Read Aralle-Tabulahan Yohanes 5 Bible Online

Yohanes 5 - Aralle-Tabulahan bible

Yohanes 5

¹Tahpana yatoo le'ba'mi Puang Yesus dai' di Yerusalem aka' aha pa'rame-rameanna to Yahudi.

²Yaho di Yerusalem aha limbeng ang yaling di basa Ibrani disanga ‘Betesda,’ sidungku' babana bohto mahoa' ang disanga ‘Baba Domba.’ Di behinna inde limbeng aha lima pentu'dungang

³ang naongei mai'di to makorong: aha to buta, aha to hehpä' anna aha to makule. [Sika ungngempei ke tisimbeng bung inde uhai.

⁴Aka' si aha tempona malaeka'na Dehata tuhung yaho mai anna napatisimbengngi. Diamo to makorong ang handang dolu mentama yato di uhai lella' tisimbeng, ya' mala tahpa bono' di hao mai di koronna, moi korong aka siamo.]

⁵Di hao yato di behinna aha mesa muane ang tallumpulo kahuang pahiamanna makorong.

⁶Naitang Puang Yesus yato tau matindo di hao di patindoanna anna nainsang naoatee masae liung makorong. Ya' nakutanaing naoaintee, ”Ungngakuraka ke bono'o?”

⁷Natimba'mi naoatee, ”O Tuang, dai aha tau mangkalemuiä' tahpa mampatamaä' inde di uhai ke tisimbeng bumi. Aka' la mao bouä'to tama, ya' dakä' lambi' anna napendolui bumä' tau senga'.”

⁸Naoaminte Puang Yesus, ”Kalehamo! Lolongngii alemu umbaha anna mellaoo.”

⁹Ya' kaleha siang donetoo aka' bono'mi. Ullolongngi siang alena anna nabahai le'ba' mellao. Donetoo sipatu allo katohhoang.

¹⁰Dianto anna naoaminte to pambahananna to Yahudi, ”Allo dinoa allo katohhoang. Dao mala do umbulle alemu!”

¹¹Ampo' natimba' naoatee, ”Tau ang mampabono'ä' di langngena' dianto ang mansuoä' do umbaha inde aleku.”

¹²Nakutanaing naoaintee, ”Mennakae' ne ang mansuoo?”

¹³Ampo' inde tau ang mane puha bono' dai nainsang menna yatoo, aka' mentamang Puang Yesus di alla'-alla'na tau mai'di.

¹⁴Pihsananna silambi'mi Puang Yesus di hao di Dasang Ada'na Puang Alataala naoamintee, ”Dinoa bono'mo. Dahi daumbabe lolo kasalaang anna dao nahoa kamasuhsaang ang matingngi puhake'.”

¹⁵Ya' le'ba'mi inde tau anna napepainsangnging pano di to pambahananna to Yahudi naoatee Puang Yesusmitoo ang puha mampabono'.

¹⁶Donetoo napahandu'mi to pambahananna to Yahudi umpeängnging lalang Puang Yesus anna malai nadahha aka' umpabono' tau di allo katohhoang.

¹⁷Ampo' naoate Puang Yesus pano diii, ”Mengkähäng lolo Ambeku lambi' allo dinoa. Dahi pahallu mengkähäng lolo touä' Kodi'.”

¹⁸Yato tula'na Puang Yesus tuhtuang umpakeaha' to pambahananna to Yahudi lambi' mopahtuyu sika la napatei. Ang napokeaha' to Yahudi dai supu aka' untehkai atohang didiona allo katohhoang, ampo' aka' unsanga toe' Kalaena Änä'na Puang Alataala, ang bahtuanna umpasinnoa Kalaena Puang Alataala.

¹⁹Ma'karang Puang Yesus pano diii naoaintee, ”Kutula'ingkoa' setonganna Kodi', Änä'na Puang Alataala, darä'te' la mala umbabe aka-aka siamo situhu' pahtuyungku tobou Kodi', ke dai puha kuita nababe Ambeku. Aka' aka ang puha nababe Ambeku dia tunto Kodi' kubabe.

²⁰Aka' pa'kalemunna Ambeku pano di Kalaeku lambi' napaitaiä' ingkänna kaha-kaha ang puha nababe Kalaena. Anna dai yato supu, ampo' la napaitai touä' nei' kaha-kaha ang käyyäng puha nei' andana yatoo, lambi' la pusa'koa' ungngita.

²¹Aka' umba napanoa Ambeku umpatuho sumule to mate bahtu' mebea katuhoang, la kupanoa tunto Kodi' umbea katuhoang ang lambi' sapano-panona pano di diamo tau ang pemala kubea.

²²Tadiaete' Kalaena Ambeku ang la manghohto'. Ampo' ang la manghohto', dianto puhang nabeho pano di Kodi' Änä'na.

²³Napanoa yatoo Ambeku anna malai ingkänna tau mampa'käyyängngiä' sinnoa umpa'käyyängngi Ambeku. Pano di tau ang dä' mampa'käyyängngi datoete' umpa'käyyängngi Ambeku ang mansuoä' sule.

²⁴Kutula'ingkoa' setonganna menna-menna ang umpehingngii tula'ku anna mampetahpa' dai' di Ambeku ang mansuoä' sule, ya' ullambi'mi nei' katuhoang sapano-panona anna daine' la ditahungkung, ampo' lahpa'mine' di hao mai di kamateang lupano di katuhoang.

²⁵Kutula'ingkoa' setonganna la aha tempona, anna yato tempona mala dioatee dahing dinoa, naongei mai'di tau ang mate di mendehatanna la unghingngi tula'ku lambi' la sika tuho.

²⁶Aka' umba noa Ambeku nakasulei katuhoang, ya' napanoa tumä'to Kodi' lambi' nakasulei touä' Ko katuhoang.

²⁷Anna puhamä' nabehoing kakuasaang unghohto' ingkänna to lino, aka' Kodi' indee Änä' to Lino.

²⁸Daumpusa'a' unghingngi inde kaha-kaha ang la dahi, aka' la lambi' tempona ingkänna to mate la unghingngi kamahangku,

²⁹anna sohongngi di hoi' mai di ku'bu'na. Lambi' ang membabe mapia la ullambi' nei' katuhoang, ampo' ang membabe karake la ditahungkung nei'.”

³⁰Napasilombung tula'na Puang Yesus naoatee, ”Dä' mala umbabe aka-aka siamo ke la untuhu'iä' pangngelo'ku tobou Kodi'. Manghohto'ä' situhu' ang kuhingngi yaho mai di Ambeku, anna yato panghohto'ku maroho aka' dä' untuhu'i pangngelo'ku tobou Koo, ampo' untuhu'iä' Ambeku ang mansuoä' sule.

³¹Ponna ke la unsa'bii tobouä' Ko Kalaeku, ya' daete' la napetahpa' tau yato kasa'biangku.

³²Ampo' aha ang senga' ang untula' kasa'biang didiona Kalaeku anna kuinsang kuoatee yato kasa'bianna tahpa'.

³³Puhamokoa' unsuo solamu mao do mekutana pano di ta Yohanes didiona Kalaeku, anna yato kasa'bianna Yohanes tahpa'.

³⁴Didiona kaha-kaha indee kutula'ingkoa' dai aka' pemalaä' untahimbo kasa'biang di hao mai di hupatau, ampo' pemalaä' anna dipasalama'koa'.

³⁵Yohanes dianto sihapang lampu ang puhpu makähhäng anna umpesa'dingngia' yato kamakähhänganna ampo' sampinehe' supu.

³⁶Ampo' aha tou Ko kasa'biangku didiona Kalaeku ang londo puha andana kasa'bianna Yohanes. Dianto didiona ingkänna pengkähängang ang puhaä' nabehoing Ambeku anna malai kukähäng. Pengkähängang yatoo dianto ang menge kubabe dinoa anna dianto ang mendahi kasa'biang dioate Ambeku ang mansuoä' mentama inde di lino.

³⁷Ang unsa'bii didiona Kalaeku dianto Ambeku ang mansuoä' mentama inde di lino. Moi kamahanna dake'a' aha unghingngi, londonang la umpehupa.

³⁸Anna yato bahtakaranna daia' tohho yaling di inahammu aka' dakoa' mampetahpa' pano di Kodi' ang nasuo sule.

³⁹Umpahehsakoa' Suha' Masero allo-allo aka' unsangaa' la malakoa' ullambi' katuhoang sapano-panona ke umbatakoa' Suha' Masero. Ampo' moinnakato umbatakoa' kasa'biang didiona Kalaeku yaling mai,

⁴⁰ya' dasiangnga' ungngaku sule hao mai di Kodi' anna malai ullambi' yato katuhoang sapano-panona.

⁴¹Dä' pahallu napudi hupatau.

⁴²Anna kuinsangkoa' ahana inang dai aha pa'kalemummu pano di Ambeku Puang Alataala yaling di inahammu.

⁴³Kodi' ang sule yaling di sanganna Ambeku bilang dä'a' untahimbo, ampo' ponna aha tau ang sule yaling di sanganna toboe' bilang untahimboa' nei'.

⁴⁴Umbangnga' dio la umpanoa mampetahpa' ke supumokoa' pemala napudi solamu, ampo' daia'ne' ungngaku umpengkabela-belai membabe mapia anna malakoa' napudi Puang Alataala ang setonganna?

⁴⁵Daunsangaia' Kodi' ang la mampasalakoa' di olona Puang Alataala. Ampo' setonganna ang la mampasalakoa' dianto Nabi Musa ang mebea yato Atohang ang unghannuangnga' la mepasalama'.

⁴⁶Aka' ponna ke mampetahpa'koa' pano di Musa, tantunte' anna mampetahpa' toukoa'ne' pano di Kodi', aka' puha nauki' yaling di suha'na didioku.

⁴⁷Ampo' ponna ke daia' ungngaku umpetahpa' yato aka ang puha nauki' Nabi Musa dolu, ya' umbangnga' dio la umpanoa umpetahpa' ingkänna ang kutula'?”