Read Arabela San Mateo 13 Bible Online

San Mateo 13 - Arabela bible

San Mateo 13

¹Cuno juucaja, Jesuuri tohuataquiaari tiajiniji. Caminia casaqueyaji cajishiiri. Canaari nata quiriquiaani.

²Jiyanohua queraatia pueyari nocua rerequeejoquiaari. Puera pueya quiniuucua, Jesuuri botejinia tacaquiaari. Tii cajishiiri. Puetunujuanaa pueyari jaaquiajinia jateequiaari, tiji na tojitianura Jesu canaata.

³Jesuuri queraatia casaa pueya maanu niishitiojoriquiaa miriqui. Naa pohuataquiaari puetunu canaajanaari: —Pueyanoori natoojonura quiaquiaari na cuhuariquiajinia.

⁴Na jacutasacari, secajaari nucuaco totequiaari. Shuhuari nocua rosetaquiaari. Puetunujuanaa nucuacoji na natau miojoquiaariiri.

⁵Tajaacaari totequiaari tamaqui sai tajiniaqueya. Majaari puera jiya quiniu quiquiaari tii. Naaratej, cuno natauri ritia moritiaquiaari.

⁶Pananu jaara tacaquiaari, cuno natauri ritia sorequiaari maja puera nujuacaraca na quishacari.

⁷Tajaacaari totequiaarijiuhua riyocuaca tajinia. Riyocuaca maashishacari, majaari cuno natau maashiniu quiquiaari maninia. Majaari na muetunu quiquiaari.

⁸Maninia jiyajinia totequiaariiri tajaaca saniniuujia. Tii moritiaquiaari maninia cutaraari. Maninia muetuquiaari cutaraari. Puetunu cuno jiyoneejinijijianaani, noojiaqueyari muetuquiaari cien jajau niquiriyatu jiyonaacua. Tamonu jiyoneeri muetuquiaari sesenta jajau niquiriyatu jiyonaacuajuhuaj. Socua tamonu jiyoneeri muetuquiaari treinta jajau.

⁹Niaa jaara numaaraca quiri, nia tojitiare cua pohuatasano. Casaara Jesu niishitiojiya miriquini

¹⁰Jesuuri naa pohuataquiaari miriqui pueya niquiaratej. Na nuhuaji, canaa, Jesu saquiriojosano pueyani, canaari nocua catecanoquiaarini. Canaari na nequesotaquiaarini: —Jiyaniijianaa, ¿casaara pueya quia niishitiojoriquiaa miriquini?

¹¹Jesuuri canaa riucuaree: —Pueyasoori nia saquiriojoquiaari, nia niishishoo casaa Pueyasojiniji nia niishiniuria, taa Pueyaso poonijiya pueya jiuujiajiniani, na muerasura nojori quiniuria shuquiriaatia. Tamasacara saniniuujia, majaari nio jiyasohuaja Pueyasojiniji niishishano nojori niishishocoriquiano.

¹²Cante Pueyaso rupaa tojijia cutarani, nojuajaari socua niishitiojosaanutaniya, Pueyasojiniji jiyanohua na niishiniuria. Cante Pueyaso tojiyashijiani, shiitianiyojua Pueyasojiniji nojori niishishanoori puetunu jaariuutiasaanutaniyajanaa nojorijiniji.

¹³Cunora, janiyari miriqui pohuatariquiaa nojori niquiarani. Naacuajitij, nojoriiri najuhuana niquiquiaa cua miishano na niishiyaquiniutia. Nojori tojishacari cua pohuatasano, na numaa shama tojitiuquiaa saajaari. Majaari quenaaja nojori niishiniu na tojishano.

¹⁴Naa nojori quiniuucuatej, tari tohuateereeri juhuacarijia supuetana Isaías sequesano nojorijiniji. Pueyara Pueyaso sequesano caminiujiunia na quiniuucua, nojuajaari naa sequequiaari pueyatej:“Niaari seetanujuanaa Pueyaso rupaa tojiniutianiya najuhuanaj. Majaari nia niishiniu quiniutianiya. Niaari Pueyaso miishano niquiniutianiya najuhuanaj. Majaari nia niishiniu quiniutianiya nia niquishano.

¹⁵Nojoriiri cumajiuujiaaca quiya. Nojoriiri juhua numueeju, tojiyashijiaca. Nojoriiri juhua nimishitiu quiyajuhuaj. Naa juhua nimishitiu quitiuyari nojori niquiyaquiniuucuaji. Nojoriiri naa juhua numueejunucuajuhuaj, nojori tojitiaaquiniuucuaji noojiata. Naa quitiuyari nojori niishiyaquiniuucuaji noojiata, cucua nojori tacatenuhuara cua jeecanura nojori jiuujia seque”.

¹⁶’Cua pueyanaa, niaari saniniuujia shuquiriaatia quiya maninia nia niishishacari cua miishano, nia tojishacari cua pohuatasanojuhuaj.

¹⁷Seetanujuanaa nia sequeyanijia, queraatia tariucuacaanu pueyari quiarijia nia niquishano niquiniuucua jiaatiaquiaari juucua. Naa nio niquiniuucua jiaatiaquiaariiri tariucuacaanu Pueyaso sequesano caminiujiuniaa, queraatia maninia pueyanio. Majaari nojori niquiniu quiquiaari saaja. Nojoriiri nia tojishano tojiniuucua jiaatiaquiaari juucuajuhuaj. Majaari nojori tojiniu quiquiaari saaja. Jesu niishitiojosacari miriqui na pohuatasano natoojojuajiniji

¹⁸’Nia pohuatareera nia niishiniuria cua pohuatasano natoojojuajiniji.

¹⁹Canapuete Pueyasojiniji cua pohuatasano niishiyaquiyani, nojoriiri juhua nucuaco toteno jajau. Sesaacaari niquiaa. Pueyaso Rupaa jaariutiaa noojiajinijiiri.

²⁰Noojiaqueya pueyari juhua sai tajiniaqueya jacutasano jajau quiquiaa. Naaratej, nojori jaara shuquiriaatia tojiri Pueyaso Rupaa, nojoriiri ritia shitimia nocua tiuuquiaa.

²¹Nojoriiri juhua nujuacaaju. Majaari cumaatia na nujuatunu. Naaratej, nojori jaara naquiya miishaare Pueyaso Rupaa tojijiaca nojori quiniuucua, nojoriiri ritia Pueyaso tojiniu tarinitiaquiaa.

²²Noojiaqueya pueyari juhua riyocuaca tajinia toteno jajau quiquiaa. Nojoriiri Pueyaso Rupaa tojirii. Na nuhuaji, nojoriiri saaja puera tacaaquiaa nio jiya casamiicua. Naajuhuaj, nojoriiri sapojosaaquiaa nojori jiyanishacari nojori jaara queraatia casamiriaca quiriquia, nojori maara shuquiriaatia quiriquiaj. Cunora, Pueyaso Rupaari maja na naata poonijionu nojori jiuujiajinia. Naacuajitij, cuno pueyari juhua natau muetuhuo quiquiaa.

²³Saniniuujia, cante maninia tojijia Pueyaso Rupaani, maninia na niishiyari. Cunoori juhua jiya maniniujinia jacutasano jajau. Naacuajitij, cuno pueyari juhua maninia natau, maninia muetuna cutara. Jiyanohua maninia pueyari quiquiaa na tojishacari Pueyaso Rupaa. Naaratej, tamonuuri juhua cien jajau muetujua. Tamonuuri juhua sesenta jajau muetujua. Tamonuuri juhua treinta jajau muetujuajuhuaj. Jesu pohuatasano miriqui trigo tajinia moritiaja sesa jiyasocuajiniji

²⁴Jesuuri tamonu miriqui pohuatasano pohuataquiaari pueya niquiara, nojori na niishitiojonura taa Pueyaso tojitiaashijiaca pueya quiniutianiya Pueyaso muerasu tajiniani. Jesuuri naa pueya pohuataquiaari: —Tamonu pueyanoori maninia jajau nataquiaari na cuhuariquiajinia.

²⁵Puetunu pueyajanaa jaara niucua maqueturiquiaa, na paracaari jiyacari niquiaari. Sesa jiyasocua jajau jaquerooquiaari trigo natasano cuhuariquiajiniaari. Na natanu nuhuaji, tacateyarohuari.

²⁶Trigo jajauri maashiquiaari. Na nuhuaji, na jajau mueratuusacari shusha, sesa jiyasocuaari mariyata niquishaaquiaari maashiyano.

²⁷Cuhuariquia camaru seyari quiaquiaari na camarujuanaa nojori sequenura: “Jiyaniijianaa, ¿majateeri maninia saquiriojosano jajau quiquianucuaja quia natasano cuhuariquiajiniani? ¿Teje cuno sesa jiyasocua moritiarucuaa quia natau tajiniacuaraarini?”

²⁸Cuhuariquia camaruuri nojori riucuaree: “Pa paracaari cunohuaj, naa pa miiriucuaani”. Na seyari na nequesotaree: “¿Quiaate paniya canaa quianura cuno jiyasocua jayotanura trigo tajiniaqueyajiniji?”

²⁹Na seya sequeree saajaari: “Maja. Maja nia jayotanu jiyasocua, niaa mariqui trigo na cojiritiareeri.

³⁰Naajaa, nia tarinitiare cuaara maashiiria, mariyata cuaara noshiiriajaara trigo jajau. Na nuhuaji cutara janiyari senoonaa jiyaronutaniyani, cuaara coteenu jiyasocua namirioora, nojori jiuniocojonura jiyasocua catijiasocoriquiano. Na nuhuaji cutara, cuaara trigo jajau racatatuura nataco”. Jesu pohuatasano miriqui mostaza jajaujiniji

³¹Jesuuri socua miriqui pohuataquiaari pueya niquiara, na niishitiojonura taa Pueyaso poonijiya pueya jiuujiajiniani, nocua nojori tiuushacari. Naa sequereeri: —Tamonu pueyanoori mostaza jajau nataquiaari na cuhuariquiajinia.

³²Seetanujuanaa mostaza jajauri socua jiyanohua shiitianiyojua puetunu tamonu jajaujinijijianaa. Naajaa, cuno mostaza jaara maashiri, socua puereetuucara maashijiaari narta nataacuacajiniji. Naacuajitij, shuhuari na cashacucuaacua jesuya. Naajuhuaj, pueyano tojishacari Pueyaso rupaa, seetanujuanaa maninia Pueyaso muerasura jatanishiyari. Jesu pohuatasano miriqui pan poreetajajiniji

³³Jesuuri nio miriqui pohuatasano pohuatarohuacuhua pueya niquiara, taa Pueyaso Rupaa poonijiya mijiriani. Nojori sequereeri: —Pueyaso rupaari jiyanohua cumaacaraca na poonijionura juhua pan poreetaja. Maaji jaara pan poreetaja cojitiri jiuujianaraca shiitianiyojua tohuatashi mishaja trigo cashojuata, puetunujuanaa na poreeteyari. Pueyaso rupaari naa cumaacaracajuhuaj, pueya na jataniniuria quiariniora. Casaara saaja miriqui sequesanota pohuatasaaquiaa pueya niquiarani

³⁴Puetunu Jesu pohuatasanojuanaa pueya niquiarani, miriqui sequesanoori quiquiaari. Puetunu na pohuatasanojuanaari naa quiquiaaritij.

³⁵Naacuajitij, maninia tohuateequiaariiri tariucuacaanu pueyara Pueyaso sequesano caminiujiunia sequesano, jaara nio naajiotaquiaari:“Pueyasoori naa sequeyaquij: ‘Janiyari pueya niishitiojonutaniyani saaja miriqui cua pohuatasanota. Naacuajitij, janiyari pueya pohuatanutaniya pueyaracaanu nojori niishishoo casaani, shusha jiya shipinishaanujiniji’ ”. Jesu niishitiojosacariuhua miriqui na pohuatasano sesa jiyasocuajiniji

³⁶Na nuhuaji, Jesuuri pueya maanu sequeree: —Tariucuaja pueyanaa. Nia quiojorohua. Na nuhuaji, nojuajaari na quijia tiajinia tacaarohua. Jiyacaritij, canaa, na saquiriojosano pueyani, canaari nocua catecanoquiaarini. Canaari Jesu sequereeni: —Canaa quia niishitirijia miriqui quia pohuatasano cuno sesa jiyasocuajiniji.

³⁷Jesuuri canaa sequeree: —Janiyacuajaari cunoni, maninia jajau natoojojuani.

³⁸Nio jiyari juhua cuno cuhuariquia. Pueyaso muerasuuri juhua cuno maninia jajau, cuhuariquiajinia natasanoni. Tamasacaari saniniuujia Sesaaca muerasu quiya. Nojoriiri juhua cuno sesa jiyasocua, cuhuariquiajinia natau tajinia maashinioni.

³⁹Sesaacaari juhua cuno cuhuariquia camaru paraca. Nojuajaari cuno sesa jiyasocua nataquiaari. Nio jiya puequesacariiri juhua cuhuariquia senoosacari quiniutianiya. Jiyocuacaanuji Pueyaso seyari juhua cuhuariquia senoonaa quiniutianiya.

⁴⁰Naatej, taa sesa jiyasocua namitiashiya catijiasocoriquianocuaani, naa quiniutianiyajaariuhua nio jiya puequesacari.

⁴¹Janiyari cua seya jiyaronutaniya jiyocuacaanujini. Nojoriiri sesa miijiaca quioonutaniya, mariyata canapuete tamasaca miitiquiaa sesani.

⁴²Nojoriiri quejoosaanutaniya mani quiquiojinia. Nojoriiri tii sapuenutaniya pueyaracaanu. Naquiya na miishacari, na quiaca miaquenutaniyari.

⁴³Na nuhuaji, Pueyaso tojitiajacaari jiyanohua shacantuucara quiniutianiya juhua pananu, na Que Pueyaso jiitiasacari nojori pueyaracaanu. Cante numaaracani, cuaara tojitiaara cua sequesano. Jesu pohuatasano miriqui jiyanohua panishano casaajiniji

⁴⁴Jesuuri canaa na pueya pohuataquiaari miriqui, Pueyaso muerasu pa quiniuni, cunoori jiyanohua panishano. Nojuajaari naa sequequiaaritij: —Tamonu pueyanoori tamasaca cuhuariquia tajiriquiaa juucua. Casaa riuriatamaari, jiyanohua panishano casaa. Tiijia na jamorohuari tee na quiriquiaacuajani. Jiyanohua na shuquiritiasacari na riuriatasano casaa, puetunujuanaa tama na casamijiaaja niquitiojoreeri queraatia cumaneeca na jiitianura. Na nuhuaji, puetunu na cumaneecajanaa pataareeri cuno cuhuariquia camaruucua, cuno cuhuariquia na masenura. Naacuajitij, cuno jiyanohua na panishano casaari tama na casaara quiquiaarijiaaja. Naajuhuaj, socua jiyanohua panishano cutaraari, Pueyaso pueyanora nia quiniuria. Cunoori jiyanohua socua panishano puetunu pa panishano casaajinijijianaa.

⁴⁵’Socua nia tojiri nio pohuatasano. Casami niquitiojonaari pueyaracaanu rucuanejoriquiaa shanohua cohuajaaca tiujiau na pajenura. Cunoori noturu shipinijiosano sai quiquiaari.

⁴⁶Tamonu juuca, jiyanohua shanohua noturu saajia niquitishaaquiaariiri. Jiyanohua na panishano. Naaratej, puetunu na jiitiasanojuanaa niquitiojoquiaariiri, cumaneeca na jiitianura, cuno na panishano casaa na masetajara. Na nuhuaji, puetunujuanaa na casami samitia masequiaari cuno noturu saajiaari, jiyanohua na panishanoni. Naajuhuaj, nia tarinitiare puetunu nia panishano casaajanaa, Pueyaso pueyara nia quiniuria seetanujuanaa. Jesu pohuatasano miriqui shiyarujiniji

⁴⁷’Pueyaso Rupaari juhua puereetuuca shiyaru na camaru jartasano caminiajinia.

⁴⁸Jaara mishaja quiquiaari sapitiaajata, pueyari na jayotaquiaari jaaquiajiniara. Queraatia tamaatiuniucua sapitiaajaari tii quiriquiaa. Pueyari jaaquiajinia cajitiuquiaari saaja maninia sapitiaaja nojori saquiriojonura. Canaasatujinia na niojotureeri racatasocoriquiano. Sesa sapitiaajaari saniniuujia jacutasaaquiaari.

⁴⁹Naa quiniutianiyajaariuhuaj jiya puequesacari. Naacuajitij, Pueyaso seyari rosetanutaniya, sesa miijiaca na saquiriojonura maninia pueya tajiniji.

⁵⁰Na nuhuaji, sesa pueyari quejoosaanutaniya mani quiquiojinia, taa sesa sapitiaaja jacutasaaquiaaricuaani. Nojoriiri tii sapuenutaniya. Na quiaca miaquenutaniyajaariuhua naquiya na miiniutia. Pueyaso Rupaari jiyanohua panishano: tariucuacaanu naajiotasano, quiari naataja naajiotasanonio

⁵¹Jesu pohuatanu puecasacari, canaa na pueya nequesotaquiaariiri: —¿Niaate maninia niishirii puetunu cua pohuatasanojuanaacuaja? Canaari Jesu riucuareeni: —Taaquiriirinij Jiyaniijianaa.

⁵²Jesuuri canaa sequeree: —Maniniacuajaqui. Tariucuacaanu Pueyaso Rupaajiniji niishitiojona jaara quiarinio cua niishitiojosano Pueyasojiniji niishirijiuhuaj, nojuaja cutaraari Pueyaso Rupaa niishijia seetanujuanaa. Nojuajaari juhua tia camaru, cante tariucuacaanu shanohua casamiriacacuajani, quiarinio casamiriacajuhuaj, na tiajiniaaco racatasano. Na panishacari, na camaruuri na racatasanojiniji na panishano rijia. Jesu quishacari Nazaret tiacajinia

⁵³Jesu jaara puecaquiaari miriqui pohuatanu, tiji quiaquiaariuhuari. Canaari na nuhuajiriquiaani.

⁵⁴Canaari na maashijia tiacajinia tiuquiquiaariuhuani. Canaa tiuquiijiosacari, canaari Pueyaso secojojua tiajinia tiuquiquiaarini. Jesuuri tii pueya niishitiojonu coteequiaari. Pueyari jiuujiatequiaari na niishitiojosano nojori tojishacari. Nojoriiri tama sequequiaarijiaaja: —¿Taa nio pueyano niishiya puerajaarani? ¿Tejenotejaara na cumaacani, cusosuhua na naatanijionurani?

⁵⁵Na shipininiocuajaari suruhuatujiniji casaa shipinijiona quijia. Na nucuacuajaari María. Na tapueyocuacaari Santiago, José, Simón, Judasnio.

⁵⁶Na rimiatuhuari mariyata niya pa tajinia quiya. ¿Taa na niishiya pueraarini?

⁵⁷Naaratej, pueyari na ruuretaquiaari saaja. Naa na tiacajinijinio pueya tojitiaaquishacari nojuajatej, Jesuuri nojori sequequiaari: —Puetunu tiquiyocua pueyajanaari maninia tojitiaquiaa cutara Pueyaso sequenu panishano caminiujiunia. Saaja narta pueya tama na jiyajinijiniojuaarijia na tojitianu paniyaquiya, tama na tiajinijiniojuaaja pueyanio.

⁵⁸Naa nojori ruuretanuucua Jesutej, majaari puera na cumaacata na miiniu quiquiaari tii, nojori tiuyaquiniuucua nocua.