Read Aralle-Tabulahan Yohanes 1 Bible Online

Yohanes 1 - Aralle-Tabulahan bible

Yohanes 1

¹Uhu-uhuna naonge dake' dipadahi inde lino, inang ahang Bahtakara. Yato Bahtakara sibaha Puang Alataala anna yato Bahtakara dianto Puang Alataala.

²Mengkalao dolu inang sibaha lolong Puang Alataala.

³Ingkänna-ingkänna siamo napadahi asang Puang Alataala ungngolai Bahtakara. Dai aha moi poro la mesa ang dahi ke dai ungngolai yato Bahtakara.

⁴Yaling yato di Bahtakara aha katuhoang anna yato katuhoang dianto ballo ang umballoi ingkänna hupatau.

⁵Yato ballo mesilo yaling di kamalillingang, anna inde kamalillingang dai mala umpi'dei pesilona yato ballo.

⁶Suleng mesa pesuona Puang Alataala ang disanga Yohanes.

⁷Sule umpepainsangnging yato ballo anna malai ingkänna tau mampetahpa'.

⁸Inde Yohanes tadiaete' diang yato ballo, ampo' supu kalente' nei' mampepainsangnging.

⁹Yato ballo ang setonganna, ang la umballoi ingkänna to lino, mentamang inde di lino.

¹⁰Mentamang inde di lino anna inde lino inang dipadahi ungngolai inde Bahtakara, ampo' moinnakato noa dai sika nainsang naoate menna Yato setonganna.

¹¹Sule umpellambi'i bohtona toboe', ampo' dai natahimbo sola bohtona.

¹²Ampo' pano di ingkänna tau ang mantahimbo nabea nei' kakuasaang anna malai mendahi änä'-änä'na Puang Alataala, dianto ingkänna tau ang mampetahpa' pano.

¹³Inde mai tau ang mendahing änä'-änä'na Puang Alataala, dai aka' supung dahi di hao mai di mentolinona, bahtu' aka' pampemala to lino, ampo' aka' Kalaena Puang Alataala ang mepadahi.

¹⁴Yato Bahtakara menghupataung anna tohhoi yaling di alla'-alla'ta, lambi' mala taita kamatandeanna, dianto kamatandeang ang nabea Ambeta Puang Alataala pano di Änä' samboana. Ungngolai yato Änä' lambi' mala tasa'ding pa'kalemunna sibaha katahpa'anna Puang Alataala.

¹⁵Yohanes untula' kasa'bianna didiona yato Bahtakara naoatee, ”Dianto indee ang kuoaintee, ‘La sule napelolaiä' ang ma'kuasa puha nei' andana kodi', aka' inang dakä' kodi' dahi anna inang ahang nei'.’ ”

¹⁶Punno pa'kalemu di hao di Kalaena. Dai aha nabolinna nabeheingkea'.

¹⁷Yato Atohang napainsangngiingkea'ne' Nabi Musa, ampo' pa'kalemunna anna katahpa'anna Puang Alataala tatahimboa' nei' ungngolai Puang Yesus, To Dilanti' la Mepasalama'.

¹⁸Dake' aha moi poro la mesa tau ang hali ungngita Puang Alataala, supung Änä' samboana ang sinnoa siang Puang Alataala Ambena anna matama liu kasikenteanna. Dianto ang mampepaitaing umba noa setonganna Puang Alataala pano di kita'.

¹⁹Ingkänna to pambahananna to Yahudi yaho di Yerusalem unsuo sangngaka-sangngaka imang sibaha peänä'anna Lewi ang senga' mao pano di Yohanes do nakutanai naoatee, ”Mennao inde setonganna?”

²⁰Nasindohoing natimba' Yohanes naoatee, ”Tadiaä' to Dilanti' la Mepasalama'.”

²¹Nakutanai salang naoaintee, ”Ponna noa nee, ya' mennao? Nabi Eliarakako?” Natimba' bung Yohanes naoatee, ”Tadia.” Nakutanai bumi naoaintee, ”Dioraka inde Nabi ang la sule?” Natimba' bumi Yohanes naoatee, ”Tadia.”

²²Naoa bumintee, ”Ponna noa yatoo, ya' tula'ingkang mennao setonganna anna kiinsangngi kitula'ing pano di tau ang mansuoang, ke kihingnging tula'mu didiona kalaemu.”

²³Natimba' Yohanes naoatee, ”Kodi'mito indee ang puha natula' lohpo' Nabi Yesaya naoatee, ‘Aha tau kakoha-koha di hao di ongeang makä'däng naoatee: Pamarohoing lalang ang la naola Puang.’ ”

²⁴Di alla'na yato tau ang disuo umpellambi'i Yohanes aha sangngaka-sangngaka to Farisi.

²⁵Sika mekutana bumi naoatee, ”Ponna ke tadiao To Dilanti' la Mepasalama', tadiao Nabi Elia, tadia burako Nabi ang puha didandi la sule, ya' akana mantero'o?”

²⁶Mentimba'mi Yohanes naoatee, ”Kodi' supung mantero'ä' umpake uhai. Ampo' yalingnga' di alla'-alla'mu dinoa aha mesa tau ang daia' ungnginsang.

²⁷Dianto ang sule mampelolaiä', ampo' moi la mensabua' pälli'ä' di olona, datukä' sihatang.”

²⁸Kaha-kaha yatoo dahi di hipe di Bohto Betania, tando di katimbingang allona Salu Uhai Yordan ang naongei Yohanes mantero'.

²⁹Tahpana marondonna Yohanes ungngita Puang Yesus sule napellambi'i. Ya' ma'karang Yohanes naoatee, ”Itaia', Dianto indoo Änä'na Puang Alataala napasihapang Änä' Domba ang la napake umpa'dai dosanna to lino.

³⁰Dianto yato ang hali kutula' dolu, la sule napelolaiä' ang ma'kuasa puha nei' andana kodi', aka' inang dakä' kodi' dahi anna inang ahang nei'.

³¹Uhuna datoi ko kuinsang kuoate menna inde setonganna. Ampo' setonganna nasuhung suleä' mantero' umpake uhai anna malaia' ungnginsang to Israel ungngoate menna Yatoo.”

³²Nasa'bii toe' Yohanes naoatee, ”Kuita toe' Inaha Masero tuhung yaho mai di langi' sinnoa dangang-dangang menghampo yaho di hahona anna tohhoi.

³³Donetoo dake' kuinsang menna Yatoo. Ampo' inang puhaä' napa'karai Puang Alataala ang mansuoä' mantero' umpake uhai naoaingkä'tee, ‘Ponna ke ungngitao Inaha Masero tuhung yaho mai di langi' anna tohhoi yaho di hahona mesa tau, ya' yato tau ang nakahampoi Dianto ang la metero' umpake Inaha Masero.[1]’

³⁴Anna yato Inaha Masero kuita si'dang lambi' kusa'bii kuoatee Dianto yatoo Änä'na Puang Alataala.”

³⁵Marondonnai di hao bung Yohanes yato di ongeanna sibaha derua to pentindo'na.

³⁶Ungngitanna Puang Yesus liu, ma'karang naoatee, ”Itai, Dianto indoo Änä'na Puang Alataala napasihapang Änä' Domba.”

³⁷Yato derua to pentindo'na unghingngi aka ang natula' Yohanes, ya' le'ba'mi untindo' Puang Yesus.

³⁸Mensaileng Puang Yesus pano di kebo'na, ya' ungngitang yato to derua mentindo'. Nakutanaing naoaintee, ”Aka umpeängnga'?” Sika mekutana salang naoatee, ”Rabi, (bahtuanna: O Tuangkuhu), umba ungngonge tohho?”

³⁹Mentimba'mi Puang Yesus naoatee, ”Maikoa' anna ungngita toboia' dio kalaemu.” Donetoo umbai tehte' uhpa' maloe. Ya' maong sibaha-baha anna naitai ang naonge tohho lambi' bengi.

⁴⁰Di alla'na yato derua tau dianto ta Andreas, ullu'na ta Simon.

⁴¹Napenandai siang ta Andreas le'ba' undaka' ta Simon anna naoaintee, ”O Simon, puhamang sitammu yato Mesias.” (‘Mesias’ sinnoa siang ‘Kristus’ bahtuanna: To Dilanti' la Mepasalama'.)

⁴²Sumule bung Andreas pano di Puang Yesus umposola ta Simon. Tahpana naita, ma'karang Puang Yesus pano di ta Simon, änä'na ta Yona, naoainte, ”O Simon, la disangaio dio: ‘Kefas.’ ” (‘Kefas’ sinnoa siang ‘Petrus’ ang bahtuanna: batu.)

⁴³Marondonnai nabohtung Puang Yesus la mao tama di Galilea. Yaling di pellaoanna lutama sitammu ta Filipus. Naoamintee, ”O solasohong, maio tindo'ä'!” Ya' mentindo' siang.

⁴⁴Inde ta Filipus mesa to Betsaida, sola bohtona ta Andreas anna ta Petrus.

⁴⁵Pihsananna inde ta Filipus sitammu ta Natanael, naoamintee, ”O leä, kilambi'mi yato Tau ang hali natula' Nabi Musa yaling di Suha' Masero, Yato ang nauki' ingkänna nabi! Dianto Puang Yesus, änä'na ta Yusuf, to Nazaret.”

⁴⁶Ampo' natimba' Natanael naoatee, ”Pake la aharakae' ang mapia sule di hao mai di Nazaret?” Natimba'mi Filipus naoaintee, ”Ya' maio anna ungngitai kalaemu.” Ya' le'ba' si'dang do naita.

⁴⁷Tahpana Puang Yesus ungngita ta Natanael sule, ma'tula'mi naoatee, ”Itaia' indo tau dianto to Israel si'da-si'da ang tinahpa'.”

⁴⁸Mekutanang ta Natanael naoatee, ”Akana malaä' ungnginsang, Tuang?” Natimba'mi Puang Yesus naoaintee, ”Mane la mao ta Filipus natambaio anna inang kuitamo di hao di hoi'na indo poang ara.”

⁴⁹Ya' naoante Natanael, ”O Tuang, Dionto Änä'na Puang Alataala anna Tomarayanna to Israel!”

⁵⁰Naoa salaminte Puang Yesus, ”Supungka umpetahpa'ä' aka' kuoaingkotee inang kuitamo di hao di hoi'na poang ara? Ya' la ungngitake' kaha-kaha ang käyyäng puha!

⁵¹Kutula'ingko setonganna la ungngitao langi' tibilläng, anna Kodi' inde Änä' to Lino la sihapangngä' eheng suruka ang la naola malaeka'na Puang Alataala mahka dai' mahka tuhung.”[2]