Read Arabela San Mateo 14 Bible Online

San Mateo 14 - Arabela bible

San Mateo 14

¹Cuno quishacari, Galilea jiya jiyaniijia Herodesri pohuatasaaquiaari Jesu miishanojiniji na cumaacata.

²Herodesri na seya sequequiaari Jesujiniji: —¡Nojuacuajaari cua mosano Tiuquinijiona Juan! ¡Samiitiarohuacuaaqui! Naacuajitij, jiyanohua cumaaca jiitiaari, jiyajeneta casaa na miiniuria Pueyaso cumaacata.

³Herodesri naa sequequiaariti na monuucua Tiuquinijiona Juan. Nojuajaari naa miiquiaari Juantej: coteenu na quiatequiaariiri. Na morojoquiaariiri cumayocua shipinishano jiyocuata. Na nuhuaji, na nujuatequiaari nujuatejojuajiniaari. Herodesri naa miiquiaari na juaaniutia Juantej, Juan nacasunuucua nojuaja, Herodes quiniuucua tarajanu Felipe niquiocuata.

⁴Tiuquinijiona Juanri naa Herodes sequequiaari quiasano na quiyaquishacarijia: —¡Quiaari Pueyaso tojiyashijia! ¡Majaari maninia quia quiniuria Herodíasta! ¡Nojuacuajaari quia tarajanu Felipe niquiocua!

⁵Herodesri cunora Juan monu paniriquiaa juucua. Judiocuaca puereriquiaa saajaari. Judiocuacaari niishiquiaari cutara, Juanri seetanujuanaa Pueyaso sequenu panishano caminiujiunia quiquiaari.

⁶Tiuquinijiona Juan nujuasacarijia nujuatejojuajinia, Herodesri na rasaanu juucajinia queranacuquiaari na masuusano pueyata. Jiyacaritij, cuno maaji Herodías niyatuuri nianujuquiaari Herodes masuusano pueya niquiara. Jiyaniijia Herodesri jiyanohua na shuquiritiaquiaari.

⁷Naaratej, Herodesri necanuru sequequiaari puetunu pueya niquiarajanaa: —Sanaunaa, cua sequere casaa quia paniyani. Janiyacua quia niquitiore quia panishanoni. ¡Seetanujuanaa quia sequeyanijia! Majaari cua rupaa cua jatanu quiniutianiya. ¿Casaa quia paniniutianiyani?

⁸Jiyacaritij, niyacoo nucua Herodíasri neyatu rootaquiaari jiyasohuaja, casaa na masenutaniyani. Naaratej, niyacoori jiyaniijia Herodes sequesee: —Cua quenunaa, cua niquitiore Tiuquinijiona Juan naca miacojuajinia.

⁹Jiyaniijia Herodesri taraajequee niyacoo sequesano na tojishacari. Naajaa, majaari na naata na rupaa jatanu quiquiaari, seetanujuanaa na sequenuucua na masuusano pueya niquiara. Naacuajitij, Herodesri na seya sequequiaari cuaara niquitiosaarianoj.

¹⁰Naaratej, na pueyano jiyaroquiaari nujuatejojuajiniaari, Tiuquinijiona Juan na nacatanura.

¹¹Na nuhuaji, Juan nacaari patasaaquiaariuhua miacojuajinia. Niyacoo niquitiosaasuhuari. Niyacoori saniniuujia na nucuaacua na pataquiaari.

¹²Na nuhuaji, Tiuquinijiona Juan pueyari quiojoquiaari na quete na panura. Na jamotuquiaariiri. Na nuhuaji, nojoriiri nijioquiaari Jesu pohuatanuucua Tiuquinijiona Juanjiniji. Jesu mianuutesacari cinco mil pueya

¹³Jesu tojishacari Tiuquinijiona Juan tari mosaarucuaa, nojuajaari canaa jiyataquiaari botejinia tamaquiria, pueya quiyaquishaquiria. Pueya jaara niishiquiaari tee Jesu quiaareeni, queraatia pueyari cuno jiya tiacajiniji quiojoquiaari tiriarajuhuaj. Nojoriiri na neteyotaquiaari nucuaco caminia shuriuquioco. Cuno pueyari canaacuaji cutesee.

¹⁴Naacuajitij, Jesu rosesacari botejiniji, jiyanohua queraatia pueya niquishii saajaari. Nojoriicua taraajereeri. Cuno pueya patootasano cusosuhua naatanijioreeri.

¹⁵Tariucua tenacari, canaa, Jesu saquiriojosano pueyani, canaari nocua niquiaarini. Canaari na sequereeni: —Canaa Jiyaniijianaa, paa niya quiya pueya quiyaquishaquini. Paari nininiutianiyani. Juhuacarijia pueya quia sequere nojori cuaara quiojohuara tiacajinia, na miaquesocoriquiano nojori masenura.

¹⁶Jesuuri canaa sequeree saaja: —¿Maatucua casaara quiojiyarohuani? Niaa mariqui nojori mianuutere saniya.

¹⁷Canaari Jesu sequereeni: —Maja canaa jiitianu miaquesano. Niya quiya saajaari cinco pan, caapiqui sapitiaajanio.

¹⁸Jesuuri canaa sequeree: —Miji nia patare.

¹⁹Jesuuri sequeree pueya cuaara cajitiuuria jiyasocuajinia. Na nuhuaji, Jesuuri cuno pan pataree, sapitiaajanio. Jiyocuacaanu maureeri na Queecuara, miaquesanoocuara na secojonura. Na nuhuaji, Jesuuri pan neecasequiaari queraatiara. Canaa na niquitiojoreeri puetunu pueyajanaa canaa niquitiojosocoriquiano.

²⁰Puetunu pueyajanaari miaquenuuquiaari. Maninia tooquioreeri. Nojori puecasacari miaquenu, canaari pan neeca reratequiaariuhuani, sapitiaaja raquiquianio. Doce canaasatuuri mishinijiosaaquiaari na raacuata.

²¹Jiyanohua queraatia pueyari miaquenuuquiaari; cinco mil quiquiaari saa canuujua. Majaari maajipohua serojosaanu quiquiaari, naatujoorinio. Jesu rucuanesacari mohuaca caco

²²Na nuhuaji, Jesuuri canaa na saquiriojosano pueya secootequiaari botejinia canaa tacatanura, canaa puetanuracuaa nojuaja caminia taquijiria. Jesuuri jiyacari pueya maanu sequeriquiaa nojori quiojonuhuara.

²³Pueya jaara tari quiojoquiaariuhua, Jesuuri tuhuananuucua tacaquiaari tamajaaja, na Que Pueyaso na secojonura. Jaara niniquiaari, Jesuuri tii quiriquiaa tamajaaja.

²⁴Canaari saniniuujia caminia jiuujiajinia tari jaaretariquiaacuaani. Mohuacaari saaja canaacuara cajiniuucuariquiaa, paratu piyarojosacari canaacuara.

²⁵Juhuaquenu panishacari, Jesuuri canaa rupuesee mohuaca caco na rucuanenuta.

²⁶¡Canaa niquishacari casaa mohuaca caco rucuaneyano, canaari jiyanohua shiriiquitiuriini! Canaari sariyocuatureeni. —¡Yae! ¡Samaruruhua!

²⁷Jesuuri ritia pocuaree. Canaa sequereeri: —¡Nioojia nia cumaquiri! Janiyacuajanijia. Maja nia puerenu.

²⁸Canaa tojishacari Jesu, Pedroori Jesu sequeree: —¡Jaara seetanujuanaa quiajaniya quiri Jiyaniijianaa, cua sequere quiocua cua quianura mohuaca caco!

²⁹Pedro sequereeri: —Mijicuarajaj. Pedroori ritia rosequiaari botejiniji. Mohuaca caco rucuanenu coteequiaariiri Jesuucua na quianura.

³⁰Na niquishacari paratu jiyanohua piyarojiyano, Pedroori puerequiaari. Na pueresacari, moo cariquimia tiuquiniu coteequiaariiri. Nacareeri: —¡Jiyaniijianaa cua quiare!

³¹Jesuuri ritia Pedro juaashiquiajiniji quiaree. Na sequereeri: —Pedronaa, majaqui puera quia tiuuniu cucua. ¿Casaara cua sequesanoocuaji quia taacanuureeni?

³²¡Nojori jaara botejinia tacataquiaariuhua, paratuuri jiyacari pueyajequee!

³³Canaa niquishacari naa Jesu miishano na cumaacatatej, canaari Jesuucuara mojoquetacoquiaarini. Canaari na sequereeni: —¡Quiaaqui seetanujuanaa Pueyaso Niyanu! Jesu naatanijiosacari cusosuhua Genesaret jiyajinia

³⁴Canaa jaara caminia taquijiria niuutiaquiaarini, canaari Genesaret jiyajinia shiitiaseeni.

³⁵Genesaret pueya jaara niishiquiaari Jesu tiuquirii, nojoriiri puetunu na jiyajiniajanaa pueya numootequiaari, cuaara patootasaaria cusosuhua Jesuucua. Naacuajitij, Jesuucua patootasaaquiaariiri puetunu cusosuhuajanaa.

³⁶Pueyari Jesu sequetuquiaari: —Nareja quia shanacure cusosuhua quiocua, nojori cuaara quia tucuaque toque quiaara quenaaja, nojori naataconuhuara. Jesuuri naa miirii. Puetunu na toque quianaajanaari naatacoquiaariuhua na cusonujiniji.