Read Arabela San Marcos 11 Bible Online

San Marcos 11 - Arabela bible

San Marcos 11

¹Nojoriiri tari catecanoriquiaa Jerusalén tiacaacua. Jiyacaritij, nojoriiri tiuquiijiosee Olivo cuhuariquia tuhuananuucua. Cunoori Betfagé tiaca shuriucua, Betania tiaca shuriucuanio. Jesuuri caapiqui na saquiriojosano pueya jiyaroree tiji.

²Nojori sequereeri: —Cuno tiacajinia nia quiaare, pa tacoji niquishiyani. Niaa jaara tiuquishii tii, niaari burro riuriatanutaniya morotasano, pueyano cajishoojua na nijinia. Niaa jaara niquishiinioj, niocua na samaacartasee. Niocua na jaatucumohua miji.

³Pueya jaara naa nequesotare niajaniya: “¿Casaara nia samaacartaanoj?”, niocua na sequere: “Jiyaniijia na paniya rupaquijia. Ritia na niquitionutaniuhuacuaja”.

⁴Nojoriiri quiojoquiaari. Burro riuriatatuseeri morotasano nuujinia, tamonu tia tohuateya shuriucua. Nojoriiri na samaacartasee.

⁵Tamasaca tii quiniaari nojori sequeree: —¿Casaa nia miyani? ¿Casaara nia samaacartaa cuno burroni?

⁶Nojoriiri na riucuaquiaari taa Jesu rootaquiaari nojoricuajani. Naaratej, cuno pueyari nojoriria na tarinitiaquiaari.

⁷Na nuhuaji, Jesuucua jaatucutumohua cuno burroori. Pueyari na toqueya niojoquiaari burro nijinia, Jesu cajijiara. Na nuhuaji, Jesuuri nocua cajirii.

⁸Queraatia pueyari na toqueya muejoquiaari nucuaco, Jesuucuaji nojori maniniushitiniuria nuu. Tamasacaari jaamasucua piyotaquiaari cuhuariquiacajiniji, Jesuucuaji nojori niojotasocoriquiano na nucuacojuhuaj.

⁹Jesu puetanaa, mariyata na nuhuaji nijionaari jiyanohua nacoojonu coteequiaari nojori shuquiriniutia. Naa sequeturiquiaari: —¡Pa shuquiritiare pa Jiyaniijia Pueyaso! ¡Jiyanohua maniniacuaja pa Jiyaniijia, cuno, Pueyaso cumaacata tiuquiyani!

¹⁰¡Pueyaso cuaara na jiyateera maninia Jiyaniijia na quiniuria pajaniyara! ¡Nojuajaari pa supuetanaa jiyaniijia David niti pa jiitianutaniya maninia cutara! ¡Jiyocuacaanu Quijia pa Pueyasocuajaari pa shuquiritiasano!

¹¹Jesuuri naa tiuquiquiaari Jerusalén tiacajiniatej. Pueyaso Secojojua tiajinia tiuquishiiri. Na niquinijionu nuhuaji puetunu casaajanaa, Betania tiacajiniara quiaquiaari ritiaari na doce saquiriojosano pueyata. Jiyacaritij, tari tenacariiri quiriquiaa. Jesu sesacasacari jajauju higo naana

¹²Tariqui, nojori quiojosacari Betania tiacajiniji, Jesuuri miaajeriquiaa.

¹³Tucuacaanuji niquirii higo naanaari queraatia jaamasucuaraca. Nocua canujiyareeri na niquiniuria seetanujuanaa jajauracate quiriquiaa. Saaja queraatia jaamasucuaari quiriquiaa. Maja higo muetusacari quiquiaari jiyacari.

¹⁴Jesuuri naa sesacaree higo naana: —Maja quiocuaji socua quia jajau miasaanu quiniutianiya. Na saquiriojosano pueyari na tojitiariquiaa naa na sequesacaritij. Jesu jaacasacari seya niquitiojonaa Pueyaso Secojojua tiajiniji

¹⁵Nojori jaara tiuquiijioquiaari Jerusalén tiacajinia, Jesuuri tiuquiquiaari Pueyaso Secojojua tiajinia. Tiji pueya tohuatanijionu coteereeri, cuno pojori, canapuete Pueyasoocuara puecoosocoriquiano seya niquitiojoriquiaa cumaneecaracuajani. Na masejonaa tohuatanijioreejaariuhuaj. Cumaneeca tacatojojuaca juhuacutucua caponeetareeri, tee pueya tacatojoriquiaa taucuaca cumaneecacuajani, Pueyaso Secojojua tiajinia niquitiojosocoriquiano cumaneecaracuajani. Naajuhuaj, Jesuuri mococoonu niquitiojonaa cajitiucua caponeetaree.

¹⁶Naajuhuaj, majaari na shanacunu quiquiaari pueya niyacunura najuhuana Pueyaso Secojojua tia, na nitiootasano casamitia.

¹⁷Na nuhuaji, pueya niquiara niishitiojonu coteereeri. Naa sequereeri: —Tariucuacaanu Pueyaso Rupaajinia naa naajiotasanocuajaari quiya:“Cua tia sesaari quiniutianiya, Pueyaso Secojojua tia. Puetunu jiyacajinijiniojuanaa pueya secojonuujuara quiniutianiyari”. Niaari saniniuujia na jiyatequiaari nohuasenuujuaca quiquiora.

¹⁸Pueyacuara secojonaa jiyaniijianucua, mariyata Moisés Rootasanojiniji niishitiojonaari niishiquiaari naa Jesu miishanojiniji. Cunora, nojoriiri roojotooquiaari taa na motunutaniya Jesuni. Saniniuujia, puetunu pueyajanaari jiuujiateriquiaa Jesu niishitiojosano nojori tojishacari. Cunora, Judiocuaca jiyaniijianucuaari Jesu puereturiquiaa, puetunu pueyajanaa tojishacari na niishitiojosano.

¹⁹Jaara niniquiaari, Jesuuri Jerusalén tiacajiniji quiacuhua na saquiriojosano pueyata. Higo naana sorenojiniji pohuatasano

²⁰Tariquiicuaji, nojori shocosacari higo naana, na niquitiuquiaariiri tariucua soreno, puetunu na nujuacatajanaa.

²¹Pedroori jiyacari Jesu sequesano niishiquii. Jesu sequereeri: —Niishitiojonanaa, ¡quia niquiri! ¡Quia sesacasano higo naanaqui tari soreree!

²²Jesuuri nojori riucuaree: —Pueyasoocua nia tiuuri.

²³Seetanujuanaa nia sequeyanijia, niaa jaara Pueyasoocua tiuuriquia nia taacanuyaquiniutia, nia naata nio tuhuananu sequenu: “Shiiquia niiquiji. Quia jaataare shoniniacu caminiajinia”. Niaa jaara naa sequere seetanujuanaa Pueyasoocua nia tiuuniutia, niaari nia sequesano niquiniutianiya. Naacuajitij, Pueyasoocuaji nia taacanuyaquishacari, nia sequesanocuajaari tohuateenutaniya taa nia sequereecuajani.

²⁴Janiyari cunora nia sequeyani, puetunujuanaa nia masesano nia secojosacari Pueyasoni, nia niishiri niaa na jiitiaa tari. Na nuhuaji, niaari seetanujuanaa na masenutaniya.

²⁵Nia secojosacari, niaa jaara niishiquii niaa sesa quiya tamonu pueyanota, sesa na miiniuucua niajaniya, nojuaja nia jiyanoori. Naacuajitij, jiyocuacaanu Quijia nia Queeri nia jiyanooniutianiya sesa nia miishanojinijijiuhuaj.

²⁶Niaa jaara jiyanoyashijia quiriquia, jiyocuacaanu Quinia nia Queeri nia jiyanoyaquiniutianiya, sesa nia miishanojinijijiuhuaj. Pueya nequesotasacari Jesu, cante na jiyaronani

²⁷Na nuhuaji, nojoriiri quiaquiaariuhua Jerusalén tiacajiniohua. Jesu rucuanejosacari Pueyaso Secojojua tiajinia, nocua catecanoquiaariiri pueyacuara secojonaa jiyaniijianucua, Moisés Rootasanojiniji niishitiojonaajuhuaj, narta Judiocuaca camarucuanio.

²⁸Nojoriiri Jesu nequesotaree: —¿Cante quia sequecanu naa quia miiniuriani? ¿Cante quia jiyatecanu Pueyaso Secojojua tia jiyaniijia quia quiniuriani?

²⁹Jesuuri nojori riucuaree: —Janiya nia nequesotanutaniya saniniunijia. Niaa jaara cua nequesotasano riucuare coteenucuaa, janiyari nia sequenutaniyajuhuaj cante cua jiyaroquiaari naa cua miiniuriani.

³⁰Cua riucuaturetoj, ¿cante Tiuquinijiona Juan jiyaroquiaari pueya na tiuquinijionura moojiniani? ¿Narejaca pueyatee, Pueyaso soj? Cua riucuature.

³¹Jiyacaritij, cuno pueyari jiyasohuaja tama juayonuutanu coteequiaarijiaaja. Naa sequetooquiaariiri: —Paa jaara na sequereni Pueyaso na jiyaroquiaari, pa riucuarucua: “¿Casaara nocua nia tiuyaquiquianucuaraarini?”

³²¿Paatucua taa sequereeri, nojuaja nareja pueya jiyarosano quiquiaari? Cuno pojoriiri narta Israel pueya puereturiquiaa sequenura, Tiuquinijiona Juanri nareja pueya jiyarosano quiquiaari. Nojoricuajaari niishiriquiaa puetunu pueyajanaari niishiquiaari Tiuquinijiona Juanri seetanujuanaa Pueyaso sequesano caminiujiunia quiquiaari. Cunora, nojoriiri Tiuquinijiona Juan rerequetenu pueretuquiaari, pueya quishacari tii.

³³Naacuajitij, maja na naata na riucuatunu quishacari, Jesu sequetureeri: —Maja canaa niishiniu. Jesuuri nojori sequeree: —Janiyajuhuaj, maja cua sequenu quiniutianiya niajaniya, cante cua jiyaroquiaari naa cua miiniuriani.