Read Aralle-Tabulahan Yohanes 14 Bible Online

Yohanes 14 - Aralle-Tabulahan bible

Yohanes 14

¹Nalombungnging tula'na Puang Yesus naoatee, ”Pamasannangngia' inahammu. Pampetahpa'koa' dai' di Puang Alataala anna pampetahpa' toukoa' nei' pano di Kodi'.

²Di hao di dasanna Ambeku, mai'di ongeang la dionge tohho. Dianto anna la maoä' pano, la do kupatokaingkoa' ongeammu. Aka' ponna ke la dai noa, ya' darea'te' la kutula'ingko mating.

³Anna ponna ke maomä' pano, anna puhang kupatokaingkoa' ongeang, ya' la sumulemä' yaho mai anna kuposolakoa' pano yato di ongeang anna malai umba kuongei, dia tungnga' dio ungngongei.

⁴Ungnginsangnga' lalang yato ang la kuola pano.”

⁵Naoante Tomas pano di Puang Yesus, ”O Tuang, dai kiinsang umba ne ang la ungngola. Dahi umbanne' noa la mala kiinsang ne lalang pano?”

⁶Mentimba'mi Puang Yesus naoatee, ”Kodi'mito indee lalang ang umpalanda' katahpa'anna Puang Alataala anna ang mepatuho. Dai aha moi poro la mesa tau ang la mala dai' di Ambeku ke dä' naolai.

⁷Aka' ponna ke la ungnginsangngä', ya' la ungnginsang tourakoa'te' Ambeku. Anna dinoa ungnginsammia' anna ungngitang menna Yatoo.”

⁸Ma'karang ta Filipus naoatee, ”O Tuang, palanda'ingkang ne Ambe ang ungngoaing, aka' sundummite' pano di kami'.”

⁹Ya' natimba'mi Puang Yesus naoatee, ”Aka' sangngakang masaena sibahaingkea', ya' daloloke' ungnginsang mennaä' indee. Tau ang puhang mangngitaä', ya' puha tunte'ne' ungngita Ambeku. Dahi umbang dio noa la mala ungngoatee, ‘Palanda'ingkang ne Ambe’?

¹⁰Daraka dio umpetahpa' aka' Kodi' yaling siamä' di Ambeku anna Ambeku yaling siang di Kalaeku? Dahi aka ang kutula'ingko mating tadia aka' pangngelo'ku, ampo' sule di Ambeku ang yaling di Kalaeku. Dianto ang umbabe ingkänna yato pengkähänganna.

¹¹Dahi petahpa'mä', aka' Kodi' yaling siamä' di Ambeku anna Ambeku yaling siang di Kalaeku. Bahtu' ke dake' umpetahpa' yato karangku, ya' petahpa'ia' aka' puha ungngita ingkänna yato ang kubabe.

¹²Kutula'ingkoa' setonganna tau ang mampetahpa'ä' la umbabe toe' sinnoa yato ang puha kubabe, bahtu' käyyäng puhake'ne' ang la nababe andana ingkänna yatoo, aka' la maoä' pano di Ambeku tohhoang sibaha.

¹³Dahi ingkänna siamo ang umpalaua' yaling di sangangku, ya' la kubabeingkoa', anna malai yato ang kubabe umpamatande Ambeku.

¹⁴Anna ponna ke umpalauia' ingkänna siamo yaling di sangangku, ya' la kubabe asang yatoo.

¹⁵Ponna ke ungkalemuiä'a', ya' la untuhu'iete' ingkänna pahentaku.

¹⁶La kupalau pano di Ambeku anna malai nabeakoa' mesa to Pa'kalemu ang senga' ang la mamposolai lolokoa' lambi' sapano-panona.

¹⁷Dianto indee Inaha Masero ang la untehtekoa' pano di pepaturu ang tahpa'. Daete'ne' la natahimbo to lino ang dai mampetahpa', aka' daine' nainsang anna dai naita. Ampo' dioa' ungnginsangnga' dio aka' naposolaikoa' dinoa anna la tohho yaling di kalaemu.

¹⁸Dakoa' la kupellei sinnoa änä' biung. Ampo' la suleä' sumule.

¹⁹Dang masae anna damä' naita to lino, ampo' dioa' la ungngitaä'. Aka' tuhoä', ya' la tuho toukoa' dio.

²⁰Ponna lambi'mi tempona donetoo, diangnga'too la umpangnginsangngi ungngoatee, Kodi' yaling siamä' di Ambeku, dioa' yaling siamo di Kalaeku anna Kodi' yaling siamä' di kalaemua'.

²¹Menna-menna ang umpentokei pahentaku anna napembabeing, dianto yato ang mangkalemuiä'. Anna menna-menna ang mangkalemuiä', la nakalemui toe' Ambeku anna la kukalemui toe' anna kupengkalanda'i.”

²²Mekutanang Yudas (ang tadia Yudas Iskariot) naoatee, ”O Tuang, aka suhunna anna la umpengkalanda'iang, anna daine' pano di to lino?”

²³Natimba'mi Puang Yesus naoatee, ”Menna-menna ang mangkalemuiä' la untuhu'i bahtakarangku. Anna Ambeku la ungkalemui yato tau ang noa. La maoang Ambeku pano yato di tau anna tohhoang sibaha-baha.

²⁴Menna-menna ang dä' mangkalemui, ya' dai umpembabeing yato pepaturungku. Anna yato pepaturu ang unghingngia' dai sule di hao mai di Kalaeku, ampo' sule di hao mai di Ambeku ang mansuoä' sule tama inde di lino.

²⁵Ingkänna indee kutula'ingkoa' mating akinna tohhoingkea' sibaha-baha.

²⁶Ampo' yato Inaha Masero la sule nakalemuikoa' aka' la nasuo Ambeku nabala'iä'. Dianto ang la mampaturukoa' ingkänna siamo mating anna la napakalehakoa' ingkänna yatoo ang puha kuoaingkoa'.

²⁷Kamasahkeang kupatohhoingkoa', dianto yato kamasahkeang ang supung sule di hao mai di Kalaeku. Dai sinnoa ang nabeakoa' to lino. Dahi pamasannangngia' inahammu; daummahea'.

²⁸Puhangnga' unghingngi aka ang puha kutula' mating, dianto la maoä' ampo' la suleä' sumule tama di alla'mua'. Anna ponna ke ungkalemuiä', ya' tantunte' la kahsikoa' unghingngi ke la maoä' pano di Ambeku, aka' Ambeku ma'kuasa puha nei' andana Kodi' lambi' nasuoä' sule.

²⁹Kutula' lohpo'ingkoa' mating dinoa, dolunna la dahi yato kaha-kaha, anna malaia' umpetahpa' ke lambi'mi tempona la dahi.

³⁰Damä' la mai'di tula' mating aka' la lambi'mi tempona kende' to ma'kuasa yaling inde di lino, bahtu' Pongkahana setang. Ampo' dai ma'kuasa pano di Kalaeku moi poro la sai'di'.

³¹Ampo' moinnakato noa pahallu la dahi anna malai nainsang to lino naoatee ahana inang ungkalemuiä' Ambeku anna kubabe asang ingkänna aka ang puha napahentaingkä'. Ya' talaomokoa' tapelleii inde ongeang.”