Read Aralle-Tabulahan Yohanes 18 Bible Online

Yohanes 18 - Aralle-Tabulahan bible

Yohanes 18

¹Tahpana puha ma'sambayang Puang Yesus, ya' sika mengkalaong sibaha pahsikolana lubete' ullambang Lembäng Kidron. Di hipentoo aha bela' zaitun, dianto sika naongei tama.

²Yato ta Yudas ang umbalu' Puang Yesus nainsang toe' yato ongeang aka' inang si biasa naongei Puang Yesus sibaha pahsikolana ma'himpung.

³Dai masae, ya' sulerang ta Yudas sibaha samparengnge' tantarana to Roma anna sangngaka-sangngaka to pandaka Dasang Ada'na Puang Alataala ang nasuo kapala-kapala imang sibaha to Farisi. Sika para-para mesele' anna aha piha ang umbaha ballo.

⁴Donetoo inang nainsammi Puang Yesus aka ang la dahi pano di Kalaena. Ya' umpendungku'ing yato tau mai'di anna nakutanaii naoaintee, ”Mennarea' dio umpeäng?”

⁵Sika mentimba'mi naoatee, ”Yesus to Nazaret.” Naoante Puang Yesus, ”Aka' Kodi'mi nei'.” (Ke'de' toe' ta Yudas sibaha-baha yato ingkänna tantara.)

⁶Puhanna ma'tula' Puang Yesus naoate, ‘Aka' Kodi'mi nei',’ ya' pihsa' sika mellao kebo'mi yato setantaraang lambi' loe kebo'.

⁷Sika nakutanai bung Puang Yesus naoaintee, ”Mennarakaa' dio umpeäng?” Sika mentimba'mi naoatee, ”Yesus to Nazaret.”

⁸Naoaminte Puang Yesus, ”Aka' puhamokoa'ne' kuoainte ‘Kodi'mi nei'.’ Dahi ponna ke inang Kodi'a' ang umpeäng, ya' pabei asangngingkä'ne' solaku le'ba'.”

⁹(Inde tula'na dianto kasundunganna yato ang puha natula' lohpo' naonge naoaitee, ”O Ambe', di alla'na inde mai tau ang puha umbeaä', dai aha la kupabei pa'da moi poro la mesa.”)

¹⁰Donetoo Simon Petrus unsele'ne' mesa pa'dang. Ya' nasintä'mi mane natepä'ing talinga kuananna mesa sabua'na handang pongkaha imang ang disanga Malkus.

¹¹Naoante Puang Yesus pano di Petrus, ”Patamai sumule di banuanna ne pa'dammu. Daraka dio umpihki' inang la ungngolaiä' kamadahhaang situhu' pangngelo'na Ambeku, sihapang ungngenu'ä' ihsi tangki' ang mapäi'?”

¹²Pihsananna yato tantarana to Roma anna kapalana, sibaha to pandaka Dasang Ada' ang nasuo to pambahananna to Yahudi, unsahkang Puang Yesus anna napungoi teyyena.

¹³Uhuna sika napapengngolo dolu pano di Hanas, pasananna Kayafas, aka' inde Kayafas handang pongkahana imang donetoo.

¹⁴(Dianto inde Kayafas ang inang puha ma'tula' dolu pano di to pambahananna to Yahudi naoatee, ”Ahante' mesa tau dipatei andana la dipatei asangngingkea' ingkänna to Yahudi.”)

¹⁵Donetoo Simon Petrus anna mesake' sola pahsikolana le'ba' umpelolai Puang Yesus. Inde solana siinsanne' handang pongkahana imang. Dahi mentindo' lolone' sibaha-baha Puang Yesus lambi' tama di tähämpä' dasanna,

¹⁶ampo' indene' ta Petrus tohhone' mangngempe yaling di aneang di behing baba hala. Pihsananna sohommi inde solana anna umpa'tula'i mesa bahine, dianto sabua' ang menge undakai baba. Puhai napa'tula'i, ya' dipabei tunne' tama ta Petrus.

¹⁷Mekutanang inde bahine pano di Petrus naoatee, ”E, darakae' dio inde mesa to pentindo'na indo tau?” Natimba'mi Petrus naoatee, ”Äh, tadiaä'!”

¹⁸Donetoo madinging liu kalane. Dianto anna sika umpapuhpung api yato to pandaka sibaha sabua' ang senga', mane sika ke'de'i di behinna mamindu. Mempako tunne' ta Petrus mamindu sibaha-baha.

¹⁹Napahandu'mi handang pongkahana imang, ang nabala'ing Kayafas donetoo, ungkutanai Puang Yesus didiona pahsikolana anna pepakuhunna.

²⁰Ma'tula'mi Puang Yesus mentimba' naoatee, ”Kodi' ke mampaturuä' kupahingngii asang ingkänna tau mai'di; dai aha kubuni. Si mampakuhuä' yaling di Dasang Ada'na Puang Alataala anna yaling di pa'sambayangang ang si naongei ma'himpung to Yahudi.

²¹Dahi aka boi anna ungkutanaiä'? Ponna ke pemalao ungnginsang, ya' kutanaii ne pano tau ang puha unghingngi pepakuhungku aka' nainsang asangngete' yato aka ang puha kupakuhuing.”

²²Puhanna ma'tula' noa yatoo Puang Yesus, ya' natampiling siang mesa to pandaka ang ke'de' di hao di behinna anna naoaintee, ”Dipanoanne' ne mentimba' di olona handang pongkahana imang?”

²³Natimba'mi Puang Yesus naoatee, ”Ponna ke salai yato tula'ku, ya' tula'ingkä' aka ang sala. Ampo' ponna ke tahpa'i, ya' akaboi anna untampilingngä'?”

²⁴Pihsananna inde ta Hanas unsuong tau do umposola Puang Yesus, menge tipungo teyyena, pano di Kayafas ang handang pongkahana imang donetoo.

²⁵Donetoo Simon Petrus mengeke' ke'de' mamindu. Nakutanaing yato tau ang nasibahaing di hao naoatee, ”Darakae' dio ne mesa pahsikolana inde yaling tau?” Ampo' natimba' Petrus ma'baho naoatee, ”Äh tadiaä'!”

²⁶Donetoo aha mesa sabua'na handang pongkahana imang, solasohonna yato tau ang puha natepä'i talinganna ta Petrus, mekutana toe' pano naoatee, ”E, darakae' dio ang kuita di hipe yato di bela' sibaha-baha inde yaling tau?”

²⁷Mentimba' bung Petrus ma'baho naoatee, ”Tadia kodi'!” Donetoo, ya' tahpa mentuhturuu'mi mane'.

²⁸Tahpana buhka' baya, ya' sika umposolang Puang Yesus mengkalao di dasanna Kayafas lupano di dasanna Tuambahsa' Pilatus. Ampo' inde mai to Yahudi ang mamposola dai sika naaku mentama aka' la diangka' kärähko' situhu' ada'na ke mentamai di dasanna tau ang tadia to Yahudi. Anna pemala toi ungngande andeang Paska ampo' inang dai mala ke lella'i diangka' kärähko'.

²⁹Dianto anna sohommi Tuambahsa' Pilatus untammui yato tau mai'di anna nakutanaii naoaintee, ”Aka kasalaanna inde tau anna umposolai sule?”

³⁰Sika mentimba'mi naoatee, ”Ponna ke la dai aha kasalaanna, ya' daete' la kibahaingko sule.”

³¹Naoa buminte Pilatus, ”Ya' do posolaia' anna unghohto' toboia' dio aka kasalaanna situhu' atohammua'.” Sika mentimba'mi yato to Yahudi naoatee, ”Ampo' daangkang dipabei untahungkung mate tau ang kekasalaang.”

³²(Ingkänna inde dahi anna malai sundung tula'na Puang Yesus didiona lalang kamateanna ang hali natula' dolu.)

³³Sumuleng Pilatus tama di huäng dasanna ang si naongei manghohto' anna untambaii Puang Yesus nakutanai naoaintee, ”Diongka ne tomarayanna to Yahudi?”

³⁴Mekutana salang Puang Yesus naoatee, ”Lemba' yalindaka mai di inahammu nee pekutanammu, bahtu' aharaka tau senga' ang puha mampainsangngio didiona Kalaeku?”

³⁵Mentimba' Pilatus naoatee, ”Ungnginsang siang tadiaä' to Yahudi! Inde mai tau ang mampapesahkao anna mambahao sule, dianto sola bohtomu siang sibaha kapala-kapala imang. Dahi aka ang puha umbabe?”

³⁶Ma'tula'mi Puang Yesus naoatee, ”Katomarayaangku dai sule yaling mai inde di lino. Aka' ke la sule yalingngi mai di lino, ya' napetunduimä'te' ingkänna petauangku anna dä' nasahka to pambahananna to Yahudi. Ampo' inang dai sule yaling mai di lino katomarayaangku.”

³⁷Nakutanai sala bung Pilatus naoaintee, ”Dahi ke noai nee, tomarayarakako?” Mentimba'mi Puang Yesus naoatee, ”Ya' kalaemu tubung dio ang mansangaiä' tomaraya. Setonganna nasuhung dahiä' anna suleä' mentama di lino anna malaä' umpalanda' katahpa'ang. Dahi ingkänna tau ang untuhu'i katahpa'ang dianto ang umpehingngii pepakuhungku.”

³⁸Naoa salake'te Pilatus ”Akae' ne disanga katahpa'ang?” Donetoo le'ba' bung tama di aneang Pilatus anna ma'tula'i pano di to Yahudi naoatee, ”Daponalae' aha kulambi' kasalaanna moi poro la mesa inde tau.

³⁹Ampo' situhu' ada'mua' si kulahpa' loloingkoa' mesa to ditahungkung ke lambi' bumi allo pa'rame-rameang Paska. La ungngakurakaa' ke kulahpa'i inde Yesus, tomarayammu?”

⁴⁰Para-parang sika mentimba' mekoha naoatee, ”Dai! Tadia nee! Barabas lahpa'ingkang!” (Inde ta Barabas dianto mesa tau karake ang si umpa'bali to ma'pahenta.)