Read Aralle-Tabulahan Yohanes 2 Bible Online

Yohanes 2 - Aralle-Tabulahan bible

Yohanes 2

¹Tahpana kadongngallona aha pa'rame-rameang kakabengang di hao di Bohto Kana di Galilea. Donetoo di hao toe' indona Puang Yesus.

²Anna dibahai toe' Puang Yesus sibaha-baha to pentindo'na ullumba yato kakabengang.

³Mengeke' sika ma'rame-rame, ampo' sika kapuhaang angkoro'. Naoante indona pano di Puang Yesus, ”O Änä'ku, kapuhaang angkoro'e' inde mai tau.”

⁴Natimba'mi naoatee, ”Dakä' mala unsuo, Indo', aka' dake' lambi' tempona la kupalanda' kakuasaangku.”

⁵Ampo' inde indona umpa'karai yato to pantahiai naoaintee, ”Babe tomande'i aka ang naoaingkoa'.”

⁶Donetoo di hao aha unnung buhso käyyäng ang si dipaongei uhai ang la dipembasei situhu' ada'na to Yahudi. Tandana käyyäng, mesa buhso sangngatu' lite' uhai tama.

⁷Naoante Puang Yesus pano di to pantahiai, ”Pangngihsi asangngia' ne buhso uhai lambi' punno.” Ya' sika napangngihsi si'dang lambi' punno asang.

⁸Ya' naoa bunte Puang Yesus, ”Dinoa sengko'i sai'di' anna umbahai pano yato di olona pongkahana to pa'rame-rame.” Ya' sika napanoa si'dang.

⁹Nasändä'ing yato pongkahana to pa'rame-rame inde uhai ang mendahi angkoro'mi. Ampo' dai nainsang umba nakasulei, supung to pantahiai ang mangnginsang. Umpellambi'ing yato to kabeng ang muane

¹⁰anna naoaintee, ”O to bakahu, kabiasaanna tau si umpaenu'e' dolu to sulena angkoro' ang handang mammi'. Puhaitoo mane napaenu'i angkoro' biasa. Ampo' dio, to bakahu, umpobe'be-be'beirako dio angkoro' ang handang mammi' lambi' dinoa.”

¹¹Dianto indee ang mepusa'-pusa' ang handang uhuna nababe Puang Yesus ang napalanda' di hao di Bohto Kana di Galilea. Yaling yato di tanda landa' si'da-si'dang kakuasaanna pano di to pentindo'na lambi' tuhtuang sika napetahpa'.

¹²Puhai yatoo, le'ba'mi Puang Yesus naung di Kapernaum sibaha indona, siullu'na anna to pentindo'na anna tohho di hoi' sangngaka amo benginna.

¹³Tahpana marungku'mi allo pa'rame-rameang Paskana to Yahudi, le'ba'mi Puang Yesus dai' di Yerusalem.

¹⁴Ya' mentamang di Dasang Ada'na Puang Alataala ampo' ullambi'e' to pa'balu' yaling, menge umbalu' saping, domba anna dangang-dangang. Anna yaling toe' sika ohko' tau ang si umpasisapi'-sapi' doi'.

¹⁵Ungngalang kondaling nababe pehahi' anna unghambaii yato ingkänna olo'-olo' ang yaling di Dasang Ada'na Puang Alataala, noa domba, noa saping. Noa tunne' meja ang si naongei to pansapi' doi' napasikatua' lambi' tisembu' asang yato doi'.

¹⁶Anna ungkeaha'i to pa'balu' dangang-dangang naoaintee, ”Ängkä'i asangngia' sohong ne aka-akammu! Daumpadahia' pasa' Dasang Ada'na Ambeku!”

¹⁷Ya' sika nakalehaing pahsikolana aka ang tiuki' yaling di Suha' Masero naoatee, ‘Matama si'da-si'da pa'kalemungku pano di Dasang Ada'mu sinnoa api ang pemala mangngande.’[3]

¹⁸Ampo' yato to pambahananna to Yahudi umbali-bali Puang Yesus naoaintee, ”Babeingkang tanda ang mepusa'-pusa' anna malai kiinsang kioatee sihatang si'dao umbabe noa indee.”

¹⁹Natimba'mi Puang Yesus naoatee, ”Tale-taleia' inde Dasanna Puang Alataala anna kupake'de' salai sumule yaling di tallu allona.”

²⁰Sika naoa buntee, ”Inde Dasang Ada'na Puang Alataala napake'de'ete' tau yaling di uhpa'pulo unnung pahiamanna anna pake la umperomi' buming Dio umpake'de' yaling tallu supu allona?”

²¹(Ampo' setonganna ang aha yaling di pihki'na Puang Yesus dianto bätäng Kalaena.

²²Dahi tahpana tuho sumule Puang Yesus di hoi' mai di kamateang, nakalehaing inde pahsikolana yato aka ang puha natula'. Ya' sika umpetahpa'mi yato ang tiuki' yaling di Suha' Masero anna yato ang puha natula' Puang Yesus.)

²³Di tempona yahoke' Puang Yesus di Yerusalem menge umpakahoa' pa'rame-rameang Paskana to Yahudi, ya' tuhtuang mai'ding tau ang mampetahpa' pano aka' puhang ungngita tanda ang mepusa'-pusa' ang nababe.

²⁴Ampo' inde Puang Yesus dai tahpa umpetahpa' yatoii aka' ungnginsang inahanna ingkänna tau.

²⁵Anna dai mangki' dipainsangngi aka ang aha yaling di inahanna hupatau, aka' nalosa asang nei'.