Read Aralle-Tabulahan Yohanes 17 Bible Online

Yohanes 17 - Aralle-Tabulahan bible

Yohanes 17

¹Puhanna ma'kara noa yato Puang Yesus, mentongang dai' di langi' ma'sambayang naoatee, ”O Ambe', dinoa lambi'mi tempona la umpamatandeä', Kodi' inde Änä'mu, anna mala touä' Koo kupamatandeo.

²Aka' Dio Ambeku ang mambeaä' inde kakuasaang pano di ingkänna hupatau, anna malai kubea katuhoang ang tontong lambi' sapano-panona pano di ingkänna hupatau ang puha umbeaä'.

³Anna dianto indee katuhoang ang tontong lambi' sapano-panona, anna malai nainsangngo hupatau, dianto Dio, Dehata ang setonganna. Anna katuhoang indee la mala nalambi' aka' sika nainsang naoatee Kodi' indee Puang Yesus, To Dilanti' la Mepasalama', ang unsuo tama di lino.

⁴Puhamo kupamatande yaling inde di lino ungngolai yato pengkähängang ang umpadurungngiingkä' mai.

⁵O Ambe', dianto anna kupalaui la umpamatandeä' mating di olomu, yaling yato di kamatandeang ang kuampui naonge sibahaingke dolunna la dipadahi inde lino.”

⁶Nalombungngike' sambayanna Puang Yesus naoatee, ”Puhang kupepainsangnging umba noa kamatandeammu pano inde di tau ang puha umbeaä' yaling mai inde di lino. Inde hupatau dianto ampuammu anna puhamä' umbea anna sika untuhu'ing bahtakarammu.

⁷Dinoa sika nainsammi naoatee yato ang umbeaä' sule asang yaho mai di Dio, Ambeku.

⁸Anna puhang kupakalesoing pano diii yatoo ingkänna ang ungngoaingkä', lambi' sika natahimbong. Sika nainsammi naoatee sule si'da-si'daä' yaho mai di Dio, Ambeku, anna sika napetahpa'mi naoatee Dionto ang mansuoä' sule tama inde di lino.

⁹Dä' la unsambayangngi yato ingkänna to lino, ampo' supung kusambayangngi inde mai tau ang puha umbeaä', aka' dianto indeii ampuammu.

¹⁰Ingkänna tau ang kuampui dianto ampuammu tou Dio, anna ingkänna tau ang ungngampui dianto ampuangku tou Kodi'. Dianto ang la umpamatandeä' ungngolai pembabenaii.

¹¹O Ambe' ang Masero, mane la matingngä' di olomu, damä' la tohho yaling inde di lino. Ampo' tontongke'ne' sika yaling inde di lino. Dahi dakaii yaling yato di kakuasaang sangammu ang puha umbeaä', anna malai sika mesa inaha toe' sinnoa Dio Ambeku anna Kodi' mesa inahaingke.

¹²Yaling inde di lino sika sibahaang, puhang kukambi' yaling yato di kakuasaang sangammu, dianto sanga ang puha umbeaä'. Inde pahsikolaku puhang kukambi' anna malai moi poro la mesa dai la tallang, sehalinna ang inang puha dipama'tantu la tallang. Inde la dahi anna malai sundung aka ang tiuki' yaling di Suha' Masero.[15]

¹³Dinoa matingngä'. Kutula' asangngingko akinna yalingkä' inde di lino anna malai inde pahsikolaku sundung toe' nasa'ding yato kakahsiangku.

¹⁴Puhang kupakalesoing pano diii yatoo ingkänna ang ungngoaingkä', dianto anna sika nakahiri'mi inde to lino, aka' tadia solana. Sinnoa Kodi' tadiaä' solana to lino.

¹⁵Dai kuoatee kupalau mating anna sika ungngalai yaling mai inde di lino, ampo' kupalau anna malai umpakahaoing To handang karake.

¹⁶Sinnoa Kodi' tadiaä' solana lino, noa tuntone' inde pahsikolaku tadia solana lino.

¹⁷Pakuhui bahtakara katahpa'ammu anna malai masero.

¹⁸Sinnoa Dio, Ambeku, puhaä' unsuo tama inde di lino, dahi noa tunto Kodi' puha sika kusuo tama inde di lino.

¹⁹Puhang kubeho Kalaeku sitonda unnä' inahangku mating anna mala toine' inde pahsikolaku dipasenga' si'da-si'da mendahi petauammu.”

²⁰Nalombungngike' sambayanna Puang Yesus naoatee, ”Tadia inde supu pahsikolaku ang kusambayangngi, ampo' noa toe' pano di ingkänna tau ang la mampetahpa'ä' ungngolai kasa'biannaii.

²¹Kupalau anna malai sika mesa inaha sinnoa Dio Ambeku tohho yaling di Kalaeku anna Kodi' tohho yaling di Kalaemu, anna sika mala toine' tohho yaling di Kita' lambi' mala napetahpa' to lino naoatee, Dionto inde ang mansuoä' sule.

²²Anna puhang sika kubea yato kamatandeang ang puha umbeaä' anna malai sika mesa inaha sinnoa Kita' mesa inahaingke.

²³Dahi la tohhoä' yaling di kalaenaii, noa Dio tohho yaling di Kalaeku. Ke la malai sika mesa inaha si'da-si'da lambi' nainsang to lino naoatee Dionto ang mansuoä' sule anna Dionto ang sika ungkalemuii sinnoa ungkalemuiä'.

²⁴O Ambe', kupalau ke la malai inde ingkänna mai tau ang umbeaä', diamo-diamo kuongei, dia tunne' la sika naongei tohho sibaha-bahaang. Aka' ponna ke noang, ya' malang la sika ungngita yato kamatandeangku ang puha umbeaä' aka' ungkalemuiä' dolunna la dipadahii inde lino.

²⁵O Ambeku, To Maroho, inang dao nainsang inde mai to lino, ampo' Kodi' Kodi' kuinsangngo anna sika nainsang inde maiii ang mampetahpa'ä' naoatee Dionto ang mansuoä' sule.

²⁶Puhang sika kupakalesoing didiomu, anna dinoa la kupakaleso salaing anna malai sika unsa'ding yato pa'kalemummu sinnoa ang kusa'ding, anna mala touä' Kodi' la tohho yaling di kalaenaii.”