Read Aralle-Tabulahan Yohanes 11 Bible Online

Yohanes 11 - Aralle-Tabulahan bible

Yohanes 11

¹Aha mesa tau ang disanga Lazarus, tohho yaho di Bohto Betania sibaha derua ullu'na, dianto ta Maria anna ta Marta.

²(Inde Maria dianto mesa bahine ang hali umminnä'i bihti'na Puang Yesus umpake minnä'-minnä' bomammi' anna napahsii beluhä'na.) Pihsang tempo yato ta Lazarus, makorong maho.

³Inde derua ullu'na umpasang Puang Yesus naoatee, ”O Puang, inde ullu'ki' ang umpakamaya, makorong maho dinne.”

⁴Tahpana nahingngi Puang Yesus yato kaheba, ma'tula'mi naoatee, ”Inde korong, katämpä'anna daete' la umbaha kamateang pano di Lazarus, ampo' la umpatandaang kamatandeanna Puang Alataala. Noa tunne' anna malai dipamatande Änä'na.”

⁵Puang Yesus inang umpakamaya inde tallu to siullu'.

⁶Ampo' naonge napekahebai didiona kamakoronganna Lazarus, naangka'ike' Puang Yesus tohho di hoi' di ongeang ang naongei dongngallo masaena.

⁷Puhai yatoo ma'tula'mi Puang Yesus pano di pahsikolana naoatee, ”Maikoa' talao bou sumule dai' di Yudea.”

⁸Sika naoante yato pahsikolana, ”O Tuang, mane di pihhang tiing anna sika pemalai tau yaho la nasaleba'io batu. Akana la mao burako dai' dinoa?”

⁹Naoatee Puang Yesus, ”Yaling di sangngallo aha sampulo derua tehte', dahi tau ang mellao di allo, daete'ne' la titero aka' naballoi nei' pesilona mata allo.

¹⁰Ampo' tau ang mellao di bengi di tempo kamalillingang la titeroete'ne' pano di batu aka' dai aha mamballoi. Dahi daummahea'a', aka' sibahakingkea'.”

¹¹Noanto inde tula'na Puang Yesus. Mane nalombungngi salake' tula'na naoatee, ”Solasohonta Lazarus haheng. Ampo' la maoä' do kuheke.”

¹²Sika naoante pahsikolana, ”O Puang, ponna ke malae' hahe, ya' bahtuanna la bono'etee'.”

¹³Ang napihki' Puang Yesus nasuhung naoate ‘hahe,’ dianto bahtuanna: mateetee', ampo' nasangane' pahsikolana hahe sinnoa biasa.

¹⁴Dianto anna nasindohoing Puang Yesus naoatee, ”Lazarus mateng.

¹⁵Ampo' malanto dä' yaho anna malai ungngolai kaha-kaha indee la tuhtuang matamaa' kapampetahpa'ammu. Dahi dinoa talaomokoa' dai'.”

¹⁶Ma'tula'mi ta Tomas, ang si disangai toe' ‘To Hambung,’ pano di sola pahsikolana naoatee, ”Maikoa' talao mempola di tuangkuhunta anna mateingkea' sibaha.”

¹⁷Lambi'na Puang Yesus dai' di Betania, ya' inang uhpa'mi benginna Lazarus puhanna diku'bu'.

¹⁸Inde Bohto Betania sidungku' Yerusalem, umbai tallu supu kilo makahaona.

¹⁹Mai'di to Yahudi ang sule yaho ullumba Marta anna Maria anna malai napakahanga ungngoloi kamateanna ullu'na.

²⁰Tahpana nahingngi ta Marta didiona kasuleanna Puang Yesus, ya' tahpa le'ba'mi do natammui, ampo' tohhone' ta Maria di hao di dasanna.

²¹Ma'karang Marta pano di Puang Yesus naoatee, ”O Puang, ke la dinneone' donetoo, ya' tantu anna daete' la mate inde ullu'ku.

²²Ampo' moinnakato noa, kuinsang si'da-si'da dinoa kuoatee aka ang la umpalau dai' di Puang Alataala tantu anna nabeao.”

²³Ma'tula'mi Puang Yesus pano di ta Marta naoatee, ”La tuhoete' sumule ullu'mu.”

²⁴Mentimba'mi naoatee, ”Kuinsang kuoatee inang la tuho sumule Lazarus ke dipatuho asammi to mate di allo katämpä'anna lino.”

²⁵Ma'tula' sala bung Puang Yesus naoatee, ”Kodi'mito indee ang mala umbea katuhoang pano di tau anna mala umpatuho sumule to mate. Tau ang mampetahpa' pano di Kodi' la tuho moinnakato mateng.

²⁶Anna tau ang tuhoke' ke mampetahpa'i pano di Kodi', inang dai aha la ungngolai kamateang di mendehatanna lambi' sapano-panona. Umpetahpa'raka indee?”

²⁷Mentimba'mi naoatee, ”Io, Puang, kupetahpa' Dionto Änä'na Puang Alataala, To Dilanti' la Mepasalama' ang la tama inde di lino.”

²⁸Puhanna ma'kara ta Marta, ya' le'ba' siang do untambai ta Maria nakuti' naoaintee, ”Di hao dono indoo Tuangkuhunta, natambaio.”

²⁹Nahingnginna yato Maria, napenandai siang ke'de' anna le'ba'i do untammui Puang Yesus.

³⁰Donetoo dake' lambi' tama di alla' bohto Puang Yesus. Di haoke' yato di aneanna bohto ang naongei sitammu ta Maria.

³¹Yato tau mai'di ang sulei di hao di dasanna mampakahanga ungngita Maria tahpa napenanda-nandai le'ba'. Ya' sika melola tung nei' aka' nasanga la mao pano di ku'bu' do undusengngi ullu'na.

³²Ullambi'na Puang Yesus, ya' tahpa malimuntu'mi di olona menomba anna ma'karai naoatee, ”O Puang, ke la dinneone' donetoo, ya' tantu anna daete' la mate inde ullu'ku.”

³³Tahpana Puang Yesus ungngita Maria museng, sibaha yato tau mai'di ang nasibahaing dumuseng toe', ya' manahong inahanna naita anna masuhsa liu nasa'ding.

³⁴Mekutanang pano diii naoatee, ”Umba umpangku'bu'ia'?” Sika mentimba'mi naoatee, ”Maio, Puang, anna la ungngitai.”

³⁵Ya' musemmi Puang Yesus.

³⁶Ma'tula'mi yato tau mai'di naoatee, ”Itarea' tandana umpakamaya liu Lazarus!”

³⁷Ampo' aha sangngaka-sangngaka di alla'na yato tau mai'di mangngoatee, ”Akae' anna mioe'ne' umpapennenne' to buta anna la dae' mala umpabono' Lazarus anna dai mate?”

³⁸Donetoo manaho bung inahanna Puang Yesus, mane maoi pano di ku'bu'na Lazarus. Yato ku'bu' dianto mesa leäng ang dilapa' batu käyyäng.

³⁹Ma'tula'mi Puang Yesus naoatee, ”Kisu'ia' ne batu pelapa'na.” Ampo' mentimba' ta Marta naoatee, ”O Puang, bouri'mi aka' uhpa'mi allona puhanna diku'bu'!”

⁴⁰Naoante Puang Yesus pano di Marta, ”Darakae' halimo kuoaintee: Ponna mampetahpa'o mai di Kodi', ya' la ungngitarakotee' kakuasaanna Puang Alataala.”

⁴¹Ya' sika nakisu'mi yato batu pelapa'na ku'bu'. Puhai yatoo mentongang Puang Yesus dai' di langi' anna ma'sambayangngi naoatee, ”Kuhhu'sumanga' kuängkä' mating di Dio, Ambe', aka' umpehingngiimo palaungku.

⁴²Kuinsang kuoatee si umpehingngii lolo ingkänna palaungku, ampo' nasuhung kutula' noa indee anna malai inde mai tau ang aha dinne dinoa napetahpa' naoatee Dionto ang mansuoä' sule.”

⁴³Puhanna ma'sambayang dai' di Ambena, ya' mekohang napekäyyängngi naoatee, ”O Lazarus, sohongngo!”

⁴⁴Yato to mate sohong si'da yaling mai, tontongke' tibalung teyyena anna bihti'na anna noa toi lindona napoto' tuke'ne' pebalung. Ma'tula'mi Puang Yesus naoatee, ”Alaiia' indo pebalunna anna malai beba' mellao.”

⁴⁵Donetoo mai'di to Yahudi ang sule ma'tomate di hao di dasanna ta Maria ungngita yato kadahiang ang nababe Puang Yesus lambi' sika mampetahpa' pano.

⁴⁶Ampo' aha sangngaka-sangngaka tau di alla'na ang le'ba' pano di to Farisi unghahpo' yato aka ang mane puha nababe Puang Yesus.

⁴⁷Dianto to Farisi anna kapala-kapala imang anna umpaahai pa'limboang sibaha To Mahkeada' untula' didiona Puang Yesus. Sika naoatee, ”Akangnga' inde la tababe? Aka' yato tau umbabee' mai'di kaha-kaha ang mepusa'-pusa'.

⁴⁸Ponna la tapabei loloa' napanoa, ya' la mampetahpa' asang ingkänna tau anna tuhtuang mai'dii to pentindo'na. Ponna noa yatoo, ya' la mahea' to pa'pahentana to Roma lambi' la umpahenta tantarana ungkarakei inde Dasang Ada'na Puang Alataala anna kita' toua' to Yahudi la nakarakei.”

⁴⁹Ampo' aha mesa tau di alla'naii ang disanga Kayafas, ang setonganna handang pongkahana imang donetoo, ma'kara naoatee, ”Dioa' dai aha aka-aka ungnginsang.

⁵⁰Darakaa' dio umpihki' tama di inahammu ungngoatee ahante' mesa tau dipatei andana la mate asangngingkea' ingkänna to Yahudi?”

⁵¹(Inde ang natula' Kayafas setonganna dai sohong yaling mai di pihki' kalaena, ampo' donetoo mendahi handang pongkahana imang ang untula' lohpo' didiona kamateanna Puang Yesus ang la umpasalama' to Yahudi.

⁵²Anna tadia to Yahudi supu, ampo' yaling inde di kamateanna Puang Yesus lambi' dipopa'mesa ingkänna tau ang tisembu' yaling di lino ang la mendahi petauanna Puang Alataala.)

⁵³Mengkalao donetoo, mopahtuyung ingkänna to pambahananna to Yahudi la umpatei Puang Yesus.

⁵⁴Dianto inde Puang Yesus anna dang umpalanda' Kalaena di olona to pambahananna to Yahudi, lambi' le'ba' umpellei Yerusalem lunaung di Bohto Efraim ang sidungku' ongeang makä'däng anna tohhoi di hoi' sibaha ingkänna pahsikolana.

⁵⁵Donetoo marungku'mi allo pa'rame-rameang Paskana to Yahudi. Mai'di tau sulei di hoi' mai di bohto senga' ludai' di Yerusalem aka' pahallu umpamasero dolu kalaena mane malai umpakahoa' yato pa'rame-rameang.

⁵⁶Lella'mi sika umpeäng Puang Yesus. Tahpana sika ma'mesa-mesang yaling di Dasang Ada'na Puang Alataala, ya' sikutana-tanaing naoatee, ”Umba dio noa pihki'mu, la sulerakae' inde Puang Yesus di pa'rame-rameang, daraka?”

⁵⁷Donetoo kapala-kapala imang sibaha to Farisi inang puhang umpasohong pahenta pano di hupatau naoatee, ”Menna ang ungngita inde Yesus pahallu napenandai nahahpo' umba naongei anna malai disahka.”