Read Aralle-Tabulahan Yohanes 10 Bible Online

Yohanes 10 - Aralle-Tabulahan bible

Yohanes 10

¹Nalombungngike' tula'na Puang Yesus naoatee, ”Kutula'ingkoa' setonganna ponna ke ahai tau ang mentama di hala domba, anna dai mangngola baba ang si biasa diola tama, ampo' lumelene' dai' di hala, ya' tau yatoo setonganna to pabokoetee' bahtu' tau karake.

²Ampo' panone' di tau ang mentama mangngola baba, dianto yatoo to pangkambi'.

³Pano di tau ang noa indee, la nabuhkeiinne' baba yato to pandaka anna malai naola tama. Inde tau la untambai simesa-mesa ingkänna dombana situhu' sanganna anna napasohongngi. Noa tunne' yato dombana la umpehingngii kamahanna yato to pangkambi'.

⁴Ponna ke napasohong asammi yato ingkänna dombana, ya' mellaong yato to pangkambi' nakadoluangngi, anna yato dombana la mentindo' aka' nainsang napekamaha.

⁵Ampo' pano di tau senga', daine' la napentindo'i yato domba, supung la sisähä'-sähä' napellei, aka' dai biasa nahingngi kamahanna.”

⁶Ingkänna indee natula' Puang Yesus pano diii yaling di pohapangang, ampo' dasiang sika napebahtuang aka yato ang natula'.

⁷Nalombungngike' tula'na Puang Yesus umpakaleso yato pohapanganna naoatee, ”Kutula'ingkoa' setonganna Kodi'mito indee sihapang babana yato hala domba.

⁸Ingkänna to pampakuhu senga' ang mampendoluiä' sule diangka'ne' to paboko anna tau karake. Anna yato ingkänna domba dai napehingngii.

⁹Kusulei salake' kuoatee: Kodi'mito indee baba. Menna ang mentama naolaä' dianto ang la salama' sihapang domba ang beba' lutama luyaling mai anna la ullambi' andeang.

¹⁰Kasuleanna to paboko dianto anna malai maboko, papateang anna pakarakeang. Ampo' kasuleangku Kodi', dianto anna malai ingkänna tau ullambi' katuhoang anna yato katuhoang dai aha nakalala'i.

¹¹Kodi'mito indee to pangkambi' ang handang mapia. Ang dioainte to pangkambi' ang handang mapia dianto ang umbeho sungnga'na anna malai salama' yato ingkänna dombana.

¹²Tau ang disahoi mangkambi', ang tadia puänna yato domba, la le'ba'ete'ne' lumumpa' umpellei yato domba ke ahai sule olo'-olo' peande. Lambi' yato domba la naande anna napasisähä'-sähä' yato olo'-olo' peande.

¹³Nasuhung napanoa yatoo aka' supung nainsang untahimbo sahona. Dianto anna dang undakai manahpa yato pangkambi'na.

¹⁴Kusulei salake' kuoatee: Kodi'mito indee to pangkambi' ang handang mapia. Umbehoä' sungnga'ku anna malai salama' yato pangkambi'ku. Aka' sika kuinsang yato ingkänna dombaku anna nainsang touä' nei', sinnoa nainsangngä' Ambeku anna kuinsang tou nei'.

¹⁶Ahake' dombaku ang senga' ang dake' mentama di pa'mesaanna inde dombaku ang aha dinoa. Dia tuntone' yatoo pahallu kutehte anna sika la umpehingngii kamahangku, lambi' la sika ma'mesa toe' anna mempakoi tama inde di dombaku ang ahang dinoa untuhu'i mesa to pangkambi'.

¹⁷Nakalemuiä' Ambeku aka' sadiaä' la umbeho sungnga'ku, mane kualai sumule.

¹⁸Dai aha mesa tau la manghampa'iä'. Yato kubeho aka' pampemalangku tobou Kodi'. Ma'kuasaä' kubeho anna ma'kuasa touä' kuala sumule. Dianto indee durungang ang kutahimbo yaho mai di Ambeku.”

¹⁹Donetoo kende'mi kasibehtaang di alla'na to Yahudi aka' unghingngi tula'na Puang Yesus.

²⁰Lambi' ahang piha ang mangngoatee, ”Daumpehingngiia' indo tau, aka' umbai napentamaiete' setang, ke dai tahta'!”

²¹Ampo' aha toe' ang mangngoatee, ”Daete' mala ma'kara noa indo tau ke napentamaii setang! La miorakae' setang umpapennenne' to buta?”

²²Yaho di Yerusalem ingkänna tau lella' umpakahoa' pa'rame-rameang Pengkakalehaang Pantabisang Dasang Ada'. Donetoo sipatu tempo kamadingingang.

²³Lella'ne' Puang Yesus ma'saleo-leo di hao di Serambi Salomo yaling di Dasang Ada'na Puang Alataala,

²⁴ya' suleng sangngaka-sangngaka to Yahudi ungkulimboi Puang Yesus anna sika mekutanai naoatee, ”O Tuang, sangngakake' masaena la umpabata-bata loloang? Dinoa tula'ingkang setonganna ke inang Dio si'dang inde To Dilanti' la Mepasalama'.”

²⁵Sika natimba'mi Puang Yesus naoantee, ”Puha siamokoa' kutula'ing, ampo' daia' ungngaku umpetahpa'. Ingkänna pengkähängang ang yaling di sanganna Ambeku, dianto ang mendahi buhti pano di Kalaeku.

²⁶Ampo' daia' ungngaku umpetahpa' aka' dakoa' mentama di kamesaanna ingkänna ang kupasihapang dombaku.

²⁷Yato dombaku umpehingngii kamahangku anna sika napentindo'iä'. Anna sika kuinsang si'da-si'da.

²⁸La sika kubea katuhoang lambi' sapano-panona anna dai la sika tallang. Dai aha moi poro la mesa tau ang la manghampa'iä'.

²⁹Yato ingkänna dombaku dianto Kalaena Ambeku mambeaä' ang dai aha mantondong kakuasaanna. Dahi inang daete' aha ang la mangngala di hao mai di teyyena Ambeku.

³⁰Kodi' anna Ambeku mesaang.”

³¹Ya' pantang bung yato to Yahudi undohe' batu la unsaleba'i Puang Yesus.

³²Ampo' tahpa sika naoaintee Puang Yesus, ”Ungngitangnga' mai'di liu kahängäng mapia ang kubabe ang napadurungngiingkä' Ambeku. Dahi, kähängang aka ang kubabe ang umpesalaingnga' lambi' la unsaleba'iä'?”

³³Sika mentimba'mi yato to Yahudi naoatee, ”Tadia aka' ne pengkähängang mapia ang umbabe lambi' la kisaleba'io, ampo' aka' untula' tahuhuo sanganna Puang Alataala. Londonang aka' kiinsang mesa touo Dio tau biasa, ampo' akana la umpasinnoao Kalaemu Puang Alataala?”

³⁴Sika natimba' bung Puang Yesus naoaintee, ”Darakate' aha tiuki' tula'na Puang Alataala yaling di Suha' Maseromua' naoatee, ‘Diongnga'to indee dehata’?[6]

³⁵Tainsangnga' para-para taoatee, aka ang tiuki' yaling di Suha' Masero la tontong lolo tahpa' lambi' sapano-panona. Dahi ponna Kalaena Puang Alataala unsangai ‘dehata’ pano di tau ang mampehingngii tula'na,

³⁶ya' akana untanda'ä'a' untula' tahuhu Puang Alataala aka' kuoatee, ‘Änä'naä'’? Anna inang napataniä' Ambeku anna nasuoä' tama inde di lino.

³⁷Ponna ke dä' umpembabeing kähängang ang napadurungngiingkä' Ambeku, ya' malato dä'a' umpetahpa'.

³⁸Ampo' aka' kupembabeing ingkänna yatoo, dahi petahpa'ia' yato aka ang kubabe, moinnakatoo anna daia' ungngaku mampetahpa' pano di Kodi'. Aka' yalinna yatoo la malaa' umpähäng umba noa naposolai loloä' Ambeku anna tohho yaling di Kalaeku; noa tumä' Kodi' tohhoä' yaling di Ambeku.”

³⁹Donetoo yato to Yahudi pemalang sika unsahka Puang Yesus, ampo' le'ba' ungngalai Kalaena.

⁴⁰Mane le'ba'i lubete' di tando bete'na Salu Uhai Yordan, yato ang naongei dolu mantero' Yohanes to Pantero', anna tohhoi di hipe.

⁴¹Suleing mai'di tau mallumba anna situla'-tula'i naoatee, ”Daine' aha umbabe tanda ang mepusa'-pusa' Yohanes, ampo' ingkänna ang natula' didiona inde tau tahpa' asang.”

⁴²Donetoo mai'di liu tau di hipe ang mampetahpa' pano.