Read Apatani MIHUKAKIÑNIIÑ 21 Bible Online

MIHUKAKIÑNIIÑ 21 - Apatani bible

MIHUKAKIÑNIIÑ 21

¹Ho ngo kapato niti dariiganda la niti kiiddiapiñ nyimi; niimpalukoda kapyo dariiganda la kapyo kiiddiapiñ nyi lyune ku, ho siimie hiitiirḛ nyikuma.

² Ho ngo kapato darii citi mi, niti Jerusalem mi, tola dopa dariiganda Pinii kokii, mihie mika mohka millo paka giiju ajubitii nii hiilyañ;

³ho ngo tapato hempḛr goro aguñ raddeduko hokii lubiidola, “Kato, Pinii ka duko hii miyu atañka agiñ hoke dolyi kunii. Mo mohluka agiñho dubo kendo, ho mohlu mohka miyupa lyikiñdo, ho Pinii mohloda mohluka agiñho dabo kendo;

⁴mo tipa kendo kone abika mila mi mohluka amee hokii, ho shiikiñ kuma, malo hiiko haru henkiñ kuma malo kheniiñ hii malo achih chikiñ kuma, niimpalukoda kappyo drih atañ impa neku.”

⁵Ho hii huna raddeduko ho dunii ludo, “Kato, ngo hikha drih atañmi niti dopa miichi.” Hiira mo ludota, “Siika siimi keto, niimpalukoda siika aguñ atañsi khiiniiñ ke ho jije ke.”

⁶Ho mo ngiimi lune, “Siika siimi miitii ku! Ngo Alpha ke ho Omega ke, arañ la mitu ke. Yasie hangḛr bo atañmi ngo sango ka yasie shoo hokii bichi hang arie lamapa.

⁷Mo huna pamiñdonii siika pensi konii si dokiñdo, ho ngo mohka Pinii pa lyichi ho mo ngiika oho pa lyikiñdo.

⁸Hojalo biiso bopa, henje giima bopa, miibḛrmiilyi koniibopa, miyu menii atañpa, datuapu punii atañpa, ashumiinii atañpa, puchiniimika heriinii atañpa, ho hikha gollubo atañpa, mohluka dusa kohii siimie hoke nohna lyala donii yamu la sulphur nyi, hiikahii ronye niipaka shiitiniiñ.”

⁹Hiikahiiba ho kone ahhii kanuhe miidopopi hokii huko hona paka kokkanuhe poteje kamija doli kanuhemi biidonii, ho ngiimi lune, lubiidola, “Ahto, Ngo niimi kakiñso Mihie mi, Subuñ ka mihie.”

¹⁰Ho Yajiyallo ho mo ngiimi ingii kaye putoo ohoh ho, ho ngiimi kakiñ darii citi Jerusalem mi Pinii ka dariiganda hokii tola dopa,

¹¹Pinii ka tatukatu mi giitola, mohka hutoh byoliñnii hii kapakaka manii khiniiñyalañ hiilyañ, jasper yalañ chuli, crystal yalañ mitrḛ kadḛr yatola.

¹²Hiika hii kaye, hempḛr ohoh tarsi, hagya gyalyañ lenye giitola, ho hagya atañ ho miidopopi alyañlenye, ho hagya atañ ho alyañlenye halu ka armyañ atañ Isrel ka oho atañ kiimi ketola do;

¹³danyichaggo dalyiho hagya gyahiñhe, assañ dalyiho hagya gyahiñhe, ahadalyi ho hagya gyahiñhe, ho danyiaggo dalyiho hagya gyahiñhe.

¹⁴Ho citi ka tarsi ho alyañlenye liidiraniiñ do, ho hiikaho alyañlenye Subuñ ka kiiniñkonii ka armyañ hii giido.

¹⁵Ho mo huna ngiimi lurii nenii mohka alah ho ayyiñ hokii tuka nanii panyi biido citi mi tuka dupa hiila ho hiika hagya atañla tarsi atañmi.

¹⁶Citi hii khonchañ piilye giitola, aso hii apiika ahiñ japa; ho mo citi mi mohka tuka naniiñlo tuka biine, jarlyañ lenye nyatu dotii[4]; hiika obyo hii ho appiih hii ho ohoh hii ahiñ siida do.

¹⁷Mo hiika tarsi mitrḛ tuka biine, langela alyañ piilye la piilye miyu ka ladu tuka ko do, hiika hii, miidopopi kone kii.

¹⁸Tarsi hii jasper yalañ hokii putii, ho citi hii didḛr ayyiñ hokii, sisa mitrḛ dariiya.

¹⁹Citi ka tarsi mika liidiraniiñmi kapyo loda miijutii kapane khiiniiñ yalañ lo; kapyo jahii jasper yalañlo, anye niihii sapphire yalañlo, hinge niihii agate yalañlo, piilye niihii emerald yalañ lo,

²⁰yangoniihii onyx yalañlo, khiihnii hii carnelian yalañlo, kanunii hii chrysolite yalañlo, pinyenii hii beryl yalañlo, kowanii hii topaz yalañlo, alyañnii hii chrysoprase yalañlo, alyañlenkuñ nii hii jacinth yalañ lo, alyañlenye nii hii amethyst yalañlo.

²¹Ho hagya gyalyañ lenye ho tassañ solyañ lenye giitii, hagya gyahe abi tassañ perelo putii, ho citi daka lembo hii ayyiñ dariiloda lo putii, sisa hiilyañ kapela.

²²Ho ngo hang piniiude kapama citi ho, niimpalukoda hiika piniiude hii Attoh Pinii Tamoja la Subuñ nyikii.

²³Ho citi hii danyi malo piilo mi anna ma hiiko byohu dopa, niimpalukoda Pinii ka hudakhada hii hiika hutoh, ho hiika muru Subuñ ke.

²⁴Hiika hutoh lo ganda atañ inkiñdo; ho kiiddiapiñka radde atañ mohluka tatukatu mi hiiko biilii kendo,

²⁵ho hiika hagya mi pema allo ho miitiñ kema, ho hiikaho hang ayoh nyikiñma;

²⁶mohlu biilii kendo hiika tatukatu mi ho ganda atañ mika kiniiñmi.

²⁷ Hojalo hang kacho hiikaho ahkiñma, malo hu kone jalopa huna miinyo donii kanamaniimi malo amuhmi, hojalo hiika atañsii hukiina ketola donii Subuñ ka sango ka kheta ho.