Read Apatani 2 PITAR 1 Bible Online

2 PITAR 1 - Apatani bible

2 PITAR 1

¹Saimon Pitar, Jisu Kristo ka miira ho kiiniñkonii kone, Hiika atañpa hutiina patii kunii henje ahiñ ngunuka agiñho danii ngunu Pinii la Lyangurbo Jisu Kristo ka denki ho:

²Aroh-aya la chimie abuyapa nunuko dokiñcho Pinii la Jisu ngunuka Attoh nyimika chiniiñho.

³Mohka pinii harchichike lo ngunumi bitiiku hikha drih atañmi hiikahii sango la piniisanju, mohka chiniiñlo huna ngunumi gyotiinii mohka atoh tatukatu ho la ayajalo,

⁴niilona mo ngunumi bitii kunii mohka khiiniiñ ho hempḛr kahe hemme biniiñmi, niimpalukoda hiikiihiilo nunu hargii nandupa ayamanii hokii niihna dohadolo ho donii helyihembyo kiilo, ho piniihenju mika hembo niipa lyidu kupa.

⁵Niimpalukoda siika piigo lodapa kapanelo miibyuñ talyi hento nunuka henje ho ayahenju agiñho, ho ayahenju ka agiñho chiniiñ,

⁶ho chiniiñ ka agiñho hendimiidi, ho hendimiidi ka agiñho rantinii, ho ranttiniika agiñho piniisanju mi,

⁷ho piniisanju agiñho anubarmii hensumyañsu niimi, ho anubarmii hensumyañsu niika agiñho hensu niimi.

⁸Niimpalukoda siika drih atañsi nunuko dokoda ho abupa giido koda, siika atañsi nunumi ngunuka Attoh Jisu Kristo ka chiniiñ hokiika ajju malo ahee himanii hokiila dagii kendoke.

⁹Niimpalukoda hutiina siika drih atañmi giimanii hii micha ke ho kago doke ho helyu tiiku mohmi bilo khu ingyamiigya atañ hokii ase tiiku hiila.

¹⁰Hopa, anubarmii atañ, uroyapa ya mechi hiila hento nunumika gyoniiñ la kahe niimi chindḛr dupa, niimpalukoda nunu matiirḛ siimi miido koda nunu pema huhi kemake;

¹¹Hopa hiikoho abuje biliñ kendoke nunupa ngunu Attoh ho Lyangurbo Jisu Kristo ka santḛrlamanii raddeganda ho ahkopa.

¹²Hiikohopa ngo kiirañ hendu nunumi lupa du siika drih atañmi, nunu hiika atañmi chinsu dojalo ho jije ho nunu koka doniimi dodopa miisu tiijalo.

¹³Ngo hendo hiikahii miidiko hiila, nii dahepa ngo siika apo ho dachi, nunumi heridopa miichi lupa biidola,

¹⁴niimpalukoda ngo chindo ngiika apo mika opa kusanii hii tunii dokuke, ngunuka Attoh Jisu Kristo ka ngiimika kakiñ nii hiilyañpa.

¹⁵Ho ngo kaka talyike hiimi ngiika ineko nunu nii myodu hojalo siika drih atañmi hempa ladopa.

¹⁶Niimpalukoda ngunu surupaka uyilukoko kiiliñ ho imbo make, ngunuka nunumika harchichike la Attoh Jisu Kristo ka ahsa niimi ka luko niisi, hojalo ngunu ameeloka kapanii mohka kaye mi.

¹⁷ Niimpalukoda mohka khiiniiñ la tatukatu nyimi Pinii Aba kokii ka larii lyiho ho luliñnii mohmika lulyi ho Kayeja tatukatulo, “Siikasi ngiika heniiñja Oho ke, humina ngo ano hempyo biidunii,”

¹⁸ngunu siika luniiñmi tapato dariiganda hokii, niimpalukoda ngunu mohka agiñho dato darii putoo ho.

¹⁹Ho ngunuko nyibuheniika luniiñ hii do uroyapa hentiñ giidopa. Nunu aya yapa miikiñ doke henga biidola siika so muru ka kamo hoka byohu donii hiilyañ, allo loliñ menda hemi ho konchi takḛr ka nunuka ahha ho byomiñ dahe mi.

²⁰Kappyo japa nunu siika siimi chinto, nyibuheniiñ ka piniipota mi konetiirḛ atohpa luko siidu hiila lula kema,

²¹niimpalukoda nyibuheniiñ ka luniiñhii miyu kokii ahdu hiila ahma, hojalo miyu atañmi Darii Yajiyallo abyu giila la Pinii kokii lutii.