Read Apatani TAITAS 2 Bible Online

TAITAS 2 - Apatani bible

TAITAS 2

¹Hojalo no, tonsḛrto niihna tonju ayanii.

²Abañ yami yarto hendito hiila, uroheniiñ, dadimiiri, aya henje niikiñdo, hensuniiho, ranttiniiho.

³Ammi yami hii chulipa yarto miijuluju ho khiiko dopa dato hiila, nipakoya niipa dakiñma malo ow miirapa lyikiñma; mohlu tonsḛr kendo niihna aya donii,

⁴ho nyimuñ annii akha mi miinyo lunyo giito niitañpana atoh ka millo la wiinga mi henkiñ donii hiila,

⁵dadimiiri kendo, addah kendo, ude henga niikiñdo, helakala, atoh millo ka luniiñ takiñdo, niimpalukoda Pinii ka aguñmi khiipa madopa.

⁶Hiichulipa anuya milobomi tiirḛ yarto atohmi pigii siinya tote hiila.

⁷Atohmi hikha khiiniiñ ho katiñnaniiñpa kakiñ siito aya miiju atañlo, ho niika tonsḛr ko denkilotii mi, hendimiidi mi kakiñ tolya,

⁸ho aya lujumi hiikaho sarpa kolya yo, niimpalukoda cheriibomi hiinyañ dopa, hang diimmah ngunumi lusa giima dopa.

⁹Miira atañmi yarto mohluka attoh ka luniiñmi tato hiila ho kapane miigolugo ho hembyañ dopa miibito hiila; mohlu lukur lusila miikiñma,

¹⁰lapyo kema, hojalo kakiñ siikiñdo kapaneho ho jije lotiimi niimpalukoda kapane drih ho mohlu giikiñdo Pinii ngunuka Lyangur boka tonjumi.

¹¹Niimpalukoda Pinii ka aroh-aya hii ahtii hikha miyu atañka sangopyako pa,

¹²ngunumi miinyolunyo giitii henje maniiñmi apato ho dohadolo ka helyihembyo atañmi, ho hendimiidipa santo hiila, lotii, ho piniihenju jaho santo hiila siika dohadolo so,

¹³ngunuka lyaniiñ hentiñ mi kalyala, ngunuka tatukatu kahe Pinii ho Lyangur bo Jisu Kristo ka ahsa niimi,

¹⁴huna mo atohmi ngunupa bisu tiinii ngunumi tupya dukupa hikha kacho hokii ho darii miidupa mohpa mohka atoh miyupa miidupa huna aya miigo atañmi miinala hendo nii.

¹⁵Siika drih atañmi lukoto; harolupato ho gato hikha otority lo. Kone lotrḛ khiipa kolya yo.