Read Aralle-Tabulahan Yohanes 21 Bible Online

Yohanes 21 - Aralle-Tabulahan bible

Yohanes 21

¹Pihsananna umpepaita buming Kalaena Puang Yesus pano di pahsikolana di hoi' di behing Le'bo' Tiberias.[19] Noa indee tohodolunna:

²Pihsang tempo indee sangngaka-sangngaka pahsikolana, dianto: Simon Petrus, Tomas ang si disanga ‘To Hambung,’ Natanael ang sule di hao mai di Bohto Kana di Galilea, derua änä'na ta Zebedeus anna ahake' derua ang senga', sika tihimpung di hoi' di behing le'bo'.

³Naoante Simon Petrus pano di solana, ”La maoä' ko modala.” Sika natimba'mi naoatee, ”La mao touang kami' mempola.” Ya' sika mendai' siang di lopinna anna le'ba'i. Ampo' donetoo napesambengii modala, daliui aha bau naala moi poro la mesa.

⁴Tahpana la timbimmi allo, ke'de'mi Puang Yesus di hipe di behing le'bo' ampo' dai sika nainsang naoate Puang Yesus yatoo.

⁵Mekutanang Puang Yesus pano diii naoatee, ”Oa' sammuane, aharaka pealammu?” Para-parang mentimba' naoatee, ”Dai aha.”

⁶Naoante Puang Yesus pano diii, ”Pensambangngingnga' ne dalamu pano di tando kuananna lopimmu anna malaia' aha bau ungngala.” Ya' sika napanoa si'dang. Tahpana nahui' yato dalana, dakale nabela nabua' dai' di lopi tandana matingngi si'da-si'da aka' punnong bau.

⁷Ya' ma'karang yato pahsikolana Puang Yesus ang napakamaya pano di Petrus naoatee, ”Tantu anna Puangngi indoo!” Nahingnginna ta Petrus, Puang Yesus-e', tahpa mekaya' siang anna mengkahtibei naung di le'bo', molangi bete'.

⁸Yatone' pahsikolana ang senga' sika melolane' molopi lella' unghui' yato dala ang punno bau, aka' dasiang makahao, umbai sangngatu' supu mete' alla'na.

⁹Tahpana sika lambi' bete' anna tuhummi yaho mai di lopinna, ya' sika ungngitang api meahha menge dipantunui bau anna aha toe' roti.

¹⁰Naoante Puang Yesus pano diii, ”Bahaia' ne mai sisangngaka baummu ang mane ungngala.”

¹¹Ya' dai'mi Simon Petrus di lopinna anna unghui'i yato dala ang punno bau sikäyyäng pano di kalantanang. Mai'dinna yato bau sangngatu' limampulo tallu, ampo' moinnakato noa, ya' dai maaka yato dala.

¹²Ma'kara bung Puang Yesus pano diii naoatee, ”Maimokoa', potindä'.” Donetoo ingkänna pahsikolana, dai aha ang bahani mekutana naoate, ”Mennao setonganna?” aka' sika nainsammi yaling di inahanna naoate Puang Yesus yatoo.

¹³Pihsananna mendungku'mi Puang Yesus mane ungngalai yato roti anna nasusaing pano diii, sika naande. Noa tunne' yato bau.

¹⁴Dianto inde kapentallunna Puang Yesus umpepaitaing Kalaena pano di pahsikolana tahpana tuho sumule di hoi' mai di kamateang.

¹⁵Puhai sika mande, mekutanang Puang Yesus pano di Simon Petrus, änä'na Yohanes, naoatee, ”O Simon, ungkalemui si'da-si'darakakä' la'bi andana pa'kalemunna solamu?” Mentimba'mi Simon Petrus naoatee, ”Io Puang, ungnginsang tobou Dio kukalemui si'da-si'dao.” Naoaminte Puang Yesus, ”Kambi'ingkä' petauangku sihapang änä' dombaku.”

¹⁶Mekutana sala bumi Puang Yesus kapendoanna naoatee, ”O Simon, ungkalemui si'da-si'darakakä'?” Mentimba' bumi Simon Petrus naoatee, ”Io Puang, ungnginsang tobou Dio kukalemui si'da-si'dao.” Naoa buminte Puang Yesus, ”Kambi'ingkä' petauangku sihapang dombaku.”

¹⁷Nakutanai sala bumi Puang Yesus kapentallunna naoaintee, ”O Simon, ungkalemui si'da-si'darakakä'?” Ya' mapi'di'mi inahanna Simon Petrus aka' pentallung kalerang nei' napa'kutana-tanai Puang Yesus. Mane mentimba'i naoatee, ”O Puang, ungnginsang asang ingkänna-ingkänna siamo. Ungnginsang toi umba noa pa'kalemungku mating.” Naoa buminte Puang Yesus, ”Kambi'ingkä' petauangku sihapang dombaku.

¹⁸Kutula'ingko setonganna naonge mahäti'kangko si unsalipii tobouo dio kalaemu anna maoo kalao-lao situhu' pampemalanna inahammu. Ampo' ke to baha'mo dako' la umpentandorangngingko supu teyyemu anna napungoo tau, mane nabahao pano di ongeang ang dai la ungkärä'i.”

¹⁹(Inde ang naoa Puang Yesus untula' lohpo' umba la noa kamateanna ta Petrus dako' ang la umpamatande Puang Alataala.) Puhai yatoo naoaminte Puang Yesus, ”Tindo'ä'.”

²⁰Mensaileng ta Petrus pano di kebo'na, ya' ungngitang yato pahsikolana Puang Yesus ang napakamaya, yato ang mohko' dolu di behinna Puang Yesus naonge sika mandei anna mekutanai naoatee, ”O Puang, menna inde ang la mambalu'o?”

²¹Naitanna Petrus, ya' mekutanang pano di Puang Yesus naoatee, ”O Puang, umbanne' la noa indee?”

²²Natimba'mi Puang Yesus naoaintee, ”Ke la hapangannai pemalaä' anna tuho loloi lambi' kasuleangku kapendoanna, ya' tadia ang la ungnginsang. Ampo' dio, tindo'ä'!”

²³Dianto anna tisembu'mi kaheba di alla'na pahsikolana Puang Yesus naoatee, ”Daine' are' la mate yatoo.” Ampo' setonganna dai aha naoate Puang Yesus, ”Daine' la mate,” supunne' naoatee, ”Ke la hapangannai pemalaä' anna tuho loloi lambi' kasuleangku kapendoanna, yatoo tadia ang la ungnginsang.”

²⁴Dianto inde pahsikolana ang mansa'bii didiona ingkänna indee ang dahi, anna dianto ang mangnguki'. Lambi' mala tainsang taoatee yato kasa'bianna tahpa' si'da-si'da.

²⁵Setonganna mai'di liuke' kaha-kaha senga' ang hali nababe Puang Yesus, ampo' ponna la diuki' asang ingkänna yatoo, ya' umbai dai la sihoa tama asang di lino yato ingkänna suha' ang la diuki'.