Read Arabela San Marcos 7 Bible Online

San Marcos 7 - Arabela bible

San Marcos 7

¹Jesuucua catecanoquiaariiri Fariseocuaca, Moisés Rootasanojiniji niishitiojonaanio, canapuete Jerusalén tiacajiniji nijioquiaaricuajani.

²Cuno pojori quishacari tii, nojoriiri noojiaqueya Jesu pueyajinijinio niquiquiaari shuquitioojua miaqueyano. Nojoriiri jiyanijia, nojori rucuanejosacari sesa miijiaca pueya tajinia, sesa nojori quiniu na naata nojoriicua pacunu. Nojoriiri cunora shuquitianu jiitiquiaari, nojori jiyanishacari nojori jiuujia naasucua curuushiniutianiya, shuquitioojua nojori miaquesacari. Naaratej, cuno pueyari Jesu pueya pocuanu coteequiaari.

³Cuno Fariseocuaca, puetunu narta Judiocuacajanaanio, nojoriiri maja na cartenu quijia tariucuacaanu nojori supuetanaa niishitiojosano. Naaratej, majaari nojori miaquenu quijia shuquitioo.

⁴Naacuajitij, nojori jaara miaquesano niquitiojosaquiji tacatequiohua, majaari nojori miaquenu shuquitioojua. Socua queraatia quiyari cuno pojori niishishano. Naacuajitij, nojoriiri jiyaniquiaa, sesa nojori quiyaquiniuucuaji Pueyaso niquiara, nojori cuaara na ratujua jeequejoora, pataco, coshi, na maquetucuanio.

⁵Naaratej, Fariseocuaca, Moisés Rootasanojiniji niishitiojonaanio, nojoriiri Jesu nequesotaquiaari: —¿Casaara quia pueya tojitiaaquiya pa supuetanaa niishitiojosanoni? Nojoriiri maja na shuquitianu quiquiaa na miaquenuunura.

⁶Jesuuri cuno pojori riucuaree: —¡Niaari sapuenu juhua maninia pueya niquishano! ¡Niaacuajaari seetanujuanaa sesa miijiaca! Pueyaso sequesano caminiujiunia Isaíasri maninia sequequiaari niajaniyajinijicuaja, naa na naajiotasacari Pueyaso sequesano:“Nio pueyari saaja na rupaata shuquiritiaa janiya. Nojori jiuujiaari saniniuujia tucuacaanu quiya janiyajiniji.

⁷Nojori miishano quiriani, cunoori najuhuanaj. Naa nojori miishanoni, majaari na shuquiritiniu janiya. Nojori niishitiojosanoni, cunoori tama pueya niishitiojosanojuaaja, maja cua sequesano”.

⁸Niaari cua pueya pocuariquiaa. ¿Niajaniyariuhuaj? ¿Casaara Pueyaso sequesano nia tojiyaquiquiaanijia? Niaacuajaari Pueyaso sequesano tojiyaquiya, tama nia supuetanaa niishishanojuaaja nia miiniuria najuhuanaj.

⁹Jesuuri socua naa sequequiaari cuno pojoritij: —Tama nia miiniu jiitishanoocua nia miiniuriajaaja, ¡niaari Pueyaso sequesano shocortaa saaja!

¹⁰Moiséscuajaari naa rootaquiaari: “Maninia quia miiri quia que, quia nucuanio. Majaari nojori rerequetenu. Cante na que, na nucua sesacajani, cuno pueyano cuaara mosaaria”.

¹¹Niaari sequeya saniniuujia, maniniacuaja, pueyano jaara na que, na nucua sequere: “Maja cua naata naacutanu niajaniya cua casamitia. Janiya tari Pueyasora jiyateree puetunu cua jiitiasanojuanaani”.

¹²Niaari sequequiaajuhuaj, pueyano jaara naa sequeretej, maniniacuaja maja na naacutanura na que, na nucuanio.

¹³Naacuajitij, niaari Pueyaso sequesano shocortaa saaja, tama nia niishishanojuaaja nia miiniuria najuhuanaj. Cuno nia niishishanocuajaari saaja nia supuetanaajiniji caminiujiushano. Niaari socua queraatia casaa miiquiaa juhua cunojuhuaj.

¹⁴Naa na nacasunu nuhuaji cuno pojoritij, Jesuuri pueya rerejoterohua na shocua. Nojori sequereeri: —Cua tojitiare puetunu niajaniyajanaa, maninia nia niishiniuria.

¹⁵Casaa pa miaqueyani, Pueyasora naajaa. Cunoori maja na naata pueyano jiyatenu sesa miijiara. Poojiajinia pa niishiriojosano cutaraari sesara pa jiyateya Pueyasora.

¹⁶Cante numaaracani, nojuaja cuaara tojitiaara cua sequesano.

¹⁷Jesu jaara tiujiaquiaari cuno pueya, tiajiniaaco tiuquiyarohuari. Na saquiriojosano pueyari tii na nequesotaree pueya na niishitiojosanojiniji.

¹⁸Jesuuri nojori sequeree: —¿Niaateeri cua sequesano niishiyaquiyajuhuaj? ¿Majateeri nia niishiniu? Puetunu pa jiniacuma tiuquijiajanaani, cunoori maja na jiyatenu sesa miijiara pajaniya.

¹⁹Pa miasanoni, majaari na tiuquiniu poojiajinia, saaja pa seecojinia mishiya cutaraari. Na nuhuaji pocoma tajiyari pa marecuhuacuma. Nio sequesanota, pueya niishitiojoriquiaari, puetunu miaquesanojuanaari maniniacuaja pa miaquesocoriquiano. Maja cutaraari na naata na jiyatenu pajaniya juhua curuutuucara Pueyasora.

²⁰Jesuuri sequereejuhuaj: —Pueyano niishiriojosano sesa noojiajiniani, cuno cutaraari sesara na jiyatequiaa.

²¹Pueyano jiuujiajiniji supueya cutaraari sesa niishiriojosano, sesa na miiniuria. Naacuajitij, pueyanoori na camishoo maajipohua numuetucujua, seya numuetucujuajuhuaj. Tamonu pueyano casami nohuasejoquiaari. Pueya moquiaajaariuhuaj.

²²Narta pueyano niquiocua numuetucuquiaari. Tamonu pueyano casamiicua jiaatiaquiaari. Jiyanohua sesa miiquiaari. Cuaracashijionu niishiyari. Tama na cuaqueyajaaja shuquiritiquiaari na miiniu jiitishanota. Narta pueyano miananajoquiaari. Tamonuucuara tonujuquiaari. Naajuhuaj, saaja tama na cuaqueyajaaja shuquiritiaja quiquiaari. Juhuajaniya sesa miiquiaajaariuhuaj, moseeca na quiniuucua.

²³Puetunu nio sesa miishanojuanaari pueya jiuujiajiniji supuequiaa. Cuno cutaraari sesa quijiara pueya jiyateja Pueyaso niquiara. Taatu tiuushacari Jesuucua

²⁴Jesuuri cuniquiji quiaaree Tiro tiaca shocua jiyajiniara. Tii tiuquishii tamonu tiajiniaari. Majaari na paniniu quiquiaari pueya niishiniuria nojuajiniji, tee na quiyani. Naajaa, majaari na naata jamaaniu quiriquiaa.

²⁵Tamonu maajiiri ritia Jesujiniji niishiquiaari. Neyatuuri samaruraca quiriquiaa. Naaratej, maajiiri Jesuucua niquiaari. Na cariquimiaji mojoquetaseeri.

²⁶Cuno maajiiri Sirofenicia jiyajinijinio taatu quijia. Jesu secojoseeri samaru na tohuataniniuria neyatujiniji.

²⁷Jesuuri maaji sequeree miriqui: —Quia tarinitiare, muerasu cuaara coteenu miaquenuura. Majaari maninia muerasu pa jaariutianura na miaquesano, sareyacari jatasocoriquiano.

²⁸Maajiiri Jesu riucuaree: —Jaa, Jiyaniijianaa. Naajaa, sareyacuajaari miaqueja cariquiacoji tatucuaja, muerasu totinijiosano miaquesano shiriya.

²⁹Jesuuri na sequeree: —¡Quiaacuaja maninia cua riucuaree! Quia tacateyarohua. Samarucuajaari tari tohuataree quia niyatujiniji.

³⁰Maaji tiuquishacariuhua na tiajiniohua, neyatu riuriatasuhuari na maquetujinia mataano. Samaruuri tari tohuatano quiriquiaa nocuaji. Jesu jeecasacari numueeju, tiquia pueyano

³¹Jesuuri tacatequiaariuhua Tiro tiaca shocua jiyajiniji. Na tacatesacariuhua, Sidón tiaca shocojoquiaariuhuari, Decápolis jiya tiacanio. Galilea caminiajinia tiuquishuhuari.

³²Tii na quishacari, nocua jaatucusaaquiaariiri numueeju, tiquia pueyano. Na jaatucunaari Jesu secojotuquiaari na juaashiquia na nianura nocua, na jeecanura cuno pueyano.

³³Jesuuri pueyano numueeju jaatucuree tamocora pueyacuaji. Na numaama shirii na juaashiquiaari. Na nuhuaji, tama na juaashiquiajiniajaaja riocoreeri. Na riacau cojuata pocuaashijia niti quiareeri.

³⁴Jiyacaritij, jiyocuacaanu maureeri. Noojia niareeri. Na nuhuaji, cusosu numaa sequereeri: —¡Efata! Nioori pueyano rupaajinia sequeya: “¡Quia riatere!”

³⁵Jiyacaritij, numueeju numaari riatequequee. Na nitiiri jeequequeejuhuaj. Ritia pocuaquee maniniaari.

³⁶Jesuuri cuno pojori rootaree maja nojori pohuatanura na jeecasano pueyanojiniji tamasaca niquiara. Nojoriiri saaja tiquiyocua pohuatanuuquiaari. Naa Jesu rootasacari na naatanijiosano pueyatej, maja nojori pohuatanura na miishanojiniji, nojoriiri saaja socua jiyacatequiaari pohuatanura.

³⁷Pueyari jiyanohua jiuujiatequiaari Jesu miishano na niquitiushacari. Tama nojorijiaarijia sequetooquiaari: —¡Puetunujuanaa miya maniniaari! Numueejunucua jiyateya tojitiajacaraari. Tiquianucua pohuateyajaariuhuaj.