Read Arabela 1 Carta a los Tesalonicenses 5 Bible Online

1 Carta a los Tesalonicenses 5 - Arabela bible

1 Carta a los Tesalonicenses 5

¹Majaruhua maninia cua naajionura niaacuara cua niishitiniuria niajaniya socua, taacari pa Jiyaniijia tiuquiniutianiuhuani. Niaacuajaari tari na niishiya, naajuhuaj, taate mijiria quiniutianiyani na tiuquiyaquishacarijia.

²Niaacuajaari maninia niishiya, pueya jiyanishacari juhuanojuaja maja pa Jiyaniijia tiuquiniu quiniutianiuhua, nojuajaari jiyacari tiuquiniutianiya. Nojuajaari canashiyaquiji tiuquiniutianiya, taa nohuasejojua tiuquiquiaa niucua tiajiniaacocuaani, juhuajaniya tia camaru maquesacari.

³Naajuhuaj, quera pa Jiyaniijia tiuquishacariuhua, mijiria quiniaa pueyari naa sequejaca quiniutianiya: “Paacuaja maninia quiyani. Shaaquicuaja miaquetoojonu”. Canashiyaquiji jiyacari, Pueyaso saniitiosacari na tojiyashijiacaari quiniutianiya. Naa quiniutianiyari taa maaji nooquiaa juhuacatecara canashiyaquiji na manajacuaani. Majaari quenaaja niquiriyatu curosaanu quiniutianiya saniitiosoo.

⁴Niajaniya saniniuujia cuarta Pueyaso pueyanaa, niaari maja juhua ninishiqui quijiaca, pa Jiyaniijia cariyatunura niajaniya.

⁵Puetunu niajaniyajanaacuajaari cuhuashiqui quijiaca. Pueyasojuanaacuajaari nioojiaca cuhuataquiaari. Majaari tari juhua ninishiqui quijiaca pueya pa quiniu.

⁶Cunora, pa Jiyaniijia sashijiaca pa quirij. Maja juhua tamasacaja, juhuajaniya quiquioyari. Nojoriiri juhua maquetiuya. Pajaniya saniniuujia cuarta Pueyaso pueyanaa, juhua sutejaca pa quirij, maninia niishiriojojuacajuhuaj.

⁷Maquetujuacaari niucua maquetuquiaa. Naajuhuaj, mashaasequenuujuacaari niucua mashaasequenuuquiaa. Naa miijiacaari Pueyaso tojiyashijiaca. Majaari na maniniucuanu cuhuashiqui.

⁸Pajaniya saniniuujia, paari cuhuashiqui quijiaca cutarani. Naaratej, pueyaracaanu maninia niishiriojojuaca pa quirij. Romano pueya miaquetoosacari, nojoriiri turtuco cushiyonuujua, nocuaji na nujutajara cashi. Cumueeca casaa cushiyonuujuajaariuhuaj, na naca na cojuatajara. Naajuhuaj, naa poojia pa cojuare, saaja Jesuucua pa tiuuniutia, seetanujuanaa panijiaca pa quishacarijiuhuaj. Seetanujuanaa pa niishiri, Pueyasoori pa saquiriojoquiaari na muerasu pa quiniuria pueyaracaanura. Naacuajitij, pocua pa niishitiaja cojuareni, maja poojia pa niquijiotenura najuhuanaj. Naacuajitij, Sesaacaari maja na naata shocotanu quiniutianiya pajaniya.

⁹Pueyasoori maja na saquiriojonu quiquiaari pajaniya na saniitiosocoriquiano. Pa saquiriojoquiaari cutaraari na jiyanooniuria pajaniya, na muerasu pa quiniuria, Neyanu Jesucristoocua tiuujiaca pa quishacari.

¹⁰Neyanucuajaari pocuara cusoquiaari, nata rishijiaca pa quiniuria pueyaracaanu. Naacuajitij, naajaa, paa jaara cusoyareni, paa jaara saminio quiyajuhuaj, pa Jiyaniijia tiuquishacariuhua, puetunu nocua tiuujiacajanaari pueyaracaanu saminio quiniutianiya nata.

¹¹Naaratej, pueyaracaanu nia cumaquitioojoriquia Pueyaso rupaata. Nia shiniujiutiooriquiajuhuaj, seetanujuanaa pa Jiyaniijia tojijiaca nia quiniuria, taa nia miiquiaacuaja tarini. Socua Pablo rootasacari Pueyaso pueya

¹²Cuarta Pueyaso pueyanaa, canaa nia tojiri. Cuniqui nia jiitianaa tojijiaca nia quiri. Majaari nojori rerequetenu. Nojoriiri jiyanohua poonijioquiaa pa Jiyaniijiara nojori niishitiojonura niajaniya, na nacasunura niajaniyajuhuaj.

¹³Cunora, jiyanohua nojori nia paniri. Majaari na rerequetenu. Nojoriiri pa Jiyaniijiara poonijioquiaa na cumaquiniuria niajaniya. Maninia nia quiri pueyanaa. Majaari juayonuujutanu.

¹⁴Nio nia tojirijiuhuaj cuarta Pueyaso pueyanaa. Taajecori nia nacasure. Noojia niquijiotejaca nia shiniujiuri, seetanujuanaa cumueeca Pueyaso pueya nojori quiniuria. Noo pojori nia cumaquiriquiajuhuaj, Satanás saniniujiushacari na cuaqueya miiniu panishano rejeretaashijiacatej. Majaari cuno pojori cartenu. Nia juaaniu nia rejeteriquia, maja quenaaja nia juaaniuria tamasacata.

¹⁵Naajuhuaj, tama nia cuaqueyajaaja nia cojuariquia maja nia naminiuria niarta pueyano, nojuaja jaara sesa miiriquia niajaniya. Saniniuujia, pueyaracaanu maninia nia miitiooriquia niarta Pueyaso pueyata. Naa nia miiriquia puetunu pueyajuhuaj.

¹⁶Pueyaracaanu nia shuquiririquia, Pueyaso pueya nia quiniuucua.

¹⁷Naajuhuaj, pueyaracaanu nia secojoriquia Pueyaso.

¹⁸Niaa jaara maninia miishaare, niaa jaara sesa miishaarejuhuaj, naajaa, puetunu naa nia miishaanuucuajanaa Pueyaso nia sequeriquia, “paacarasho”. Pueyasojuanaacuajaari naa paniya pa miiniuria, Jesucristo Sohuanu pa jiitianuucua poojiajinia.

¹⁹Majaari Pueyaso Sohuanu nia ruuretanu, nojuaja jaara nioojiajinia nia shiniujiya maninia nia miiniuria.

²⁰Naajuhuaj, majaari nia soonu Pueyaso sequesano caminiujiuniaa pohuatasano.

²¹Coteenu nia saniniujiuri cutara, nia niishiniuria seetanutejanaa nojori pohuatasano. Teyano nojori pohuatasanojinijiniote maniniani, cuno tojijiaca nia quiri.

²²Puetunu sesa niishishano casaajanaa soojeaca nia quiri.

²³Poojia cajitinia Pueyasojuanaa cuaara nia jeenucuaara juhuacarijia, tojetaarucuajanaa sesa miyashijiaca nia quiniuria pa Jiyaniijiaacuaji. Nojuaja cuaara naa cojuaara nia sohuanu, nioojia, nia cuaqueyanio, tojetaarucuajanaa soosoo nia quiniuria pa Jiyaniijia Jesucristo cuaara tiuquiriohuajaatijia.

²⁴Cante nia saquiriojoquiaaricuaja na pueya nia quiniuriani, nojuajaari puetunu shusha cua sequesanojuanaa niajaniya miiniutianiya niaara. Nojuajaari maja na niishiniu na rupaa jatanu. Nojuaja cutaraari na sequesano miijia pueyaracaanu. Pablo sequesano na naajionee na tucuatasacari

²⁵Cuarta Pueyaso pueyanaa, Pueyaso nia secojonuuriquia canaacuarajuhuaj.

²⁶Canaara nia saruhuatare cuniqui quiniaa parta Pueyaso pueyajuhua nojori nia nujuunuta, seetanujuanaa Pueyaso paniniutia.

²⁷Pa Jiyaniijia jiyaramiquishano cua quiniuucua, cua tojitiare pueyanaa. Nio cua naajionee nia serojore puetunu Pueyaso pueyarajanaa.

²⁸Pa Jiyaniijia Jesucristo cuaara cumaquiiria nioojia. Cuaara naa quiiriatej.