Read Apatani MIHUKAKIÑNIIÑ 22 Bible Online

MIHUKAKIÑNIIÑ 22 - Apatani bible

MIHUKAKIÑNIIÑ 22

¹Ho mo ngiimi sango ka yasie ka kiiley mi kakiñ, crystal yalañ mitrḛ hudakhada yatola, Pinii ka raddeduko la Subuñ nyiko hokii biliñdo

²citi ka lembo ka liipa jaho hokii biliñdo, akota, kiiley ka pache pache pada, sango ka sannii du hiikaho pulyañlenye ahee ponsa ponsa hido, piilo karmyañmi yohe yohe ya ahee hila; ho sannii ka anniih hii ganda atañmi miipya naniiñpa done.

³Hiikaho hang beniiñ drih nyikiñ kuma, hojalo Pinii ka raddeduko la ho Subuñ hii hiikaho dukiñdo, ho mohka miira atañ mohmi herii kendo;

⁴mohlu mohka nyimo mi kapa kendo, ho mohka armyañ hii mohluka tiirii atañ ho giikiñdo.

⁵Ho ayoh hii nyikiñkuma; mohlu danyi malo muru ka hutoh mi anna keñkuma, niimpalukoda Pinii Attoh mohluka hutoh pa lyikiñdo, ho mohlu ayu dahepa sangii la dukiñdo.

⁶Ho mo ngiimi luhii, “Siika aguñ atañsi henjesaniiñ ke ho jije ke. Ho Attoh, nyibuhenii atañka yajiyallo ka Pinii, kiiniñtii mohka miidopopi mi mohka miira atañmi kakiñ kiine dupa niihna hempḛr nyibya lyikiñ donii.

⁷Ho kato, Ngo hempḛr nyibya ahchi ke.” Lyanko kendo hii huna atii biidonii siika nyibuhenii kheta hoka aguñ atañmi.

⁸Ngo Jon huna tapa tiinii ho kapatiinii siika drih atañmi. Ho ngiika tapa lyiho ho hiika hiimika kapa lyiho, ngo chuki yu mohmi heriidupa miidopopi ka alih ho huna ngiimi siika atañmi kakiñniiñ;

⁹hojalo mo ngiimi luhii, “No hiimi miiyo! ngo niika agiñho miira ahiñ siike ho niika nyibuhenii anubarmii atañka, ho hiika atañ agiñho hutiina siika kheta daka aguñ atañmi atii biidonii. Pinii mi heriito.”

¹⁰Ho mo ngiimi luhii, “Pema jhippo yo nyibuhenii atañka aguñmi siika kheta dakii mi, niimpalukoda myodu tunii dokuke.

¹¹Diimmah miinii atañmi diimmah miikañ kiineto, ho kachotanii miinii mi hiira kacho mi, ho denki atañ denki mi miikiñ doke, ho darii mi darii riikañ kiineto.”

¹²“Kato, ngo nyibya ahchi kuke, ngiika bisa niimi biiliila, kone abimi bili dukupa niihna mo miitiinii.

¹³Ngo Alpha ke ho Omega ke, kapyo ho kami, arañ ho mitu.”

¹⁴Lyanko kendo hiika atañ hutiina mohluka tarii mi ase tiikunii, niimpalukoda mohlumi diila dopa sango ka sannii hokii ho mohlumi hagya hopa citi ho ahla dopa.

¹⁵Ago ho danyada akie atañ ho ashumiinii atañ ho datuapu punii atañ ho miyu menii atañ ho puchiniimi ka heriinii atañ, ho kone abi hutiina hembyo nyadonii ho miinyadonii amuhdrih atañmi.

¹⁶“Ngo Jisu ke kiiniñ biilyinii ngiika miidopopi atañmi siika pyakoniika agiñho gyoliñkonii atañpa. Ngo liima ke ho David kokiika ohoasi ke, hutoh konchi takḛr.”

¹⁷Yajiyallo la Mihie nyi ludo, “Ahto.” Ho hutiina tapa nyadonii luke nento, “Ahto.” Ho hutiina yasie hangḛr donii ahto, huna labii nandonii labii kiineto sango ka yasie mi hang arie bimapa.

¹⁸Ngo kone abimi luluñ biilyi ke huna siika nyibuhenii aguñmi tapa biilyinii siika kheta dakiimi: hu kone jalopa siika so kebyañ liichi, Pinii mohko abyañ liikiñdo doli siika kheta soka keto laka donii hokii,

¹⁹ho hu kone jalopa siika nyibuheniiñ kheta sokii aguñmi lapa talyi, Pinii mohpaniimi lapa kendo sango ka sannii hokii ho darii citi hokii, niihna siika khetaso keto la donii.

²⁰Hii huna pyakodonii siika drih atañmi luto, “Jijeloda ngo hempḛr nyibya ahkur talyi kuke.” Amen. Ahto, Attoh Jisu!

²¹ Attoh Jisu ka aroh-aya hikha piniimiyu atañ ko dokiñcho Amen.