Read Aralle-Tabulahan Yohanes 3 Bible Online

Yohanes 3 - Aralle-Tabulahan bible

Yohanes 3

¹Aha mesa to pambahananna to Yahudi yaling mai di alla'na to Farisi ang disanga Nikodemus.

²Sule umpellambi'i Puang Yesus di bengi anna naoaintee, ”O Tuang, kiinsang kioate tuangkuhuo ang nasuo sule Puang Alataala. Aka' dai aha mesa tau ang la mala umbabe tanda ang mepusa'-pusa' sinnoa ang hali umbabe ke dai naposolai Puang Alataala.”

³Natimba'mi Puang Yesus naoaintee, ”Kutula'ingko setonganna dai aha moi poro la mesa tau ang la mala mentama di Kapahentaanna Puang Alataala ke dai dipadahi sala.”

⁴Mekutana bung Nikodemus naoatee, ”Umbanne' la noa ke tobaha'mi tau la dipadahi sala? La malarakae' tau mentama sumule di kompenna indo anna mepadahi salai?”

⁵Natimba'mi Puang Yesus naoatee, ”Kutula'ingko setonganna ponna mesa tau dai dipadahi sala ungngolai uhai anna Inaha Masero, ya' daete' mala mentama di Kapahentaanna Puang Alataala.

⁶Situhu' mentolinona hupatau dahi di hao mai di to baha'na, ampo' situhu' mendehatanna dahi di hao mai di Inaha Maserona Puang Alataala.

⁷Daa umpusa' ke kuoaingkotee: pahallukoa' dipadahi sala.

⁸Supung Inaha Masero ang mala mebea katuhoang bakahu. Yato Inaha Masero sihapang pepahi ang tisau diamo-diamo naola. Mala dihingngi yato pepahi, ampo' dai diinsang umba nakasulei bahtu' umba la naola.”

⁹Mekutana bung Nikodemus naoatee, ”Umbanne' ne la noa pake la mala dahi?”

¹⁰Natimba'mi Puang Yesus naoaintee, ”Sanga mesao tuangkuhunna to Israel. Akana pake la dae dio ungnginsang kaha-kaha yatoo?

¹¹Kutula'ingko setonganna supung ma'tula'ang didiona aka ang puha kiinsang, anna kisa'bii aka ang puha kiita, ampo' daia' ungngaku untahimbo yato kasa'biangki'.

¹²Umbangnga' dio la umpanoa umpetahpa' ke kitoroholoingkoa' kaha-kaha mendehatanna, aka' daia' ungngaku umpetahpa' ke kitoroholoingkoa' kaha-kaha mentolinona?

¹³Dake' aha moi poro la mesa tau ang haling dai' di suruka, sehalinna Änä' to Lino ang tuhung yaho mai mentama inde di lino.

¹⁴Umba napanoa Musa umpake'de' mesa ahhi anna napampadai'i yato ile ang natampa naonge di haoi di ongeang makä'däng, ya' la noa tuntone' Kodi' Änä' to Lino pahallu touä' Ko dipadai',[4]

¹⁵anna malai ingkänna tau ang mampetahpa' pano di Kodi' la ullambi' katuhoang sapano-panona.”

¹⁶Tandana käyyäng pa'kalemunna Puang Alataala pano di to lino, lambi' umbeho Änä' samboana, anna malai ingkänna tau ang mampetahpa' pano dai la tallang, ampo' la ullambi' katuhoang sapano-panona.

¹⁷Aka' nasuhung Puang Alataala unsuo Änä'na mentama inde di lino, dianto dai sule untahungkung inde to lino, ampo' sule mampasalama'.

¹⁸Ingkänna tau ang mampetahpa' pano daine' la ditahungkung, ampo' menna-menna ang dai mampetahpa' setonganna mellaonne' tahungkunna Puang Alataala yaling di katuhoanna aka' dai naaku mampetahpa' pano di Änä' samboana.

¹⁹Yato tahungkunna Puang Alataala noa indee: tandaammi katahpa'anna Puang Alataala yaling inde di lino sihapang kamabayaang, ampo' nakärä'i puhane' to lino tontong yaling di kamalillingang aka' pemala lolo sika umbabe kakarakeang.

²⁰Aka' tau ang si membabe karake ungkahi'di'ete' nei' kamabayaang. Dai naaku ullumba yato kamabayaang aka' pemala tontong tibuni pembabe karakena.

²¹Ampo' tau ang si membabe ang situhu' katahpa'ang ungkärä'iete'ne' kamabayaang anna malai tuhtuang tandaang yato pembabena dioatee naelo'i Puang Alataala.

²²Puhanna yatoo, le'ba'mi Puang Yesus sibaha pahsikolana lupano di Yudea anna sika tohhoi di hao sibaha-baha sangngaka-sangngaka masaena, lella' siang mantero'.

²³Donetoo dake' dipatama di tahungkung Yohanes to Pantero'. Menge tuke' nei' mantero' di hoi' di mesa ongeang disanga Ainon sidungku' Bohto Salim aka' di hoi' inde di ongeang mai'di timbu ang mahasa diongei mantero'. Lambi' mai'di tau sika sulei di hoi' pemala ditero'.

²⁵Donetoo aha sangngaka-sangngaka to pentindo'na ta Yohanes sibehta mesa to Yahudi didiona atohang kamabahahsiang ke la mengngoloi tau dai' di Puang Alataala.

²⁶Sika umpellambi'ing Yohanes anna ma'karai naoatee, ”O Tuang, ungkalehaikake' yato tau ang hali unsibahaing di hipe di tando bete'na Salu Uhai Yordan, yato tau ang untuhoingkang dolu? Dinoa lella' toe' mantero' anna ingkänna tau le'ba'i nallumba.”

²⁷Mentimba'mi Yohanes naoatee, ”Dai maaka, aka' dai aha mesa tau ang la mala umbabe aka-aka siamo, ke dai napabei Puang Alataala.

²⁸Hali siangnga' unghingngi naonge ma'tula'ä' kuoatee, ‘Tadiaä' To Dilanti' la Mepasalama', ampo' disuoä' sule kukadoluangngi.’

²⁹Hapanganna ang ungngampui mesa bahine ang la kabeng, dianto muane ang la nasialaing. Ampo' yato sammuanena, supunte'ne' ke'de' di hao di behinna ma'pehingngi. Anna kahsi liu ke unghingngii kamahanna yato muane ang menge dipakabeng. Noa tumä'to kodi'. Dinoa sundung liu kakahsiangku.

³⁰Inde ang kupasihapang muane ang la kabeng, Dianto ang la pahallu tuhtuang dipakeangka', ampo' kodi' pahallumä' ko tuhtuang dai dipakeangka'.

³¹Menna ang sule yaho mai di suruka dianto ang mayahoang di ingkänna siamo. Ang sule yaling mai di lino inang to lino anna ma'tula' situhu' tula'na to lino, ampo' Puang Yesus ang sule yaho mai, Dianto ang inang mayahoang di ingkänna siamo.

³²Untula' kasa'bianna didiona aka ang puha naita anna ang puha nahingngi, ampo' dai aha moi poro la mesa tau ang mantahimbo yato kasa'bianna.

³³Ampo' pano di tau ang untahimbo yato kasa'bianna, ungngakuine' katahpa'anna Puang Alataala.

³⁴Aka' ang nasuo Puang Alataala Dianto ang umpalambi' ingkänna bahtakaranna, aka' Kalaena Puang Alataala umbeai Inaha Masero napasundung si'da-si'da.

³⁵Puang Alataala ang tapoambe ungkalemui si'da-si'da Änä'na anna puhang nabehoing ingkänna kakuasaanna pano.

³⁶Dahi menna ang mampetahpa' pano di Puang Yesus la ullambi' katuhoang sapano-panona, ampo' tau ang dai mantahimbo daine' la ullambi' katuhoang, supung tahungkunna Puang Alataala ang la nalambi'.”