Read Aralle-Tabulahan Yohanes 12 Bible Online

Yohanes 12 - Aralle-Tabulahan bible

Yohanes 12

¹Tahpana la unnundang allona anna la dipahandu'mi pa'rame-rameang Paskana to Yahudi, le'ba'mi Puang Yesus dai' di Betania, bohtona ta Lazarus ang puha napatuho di hoi' mai di kamateang.

²Lambi'i dai', sika natammuing anna natosule käyyängngi, natahiai ta Marta. Di alla'na ang mohko' mande donetoo dianto ta Lazarus sibaha-baha Puang Yesus anna to sule senga'.

³Pihsananna suleng ta Maria ullumba Puang Yesus umbaha umbai setangnga lite' minnä-minnä' ang bomammi' si'da-si'da, disanga ‘narwastu.’ Inde minnä-minnä' dai aha bängki'na anna masu'li' allinna. Natolloiming bihti'na Puang Yesus, mane napahsii beluhä'na. Lambi' inde huäng dasang bomammi' si'da-si'da napobua' yato minnä'-minnä'.

⁴Ampo' mesa di alla'na pahsikolana Puang Yesus ang disanga Yudas Iskariot, dianto ang la umbalu' Puang Yesus ke dako'mi, ma'kara naoatee,

⁵”Akana dae' ne dibalu' minnä'-minnä' anna malai allinna disusa pano di to pemase-mase, aka' ke dibalu'i umbai pa'sahtaungang nasaho mesa tau allinna.”

⁶(Ma'tula' noa inde ta Yudas dai aka' ungkalemui si'da to pemase-mase, ampo' aka' si umbokoi doi' ang nabe'bei, aka' inde Yudas dianto to pambe'bei doi'na ingkänna sola pahsikolana.)

⁷Naoaminte Puang Yesus, ”Akana la unsängkäirako dio inde bahine ke napanoai? Aka' inde ang nababe sihapangngete' umminnä'i lohpo' bahkeku dolungku la mate.

⁸To pemase-mase nei' dakoa' lengka' la sibaha lolo, ampo' Kodi' daingkea' la sibaha lolo.”

⁹Donetoo mai'di to Yahudi mangnginsang naoatee di hao di Betania Puang Yesus. Dahi sika le'ba'ing pano, ampo' tadia Puang Yesus supu la sika nalumba, ampo' pemala toe' sika ungngita Lazarus ang puha napatuho sumule Puang Yesus di hoi' mai di kamateang.

¹⁰Dianto anna mopahtuyung kapala-kapala imang la umpatei toe' Lazarus,

¹¹aka' diaete' lambi' mai'ding to Yahudi umpellei pepakuhunnaii anna umpetahpa'i Puang Yesus.

¹²Marondonnai yato tau mai'di ang sulei umpakahoa' pa'rame-rameang Paskana to Yahudi yaho di Yerusalem sika napekaheba naoatee yalimmi di pellaoang Puang Yesus ludai' di Yerusalem.

¹³Ya' para-parang sika ungngala palapa mahäti', ang la naampa' naung di lalang tandana napakeangka', anna do natammuii sibaha kakahsiang, lella' siang sika koha naoatee, ”Pudii sanganna Puang Alataala! La dibehe Inde ang nasuo sule, dianto Tomarayanna to Israel!” [7]

¹⁴Ullambi'mi mesa änä' keledai Puang Yesus, ya' napensakeing lambi' sundung pole' ang aha tiuki' yaling di Suha' Masero naoatee,

¹⁵”Daummahea' ingkämmua' to Yerusalem. Itaia' suleng Tomarayammu umpensakei mesa keledai ang mahäti'ke'.” [8]

¹⁶Donetoo dake' nainsang napebahtuang ingkänna pahsikolana yato aka ang dahi. Ampo' tahpana tuho sumule Puang Yesus di hoi' mai di kamateanna anna dai'i di suruka, mane sika napebahtuangngi pole' aka kalemba'anna yato ang tiuki' yaling di Suha' Masero didiona Puang Yesus.

¹⁷Di alla'-alla'na yato tau mai'di aha piha ang puha ungngita Puang Yesus naonge umpatuhoi sumule ta Lazarus di hoi' mai di kamateang. Ya' sika untula'mi kasa'bianna didiona yatoo.

¹⁸Dianto anna saundu' mai'ding tau pemala do unnenne'i Puang Yesus aka' unghingngi kaheba ang mepusa'-pusa' didiona yato ang puha nababe.

¹⁹Ya' sioa-oaminte yato to Farisi, ”Dang aha malaa' tababe. Ita siarea' dio, napentindo'i asammine' ingkänna to lino.”

²⁰Yato ingkänna tau ang mao dai' di Yerusalem la menomba di tempo pa'rame-rameang, aha sangngaka-sangngaka di alla'na to Yunani.

²¹Inde mai to Yunani le'ba' do umpellambi'i ta Filipus, to sule di hao mai di Betsaida di Galilea, anna sika naoaintee, ”O Tuang, pemalaang sitammu Puang Yesus.”

²²Inde ta Filipus le'ba' sala do umpainsangngi ta Andreas, mane sibahai mao do umpellambi'i Puang Yesus anna napainsangngi toi nei'.

²³Mentimba'mi Puang Yesus pano diii naoaintee, ”Lambi'mi tempona dipalanda' kamatandeanna Änä' to Lino.

²⁴Kutula'ingkoa' setonganna ponna ke dai dilämmä' naung di tampo sallisa' batu pinamula sihapang ungngolai kamateang, ya' la tontong loloetee' sallisa'. Ampo' ponna ke puhang ungngolai kamateang, ya' la tuhtuang membea'etee'.

²⁵Menna ang ungkahimanangngi katuhoanna lambi' ungkahaoi kamadahhaang la bilang nakapa'daiete' yato katuhoanna; ampo' menna ang dai ungkahimanangngi katuhoanna yaling inde di lino, ya' la ullambi'ete' nei' katuhoang ang lambi' sapano-panona.

²⁶Tau ang pemala mendahi suoangku pahallu natindo' si'da-si'daä' anna malai sibaha loloang di umba-umba kuonge. Tau ang noa yatoo la napa'käyyängngi Ambeku.

²⁷Dinoa manaho si'da-si'da inahangku, dahi dai kuinsang aka ang la kutula'. Ampo' dä' mala malau dai' di Ambeku kuoate, ‘Pakahaoingkä' inde kaha-kaha kamadahhaang ang la kuolai,’ aka' nasuhung mentamaä' inde di lino anna malai kuolai inde kaha-kaha.”

²⁸Nalombungngike' tula'na ma'tula' dai' di Puang Alataala naoatee, ”O Ambe', pamatandei sangammu!” Puhanna yatoo, tahpa kahingngiammi kamaha yaho mai di langi' naoatee, ”Puhang kupamatande sangangku anna inang la kupamatande lolo.”

²⁹Yato tau mai'di ang aha di hao donetoo unghingngi yato kamaha anna sika ma'karai naoatee, ”Ui kundängnga'!” Ampo' aha sia tunne' piha ang mangngoatee, ”Tadia, umbai malaeka'naete' Puang Alataala mampa'karai!”

³⁰Ma'tula'mi Puang Yesus pano diii naoatee, ”Indo kamaha kahingngiang tadia aka' kapahalluang Kalaeku, ampo' kapahalluammua'.

³¹Dinoa lambi'mi tempona lino la dihohto', anna yato to pa'kuasa yaling di lino, bahtu' Pongkahana setang, la talong.

³²Anna Kodi', ponna ke dipadai'mä' di ongeang ang malängkä',[9] ya' la kutambai asammi ingkänna tau nalumbaä'.

³³(Natula' noa indee naola umpakaleso umba la noa kamateanna.)

³⁴Sika ma'tula'mi yato tau mai'di pano di Puang Yesus naoatee, ”Situhu' ang kiinsang yaling mai di Suha' Masero, ang dioainte To Dilanti' la Mepasalama' daete' aha la ungngolai kamateang lambi' sapano-panona. Dahi akana ungngoaitee pahallu dipadai' Änä to Lino di ongeang ang malängkä'? Menna ne ang ungngoainte Änä' to Lino?”

³⁵Sika natimba'mi Puang Yesus naoatee, ”Sämpäi'dang supu la tohho kamabayaang yaling di alla'-alla'mua'. Dahi pellaokoa' akinna mabayake' anna dakoa' nakuasai kamalillingang, aka' menna ang mellao yaling di kamalillingang dai la nainsang umba la naola.

³⁶Pampetahpa'koa' pano yato di kamabayaang akinna ahake' yaling di alla'-alla'mua' anna malakoa' mendahi tau ang tuho yaling di kamabayaang.” Puhanna ma'tula' noa yatoo Puang Yesus, ya' le'ba'mi membuni umpellei yato tau mai'di.

³⁷Moinnakato ma'kahupa-hupang tanda ang mepusa'-pusa' nababe Puang Yesus di olonaii, ampo' tontongke' dai sika naaku mampetahpa' pano.

³⁸Lambi' sundung pole' tula'na Nabi Yesaya ang naoatee, ”O Puang, dai kanna' tau ang umpetahpa' kaheba ang kipepainsangnging. Anna pano di menna la umpatandaang inde kakuasaammu?” [10]

³⁹Nasuhung tuhtuang dai sika mampetahpa' aka' inang hali toe' ma'tula' Puang Alataala ungngolai Nabi Yesaya naoatee,

⁴⁰”Puhang kupabuta matannaii, anna kupakala'bang inahannaii. Kupanoa indee andana paitai sibaha matanna, anna andana napähäng pihki'na. Aka' andana sumulei pano di Kodi' lambi' kupabono'.” [11]

⁴¹Ma'tula' noa indee Nabi Yesaya aka' puhang ungngita kakuasaanna Puang Yesus anna inang si natula' lolo.

⁴²Moinnakato noa yatoo, mai'di to Yahudi ang mampetahpa' pano, moi di alla'na to pambahanannaii. Ampo' dai sika bahani naakui di olona tau mai'di, aka' mahea' pano di to Farisi la daine' sika napabei mentama di pa'sambayanganna.

⁴³Aka' sika nakärä'i puha nei' napa'käyyängngi hupatau andana la napa'käyyängngi Puang Alataala.

⁴⁴Ma'karang Puang Yesus napekäyyängngi naoatee, ”Tau ang mampetahpa'ä' setonganna tadiaete' Kodi' supu ang napetahpa', ampo' Yato toete' ang mansuoä' sule.

⁴⁵Anna menna ang mangngitaä' ungngita toe' ang mansuoä' sule.

⁴⁶Tamamä' inde di lino sihapang kamabayaang anna malai tau ang mampetahpa'ä' dai la tuho yaling di kamalillingang.

⁴⁷Pano di tau ang ungnghingngi pepaturungku ampo' dai naaku napembabeing, tau yatoo la ditahungkung, ampo' tadia Kodi' ang la mantahungkung. Aka' kasuleangku tama di lino, dä' la untahungkung to lino, ampo' sika la kupasalama'.

⁴⁸Pano di tau ang dä' mampetahpa' anna dai naaku untahimbo tula'ku, tau yatoo la ditahungkung ke lambi'mi allo katämpä'anna lino, situhu' tula' ang haling kupepainsangnging.

⁴⁹Aka' inde ang kutula', tadiaeto Ko tula' Kalaeku, ampo' tula'naete' Ambeku ang mansuoä' sule. Anna Dianto ang mampahe'ä' umpalambi' tula' ang pahallu tama inde di lino.

⁵⁰Anna kuinsang kuoatee yato pepahe'na la mebea katuhoang sapano-panona. Dianto anna kupalambi'mi situhu' aka ang puha napaturuingkä' Ambeku.”