Read Apatani JEMS 1 Bible Online

JEMS 1 - Apatani bible

JEMS 1

¹Jems, Pinii la Attoh Jisu Kristo ka miira, Alyañlenye impyainsanii halu atañmi: Ayahelyi.

²Hempyo paya khiitolya hikha rumi, ngiika anubarmii atañ, niida nunumi ponsa ponsa tenka talyi,

³niimpalukoda nunu chindo nunuka henje mika tenka niisi ranttiniimi lingii doke.

⁴Ho ranttiniika miigomi miija kiineto, niimpalukoda nunu digoabiaya dopa ho lyipe dopa, hangdrih papo madopa.

⁵Nunu kokii matiirḛ konejalo chila papo domilo, mohmi Pinii kokii kuke nento, huna hikha miyu atañmi kobya la bidunii ho hang gamapa, ho hiika hiimi mohmi bikiñ doke.

⁶Hojalo mohmi henje biidola kuke nento, hemmomapa, niimpalukoda huna hemmo donii hii yasie siimie ka lando podo niitañdo allyi lo heduñ biikola.

⁷Niimpalukoda hiika miyu hiila henkiñma ahha punye giiniibo, hikha mohka miigo ho hendḛr lama paka miiniibo, hii hang drih Attoh kokii larii todo hiila.

⁹Arro anubarmii hempyo nyato niimika achalyiho,

¹⁰ho mingo niimika arro dopa miilyiho, niimpalukoda tammi ka apoolalu hiilyañ mo shiipa kendo.

¹¹Niimpalukoda danyi chalyiho hiika uropaka benniiñlo tammi mi benkhii kendo; hiika apoo hii pusi kendo, ho hiika kapyo hii lyudu. Hiichulipa mingo miyu tiirḛ lyukiñdo mohka kiiri miiniiñ ka punko hokii.

¹²Lyanko kendo hiika miyu huna tenka niimi pigiiladonii, niimpalukoda mo tenka niimi datḛr giido koda mo sango ka tayyiñbyopa mi kapa kendo nii mina Pinii hemme bitola donii huna mohmi hendo nii.

¹³Kone hetrḛ luyo niida mohmi tenkalarka talyi, “Pinii ngiimi tenkalarka biido hiila”; niimpalukoda Pinii pema diimmah lo tenkalarka make ho mo kone mitrḛ tenkalarka madu;

¹⁴hojalo miyu kone abi tenkalarka dopa miikodo mohka atoh heniiñka hehuhere ho miina dopaka heniiñlo.

¹⁵Hiikahiibaho miina laka heniiñ hii ahee hiliñ giidu hiika hii ingyamiigya mi buliñ giidu; ho ingyamiigya hii niida sampya talyi hii shiigo mi ahgiidu.

¹⁶Talubalo koyo, ngiika heniiñja anubarmii atañ.

¹⁷Kapane aya peniiñhii ho kapane digoabiaya ahmiñayiñ hii ayoh hokii ke, hutoh ka Aba kokii todo hukohona hang lyiguhmanii malo yallobyotiñnii nyimanii lyiguhkopa.

¹⁸Mohka atoh henko jaho ngunumi puliñtii jije ka aguñlo niimpalukoda ngunumi mohka puniiñ hokii hitu ahee chikañ dopa.

¹⁹Siika siimi chinto, ngiika heniiñja anubarmii atañ. Miyu kone abi nyibya tato, yanupa luto, yanupa hadiito,

²⁰niimpalukoda miyu ka hadii niisi denki Pinii ka miigomi miima ke.

²¹Hopa hikha kachohenju mi apatoku ho diimmah miijumi ho yanuyamya pa lariito puyu ali niimi, niihna nunuka yallo mi lyangur lakiñ donii.

²²Hojalo luniiñ tabii dola miiniiñpa lyito lya, taniipa kontii lyilya yo, atohmi talubalo siinyala.

²³Niimpalukoda mi kone matiirḛ puyu mika taniiñpa kontii siikoda ho miinii pa lyima koda, hiika miyu hiichulido huna atoh ka nyimo mi keretalo ho kasu donii;

²⁴niimpalukoda mo atohmi kasu lala ho indo ho ohepada helyu siidado mo niihtañ dona hiila.

²⁵Hojalo huna digoabiaya dapo mi kadonii, dasḛr giiniika dapo mi, ho hiichulipa miidonii, hiika taniibo helyu kema hojalo miida hiika miiniibo, mo lyanko kendo mohka miiniiñho.

²⁶Mi kone matiirḛ hendo koda mo piniihenju mika miinii hiila, ho mohka allyo mi pigii siila makoda hojalo mohka ahha mi talubalo siido, siika miyu ka piniihenju si piigo ama.

²⁷Niihna darii piniihenju ho miibḛr manii Pinii kala ho Aba ka hataho hii sike: mijiatu atañ mika katenii ho hiimie atañmi mohluka herumyanka ho, ho atohmika dohadolo so miidukoma paka danii.