Read Aralle-Tabulahan Yohanes 16 Bible Online

Yohanes 16 - Aralle-Tabulahan bible

Yohanes 16

¹Ingkänna indee kutula'ingkoa' mating anna malai daia' ullahpa' kapampetahpa'ammu di hao mai di Kodi'.

²La dihambaikoa' yaling mai di pa'sambayangang. Dia tuke' la aha tempona yato ingkänna tau ang la mampateikoa' la nasanga untuhu'ing pangngelo'na Puang Alataala.

³Sika nababe noa yatoo aka' daang sika nainsang sibahaang Ambeku.

⁴Ampo' ingkänna indee kutula'ingkoa' mating anna malai ke lambi'mi tempona ungkalehaia' yato ang puhang kutula' lohpo'ingkoa'. Nalombungngi tula'na Puang Yesus naoatee, ”Inde kaha-kaha dai kutula' lohpo'ingkoa' mengkalao dolu, aka' sibaha-bahakingkea' lambi' dinoa.

⁵Dinoa la maomä' pano yato di Ambeku ang mansuoä' sule, anna dai aha moi poro la mesa yaling di alla'-alla'mua' mekutana mai ungngoatee, ‘Umbae Dio ungngola?’

⁶Ampo' aka' kutula'ingkoa' yato kaha-kaha, lambi' umpamasuhsa inahammu.

⁷Setonganna yato ang kuoaingkoa' mating tahpa', aka' kekuna puha nei' mating di dioa' ke maoä'. Aka' ponna ke dä' mao, ya' yato To Pa'kalemu dai la sule yaling di alla'-alla'mua', ampo' ponna ke maoä', ya' la kusuo sule tama di alla'-alla'mua'.

⁸La sule Inaha Masero dianto la umpepainsangnging dosanna hupatau anna katahpa'angku, noa toi petahungkunna Puang Alataala.

⁹Inde Inaha Masero la napakaleso naoatee madosa asang ingkänna tau ke dä' napetahpa'.

¹⁰Anna napakaleso toing nei' didiona katahpa'angku, aka' la maomä' pano di Ambeku anna damä' la ungngita.

¹¹La napakaleso tou nei' didiona petahungkunna Puang Alataala pano di to lino, aka' puhang ditahungkung yato Pongkahana setang ang ma'kuasa yaling inde di lino.

¹²Mai'dike' kaha-kaha ang la pahallu kutula'ingkoa' mating, ampo' dinoa dake' umbela untahimboa'.

¹³La sule Inaha Masero anna Dianto ang la mantehtekoa' pano di ingkänna katahpa'ang. Dai la ma'kara-kara yaling mai di pihki'na toboe', ampo' la natula' aka ang puha nahingngi yaho mai di Ambeku. Anna la natula'ingkoa' mating kaha-kaha ang la sule bahtu' ang la dioloi.

¹⁴Inde Inaha Masero la napamatandeä', aka' ang napalambi' mating di dioa' dianto ang nahingngi di hao mai di Kodi'.

¹⁵Aka' ingkänna siamo ang naampui Ambeku, ya' kuampui tou Kodi'. Dianto anna kuoaingkoa'tee: la natula'ingkoa' mating aka ang puha nahingngi di hao mai di Kodi'.

¹⁶Sämpäi'dang supu anna damä' ungngita, ampo' la sämpäi' turang nei' supu anna ungngita sia bumä'.”

¹⁷Nahingnginna yato pahsikolana sikutana-tanaing mesa anna mesa naoatee, ”Aka indo bahtuanna ma'kara noa pano di kita'a' naoatee, ‘Sämpäi'dang supu anna damä' ungngita, ampo' la sämpäi' turang nei' supu anna ungngita sia bumä'’? Anna naoa tuke'tee, ‘Maomä' pano di Ambeku’?”

¹⁸Lambi' sikutana-tanai lolong naoatee, ”Aka si'da inde bahtuanna ma'kara noa naoatee, ‘Sämpäi'dang supu’? Daia' tainsang aka bahtuanna.”

¹⁹Donetoo nainsang Puang Yesus sika pemala napekutanaing yato tula'na, ya' ma'karang pano diii naoatee, ”Yato ang kutula' di langngena' kuoatee, ‘Sämpäi'dang supu anna damä' ungngita, ampo' la sämpäi' turang nei' supu anna ungngita sia bumä'.’ Diangka yato ang umpekutanaing pano di solamu?

²⁰Kutula'ingkoa' setonganna la musengkoa' anna mapi'di' si'da-si'da inahammu, ampo' to lino la kahsi nei'. Pihsananna yato kamasuhsaammu la dibala'i mendahi kakahsiammu.

²¹Sinnoanna mesa bahine ang madahha naonge la keänä'i, ampo' puhanna keänä', ya' dang nakalehai yato kamadahhaanna, aka' kahsing supu mala ungkeänä'ing mesa tau tama inde di lino.

²²Noa tungnga' dio dinoa lella' unsa'ding kamasuhsaang, ampo' la kuita boukoa' sumule lambi' la kahsikoa', anna yato kakahsiammu dai aha tau ang la mala manghampa'ikoa'.

²³La donento yatoo, damokoa' la kakutana-tana aka siamo pano di Kodi'. Kutula'ingkoa' setonganna aka siamo ang la umpalau pano di Ambeku yaling di sangangku la nabea asangkoa' mating.

²⁴Lambi' dinoa dakangkoa' aha malau aka siamo yaling di sangangku. Dahi palauia' anna la untahimboia' anna malai sundung kakahsiammu.”

²⁵Nalombungngike' tula'na Puang Yesus naoatee, ”Ingkänna indee kutula'ingkoa' mating umpakekä' pohapangang. Ampo' la aha tempona damä' la umpake pohapangang, ampo' la kusindohoi kutula'ingkoa' mating didiona Ambeku.

²⁶Pehingngiiä'a': donentoo dangnga' la kupalauingko pano di Ambeku, aka' mala tubungnga' dio umpalau pano yaling di sangangku.

²⁷Kalaena Ambeku ang mangkalemuikoa' aka' ungkalemuiä' anna umpetahpa' ungngoate Kodi' indee sule yaho mai di Puang Alataala.

²⁸Inang sule yahoä' mai di Ambeku mentama inde di lino. Ampo' dinoa la umpelleiä' inde lino sumule dai' di Ambeku.”

²⁹Ma'karang pahsikolana pano naoatee, ”O Tuang, dinoa ma'karamo unsindohoi anna dang umpake yato pohapangang.

³⁰Dahi dinoa kiinsammi kioatee Dio ungnginsang asang ingkänna siamo anna damang pahallu la mekutana mating. Aka' dianto anna kipetahpa'i kioatee sule yahoo mai di Puang Alataala.”

³¹Sika natimba'mi Puang Yesus naoatee, ”Dahi umpetahpa'raka dinoa?

³²Ampo' kalehaiia' la suleng tempona, bahtu' mala dioate lambi'mi tempona anna la sisähä'-sähä'koa'. La sumulekoa' pano di dasammu la umpelleiä' kumesa. Ampo' setonganna dai la kumesa aka' la tontongngang sibaha Ambeku.

³³Ingkänna indee kutula' asangngingkoa' mating anna malai ullambi'koa' kamasahkeang aka' tohhokoa' yaling di Kalaeku. Yaling inde di lino inang la madahhakoa', ampo' pamatohoia' inahammu aka' kutalo asammi ingkänna ang umpa'bali Puang Alataala yaling inde di lino.”