Read Aralle-Tabulahan Yohanes 15 Bible Online

Yohanes 15 - Aralle-Tabulahan bible

Yohanes 15

¹Naoa bunte Puang Yesus, ”Kodi'mito indee poang angkoro' ang tahpa' anna Ambekuntoo puänna.

²Ingkänna tangke ang mendehke' di hao di Kalaeku ang dai keboa la dibahtai nei', anna ingkänna tangke ang mendehke' ang keboa la nabahahsi nei' Ambeku anna malai tuhtuang mai'di boana.

³Dioa' inang bahahsimokoa' aka' puhang kupalambi'ingkoa' pepakuhu mating.

⁴Kodi'mito inde poang angkoro' anna diongnga'too tangke-tangkena, dahi tohhokoa' yaling di Kalaeku anna la tohho touä' Kodi' yaling di kalaemu. Menna-menna ang tohho yaling di Kalaeku anna tohho touä' nei' yaling di kalaena la keboa mai'di. [13] Aka' monna dakoa' yaling di Kalaeku, ya' daete' aha aka mala umbabe. Sinnoa yato tangke, dai mala keboa kalaena ponna dai mendehke' pano yato di poanna. Noa tungnga'to dio, dao mala keboa ponna dao tohho yaling di Kalaeku.

⁶Dahi menna-menna ang dai tohho yaling di Kalaeku la dipentibeing nei' sinnoa yato tangke ang dai keboa lambi' mabangi. Ingkänna tangke ang noa yatoo la nahimpung tau anna natunui.

⁷Anna ponna ke tohhokoa' yaling di Kalaeku anna umpentokei yato pepaturungku, ya' malakoa' umpalau aka siamo anna la nabeakoa' Ambeku.

⁸Aka' ponna mai'dia' boamu, ya' Ambeku la dipamatande. Anna ponna ke noang yatoo la mendahi si'da-si'damokoa' to pentindo'ku.

⁹Sinnoa Ambeku nakalemuiä', noa tunto Kodi' kukalemuikoa'. Dahi tohhokoa' yaling di Kalaeku anna malai unsa'ding lolo yato pa'kalemungku.

¹⁰Ponna ke untuhu'ikoa' yato pahentaku, ya' la unsa'ding lolo yato pa'kalemungku. Noa tung Koo untuhu'iä' pahentana Ambeku anna kusa'ding lolo pa'kalemunna.

¹¹Ingkänna yatoo kutula' asangngingkoa' mating anna malai kakahsiangku unsa'ding toua' dio lambi' sundung kakahsiammu.

¹²Dianto indee pahentaku: sikalemuikoa' mesa anna mesa, sinnoa pa'kalemungku mating.

¹³Dai aha pa'kalemu ang käyyäng puha andana pa'kalemunna mesa tau ang naaku mate sitonda unnä' inahanna anna malaine' tuho yato solana.

¹⁴Dioa' dianto solaku ponna ke ungngakuia' umbabe aka ang kupahentaingko.

¹⁵Damokoa' la kusangai ‘sabua',’ aka' yato sabua' dai nainsang aka pahtuyunna yato pongkahana. Ampo' kusangaikoa' ‘solaku’ aka' kupainsangngikoa' mating ingkänna siamo ang puha kuhingngi di hao mai di Ambeku.

¹⁶Tadiaa' dio ang mampilleiä', ampo' Kodi' ang mampilleikoa' sibaha kusuokoa' anna malakoa' do ungkeboaing kamapiaang tama inde di lino. Anna boa yatoo la tontong lolo anna malai aka siamo ang umpalau dai' di Ambeku yaling di sangangku,[14] la nabeakoa' mating.

¹⁷Dianto indee pahentaku mating: sikalemuikoa' mesa anna mesa.

¹⁸La nakahiri'koa' to lino, ampo' kalehaiia' dolu puhaä' Ko nakahiri' mane dioia'.

¹⁹Aka' ponna ke la sule di haokoa' mai di lino, tantunte' anna la napakamayakoa' sinnoa yato ampuanna. Ampo' aka' Kodi' ang mampilleikoa' anna kupasähä'koa' di hao mai di lino, ya' dianto anna nakahiri'koa'.

²⁰Kalehaiia' aka ang puha kuoaingkoa' mating: Setonganna mesa sabua' daete' mala umpelondoi sala pongkahana. Dahi ke la sika nadahhaä', ya' la sika nadahha toukoa' dio; anna yatoii ang untuhu'i pepakuhungku, ya' la sika umpehingngii toete' aka ang umpakuhuing.

²¹Ampo' ingkänna yatoo la nababe mating di dioa' aka' to pentindo'kukoa', aka' dai sika ungnginsang yato Ambeku ang mansuoä' sule tama inde di lino.

²²Aka' ponna ke la dä' sule anna dai kupalambi' ingkänna yatoo, ya' daete' la sika kekasalaang. Ampo' dinoa yato kasalaanna dai mala nabuni.

²³Menna-menna ang mangkahiri'ä', ya' ungkahiri' toe' Ambeku.

²⁴Puha kubabe kaha-kaha ang dai aha nababe tau senga'. Ponna ke dai sika ungngita inde kaha-kaha ang kubabe, ya' dai sika kekasalaang. Ampo' moinnakato anna sika ungngitai inde ang kubabe, ampo' tontongke' sika nakahiri'ä' sibahaang Ambeku.

²⁵Dianto anna tahpa'i Suha' Masero ang mangngoatee, ‘Nakahiri'ä' tau, dai aha suhunna.’

²⁶La kusuo sule Inaha Masero ang la mengkalao yaho mai di Ambeku. Dianto ang la untula'ingkoa' katahpa'ang didiona Puang Alataala. Anna dianto to Pa'kalemu ang la mansa'biiä'.

²⁷Ampo' la pahallu toukoa' dio la unsa'biiä', aka' mengkalaoke' pampahandu'anna pengkähängangku yaling di lino anna sibaha-bahamingkea'.