Read Arabela San Mateo 22 Bible Online

San Mateo 22 - Arabela bible

San Mateo 22

¹Na nuhuaji, Jesuuri socua niishitiojoquiaari miriqui pohuatasanota. Naa pohuataquiaaritij:

²—Pueyasoori pueya masuya nojoritia na quiniuria shuquiriaatia, taa tamonu cutara jiyaniijia miiquiaari mijiriacuaani. Cuno jiyaniijiaari shuquiriaatia quiniu paniriquiaa queraatia pueyata, neyanu camishacari. Naaratej, jiyaniijiaari queraatia sumatutequiaari, queraatia pueya miaquesocoriquiano.

³Na nuhuaji, na seya jiyaramiquiriiri na masuusano pueya numootenura nojori niniuria queranacunura. Masuusano pueyari maja na niniu paniniu quiquiaari saaja.

⁴Jiyaniijiaari socua tamasaca na seya sequeree: “Cua masuusano pueya nia numootejocoo. Nia sequesee: ‘Jiyaniijia nia sashiya. Puetunujuanaari tari jeenucuasano nia queranacunura. Tari puecoosaaree na juyaca, na shiyoshitishano seyanio. Tariucua rariyosanoori quiya. Ritia nia nimia. Nia miaquenuusee’ ”. Naa na seya na rootanu nuhuajitij, jiyaniijiaari nojori jiyaramiquirii.

⁵Masuusano pueyari saaja tojitiaaquirii. Puetunujuanaari tama na panishanojuaaja miiriquiaa saaja. Tamonuuri na cuhuariquiajinia quiaaree. Tamonuuri na casami niquitiojosaqui quiaareecujua.

⁶Tamasacaari saniniuujia jiyaniijia seya quiooree. Jiyanohua naquiya nojori miiriiri. Na nuhuaji, nojori puecootureeri.

⁷Jiyaniijia niishishacari, jiyanohua juaariiri. Nocuaji na soldadohua jiyaramiquiriiri cuno monaa nojori naminiuria saniniuujia, nojori tiaca na catijiatanurajuhuaj.

⁸Na nuhuaji, jiyaniijiaari na seya sequeree: “Puetunujuanaari tari jeenucuasano pa queranacunura cua niyanu camishacari. Cua masuusano pueyacuajaari saaja cua ruuretareeni. Namitia majaari nojori nijionu quimiaa, saaja cua rerequetejaca nojori quiniuucua.

⁹Quiarijia cutara, nia quiaare nuu tuneequetajajinia, tee queraatia pueya tajiniuucuataquiaacuajani. Nia masuure puetunu nia niquishano pueyajanaa”.

¹⁰’Na seyari quiojoquiaari tiaca nucuaco. Nojoriiri puetunu na riuriatasano pueyajanaa rerejoteree, maninia pueya, sesa pueyanio. Queranacunuusaquiiri mishiquiaari masuusano pueyata. Camarnu seyari puetunu pueyajanaa cushiyotequiaari camishacari cushiyosano toqueya, nojori tiuquitiasacari tiaco queranacunura.

¹¹’Na nuhuaji, jiyaniijiajanaari tiuquiquiaari masuusano pueya na niquiniuria. Tamonu pueyano niquishiiri camishacari cushiyosano toqueeju.

¹²Jiyaniijiaari na sequeree: “Pueyanonaa, ¿taa quia tiuquimiaa camishacari cushishano toqueejuni?” Pueyanoori sanaa na tojiriquiaa. Majaari na riucuanu quirii.

¹³Cunora, jiyaniijiaari na seya sequeree: “¡Nia morojore na cashacucua, na numatucuanio! ¡Niocua na jartarohua carijiniacuma ninishiqui! Tii sapuenutaniyari. Na quiaca miaquenutaniyajaariuhua na noonuta, naquiya na miishacari”.

¹⁴’Naajuhuaj pueyanaa, Pueyasoori queraatia pueya masuya quiarijia na muerasu nojori quiniuria. Saniniuujia, secajaari saquiriojosaanutaniya nojorijinijinio seetanujuanaa na muerasura nojori quiniuria. Jiya jiyaniijia cuaara niquitiojosaaria na sequesano cumaneeca

¹⁵Na nuhuaji, Fariseocuacaari quiojoquiaari Jesu shuriucuaji tama nojori niishitiojotoonurajaaja. Nojoriiri Jesu pocuatenu paniquiaari sesa juucua, nocuara nojori saquiriojotanura.

¹⁶Na nuhuaji, Fariseocuacaari na niishitiojosano pueya jiyaramiquirii Jesuucua, jiyaniijia Herodes panijiaca pueyata. Herodesri jiyaniijia César jiyatesano quiquiaari Judea jiyajinia jiyaniijia na quiniuria. Fariseocuaca jiyaramiquishano pueyari Jesu sequesee: —Niishitiojonanaa, canaari niishiyani quiaari maninia pueyano. Majaari quia cuaracashijionu. Quiaari seetanujuanaa casaa niishitiojoquiaa cutara taate canaa naata maninia quiniu Pueyaso niquiarani. Majaari quia puerenu quiquiaa, pueya niquiara quia pohuatanura quia niishishano. Majaari rimiajata quia niquiniu pueya.

¹⁷Naaratej, canaa quia sequere taa canaa miiniutianiyani. Paari sequesaaquiaarini pa cumaneeca pa niquitiojonura jiyaniijiajanaa Césarra, taa cuno tahue César sequequiaaricuajani. Quiajaniyariuhuaj, ¿taa quia sequeya saniniunijia?

¹⁸Jesuuri ritia niishiquii, nojoriiri naa na nequesotariquiaa na sapojonuta. Nocuaji nojori sequereeri: —Sapuenu maninia quijiacanaa, ¿casaara nia saniniujiya naa janiyani?

¹⁹Cua niquitiri nia cumaneetoj, cuno, jiyaniijia César sequesano pa niquitiojonura nojuajani. Nojoriiri Jesu niquitirii cumanee.

²⁰Jesu niquishacari cuno cumanee, nojori nequesotareeri: —¿Cana naaquiti nio nocuani? ¿Cana sesate nocua naajiotasanojaniuhuaj?

²¹Nojoriiri na riucuaree: —Jiyaniijia César naaquicuaja, na sesajuhuaj. Jesuuri nojori sequeree: —Jaara naa quiritij, César nia niquitiojore tama na casaajaaja. Nojuacuajaari na camaru. Saniniuujia, Pueyaso nia niquitiojore nerano tama na casaajaaja. Nojuaja cutaraari pa camarnu.

²²Nojori tojishacari naa Jesu sequesanotej, jiuujiatecoreeri. Na tarinitiatureeri. Quiojiyarohuari. ¿Macunucuate samiitiaconutaniuhua?

²³Cuno juucaja, Saduceocuacaari Jesuucua nijioquiaari. Nojoriiri jiyaniquiaari macunucua maja na samiitiaconu quiniutianiuhua. Naaratej, nojoriiri Jesu sequesee:

²⁴—Niishitiojonanaa, supuetana Moisésri pa sequequiaari na naajiotasanojinia, pueyano jaara cusoyare mueyaju, na tarajanu cuaara camiiria mashiquio, mueya na mueratenura tarajanu niti.

²⁵Tarijia, tamonu pueyanoori niya quiquiaari. Siete niquiohuaraca quiquiaariiri, saa canuujua. Jiyapueranuuri camiquiaari. Na nuhuaji, shaajequiaariiri muetuhuojua. Naaratej, na mashiquioori camitishaaquiaari neyaca tarajanuta.

²⁶Nojuajaari muetuhuojua shaajequiaarijiuhuaj. Naaratej, neyaca tarajanuuri mashiquio camiquiaarijiuhuaj. Nojuajaari mueyaju cusoquiaarijiuhuaj. Naa cusonuuquiaariiri puetunu cuno siete canuujuanaa.

²⁷Na nuhuaji, mashiquioori cusoquiaarijiuhuaj.

²⁸Saniniuujia, macunucua jaara samiitiacorohua, ¿teyano cuno siete neyacaajinijiniote seetanu neyacajanaa quiniutianiyani, puetunu cuno pojorijianaa jaara neyacaa quiquiaari?

²⁹Jesuuri nojori riucuaree: —¡Niaari jiyanohua jiyajeneya nia niishiyaquishacari Pueyaso Rupaajinia naajiotasano, Pueyaso cumaacanio!

³⁰Macunucua samiitiacosacariuhua, majaari canuu camiyonu quiniutianiya maaji. Naajuhuaj, maajipohuari maja na camiyonu quiniutianiya neyacaara. Caya, maajinio, nojoriiri juhuajaniya quijiaca quiniutianiya juhua jiyocuacaanu quijiaca Pueyaso seya, maja camiyosano.

³¹Socua cua tojitiare. Macunucuaari seetanujuanaa samiitiacoriquianohua. ¿Majateeri nia serojonu quiquiaacuaja taa Pueyaso sequequiaari niajaniyacuajani? Naa sequequiaariiri:

³²“Janiyari nia supuetana Abraham Jiyaniijiani, nia supuetana Isaac Jiyaniijiajuhuaj, nia supuetana Jacobo Jiyaniijianio”. Naaratej, nia sequeyanijia, Pueyaso muerasu shaajecononi, nojoriiri maja macunucua na quiniu. Canapuete seetanujuanaa Pueyaso muerasuni, nojori cutaraari pueyaracaanu quijiaca.

³³Pueya tojishacari naa Jesu niishitiojosanotej, nojoriiri jiyanohua jiuujiateree. Puetunu Pueyaso rootasanojinijijianaani, teyanote socua na pueya tojishocoriquianoni

³⁴Fariseocuaca jaara niishiquiaari Jesu Saduceocuaca sanaajaree, nojoriiri Jesuucua nijioquiaari nojori saniniujiuniuria nojuaja, nojori nequesoreenuta.

³⁵Nojoriiri jaarajaaja Jesu pocuatenu paniriquiaa sesa juucua. Tamonu nojorijinijinioori Moisés Rootasanojiniji niishitiojona quiquiaari. Na saniniujiuniuria, nojuajaari Jesu nequesotaree:

³⁶—Niishitiojonanaa, ¿Pueyaso rootasanojinijini, teyanote socua pa tojishocoriquianoni?

³⁷Jesuuri na riucuaree: —Naa naajiosano quiyacuajaari:“Quia Jiyaniijia Pueyaso quia paniri puetunu quioojiatajanaa, puetunu quia sohuanutajanaa, puetunu quia niishitiajatajanaanio”.

³⁸Niocuajaari socua na pueya tojishocoriquiano Pueyaso rootasano.

³⁹Tamonu na sequesanoori quera juhua niojuhuaj. Naa sequeyari:“Quiarta pueyano quia paniri taa quia paniyacuaa tama quia cuaqueyajaajani”.

⁴⁰Puetunu Moisés rootasanojuanaa, mariyata puetunu tariucuacaanu Pueyaso sequesano caminiujiuniaa rootasanojuanaari nio caapiqui rootasanojinijicuaja. ¿Cante Cristo supuetanani?

⁴¹Fariseocuaca quishacarijia cuniqui, Jesuuri nojori nequesotaree:

⁴²—¿Taa nia niishiriojiya Cristojinijini? ¿Cante na supuetanani? Nojoriiri Jesu riucuaree: —Pa jiyaniijiarano Cristoni, nojuajaari pa supuetana David niquiohuacuajinio supuenutaniya.

⁴³Jesuuri nojori sequerohuacuhuaj: —Taaquiriirinij. Jaara naa quiritij, ¿niaateeri niishiyacuaja casaara David sequequiaari “cua Jiyaniijiata” Cristocuaraarini, Pueyaso Sohuanu jaara na pocuatequiaari? Naa sequequiaariiri:

⁴⁴“Jiyaniijia Pueyasoori cua Jiyaniijia Cristo sequequiaari: ‘Cua miaquetajara quia cajirijiaara, janiya cuaara quia paraa shocojotare quiocuajijiaatijia’ ”.

⁴⁵¿Cristotucua taa David niquiohuacuaji supuereni, David jaara Cristo jiyaniquiya na jiyaniijiata?

⁴⁶Nojoriiri Jesu niquitiaree sanaa. Nojoriiri maja na naata na riucuanu quiquiaari. Cuno nuhuaji, pueyari maja socua na nequesoreenu paniniu quiquiaari Jesu.