niilo nii mina mohlu tonsḛr dopa lyila kemanii.

¹²Mohluka punko hokii kone, mohluka attoh ka nyibuhenii kone, lutii, “Kret miyuatañ kiirañ golludu, diimmah achu-amyo, assuale diigatanga.”

¹³Siika pyako niisi jije. Hopa mohlumi uropa gato, niimpalukoda mohlumi aya loda henje giike nendupa,

¹⁴Jew atañka jijemanii miya biike nensa niimi malo miyu atañka luniiñmi huna jije miya khiipa doniiñ.

¹⁵Darii atañpa hikha darii doke, hojalo lyolyichochi ho henjemanii atañpa hang kone hetrḛ darii make; mohluka henju ho henjumiiju hiitiirḛ hikha surudonyo ke.

¹⁶Mohlu Pinii mi chindo hiila lusudo, hojalo mohlu mapado mohluka miiniiñluniiñ miijulo; mohlu kana tanañmaniiñ, luniiñtama niike, hang aya miigo miina naniiñpa piigoamanii.