Read Aralle-Tabulahan Lukas 6 Bible Online

Lukas 6 - Aralle-Tabulahan bible

Lukas 6

¹Pihsang tempo di allo katohhoang, Puang Yesus sibaha pahsikolana ungngolai sallimbo bela'. Ya' yato pahsikolana sika umponge'mi sangngaka-sangngaka boana pinamula, mane napisii anna naande laoi di lalang.

²Ampo' aha sangngaka-sangngaka to Farisi unsängkäi yatoii naoatee, ”Akana umbaberakoa' dio yato ang dai mala dibabe di allo katohhoang?”

³Ya' sika natimba'mi Puang Yesus naoaintee, ”Dakake'a' dio aha umbata yato aka ang hali nababe Tomaraya Daud sibaha änä' buana naonge manonoi?

⁴Donetoo mentama di Dasanna Dehata anna ungngalai dehpa ang puha dipopenomba yaling. Naala naande, anna nabea toine' pano di ingkänna ang nasibahaing, ang setonganna yato dehpa dasi'da-si'dai mala naande tau sehalinna ingkänna imang.”

⁵Nalombungngike' tula'na Puang Yesus naoatee, ”Kodi' inde Änä' to Lino ang ungkuasai allo katohhoang.”

⁶Pihsang tempo di allo katohhoang senga' mentama bou Puang Yesus di mesa pa'sambayangang anna mampakuhui yaling. Yaling yatoo aha mesa tau ang mate teyye kuananna.

⁷Yato to Farisi anna to pampakuhu ada' sika umpoimata Puang Yesus ke hapang la umpabono'i tau di allo katohhoang, anna ahai sika napolalang nasalla.

⁸Ampo' nainsang Puang Yesus aka yato ang yaling di pihki'na anna ma'tula'i pano yato di tau ang mate sambali teyyena naoaintee, ”Maio done di olo ke'de'!” Ya' ke'de' si'dang pano di olo yato tau.

⁹Mane ungkutanaii yato ingkänna tau ang di hao, naoatee, ”Situhu' ada'ta, aka ang mala la dibabe di allo katohhoang: kamapiaandaka, kakarakeandaka; ungkalemuiraka tau sola, la dipateiraka?”

¹⁰Puhai yatoo unnenne'i asammi yato ingkänna tau anna ma'karai pano yato di tau ang mate sambali teyyena naoatee, ”Tandoingkä' teyyemu!” Napentando si'daming teyyena. Ya' bono' siang donetoo.

¹¹Ya' tuhtuang sika kende'mi aha'na yato to pampakuhu ada' anna to Farisi, lambi' situla'-tula'i aka ang la nababe pano di Puang Yesus.

¹²Donetoo maong dai' di tanete Puang Yesus anna napesambengii yaho ma'sambayang dai' di Puang Alataala.

¹³Tahpana mabaya, ya' untambaing to pentindo'na mengngolo anna napilleii di alla'na sampulo derua ang la napadahi rasul, dianto:

¹⁴Ta Simon (ang si nasangai Puang Yesus: Petrus), ta Andreas ullu'na, ta Yakobus, ta Yohanes, ta Filipus, ta Bartolomeus,

¹⁵ta Matius, ta Tomas, ta Yakobus änä'na Alfeus, ta Simon (ang disangai toe' to Zelot),

¹⁶ta Yudas änä'na Yakobus anna ta Yudas Iskariot (ang umbalu' Puang Yesus ke dako'i).

¹⁷Sika tuhummi yaho mai di tanete Puang Yesus sibaha-bahaii anna tohhoi di menghante-hantena. Yato di ongeang tihimpung di hao mai'di to pentindo'na anna mai'di tau senga' ang sulei di hao mai di ingkänna Yudea, yaho mai di Yerusalem anna hoi' mai di behing le'bo' di alla'na Tirus anna Sidon.

¹⁸Sika sulei pemala umpehingngii pepakuhunna Puang Yesus anna pemala sika napabono' di hao mai di ma'kahupa-hupa koronna, noa tunne' ang napentamai setang bono' toe'.

¹⁹Ingkänna tau donetoo sika umpeäng liu lalang anna malai ungnginso Puang Yesus, aka' aha kakuasaang ang sohong yaling mai di Kalaena lambi' mala umpabono' ingkänna tau.

²⁰Pihsananna unnenne'ing pahsikolana Puang Yesus anna ma'karai naoatee, ”Puang Alataala umbehekoa' dio ang memase-mase, aka' diongnga'too ang ungngampuang Kapahentaanna Puang Alataala.

²¹Puang Alataala umbehekoa' dio ang menge manono, aka' la dipabohokoa' dako'. Puang Alataala umbehekoa' dio ang dumuseng dinoa, aka' la metahakoa' dako'.

²²Puang Alataala umbehekoa' dio ang nakahiri'o solamu aka' umpetahpa'ä' Kodi' inde Änä' to Lino anna dakoa' napatama di sihu-sihuanna, anna nabeakoa' tula' tahuhu solamu sibaha nasangaikoa' to karake.

²³Kahsi si'da-si'dakoa' ke donentoo anna masannangkoa' aka' setonganna daete' aha mallondo sahomu yaho di suruka, aka' inang noa tubunne' peneneannaii pano di nabinna Puang Alataala.

²⁴Ampo' sumändä'koa' dio ingkämmu to makaka, aka' puha lohpo'mokoa' dio ullambi' pepakahangammu yaling di katomakakaammu.

²⁵Sumändä'koa' dio ang boho lohpo' dinoa, aka' la manonokoa' dako'. Sumändä'koa' dio ang metaha lohpo' dinoa, aka' la masuhsakoa' anna la sikaumbukoa'.

²⁶Sumändä'koa' ke napudio ingkänna tau, aka' napanoa tuntone' peneneannaii umpudi ang unsanga kalaena nabi ampo' setonganna tadia.”

²⁷Nalombungngike' tula'na Puang Yesus naoatee, ”Ampo' pano di dioa' ang ma'pehingngi di Kodi' kuoaingkoa'tee: kalemuio ingkänna balimmu, pembabe mapiakoa' pano di tau ang mangkahiri'o.

²⁸Palauing behe tau ang mantändoikoa'; sambayangngii tau ang pemala mantilakaikoa'.

²⁹Ponna aha tau mantampiling sambali papemu, beai natampiling sibali. Anna menna ang mangngala kaya'mu, bea toine' pelapi'na.

³⁰Ponna aha tau ang mampalau aka-akammu, ya' beai, anna daa umpalaui sumule aka-akammu ang naala tau.

³¹Anna umba noa ang ungkärä'i nababeingko solamu, ya' babe toinne' noa pano di solamu.

³²Ponna ungkalemuio supu tau ang mangkalemuio, ya' la unsangaraka ahang kala'biammu? Aka' napanoa toete' to tamampetahpa'.

³³Aka' ponna supung membabe mapia pano di tau ang membabe mapia toe' pano di dio, ya' dasiante' aha kunanna, aka' mala toete' napanoa to tamampetahpa'.

³⁴Anna ponna ke umpaindangngio aka-akammu supung pano di solamu ang mala toune' mambeao bala'na, ya' akang kunanna? Aka' mala toete'ne' napanoa to tamampetahpa' umpaindangngi solana to tamampetahpa' anna malai nabala'i sinnoa yato aka ang nabea.

³⁵Ampo' dioa' dio, kalemuio ingkänna balimmu anna pembabe mapiao pano. Dia tuke' paindangngii aka-akammu sitonda dai la umpemitaia' la nabala'i. Ponna umpanoa, ya' la ullambi'o saho ang dai aha mallondo anna mendahio änä'-änä'na Puang Alataala To Matande, aka' Puang Alataala marota' pano di ingkänna tau ang dai nainsang ma'kuhhu'sumanga' anna pano di tau karake.

³⁶Dahi pahallu toukoa' dio punno pa'kalemu, sinnoa Ambemu yaho di suruka punno pa'kalemu.”

³⁷Nalombungngi bung tula'na Puang Yesus naoatee, ”Daa untanda' tahuhu solamu anna datouo dio ditanda' tahuhu. Anna daa umpapetahungkung solamu anna datouo dio ditahungkung. Ampungngio solamu lambi' la diampungngi touo dio.

³⁸Beai aka-akammu pano di solamu anna malai dibea touo dio: la untahimbokoa' mai'di liu pebea ang sinnoa mai'dinna aka-aka ang dipe'dengngi tama di lite' lambi' tobong. Aka' lite' ang umpake pano di solamu dia tunne' la dipakeingko.”

³⁹Sika napakuhu toi Puang Yesus yaling di mesa pohapangang naoatee, ”La malaraka to buta untehte santobutanna? Daraka la sahing manaho naung di kalo'?

⁴⁰Noa tunne' daete' aha mesa pahsikola la keangka' puha andana tuangkuhunna, ampo' mesa pahsikola ang tamma'mi la umpensinnoai nei' tuangkuhunna.

⁴¹Akarea' dio anna malakoa' ungngita sahihsi' yaling di matanna solamu, ampo' daine' ungngita kayu sambehsä' yaling di matammu tobou dio?

⁴²Umbang dio la umpanoa ungngalaiing sahihsi' yaling di matanna solamu, aka' aha ture dio sambehsä' kayu yaling di matammu tobou dio? Oa' ingkämmu to kalasi, alaiia' dolu yato sambehsä' kayu ang aha yaling di matammu anna malai ungngita ungngalaiing yato sahihsi' ang aha yaling di matanna solamu.”

⁴³Napatahhi' bumi tula'na Puang Yesus naoatee, ”Poang kayu ang inang si biasa mammi' boana, daete' aha la ungkeboaing boa ang dai mammi'. Noa tunne' poang kayu ang inang si dai mammi' boana, daete' aha la ungkeboaing boa ang mammi'.

⁴⁴Aka' mesa poang kayu mala diinsang ponna ke diitang boana. Aka' la malarakae' tau umponge' boa kayu di hao mai di lolo päräng? Bahtu' umponge' boa pinamula di hao mai di balimbano?

⁴⁵Tau mapia mengngoya' mapia tubunte' aka' inang noa tubunne' ang yaling di inahanna, anna tau karake mengngoya' karake tubunte' aka' inang noa tubunne' yaling di inahanna. Aka' ingkänna aka ang ditula' sule yalingngete' mai di ihsi inaha.

⁴⁶Nalombungngi bumi tula'na Puang Yesus naoatee, ”Akangnga' suhummu unsangaiä' Puang, ungngoatee, ‘O Puang,’ ampo' daia' ungngaku umpembabeing aka ang kupakuhuingkoa'?

⁴⁷La kupaitaikoa' umba la noa pano di tau ang sule mellumbaä', umpehingngii inde tula'ku anna napembabeing yaling di katuhoanna.

⁴⁸Tau ang noa yatoo la kupasihapanne' mesa tau ang umpake'de' manahpa dasanna. Yato tau mambombeng napamanaung liu anna napampake'de'ii ahhi ang matoto' si'da-si'da. Dahi moi la käyyäng umba noa uhai buntu' sule unghoa yato dasanna, ampo' inang tala tiaka aka' matoto' si'da-si'da ahhinna.

⁴⁹Ampo' pano di tau ang umpehingngii tula'ku ampo' dai napembabeing, la kupasihapanne' mesa tau ang umpake'de' dasanna ampo' maloyo aka' dai napamatoto' ahhinna. Tahpana sule uhai buntu' unghoa yato dasanna, ya' loe siang sitale-tale.”