Read Apatani 1 PITAR 5 Bible Online

1 PITAR 5 - Apatani bible

1 PITAR 5

¹Hopa ngo harolupalyi nunu koka amiabañ atañmi, amiabañ ahiñpa lyilyila ho Kristo ka heruheniiñ ka hakipa hiikahaho ho tatukatu hoka dabo saniiñ nii mina kakiñ kendonii

²Pinii ka subuñatañ mi kabii tolya nunumika kabii dopaka biniiñ mi, miinamapa miite mapa hojalo miinabiidola miito, hiinyañmohi ka paser miiliñ biichi hiila mapa hojalo miinala hembiidola miitolya,

³hutii na nunuka ura ho danii hiimi lumiñ biito lamapa hojalo subuñ atañpa katiñ nanii pa lyibii dola.

⁴Ho niida akhoja Subuñ sornii ahchiku nunu lyula masanii tatukatu ka tahiñ byopa mi pakiñ dokuke.

⁵Hiichulipa nunu anubarmii atañ amiabañ ka luniiñ tato. Atoh mi ahgii siinyato, hikha nunu, yanu paka heniiñmi koneanyañ pa, niimpalukoda “Pinii hentii siiniiñmi kamake, hojalo atupaka hensu bomike aroh-aya mi bidunii.”

⁶Atohmi atupa hensuto hopa Pinii ka tamo alah ho, ho myodu ahlyi koho mo nunumi jotu kendoke.

⁷Hikha nunuka hena mi mohko tiilii bito, niimpalukoda mo nunumi kalyañ dake.

⁸Hendi tolya, kadila duto. Nunuka ahha-banii igii gyaduñla dake patii gyuniiñ hiilyañ, meduñla hu kone mijalo diidupa hiila.

⁹Miitḛr siito mohmi, alḛrpa nunuka henje ho dato, chimbii dola siika ahiñ heru mi nunuka anubarmii atañ miilañ hela da hiila hikha dohadolo so.

¹⁰Ho nunu ichuche heru hela lala, hikha aroh-aya ka Pinii, huna nunumi mohka ayudahe tatukatu Kristo ko gyolii tiinii, mo atohloda miilyañ kendo kuke, dodopa miikiñdo, ho alḛrdopa miikiñdo nunumi.

¹¹Mo ayudahepa domiñ biikiñcho. Amen.

¹²Silvanas kokii, lotii anu konepa ngo mohmi khiidu, ngo nunumi tudiipa pa kebii lyike, harolupala ho lukola siikasi jije Pinii ka aroh-aya ke; so alḛrpa dato lya.

¹³Mo huna babilon ho dunii, huna kahekonii ahiñnii, nunumi ayahelyi mi bilii biilyi; ho ngiika oho Mak tiirḛ.

¹⁴Kone anyañmi ayahelyi lusuto hensunii mochulo. Hikha nunuko chimie dokiñcho hutiina Kristo ko danii.