Read Apatani 1 PITAR 1 Bible Online

1 PITAR 1 - Apatani bible

1 PITAR 1

¹Pitar, Jisu Kristo Ka kiiniñkonii kone, Mompa koto laka impe inse siinii atañ Pontus ho, Gelesia, Kapadosia, Asia, ho Bitinia ho,

²Pinii Aba ka kahenii ho hemmyo kuniiñ ho Yajiyallo loka darii miikuniiñ Jisu Kristo ka luniiñ tadopa ho mohka ai loka pippu kuniiñ: Aroh-aya la chimie nunuko abuyapa dokiñcho.

³Payapacho Pinii mi ho ngunuka Attoh Jisu Kristo ka Abami! Mohka anokahe aroh kopa ngunu nitipa buko tiiku turnii hentiñ ho Jisu Kristo ka shiiniiñ hokii ka turiturku niilo,

⁴ho pensikodupa niihna lyula kemanii, miibḛrmanii, ho sellamaniiñ, dariiganda ho nunupa atii bitii,

⁵hutiina Pinii ka harchichike lo henje kiilo dagur kobiidonii sangopyako pa kamikalo myodu ho kakiñ dupa hiila henju tokula dokuniimi.

⁶Siika sipa nunu hempyoto, siisi ichuche myodu hepa nunu abuje tenka kosu dojalo,

⁷niimpalukoda nunuka jije henje kopa, ayyiñ mitrḛ ka khiiniiñya niihna lyukiñ siido tiirḛ yamu lo yaka kodu, hiika miijohii assañ giiko ladopa ho tatukatu ho khiikonii Jisu Kristo ka kakiñ lyikuho.

⁸Hang kapa mapa mohmi nunu hendo; nunu siisi mohmi kapamasu nunu mohmi henjeda ho hempyo nyada hiimkane uro hempyo ka agiñho hiimi luko hetḛr luko lama.

⁹Nunuka henje ka henjo nunu nunuka yallo ka sangopyako mi kapa biido ku.

¹⁰Nyibuhenii huna aroh-ayami nyibuhentiinii hiika hiimike nunu mekiñ donii ho siika sangopyako mi takatara to;

¹¹mohlu takatara nyatii niihtañ miyu na malo myodu mina Kristo ka Yajiyallo kakiñ tiinii mohluka ura ho Kristo ka heru hensa niimila ho hiika hiiba hoka tatukatu mi.

¹²Siikasi hiila kakiñtii mohlumi mohlu atohpa miiho siima hojalo nunupa, drih atañ nii mina siisi nunumi gyuko donii hiika atañlo hutiina tonsḛrkhenyo nyadonii ayapuyu mi Darii Yajiyallo kiilo dariiganda hokiika kiiniñ niike, drih atañ nii mina miidopopi atañ bilo kii kanañ la lyinenii.

¹³Hopa hendi nyato nunuka henju mi, hendḛr nyato, nunuka hentiñ naniiñmi apupa aroh-aya ho atii biito nunukoka ahsanii hii hiikahii Jisu Kristo mika kakiñ lyikuho.

¹⁴Luniiñ tanii himme chuli, talyayo kapyo hoka nunuka chimapaka helyihembyo henjuho,

¹⁵hojalo mo huna nunumi gyodonii dariike, darii to nunu atohpa hikha nunuka miiko lukoho;

¹⁶hiila ketola do, “Nunu dariito, niimpalukoda ngo darii ke.”

¹⁷Ho nunu matiirḛ mohmi Aba hiila gyodu milo huna henguhere mapa halii kendonii mohka miiniiñ jaho, atohmi nunu biiso biidola miitolya hikha nunuka soka mompa koto laka dudo hemi.

¹⁸Nunu chindo nunumi tupya tiiku piigoamanii lembo atañ hokii nunuka aba apa atañ kokiika pensi koniiñ hokii, lyusanii drih atañ loma rupu malo ayyiñ,

¹⁹hojalo Kristo ka khiiniiñ ai lo, hii chuli subuñ pamyo takho giimanii malo page maniihokii.

²⁰Mohmi kaye kapyo tola dotiiku dohadolo mika liidi rammarampa hojalo kakiñtii kamikalo myodu jaho niimpalukoda nunukiipa.

²¹Mohkiilo nunuko hentiñnanii do Pinii ko, huna mohmi shiinii hokii turdopa miitiinii ho tatukatu mi bitii nii, niimpalukoda nunuka henje ho hentiñ nanii hii Pinii ko dopa.

²²Nunuka yallomi darii miibii dola nunuka luniiñ talii niilo jijemi, jijeka anubarmii hensu niilo, kone anyañmi hempḛr uropa hensu tolya ahha lo.

²³Nunumi nitipa buti tiikuke, lyula sanii kormo lomake hojalo lyula samaniiloke, turnii ho Pinii ka aguñ kiilo ke;

²⁴niimpalukoda “Hikha asiialyo hii tammi chuli ke ho hikha siika tatukatu hii tammi apoo chuli siike. Tammi hii sendu, ho apoo hii liidu,

²⁵hojalo Attoh ka luniiñ hii ayudahepa dokiñdo.” Hiika luniiñhii ayapuyu ke nii mina nunuka punkoho tonsḛrkhenyo tiinii.