Read Aralle-Tabulahan Yohanes 4 Bible Online

Yohanes 4 - Aralle-Tabulahan bible

Yohanes 4

¹Donetoo nahingngi sangngaka-sangngaka to Farisi naoatee mai'di puhanne' to pentindo'na Puang Yesus ang natero' andana to pentindo'na Yohanes to Pantero'.

²(Ampo' setonganna tadiaete' Kalaena Puang Yesus ang mantero', yatoete' pahsikolana.)

³Tahpana nainsang Puang Yesus didiona kaha-kaha yatoo, ya' sika mengkalao siang umpellei Yudea sumule pano di Galilea.

⁴Yaling yato di pellaoanna pahallu ungngolai Bohto Samaria.

⁵Ya' sika lambi'mi pano di mesa bohto di hao di Samaria ang disanga Sikhar, sidungku' tampona Yakub ang namana'ing dolu pano di änä'na, dianto Yusuf.

⁶Di hao yatoo aha mesa buyung ang nababe maang Yakub. Donetoo umbai tängngäng allo anna malupu liung mellao Puang Yesus, dianto anna mehileng di hao yato di behing buyung.

⁷Tahpana le'ba'ine' pahsikolana tama di bohto do sika ungngalli andeang, ya' suleng mesa bahine to Samaria di hao yato di buyung la tumimba. Ma'tula'mi Puang Yesus pano naoatee, ”O Tanta, malarakä' umbea uhai la kuenu'?”

⁸

⁹Mentimba'mi yato bahine naoatee, ”Akana la mane diannang aha to Yahudi la umpalau uhai pano di to Samaria?” (Aka' donetoo to Yahudi anna to Samaria dai sibea inaha.)

¹⁰Mentimba'mi Puang Yesus naoatee, ”Ke la ungnginsammone' pebeana Puang Alataala anna ungnginsang toi menna ang mampalauio dinoa, tantunte' anna la malau touo dio pano di Kodi' uhai mepatuho anna inang la kubeao.”

¹¹Naoa bunte yato bahine, ”O Tuang, umbang Dio la umpangngalai ne ang ungngoaintee uhai mepatuho, aka' dai aha pesengko'mu. Dia tuke' inde buyung manaung si'da-si'da.

¹²La umpellondoi puharakako Dio peneneangki' Yakub ang mammana'ang inde buyung? Inde buyung dianto ang si napangngalai uhai kalaena Yakub dolu ang naenu' sibaha änä'na anna ingkänna patuhoanna.”

¹³Natimba' bung Puang Yesus naoaintee, ”Menna-menna ang ungngenu' inde uhai la mahähängke' sumule,

¹⁴ampo' pano di tau ang la ungngenu' uhai ang la kubea, dang aha la mahähäng lambi' sapano-panona. Anna yato uhai ang la kubea la sihapang timbu yaling di kalaena ang dai aha la mahti'-mahti'na ang mala mebea katuhoang ang lambi' sapano-panona.

¹⁵Naoa bunte yato bahine, ”O Tuang, ya' tungka beamä' ne uhai ang ungngoaing anna malai damä' mahähäng sala, lambi' damä' pahallu mosule-sule done.”

¹⁶Ma'kara bung Puang Yesus pano naoaintee, ”Laoo do tambai muanemu anna sulekoa' sibaha.”

¹⁷Mentimba'mi naoatee, ”Ampo' dä' kemuane, Tuang.” Natimba' salang Puang Yesus naoatee, ”Ahana inang tahpa' ne tula'mu ungngoatee, ‘Dä' kemuane,’

¹⁸aka' setonganna puhamo kabeng pellima kale, ampo' ang unsibahaing dinoa tadia muanemu si'da. Dahi yaling di kaha-kaha indee kuangka' tahpa' tula'mu.”

¹⁹Naoa bunte yato bahine, ”O Tuang, malesong pole' pano di kodi' dinoa kuoate mesao nabi.

²⁰Mengkalao di peneneangki' si menombaang yaho done di tanete, ampo' dioa' dio to Yahudi si ungngoaa'tee supunte' Yerusalem ang sihatang diongei menomba.”

²¹Naoa buminte Puang Yesus, ”Pehingngiiä', kutula'ingko la lambi' tempona ingkänna tau la menomba dai' di Ambeta Puang Alataala dai yaho done inde di tanete anna datoi yaho di Yerusalem.

²²Dioa' to Samaria umpenombaikoa' ang kipenombai ampo' daia' ungnginsang mennae' setonganna, ampo' kami'-kami' to Yahudi menombaang kami' pano di Dia ang kiinsang si'da-si'da, aka' to Yahudi dianto ang napillei Puang Alataala la nakasulei To Pepasalama'.

²³Ampo' la lambi'mi tempona, anna yato tempona mala dioatee dahing dinoa! Moi dinoa to penomba ang setonganna menge natehte Inaha Masero umpenombai Ambeta situhu' katahpa'ang. Dianto indee to penomba ang napeäng Ambeta.

²⁴Puang Alataala dianto Inaha Masero, dahi supung mala napenombai tau situhu' katahpa'ang ungngolai petehtena Inaha Masero.

²⁵Ma'tula' bung yato bahine pano di Puang Yesus naoatee, ”Kuinsang la sule To Dilanti' la Mepasalama' ang disangai toe' ‘Kristus.’ Ponna suleng, ya' la umpepainsangnging ingkänna-ingkänna siamo pano di kita'.”

²⁶Naoaminte Puang Yesus, ”Aka' Kodi'mi nei' indee ang lella' unsipa'karaing dinoa.”

²⁷Donetoo sika sumuleing yato pahsikolana Puang Yesus yaling mai di bohto. Pusa'mi ungngita Puang Yesus lella' sipa'tula' mesa bahine, ampo' di alla'naii dai aha ang bahani mekutana pano yato di bahine naoatee, ”Aka umpahallu, Tanta?” bahtu' mekutana pano di Puang Yesus naoatee, ”Akana sipa'tula'rakoa' Dio inde bahine, Tuang?”

²⁸Pihsananna yato bahine umpellei tomande'mi timbaanna anna le'ba'i lumumpa' pano di bohto anna ma'karai pano di ingkänna tau di hao

²⁹naoatee, ”Mairakoa' do taitai! Aha di hao done mesa tau ang mantula'i asangngingkä' ingkänna ang hali kubabe dolu. Umbai' Diang ang disanga To Dilanti' la Mepasalama'?”

³⁰Lambi' ingkänna yato ihsi bohto le'ba' asang do ullumba Puang Yesus.

³¹Donetoo lella' siang yato pahsikolana unsuo Puang Yesus mande naoaintee, ”O Tuang, maio ande.”

³²Ampo' mentimba' Puang Yesus pano diii naoatee, ”Ahaeto Kodi' andeangku ang daia' ungnginsang.”

³³Ya' laonang sikutana-tanai yato pahsikolana naoatee, ”La aharakae' ang hali mambahaing andeang, naande?”

³⁴Ma'tula' bung Puang Yesus naoatee, ”Andeangku diantoo untuhu'i ingkänna pangngelo'na ang mansuoä' sule, anna umpepuhaiä' ingkänna kähängangku ang puha napama'tantu.

³⁵Ungngoaa' diotee, ‘Uhpa'ke' bulanna mane pepaheangngi,’ ampo' kuoaingkoa' dinoa: pennenne'koa' lipu' anna ungngitakoa' inde mai tau sihapang pahe ang maheng anna malang dipepahe.

³⁶Napahandu'mi ingkänna to pentindo'ku ang dipasihapang to pepahe untahimbo sahona dianto kamasannangang unghimpung boa pengkähänna ang la umbaha to mampetahpa' pano di katuhoang ang lambi' sapano-panona, lambi' to pambubu' anna to pepahe la masannang sibaha-baha.

³⁷Yaling di kaha-kaha indee tahpa' yato kara to baha' ang naoatee, ‘Senga' to pambubu' anna senga' ang mampepahe.’

³⁸Kusuokoa' umpepahe aka ang dai aha ungkähäng; tau senga' ang mangkähäng anna sulekoa' dio supu umpepahe boa pengkähännaii.”

³⁹Mai'di liu to Samaria ang mampetahpa' pano di Puang Yesus aka' unghingngi kasa'bianna yato bahine ang naoatee, ”Natula'i asangngingkä' ingkänna aka ang puha kubabe dolu.”

⁴⁰Tahpana silambi' Puang Yesus yato ingkänna to Samaria, ya' sika malaung pano ke la malai tohhoke' di hao sibaha-baha. Ya' tohho si'dang di hao dongngallo masaena.

⁴¹Donetoo tuhtuang mai'ding tau ang mampetahpa' pano aka' nahingngi tula'na.

⁴²Sika naoante pano yato di bahine, ”Dinoa mampetahpa'mang, tadia aka' unghingngiang tula'mu, ampo' kalaeki' tubung kami' unghingngi tula'na anna kiinsang kioatee, Dianto To Pepasalama'na ihsinna lino.”

⁴³Tahpana dongngallo Puang Yesus tohho di hao di Bohto Sikhar, ya' tahhi'mi lupano di Galilea.

⁴⁴(Inang puha natula' dolu naoatee, ”Mesa nabi dai dipakeangka' di hao di bohtona toboe'.”)

⁴⁵Tahpana lambi' pano di Galilea, ya' sika natammui manahpang tau di hao, aka' puha naita pembabena yaho di Yerusalem naonge anna pa'rame-rameang Paskanai to Yahudi.

⁴⁶Puhai yatoo, sumule bung Puang Yesus pano di Bohto Kana di hao di Galilea ang puha naongei umpapendahi angkoro' uhai. Di hao yato di bohto aha mesa to pengkähänna tomaraya ang makorong kahha' änä'na di hoi' di Bohto Kapernaum.

⁴⁷Tahpana napelele sule Puang Yesus di hao mai di Yudea, ya' le'ba'mi do natammui napalau ke la malai mao naung di Kapernaum do umpabono'ing yato änä'na ang makorong kahha'.

⁴⁸Ampo' ma'tula' Puang Yesus naoatee, ”Ponna ke dakoa' ungngita tanda ang mepusa'-pusa', ya' dakoa' mampetahpa'.”

⁴⁹Mentimba'mi inde to pengkähänna tomaraya naoatee, ”Kalemuiä', Tuang, ke la malai ullumba akinna dake' mate.”

⁵⁰Naoaminte Puang Yesus, ”Laomote' aka' bono'mi änä'mu.” Inde tau umpetahpa' si'da yato tula'na Puang Yesus anna le'ba'i.

⁵¹Dake' lambi' naung anna natammuing sangngaka-sangngaka änä' buana naoaintee, ”O Tuang, bono'mite' änä'mu!”

⁵²Mekutanang pano diii naoatee, ”Tehte' sangngaka anna bono'i?” Ya' sika natimba'mi naoatee, ”Di pehengi umbai tehte' mesa tängngä allo anna pihsa' pa'dai luhsunna.”

⁵³Tahpa nakalehaing inde ambena änä' aka' tungka patunna liunto pehengi anna napa'tula'i Puang Yesus naoaintee, ”Bono'mite' änä'mu.” Ya' sika mampetahpa' asammi samai ang aha yaling di hapunna inde to pengkähänna tomaraya.

⁵⁴Dianto inde tanda ang mepusa'-pusa' ang kaderuanna nababe Puang Yesus di hao di Galilea tahpana sumule di hao mai di Yudea.