Read Apatani HIBRU 12 Bible Online

HIBRU 12 - Apatani bible

HIBRU 12

¹Hopa, ngunumi hiimkane kahe jomii dagur kobiidola hakipa, kiije ngunu tiirḛ apalyasa kapane drihmi, ho ingyamiigya niihna hempḛr ageh giitola giidonii, ho kiije ngunu harkañ ari hasa pigii biidola nii mina ngunupa miitola atii bitiinii,

²Jisu mi kabii dola miitu rigiibo ho digoabiaya dopaka miinii ngunu henjemi, huna mohka hata hoka hempyo atii tola doniiñ kiipa pogyañ mi pitii nii, hiinyañ mitrḛ hempa kapa biidola, ho duku Pinii ka duko lahbi alah ho.

³Henkato mohmi huna ingyamiigyanii atañ kokii sitañ khiimaniimi mohko pigiitiinii, niimpalukoda nunumi renge mayapa malo ahhahame mayapa.

⁴Nunuka ingyamiigya mika miitrḛ siila miiko siisi loyepa nunuka ai linda dohepa miima.

⁵Ho nunu helyu dadokuha nunumi oho atañ hiila lubii dola ka haro lupa niimi? “Ngiika oho, ano hajupa heyo Attoh ka miilyañ niimi, malo hame giiyo niidana nunu mohlo miikhiiñ kochinii.

⁶Niimpalukoda Attoh hiimi miilyañ duke humina mo hendu nii, ho miikhiiñdu oho kone abimi humina mo larii tiikunii.”

⁷Siikasi miilyañ kodu pake nunu pigii dunii. Pinii nunumi oho mika miichañ hoke miidonii; niimpalukoda mo niihtañ ka oho humina hiika aba hii miilyañ manii?

⁸Nunumi matiirḛ miilyañ mapa apa dokoda, nii hona hikharu miibo donii, hokoda nunu ipfyo oho ke ho oho loda make.

⁹Hiika hahoho, ngunukii kiiddiapiñ ka aba dunya du ngunumi miilyañ dupa ho ngunu mohlumi khiidu. Ngunu uro yapa khiikiñ masu peha Yajiyallo ka Aba mi ho sandupa?

¹⁰Niimpalukoda mohlu ngunumi miilyañdu echuche myodu pasu mohluka hempyo kiipa, hojalo mo ngunumi miilyañ du ngunuka aya kiipa, niimpalukoda ngunu mohka darii mi henche mondupa.

¹¹Myodu hepahe kapane miilyañ nii kako achih heru giido hempyo giisa niimi hentola; Kamikalo ho siikasi chimie denki ahee miya higiido humina siika silo miilyañ tiiku nii.

¹²Hopa nunuka lyuhikunii alah atañmi yuchato ho nunuka ajju liibañ atañmi alḛr dopa miigiito,

¹³ho lembo mi parda pa miito nunuka alih kiipa, niimpalukoda liichabomi inji mapa lyima dopa hojalo hiilamapa miipya kodo paya.

¹⁴Hikha miyuatañ agiñho chimie mi meto, ho darii hii nyimapa kone hetrḛ Attoh mi kapa lakiñma.

¹⁵Hendi nyatolya kone mitrḛ Pinii ka aroh-aya mi larii mapa lyike nelyayo; niimpalukoda hang “kochi ka liima” saliñ madopa ho ahiare mi lingii madopa, ho siika silo abuje miibḛr konya da;

¹⁶kone mitrḛ kalyikabyo malo Isau kii hiilyañ piniihenju mi heriimanii pa dake neyo, huna apiñ purepa pyudo siibii donii mohka oho abañ hiila khiiko saniiñmi.

¹⁷Niimpalukoda nunu chindo hiikahiiba ho, mo lyaniiñ mi pensi kona la hensu dotrḛ, mohmi khiipa tiiku, niimpalukoda mo henkur dopa myodu kapa kumatii, mo mila bibii dola hiimi mesu dotrḛ.

¹⁸Niimpalukoda nunu ahma ke nii mina tenka tiinii, yamuyala donii, ho kamoramba, ho domu, ho allyiaro,

¹⁹ho siirii muniiñ mika tapanii, ho aguñluniiñ huka luniiñ atañ na taniibo atañmi lyardopa miitiinii niimpalukoda mohlumi puyu luko lubyañ kuyo hiila.

²⁰Niimpalukoda mohlu pigii lamatii miitote hiilaka biniiñmi, “achu-amyo jalo matiirḛ putoo mi tenka dokoda, hiikahiimi yalañ kutii.”

²¹Jije lusudokoda, hiimkane biisodo hiimi ka kapanii Mose lutii, “Ngo biiso la alye to.”

²²Hojalo nunu Zayon Putoo ho chatii ho turnii Pinii ka citi ho, dariiganda ka Jerusalem, ho khiikha lama miidopopi atañka hempyo laka dakuñko,

²³ho butu wiinga ka dakuñ koho hutiimina dariiganda ho kelii tola donii, ho ayakacho kanii huna hikha ruka Pinii nii, ho denki miyu atañka yajiyallo mi digoabiaya dopa miitii,

²⁴ho Jisu ko, niti hemmesiiniiñ ka punko lubibo, ho ai pippu niilo niihna Abel ka ai mi hentola uroya aroh-aya lo ludonii.

²⁵Hendi tolya nunu ma hiila luma byoha hiimi huna ludonii. Niimpalukoda mohlu matiirḛ hargii lamatiikoda mohluka takho lyiho kiiddiapiñ hoka luluñ niimi, ngunumi apa lyido hendoha ngunu matiirḛ takho dokoda huna ngunumi dariiganda hokii luluñ donii.

²⁶Mohka aguñ kiiddiapiñ mi hukutii; hojalo siisi mo hemme tii, “Rongeta ngo huku talyi kiiddiapiñ mi kontiima hojalo dariiganda mitrḛ.”

²⁷Siika luniiñsi, Rongeta, kakiñdo lapasaniiñmi nii mina hudiñ tiinii, luniiñsi niihna putii nii, niimpalukoda nii mina huku lamanii hiimi dopedopa.

²⁸Hopa kiije ngunu payapacho lusa huku lamanii raddeganda mika larii kopa, ho hopa kiije ngunu Pinii mi larii lasaniika heriiniimi bisa, khiibii dola ho biiso biidola;

²⁹niimpalukoda ngunuka Pinii yamu yakhii niike.