Read Aralle-Tabulahan Yohanes 20 Bible Online

Yohanes 20 - Aralle-Tabulahan bible

Yohanes 20

¹Tahpana allo Mingku di buhka' baya, le'ba'mi Maria Magdalena pano di ku'bu'. Lambi'na pano ungngitang batu pelapa' ku'bu' tikisu'rang nei' umpellei ongeanna.

²Tahpa sumule siang ma'lumpa'-lumpa' do umpeäng Simon Petrus sibaha pahsikola ang napakamaya Puang Yesus. Natula'ing yato ang naita naoatee, ”Oa', lo'bämmia' ku'bu'na Puang! Dai kuinsang umba napampaongei.”

³Ya' tahpa le'ba' siang ta Petrus sibaha solana pano yato di ku'bu'.

⁴Inde to deruai sahing lumumpa' ampo' madihhi' puha nei' yato solana lambi' pano yato di ku'bu'.

⁵Melluhkung anna mengngollengngi tama yato di ku'bu' nanenne'i, ya' pebalundang supu naita yaling, ampo' dai mentama.

⁶Tahpana sule ta Simon Petrus, ya' tahhi'-tahhi'mine' tama yato di ku'bu' unnenne'i pebalung ang titoko yaling.

⁷Yato pebalung ang diba'ba'ing bää'na Puang Yesus tilolong nei' anna tipatoko senga'i.

⁸Pihsananna tama tunne' yato pahsikolana ang senga' ang dolune' lambi' pano di ku'bu'. Nanenne'ing yatoo anna napetahpa'i.

⁹(Lambi' tempo donetoo dake' sika nainsang aka bahtuanna ang tiuki' yaling di Suha' Masero didiona pahallu tuho sumule di hoi' mai di kamateang.)

¹⁰Puhai yatoo, ya' sika sumuleng pano di dasannaii.

¹¹Ke'de'mi ta Maria di hao di behinna ku'bu' menge ma'duseng-duseng. Lella' dumuseng laona siang mengngolleng tama di ku'bu'.

¹²Tahpa ungngitaranne' derua malaeka' mekaya' mabusa mohko' yaling yato ang naonge dolu tilampa' bahkena Puang Yesus, mesa tando di pembää'anna anna mesa tando di pembihti'anna.

¹³Mekutanang yato malaeka' yaling mai naoatee, ”O Indo', akae dio undusengngi?” Naoante mentimba', ”Puangku puha naala tau. Dai kuinsang umba napampaongei.”

¹⁴Puhai ma'tula' inde Maria mensaileng pano di kebo'na. Ya' ungngitang Puang Yesus ke'de', ampo' dai natandai naoate Puang Yesus yato ang naita.

¹⁵Mekutanang Puang Yesus naoatee, ”O Indo', akae dio undusengngi? Mennae dio umpeäng?” Ampo' inde Maria nasangae' to pambahahsi bela' yato ang menge mampa'karai. Dianto anna mentimba'mi naoatee, ”O Pua', Diorakae' umparendei inde bahke ang aha yaling di ku'bu'? Ponna Dio, kalemuiä' tula' manahpaingkä' umba umpampaongei anna malai do kuala sumule.”

¹⁶Naoa bunte Puang Yesus, ”O Maria.” Tahpa mengkolimmi ta Maria pano di Puang Yesus anna ma'karai yaling di basa Ibrani naoatee, ”Rabuni!” ang bahtuanna ”Tuangkuhungku!”

¹⁷Naoante Puang Yesus, ”Dakä' mala ungnganti aka' dakä' aha mao dai' di Ambeku, ampo' inang la maorä'tee'. Dahi pahallu umpainsangngi asang to pentindo'ku ang kuangka' solasohongku. Oaingkä'tee, ‘Dang masae anna maomä' dai' di Ambeku ang umpoambe toua' dio, Dehatangku ang umpodehata toua' dio.’ ”

¹⁸Dianto anna le'ba'mi Maria do napepakahebaing, aka' puhang silambi' Puang Yesus. Anna natula' asangnging yato ang puha naoaing.

¹⁹Donetoo di allo Mingku di bengi, ma'himpummi pahsikolana Puang Yesus di mesa dasang anna sika untana' asangngi babana aka' sika mahea' pano di to pambahananna to Yahudi. Pihsananna nei' sulee' Puang Yesus anna tahhi'i ke'de' yaling di tängngä-tängngänaii anna ma'karai naoatee, ”Salama' mating di dioa'.”

²⁰Puhai ma'tula' noa, ya' umpepaitaming teyyena anna kasihinna. Sika kahsi liung aka' naita anna nainsang naoatee tuho si'dae' sumule.

²¹Naoa sala bunte Puang Yesus, ”Salama' mating di dioa'. Umba noa nasuoä' Ambeku tama di lino, noa tunto Kodi' dinoa la kusuokoa' mao do umpepainsangnging inde kaheba.”

²²Mane umpembuhhu'ing penanaha anna naoaitee, ”Tahimboia' inde Inaha Masero.

²³Ponna ke ungngampungngikoa' kasalaanna mesa tau, ya' naampungngi toete' Puang Alataala. Ampo' ponna ke daia' ungngampungngi, ya' datoete' naampungngi Puang Alataala.”

²⁴Ta Tomas (ang si disangai toe' ‘To Hambung’), dianto mesa pahsikolana Puang Yesus di alla'na to sampulo derua. Donetoo daine' ma'himpung sibaha solana naonge sulei Puang Yesus.

²⁵Ya' napainsangnging solana naoaintee, ”Puhamang kami' ungngita Puang Yesus.” Ampo' natimba' ta Tomas naoatee, ”Ke dake' paita matangku anna ke dake' kupentohse'ing inde hängkä'ku pano di teyyena yato di lalang päso'; noa tunne' ke dake' kupengnguluing inde teyyeku pano di kasihinna, ya' inang dasi'da-si'dake' kupetahpa'.”

²⁶Sammingku puhanna yatoo, ma'mesa-mesa bumi pahsikolana Puang Yesus yato di dasang, ampo' di hao buke' inde Tomas donetoo. Dai masae sule buranne' Puang Yesus anna pihsa'i ke'de' di tängngä-tängngänaii, moinnakato anna titana' asangngi baba. Ma'tula'i naoatee, ”Salama' mating di dioa'.”

²⁷Pihsananna ungngoaminte ta Tomas, ”O Tomas, itang inde lalang päso' di teyyeku anna maimo pentohse'ing hängkä'mu tama. Ita toine' inde lalang doke di kasihingku anna umpengnguluing teyyemu tama. Dahi damong umbata-bata, ampo' pampetahpa' si'da-si'damo.”

²⁸Naoante Tomas mentimba', ”Dio Puangku anna Dehatangku!”

²⁹Naoa sala buminte Puang Yesus, ”Umpetahpa'mi pole' aka' ungngitamä', i? Ampo' kahsine' tau ang mampetahpa' moinnakato dakä' naita.”

³⁰Mai'dike' tanda ang mepusa'-pusa' nababe Puang Yesus di olona pahsikolana, ang dai aha tiuki' yaling inde di suha'.

³¹Ampo' nasuhung tiuki' ingkänna ang aha done indee anna malai umpetahpa' ungngoatee Puang Yesus dianto To Dilanti' la Mepasalama', Änä'na Puang Alataala. Dia tuke' anna malai untahimbo katuhoang sapano-panona aka' umpetahpa' yaling di sanganna.