Read Aralle-Tabulahan Yohanes 13 Bible Online

Yohanes 13 - Aralle-Tabulahan bible

Yohanes 13

¹Donetoo di tempona la sangngalloke' anna lambi'mi allo pa'rame-rameang Paskana to Yahudi, inang nainsammi Puang Yesus naoatee dang masae anna lambi'mi tempona umpellei inde lino anna sumulei dai' di Ambena. Umpakamaya liu ingkänna tau ang mendahing petauanna anna inang la napakamaya lolo lambi' kapuhaanna lino.

²Lella' Puang Yesus anna pahsikolana sika mande sibaha-baha, ya' inang napatamaminne' pihki' tahuhu Pongkahana setang di inahanna ta Yudas, änä'na Simon Iskariot, la umbeho Puang Yesus pano di tau ang la mampatei.

³Nainsang Puang Yesus naoatee pano di Kalaena puhang nabeho asangnging ingkänna kakuasaang Ambena. Nainsang toi naoatee sule yaho mai di Puang Alataala anna inang la sumule bou dai'.

⁴Dianto anna ke'de'mi mane ungngalaii kaya' kalambe'na. Puhai yatoo, ungngalang handu' anna napensangke'ing di ähä'na.

⁵Mane umpangngihsii mesa loyang uhai anna mengkuntu'i umbasei simesa bihti'na pahsikolana. Puhai nabasei, ya' napahsiing umpake yato handu' ang napensangke'ing di ähä'na.

⁶Tahpana la umbasei tuminne' bihti'na Simon Petrus, ya' ma'karang Simon Petrus naoatee, ”O Puang, daine' pole' aha lalang la umbaseiingkä' bihti'ku!”

⁷Natimba'mi Puang Yesus naoaintee, ”Inde ang kubabe dinoa, dake'te' ungnginsang umpebahtuang, ampo' mane la ungnginsang ke dako'mi.”

⁸Ma'tula' bung Petrus naoatee, ”Ahana inang dai mala la umbaseiingkä' bihti'ku lambi' sapano-panona, Puang!” Natimba'mi Puang Yesus naoaintee, ”Ponna ke dai kubaseiingko bihti'mu, ya' daeto dio aha bahemu yaling di pengkähängangku.”

⁹Ma'tula' bung Simon Petrus naoatee, ”Ponna noa yatoo, Puang, ya' daa bihti'ku supu umbasei, ampo' basei toingkä'ne' bää'ku anna teyyeku!”

¹⁰Natimba' bung Puang Yesus naoaintee, ”Tau ang puhang mendio' dante' pahallu mendio' sala. Aka' bahahsing kalaena, supurantee' pahallu umbasei bihti'na. Noa tungnga' dio, setonganna bahahsimokoa', ampo' dakangkoa' bahahsi asang.”

¹¹(Nasuhung naoate Puang Yesus, ‘setonganna bahahsimokoa', ampo' dakangkoa' bahahsi asang,’ aka' inang nainsammi menna yatoo ang la mambeho pano di tau ang la mampatei.)

¹²Tahpana puha Puang Yesus umbasei bihti'na pahsikolana, ya' umpakeng sumule kaya'na, mane mohko'i anna ma'karai pano diii naoatee, ”Ungnginsandakaa' aka ang mane puha kubabe mating di dioa'?

¹³Unsangaiä'a' Tuangkuhu anna unsangai touä' Dehata. Anna inang noa si'da yatoo.

¹⁴Dahi, aka' puhamokoa' kubaseiing bihti'mu, Kodi', ang unsanga Dehata anna Tuangkuhummu, ya' pahallu toukoa' dio sitahiai mesa anna mesa.

¹⁵Nasuhung kubabe noa indee, anna malaia' umpadahi pohapangang lambi' membabe toukoa' dio situhu' aka ang puha kubabe.

¹⁶Kutula'ingkoa' setonganna mesa sabua' daete' mala la umpelondoi pongkahana.

¹⁷Ponna ke ungnginsang asammia' ingkänna indee anna umpembabeing, ya' la kahsikoa' aka' nabehekoa' Puang Alataala.

¹⁸Ingkänna inde ang kutula', dai didiona ingkämmua'. Kuinsang tobou Kodi' menna ang puha kupillei, ampo' pahallu dipasundung aka ang tiuki' yaling di Suha' Masero ang naoatee, ‘Tau ang kusibahaing mande dianto ang la mampa'baliä'.’[12]

¹⁹Ingkänna yatoo kupainsangngi lohpo'koa' akinna dake' dahi anna malai ponna ke dahing dako', ya' la ungnginsangnga' ungngoatee, Kodi'mito indee To Tontong Aha.

²⁰Kutula'ingkoa' setonganna menna ang untahimbo tau ang kusuo, ya' bahtuanna natahimbo touä' nei', anna menna ang mantahimboä', ya' bahtuanna untahimbo tou nei' Ambeku ang mansuoä'.”

²¹Puhanna ma'kara noa yatoo Puang Yesus, ya' manaho liung nasa'ding inahanna. Ma'tula' sala bumi naoatee, ”Kutula'ingkoa' setonganna aha mesa di alla'mua' ang la mambalu'ä' pano di tau ang la mampateiä'.”

²²Yato ingkänna pahsikolana sinenne'-nenne'i aka' sika naoatee yaling di inahanna, ”Menna ami indo ang naoaing?”

²³Mesa di alla'na pahsikolana Puang Yesus ang handang napakamaya mohko' di behinna.

²⁴Dianto inde ang nakahubi Simon Petrus anna nasuoi mekutana pano di Puang Yesus naoaintee, ”Kutanaire, leä, menna ne ang naoaing.”

²⁵Mendungku' tatoong yato pahsikola anna mekutanai napaela' naoatee, ”Mennae' ne ang ungngoaing, Puang?”

²⁶Natimba'mi Puang Yesus napaela' naoatee, ”Diamoto tau ang la kubea inde roti ke puhang kutomme' naung inde di kahti, dianto yatoo.” Ya' ungngala si'dang roti Puang Yesus mane natomme'i naung yato di kahti, mane nabeai pano di ta Yudas, änä'na Simon Iskariot.

²⁷Sipatu donetoo, ya' nakuasai siang Pongkahana setang ta Yudas. Naoaminte Puang Yesus, ”Penandaing babei dinoa aka ang pemala la umbabe.”

²⁸Ampo' dai aha moi poro la mesa di alla'na yato ingkänna pahsikolana ang nasibahaing mande ang mangnginsang aka yato bahtuanna tula'na Puang Yesus pano di Yudas.

²⁹Aha di alla'naii ang mansanga Puang Yesus unsuo Yudas la ungngalli kapahalluang ang la sika napake ma'rame-rame. Aha toe' ang mansanga disuo unsusa doi' pano di to pemase-mase, aka' inde ta Yudas dianto to pambe'bei doi'naii.

³⁰Puhanna naande yato roti Yudas, ya' sohommi anna le'ba'i. Donetoo benging.

³¹Tahpana le'ba' ta Yudas, ma'karang Puang Yesus naoatee, ”Dinoa mengeng la dipamatandeä' Änä' to Lino. Anna yato Puang Alataala la dipamatande yaling di aka ang la dahi pano di Kalaeku.

³²Puhanna dipamatande Puang Alataala ungngolai yato ang la dahi pano di Kalaeku, ya' la napamatande touä' nei' Puang Alataala umpake kakuasaanna. Anna indee la baha' dahing.

³³Oa' änä'ku, dang masae anna la sisähä'mingkea'. La umpeängngä', ampo' sinnoa ang puha kutula' pano di to pambahananna to Yahudi pehengi: yato ang la kuongei le'ba' dake'a' dio mala ungngongei pano.

³⁴Kubeakoa' atohang bakahu: sikalemuikoa' mesa anna mesa. Umba noa kukalemuikoa', noa tuntoa' dio: pahallukoa' sikalemui mesa anna mesa.

³⁵Aka' ponna ke sikalemuikoa' mesa anna mesa, ya' la nainsang asammi tau naoatee to pentindo'ku si'da-si'dakoa'.”

³⁶Mekutanang Petrus naoatee, ”O Tuang, umbae Dio la ungngola?” Mentimba'mi Puang Yesus naoatee, ”Ang la kuongei le'ba' dake' dio mala ungngongei, ampo' la aha toboe' tempona malao le'ba' umpentindo'iä'.”

³⁷Mekutanang Petrus naoatee, ”Akaboi Tuang, anna dake' mala kupentindo'io dinoa? Dotante' kodi' mate andana Dio!”

³⁸Naoaminte Puang Yesus, ”Sadia si'darakako mate aka' Kodi'? Kutula'ingko setonganna dolunna la mentuhturuu' mane', la umbahoimä' pentallung!”