Read Arabela San Juan 10 Bible Online

San Juan 10 - Arabela bible

San Juan 10

¹Jesuuri socua pohuatarohua pueya niquiara. Naa sequereeri: —Seetanujuanaa nia sequeyanijia, cante borrego mataca tohuateyaco tiuquiyaquijiani, nojuaja jaara tamocoji tiuquimia, cunoori nohuasejojua.

²Saniniuujia, cante tohuateyaco tiuquijia cutarani, cunoori borregohua camarujuanaa cutara.

³Tohuateya cojuanaari tiootiu riataquiaa nocuaji. Borregohua camaruuri puetunu na seya sesacajanaa jiyaniquijia. Na borregohuari na rupaa niishijia. Na camaruuri naa na tohuatanijiojua puetunujuanaa na matacajiniji.

⁴Puetunu na borregohuajanaa jaara tohuareetama, na camaruuri na puetaja. Na seyari na nuhuaji sacuaja, na camaru rupaa nojori niishishacari.

⁵Saniniuujia, borregohuari maja na nuhuajiniu quijia na niishiyaquishoo pueyano. Saaja nocuaji cocuatejaari na niishishacari cunoori maja na camaru rupaa.

⁶Jesuuri naa pohuataquiaari miriqui nojori niquiara. Nojoriiri saaja niishiyaquiquiaari casaa na niishitiojonu paniriquiaa nojorini. Jesucristo, maninia pa cojuana

⁷Nocuaji Jesuuri naa nojori sequerohua maatia: —Seetanujuanaa nia sequeyanijia, janiyari juhua tohuateyani, cua borregohua tiuquitianura cua Que Pueyasoocua.

⁸Cante cua niyacarijia nijioquiaari coteenuni, nojoriiri sesa miijiaca quiquiaari, nohuasenuujuaca. Cua borregohuari namitia nojori numueejushiquiaari.

⁹Janiyari juhua tohuateyani. Cante janiyajiniji tiuquiya cua Queecuani, nojuajaari Pueyaso pueyanora jiyatesaanutaniya cutara. Cuno pueyanoori maninia cojuasano juhua borrego. Janiyari na tiuquininiutianiyani, tii na quiniuria maninia cojuasano. Janiyari juuca na tohuatenutaniyani, jiyasocua cua miaquetenura carijiniacuma.

¹⁰’Nohuasejojuaari saaja tiuquijia borregohuacua na nohuasenura, na puecoonurajuhuaj. Naa na shaajaaja puetunujuanaari. Janiyari saniniuujia niquiaarini cua borregohua cua jiyatenura pueyaracaanu quijiacara, seetanujuanaa jiyanohua shuquiriaatia quijiaca nojori quiniuria.

¹¹Janiyari maninia cojuanani, maja tamonu. Pueyano jaara maninia na seya cojuana maniniu quiri, tama na cuaqueyajaaja panitiaja na seyacuaari.

¹²Saniniuujia, borregohua camarujuanaa jaara tamonu cojuateya na seya, cuno pueyano jaara niquiri sare nocua canujiyano, nojuajaari na puerenuta neteja. Borregohua tiujiaqueeri. Naa miijiaari cuno borregohua quiyaquiniuucua na seyajanaa. Naacuajitij, sareeri borregohua soojua. Naa na cocuatajaari.

¹³Cuno borregohua cojuanaari naa neteja sareecuaji na tacayaquishacari seetanujuanaa cuno borregohuacua. Nojuajaari saaja paniya na poonijiosano sami na niquitiosaanura.

¹⁴’Janiya cutaraari maninia cojuaja borregohuani, na camarujuanaa cua quishacari. Janiyari puetunu cua seyajanaa niishijiani.

¹⁵Nojoriiri cua niishiyajuhuaj, taa cua Que niishiya janiyacuaani, mariyata taa cua niishiya cua Quejaniuhuaj. Janiyari tama cua cuaqueyajaaja panitiaja cua borregohuacuarani.

¹⁶Janiyari socua borregohua jiitiaani. Nojoriiri maja nio cua borregohua maanujinijinio. Janiyari nojori rijionutaniya niyarajuhuaj. Nojoriiri cua tojitiariquiano. Naacuajitij, puetunu cua borregohuajanaari jatiqui quiriquiano, niquiriyatu cojuanaracajuhuaj.

¹⁷’Cua Queeri cua paniya naa cua panitiasacari tama cua cuaqueyajaaja cuno borregohuacuara. Janiyari tama cua panishacarijiaaja mosaanutaniyani, na nuhuaji cua samiitianuhuara, pueyaracaanu quijia cua quiniuhuara.

¹⁸Majaari quenaaja tamonu naata monu janiya cua paniyaquishacari. Janiyari cua panishacari cusonutaniya cua borregohuacuarani. Janiyari cumaacaracani nojoriicuara cua cusonura. Janiyari cumaacaracajuhuaj cua samiitianuhuara. Cua Quecuajaari naa cua miiniuria cua jiyaroquiaari mijiria.

¹⁹Narta Judiocuaca jaara tojiquiaari naa Jesu sequesanotej, nojoriiri socua tama juayonuutaquiaarijiaaja Jesuucua.

²⁰Queraatia pueyari jiyacari sequeree: —¡Cuno pueyanoori samaruraca! ¡Maja na tojiniu, pueyanaa! ¡Najuhuana pocuaano!

²¹Tamasacaari saniniuujia sequeriquiaacujua: —¿Samaruraca pueyanoteeri maninia casaa pohuatajajaara juhua nio pueyanojua? ¡Maja! ¿Pueyanoteeri na naata samaru cumaacata jeecanu cariyojuaru namijiajaara? ¡Maja na naata! Judiocuaca camarucua niquiniu paniyaquishacari Jesu

²²Tamacari, Jerusalén tiacajiniaari queranacusaariquiaa. Cunoori quiriquiaa pueya niishiriojonura nojori juhua cuno juucajinia Pueyaso Secojojua tia jiyatequiaariuhua seetanujuanaa juhua Pueyaso quiquiora na quiniuhuara. Jiyacariiri shuniya quiriquiaa.

²³Jesuuri tii quiriquiaajuhuaj. Pueyaso Secojojua tiajinia quiriquiaari. Nojuajaari pueya jiyaniquishano tariucuacaanu jiyaniijia Salomón canujuucojojuajinia riujiuuniuquiojoriquiaa.

²⁴Jiyacaritij, canaa Judiocuaca camarucuaari tii na cosesee. Naa na nequesotatureeri: —¿Taacari canaa quia sequenutaniya socuaari cante quiajaniyani? ¡Quiaa jaara seetanujuanaa Pueyaso Jiyarosano quiri, quiarijia canaa quia sequere!

²⁵Jesuuri nojori riucuaree: —Janiyacuaja tari nia sequecanuni. Niaari saaja na cuaracashitiquianu. Niaa cuaara niishiiria cante janiyani, nia niquishacari cua miishano cua Que sequesano janiya.

²⁶Niaari saaja cucua tiuyaquiquiaa cua borregohua maanujinijinio nia quiyaquishacari.

²⁷Cua borregohuari cua rupaa tojijia cutara. Janiyari nojori niishiyajaaniuhuaj. Nojoriiri cunora cua nuhuajiquiaa.

²⁸Janiyari pueyaracaanu quijiara nojori jiyatequiaani. Majaari nojori juurequenu quiniutianiya. Majaari quenaaja tamonu naata jaariuutianu quiniutianiya nojori janiyajiniji.

²⁹Cua Queeri cua borregohua cua niquitioquiaari. Nojuajaari socua jiyanohua cumaacaraca tamasaca cumaacaraca quijiacajiniji. Naacuajitij, maja quenaaja tamonu naata cua borregohua jaariuutianu cua Quejiniji.

³⁰Janiya cua Queta, canaari juhua niquiriyatuni.

³¹Jiyacaritij, canaa Judiocuaca camarucuaari sai rijiorohuacuhuaj, Jesu na jacutajara juucua.

³²Jesuuri saaja nojori sequeree: —Janiyari queraatia maninia casaa miiquianu saaja cua Que cumaacata nia niquiarani. ¿Teyanoocua nia jacunu paniya janiyani?

³³Nojoriiri Jesu riucuaree: —Majaari canaa jacunu quiniutianiya quiajaniya maninia quia miiniuucua. ¡Canaari quia jacunutaniyani sacuaraatia quia pocuanuucua Pueyaso niquiara! ¡Quiaari tama quia cuaqueyajaaja jiyateya juhua Pueyasora! ¡Cunoori jiyanohua sesa! ¡Quiaacuajaari pueyano, juhua canaajuhuaj!

³⁴Jesuuri nojori sequeree: —Niaacuajaari tariucuacaanu naajiosano Pueyaso Rupaa jiitiaa. Pueyaso sequesanoori naa naajiotasano quiya tii:“Janiyacuajaari nia sequequiaarini, niaari pueyasohua”.

³⁵’Paacuajaari niishiyani, Pueyaso Rupaajinia naajiotasanoori maja na naata cuaracashitishaanu. Pueyasojuanaari pueya jiyaniquiquiaari “pueyasohuata”, noo pojori, teyano nojuaja jiyatequiaari Israel pueya jiitianaaracuajani.

³⁶Naajuhuaj, Pueyasocuajaari cua saquiriojoquiaari mijiria na jiyarosocoriquiano. Naa Pueyasojuanaa Jiyarosano cua quishacaritij, ¿niaatucua casaara sequereni janiya Pueyaso niquiara pocuaree sesani, cua sequesacari janiya Pueyaso Niyanuni?

³⁷Janiya jaara cua Que panishano miyaquiri na cumaacatani, janiya maara nia juayaquirini cucua nia tiuyaquiniuucua.

³⁸Niaacuajaari cua Que cumaacata cua miishano niquiquiaa. Niaa jaara cua pohuatasanoocua tiuuniu paniyaquiri, naajaa, cua Que cumaacata cua miishanoocua nia tiuuri quenaaja. Niaa jaara niishiri puetunu cua miishanojuanaari cua Que Pueyaso cumaacata miishano, niaa maara niishiri Pueyasoori coojia rupueja, janiyari noojia rupueyajaaniuhuaj.

³⁹Jiyacaritij, nojoriiri socua Jesu quiatunu paniriohuacuhuaj. Jesuuri saaja nojoriicuaji mashiquii.

⁴⁰Jesuuri canaa jiyataarohua Jordán moo taquijiria tee Juan tiuquinijioquiaari tarijia pueyacuajani. Canaari tii quishiini.

⁴¹Queraatia pueyari Jesuucua nijioquiaari tee canaa quiriquiaacuajani. Nojoriiri tama sequequiaarijiaaja Jesujiniji: —Tiuquinijiona Juanri maja quenaaja na miiniu quijia casaa Pueyaso cumaacata. Naajaa, puetunu nio pueyanojiniji na sequesanojuanaaquiiri seetanujuanaa quijia.

⁴²Naacuajitij, queraatia pueyari Jesuucua tiuuquiaari tii, tee canaa quiriquiaacuajani.