Read Aralle-Tabulahan Yohanes 19 Bible Online

Yohanes 19 - Aralle-Tabulahan bible

Yohanes 19

¹Pihsananna Pilatus unsuong tantarana umpohetong Puang Yesus.

²Puhai napohetong, sika napapiaming songko' kedui mane nasongko'ing. Puhai yatoo, sika ungngalang kaya' ang sinnoa hupanna ang si napake tomaraya anna nakaya'ing,

³mane sibala'-bala'i pano di olona anna naoaitee, ”Tabe', Tomarayanna to Yahudi,” laona siang nasitampiling-pilingngi.

⁴Puhai yatoo, sohong bumi Pilatus anna naoaite pano yato di tau mai'di, ”Itaia', kupamatimmingkoa' di olomu anna malai ungnginsang asangnga' aka' dae ko aha kulambi' kasalaanna.”

⁵Ya' sohommi Puang Yesus mesongko' dui anna mekaya' sinnoa kaya'na tomaraya. Naoante Pilatus, ”Itangnga'to inde tau.”

⁶Tahpana sika ungngita Puang Yesus yato to pandaka anna kapala-kapala imang, sika kohang naoatee, ”Toke'i! Toke'i dai' di kayu sitambeng!” Naoa bunte Pilatus, ”Alaia' mai anna untoke' toboia' dio, aka' dai kodi' aha kulambi' kasalaanna.”

⁷Mentimba'mi to Yahudi naoatee, ”Situhu' ada'ki' ne tau sihatang ditahungkung mate aka' unsanga Kalaena Änä'na Puang Alataala.”

⁸Tahpana nahingngi Pilatus yato ang sika natula', ya' tuhtuang mahea'mi.

⁹Dianto anna umposolang Puang Yesus sumule tama di dasanna anna nakutanaii naoaintee, ”Umbae Dio ungkasulei?” Ampo' dai aha mentimba' Puang Yesus.

¹⁰Naoa sala buminte Pilatus, ”Akana dai ungngaku untimba'iä'? Pahallu ungnginsang kodi' indee ma'kuasaä'. Malao kulahpa', malao kupatei.”

¹¹Mentimba'mi Puang Yesus naoatee, ”Ponna ke tadiai Puang Alataala umbeao kakuasaang, dai aha kakuasaammu pano di Kalaeku. Dianto anna kekasalaang puhaine' tau ang mambehoä' mating andana kalaemu.”

¹²Donetoo pemala liung Pilatus la ullahpa' Puang Yesus ampo' sika koha to Yahudi naoatee, ”Ponna ke ullahpa'i ne tau, ya' umpa'balimote' disanga Kaisar. Aka' tau ang unsanga kalaena tomaraya umpa'bali Kaisar.”

¹³Nahingnginna Pilatus yato tula'naii, ya' umposolang Puang Yesus sohong yaling mai anna mohko'i di ohko'ang panghohto'ang di hao di mesa ongeang malua' ang yaling di basa Ibrani disanga ‘Gabata,’ bahtuanna: Sali Batu.

¹⁴Donetoo umbai durummi allo, sangngalloke' anna dipahandu'mi pa'rame-rameang Paskana to Yahudi. Naoante Pilatus pano di tau mai'di, ”Indeengnga' tomarayammu.”

¹⁵Sika koha bumi naoatee, ”Pateii ne tau! Pateii! Toke'i dai' di kayu sitambeng!” Mekutana sala bung Pilatus naoatee, ”La kutoke' si'daraka inde tomarayammua'?” Mentimba' kapala-kapala imang naoatee, ”Dai aha tomarayangki' ang senga', supung mesa, dianto Kaisar.”

¹⁶Ya' nabehoming Pilatus inde Puang Yesus pano di tantara do sika natoke'. Donetoo yato setantaraang sika ungngalang Puang Yesus anna nabahai le'ba'.

¹⁷Ya' le'ba'mi Puang Yesus umbulle kayu sitambeng ang la dipantoke'i ludai' di mesa tanete saohko' ang yaling di basa Ibrani disanga ‘Golgota,’ bahtuanna: Ongeang Kahuhhung.

¹⁸Dianto inde ang dipantoke'i sibaha derua tau senga', mesa tando di kuananna anna mesa tando di kaihinna.

¹⁹Yato setantaraang nasuo toe' Pilatus umpadehke' papang-papang yaho di patu bää'na Puang Yesus. Di hao yato di papang tiuki' naoatee, YESUS TO NAZARET, TOMARAYANNA TO YAHUDI.

²⁰Yato ongeang ang dipantoke'i Puang Yesus dai makahao umpellei bohto lambi' mai'di liu to Yahudi umbata yato pangnguki' aka' tiuki' yaling di tallu basa, dianto: Ibrani, Latin anna Yunani.

²¹Naoante kapala-kapala imang pano di Pilatus, ”Daungnguki'i ungngoatee, ‘Tomarayanna to Yahudi,’ ampo' uki'i oaitee, ‘Unsanga Kalaena Tomarayanna to Yahudi.’ ”

²²Natimba'mi Pilatus naoatee, ”Aka ang puha kuuki' dang mala dibala'-bala'i.”

²³Puhanna sika untoke' Puang Yesus yato uhpa' tantara, ya' sika naalang pakeanna anna napereuhpa'i napopantang. Mane naala toine' yato kaya' kalambe'na ang ditannung mahasa-hasa, dai aha pandäi'anna.

²⁴Sika sioa-oaminte yato tantara, ”Daaa'ne' taseu'-seu'i inde kaya' kalambe'na aka' manangngi ampo' tahui'ingnga'ne' sihsä' anna menna ang manghui' kalambe'na, ya' dianto mangngala.” Ingkänna indee dahi anna sundungngi aka ang tiuki' yaling di Suha' Masero ang naoatee, ”La sika untaha-taha pakeangku anna unghui'ing sihsä' kaya' kalambe'ku.” [16] Ingkänna indee nababe si'da yato tantara.

²⁵Sidungku' yato kayu sitambeng ang naongei Puang Yesus ditoke', ke'de' di hao indona sibaha indouhena, siullu'na indona. Noa tunne' Maria bahinena Klopas anna Maria Magdalena di hao toe' donetoo.

²⁶Tahpana Puang Yesus ungngita indona anna pahsikolana ang handang napakamaya ke'de' sibaha-baha, ya' ungngoaminte indona, ”O Indo', dianto ne änä'mu.”

²⁷Mane mennenne'i pano yato di pahsikolana ang handang napakamaya anna naoaitee, ”Dianto ne indomu.” Napahandu' donetoo, ya' tohhong indona Puang Yesus sibaha di hao di dasanna yato pahsikolana.

²⁸Inang nainsang Puang Yesus naoate ingkänna ang la naolai dahi asammi. Dahi anna malai umpasundung aka ang tiuki' yaling di Suha' Masero, dianto anna ma'tula'mi naoate, ”Mahähängngä'.”

²⁹Yato di hao aha mesa kahaho punno angkoro' ang mainsummi. Ya' sika ungngalang lomo' anna natomme'i naung. Mane napadehke'i pano di pote'na mesa tangke kayu hisop anna nadoangngi dai' di suana Puang Yesus.

³⁰Ya' namimmi'mi Puang Yesus anna naoaitee, ”Tehpu'mi pole'!” Pihsananna lumpeng bää'na anna pohsu'i penanahanna.

³¹Yato to pambahananna to Yahudi dai naaku ke titoke' loloi bahkena tau lambi' di allo katohhoang, londonang donetoo aka' la sika umpakahoa' pa'rame-rameang Paskana. Dianto anna sika napalaung pano di Pilatus ke la malai dibahe asang lono'na yato to ditoke' anna baha' matei. Mateitoo, ya' dipatuhummi bahkena yaho mai di kayu sitambeng. Aka' naonge ditoke'i Puang Yesus sangngallorang supu anna lambi'mi allo katohhoang.

³²Ya' sika napabeing Pilatus, dahi le'ba'mi sangngaka-sangngaka tantara do umbahe lono'na to ditoke'. Ampo' yatorang supu derua to ditoke' ang sika nabahe lono'na aka' matenne' Puang Yesus, dahi danne' mangki' sika napanoa.

³⁴Ampo' mesa di alla'na yato tantara undoke kasihinna Puang Yesus, ya' sohommi haha sitonda uhai.

³⁵(Tau ang mangngita liu donetoo dianto ang mampepakahebaing anna malaia' umpetahpa'. Dahi tahpa' si'da-si'da ingkänna indee ang nasa'bii. Anna nainsang naoatee tahpa' si'da-si'da.)

³⁶Ingkänna indee dahi anna malai sundung asang samai ang tiuki' yaling di Suha' Masero ang naoatee, ”Inang dai aha la dibahe moi poro mesa bukunna.” [17]

³⁷Anna aha toe' tiuki' yaling di Suha' Masero naoatee, ”La sika napahandang yato ang puha nabuno.” [18]

³⁸Puhai yatoo, le'ba'mi Yusuf to Arimatea mehumala' pano di Pilatus ke la malai ungku'bu' bahkena Puang Yesus. (Setonganna inde Yusuf mesa toe' to pentindo'na Puang Yesus ampo' dai napatandaang sakali aka' mahea' pano di to pambahananna to Yahudi.) Ya' natahimbo si'dang Pilatus yato palaunna. Le'ba'mi do naala.

³⁹Ang nasibahaing ta Yusuf donetoo dianto ta Nikodemus. (Inde Nikodemus mesa tau ang hali dolu umpellambi'i Puang Yesus di bengi.) Ya' le'ba'mi sibaha umbaha umbai tallumpulo kilo matingnginna pakuli disanga mur anna gaharu ang si dipapano di bahkena to mate anna dai baha' bosi.

⁴⁰Yato to deruai le'ba'mi umpatuhung bahkena Puang Yesus, mane nabalungngi napasibalung yato pakuli situhu' ada' pa'tomateanna to Yahudi.

⁴¹Sidungku' yato ang dipantoke'i Puang Yesus aha di hao sallimbo bela' ang naongei yaling ku'bu' batutung ang dake' aha dipampatamai to mate.

⁴²Aka' marungku' yato ku'bu', londonang aka' la dipahandu'mi allo katohhoang, ya' diang meroho sika napangku'bu'i.