Read Aralle-Tabulahan Yohanes 6 Bible Online

Yohanes 6 - Aralle-Tabulahan bible

Yohanes 6

¹Tahpana yatoo le'ba'mi Puang Yesus ullambang Le'bo' Galilea, bahtu' ang disanga Le'bo' Tiberias.

²Lambi'na bete', ya' ungngitang mai'di liu tau mampentindo'i aka' puhang sika naita pembabena ang mepusa'-pusa', umpabono' to makorong.

³Pihsananna dai'mi Puang Yesus di mesa tanete anna mohko'i sibaha-baha pahsikolana yaho.

⁴Donetoo marungku'mi allo pa'rame-rameang Paskana to Yahudi.

⁵Tahpana umbua' matanna Puang Yesus, ungngitaranne' mai'di liu tau sulei mallumba. Ya' ungngoaminte Filipus, ”Umbang la dipangngallii andeang anna malai dipakandeing inde mai tau noa mai'dinna?”

⁶(Ampo' inang nainsammi Puang Yesus aka ang la nababe. Supung ungkutanai kale ta Filipus aka' la napangngitai umba noa kapampetahpa'anna.)

⁷Natimba'mi Filipus naoatee, ”Ampo' moi la mosaho tau pa'sahtaungang[5] dialliing andeang, datuke' la pantang inde pano tau mai'di moi poro napopantammi sisai'di'.”

⁸Mesa di alla'na pahsikolana ang senga' disanga Andreas, siullu'na Simon Petrus, ma'karang naoatee,

⁹”Aha inde änä' muane ang umbaha lima roti saohko' anna derua bau saohko', ampo' la napoakangkae' inde pano tau mai'di?”

¹⁰Naoante Puang Yesus, ”Suo asangngi ne tau mai'di umpahapa' ohko'na.” Di hao yato di ongeang ang sika naongei mai'di lohpo ang mahasa diohko'i. Ya' mohko' asammi yato tau mai'di umbai limang sa'bu muane mai'dinna, dake' diihsa' bahine anna änä'-änä'.

¹¹Pihsananna ungngalang yato roti Puang Yesus anna ma'kuhhu'sumanga'i dai' di olona Puang Alataala. Mane nasusa-susaing pano di tau mai'di. Yato bau nasusa-susa toe' napasiandeing. Ya' sika mandeing lambi' boho.

¹²Tahpana boho yato tau mai'di, ya' ma'tula'mi Puang Yesus pano di pahsikolana naoatee, ”Himpung asangngi ingkänna ang mela'bi. Dauntibeii.”

¹³Sika nahimpungnging yato ang mela'bi, ya' punnoke'ne' sampulo derua baki.

¹⁴Tahpana naita yato tau mai'di inde pembabena Puang Yesus, ya' sika pusa'mi anna naoaite, ”Ahana Diangnga'te' indee nabi ang masae liung diempei kasuleanna tama di lino.”

¹⁵Ampo' aka' nainsang Puang Yesus naoate sika pemala la napahsa mendahi tomarayannaii, lambi' le'ba' namesa-mesa mendende dai' di mesa tanete ang mahulla-hulla.

¹⁶Tahpana tempu' allo tuhungnging pahsikolana Puang Yesus naung di behing le'bo',

¹⁷mane sika dai'i di lopinna anna sika lambangngi la lubete' di Bohto Kapernaum. Donetoo malillimmi kalane aka' la benging, ampo' daloloke'ne' sule Puang Yesus umpelolai yato pahsikolana.

¹⁸Menge sika ullambang le'bo', ya' merohong pepahi käyyäng lambi' aha bombang.

¹⁹Tahpana umbai unnung kilomete' sika umbose lopinna umpellei behing le'bo', ya' sika ungngitaranne' Puang Yesus mellao yaho di haho uhai. Ya' sika mahea' liung.

²⁰Ampo' ma'kara Puang Yesus pano diii naoatee, ”Daummahea'a'! Kodi'ete' indee.”

²¹Ya' sika mahasang inahanna napadai' di lopinna. Donetoo tahpa sika ullambi' siang bohto ang inang la nakalambi'i.

²²Marondonnai yato tau mai'di tohho loloke'ne' di hipe yato di ongeang ang napengkalaoi pahsikolana Puang Yesus. Anna sika nainsang naoatee inang mesa supu lopi ang aha di hipe pehengi, dianto ang napake pahsikolana le'ba', ampo' daine' mempola Puang Yesus.

²³Pihsananna suleng sangngaka-sangngaka lopi di hipe mai di Bohto Tiberias anna napatohhoi di behing le'bo' sidungku' yato ang puha naongei tau mai'di ungngande roti ang nakuhhu'sumanga'i Puang Yesus.

²⁴Tahpana sika naita yato tau mai'di dai aha Puang Yesus di hipe, noa tunne' pahsikolana, ya' sika dai'mi di lopinnaii anna le'ba'i bete' di Kapernaum do napeäng.

²⁵Tahpana yato tau mai'di silambi' Puang Yesus di hipe di tando bete'na Le'bo' Galilea, sika mekutanang pano naoatee, ”O Tuang, tehte' sangngaka anna lambi'o sule done?”

²⁶Sika natimba'mi Puang Yesus naoaintee, ”Kutula'ingkoa' setonganna nasuhung umpeäng lelengngä'a' dai aka' ungngitakoa' tanda ang mepusa'-pusa' ang hali kubabe, ampo' aka' halikoa' kupakande lambi' boho.

²⁷Daumpengkähängnga' aka' pemalakoa' supu ullambi' andeang mentolinona ang la puha anna la bosi, ampo' diare' pengkähängkoa' anna malakoa' ullambi' andeang mendehatanna ang dai aha la puhanna anna dai aha la bosi ang la mala mebea katuhoang ang lambi' sapano-panona. Yato andeang Kodi' inde Änä' to Lino ang la mambeakoa', aka' puhamä' nalanti' Ambeku Puang Alataala anna malai yato kubabe.”

²⁸Mekutana bung yato tau mai'di naoatee, ”Dahi aka ang la pahallu kibabe anna malaang umpamasannang Puang Alataala?”

²⁹Natimba' bung Puang Yesus naoaintee, ”Noa indee pangngelo'na Puang Alataala: dianto pampetahpa'koa' mai di Kodi' ang nasuo mentama inde di lino.”

³⁰Sika naoa buntee, ”Ponna noa yatoo, ya' paitaiang tanda anna malaang mampetahpa' mating di dio. Babeingkang tanda ang mepusa'-pusa'!

³¹Peneneanta dolu puha sika ungngande andeang ang disanga manna di hao di ongeang makä'däng, situhu' ang tiuki' yaling di Suha' Masero naoatee, ‘Sika napakande roti ang tuhung yaho mai di suruka.’ ”

³²Ma'tula'mi Puang Yesus pano diii naoaintee, ”Kutula'ingkoa' setonganna tadiaete' Musa ang mambeakoa' andeang yaho mai di suruka, ampo' Ambekuetee' ang mambeakoa', anna dianto yato andeang ang tahpa' si'da-si'da.

³³Aka' andeang ang mebea Puang Alataala, tuhung yaho mai di suruka anna dianto yato ang umbea katuhoang pano di to lino.”

³⁴Sika naoantee, ”O Puang, tungka pobea-beamang ne andeang ang ungngoaing.”

³⁵Mentimba'mi Puang Yesus naoatee, ”Kodi'mito indee andeang ang mepatuho. Menna ang sule mampellambi'iä' danne' aha la manono di mendehatanna lambi' sapano-panona; anna menna ang mampetahpa' pano di Kodi' danne' la mahähäng di mendehatanna lambi' sapano-panona.

³⁶Ampo' umba noa inang puhakoa' kutula'ing, dianto moinnakato ungngitamä'a' ampo' daia' ungngaku umpetahpa'ä'.

³⁷Ingkänna tau ang inang puhang napama'tantu Puang Alataala la mendahi to pentindo'ku la sika nalumbaä', anna tau yatoo dai la sika kupasule.

³⁸Aka' nasuhung tuhungngä' yaho mai di suruka, tadia anna umpembabeingkä' pangngelo'ku tobou Kodi', ampo' anna malaä' umpembabeing pangngelo'na ang mansuoä' sule.

³⁹Dianto anna malai ingkänna tau ang puha napama'tantu la mendahi to pentindo'ku inang dai aha la kuhang moi poro la mesa, ampo' la sika kupatuho asang sumule ke lambi'mi katämpä'anna lino.

⁴⁰Aka' inang dianto indee pangngelo'na Ambeku anna malai ingkänna tau ang puhang ungngita Änä' to Lino anna mampetahpa'i pano la ullambi' katuhoang sapano-panona anna la kupatuho sumule ke lambi'mi katämpä'anna lino.”

⁴¹Napahandu'mi to Yahudi momämmäng didiona Puang Yesus tahpana sika nahingngi naoatee, ‘Kodi'mito indee andeang ang tuhung yaho mai di suruka.’

⁴²Sioa-oaintee, ”Tadiarakae' inde Yesus, änä'na Yusuf ang tainsang liua', noa tunne' indona tainsang toua' nei'? Ampo' akana la naoae'tee, ‘Tuhung yahoä' mai di suruka’? ”

⁴³Ya' sika naoaminte Puang Yesus, ”Daumpomämmängnga'.

⁴⁴Dai aha moi poro la mesa tau ang la mallumbaä' ke dai Kalaena Puang Alataala ang mansuoä' sule mambahaingkä' di hao mai, anna yato tau ang la mallumbaä' la kupatuho sumule ke katämpä'annang lino.

⁴⁵Aha tiuki' yaling di suha'na ingkänna nabi ang naoatee, ‘Ingkänna tau la napaturu Puang Alataala.’ Dahi tau ang mellaya' pano di pepaturunna anna mampehingngii la sule nalumbaä'.

⁴⁶Kaha-kaha noa yatoo daete' dioatee ahang tau ang hali ungngita Puang Alataala, aka' tau ang haling ungngita Puang Alataala supunte' Yato ang nasuo sule.

⁴⁷Kutula'ingkoa' setonganna ingkänna tau ang mampetahpa' la ullambi'ne' katuhoang sapano-panona.

⁴⁸Kodi'mito inde andeang ang mepatuho.

⁴⁹Moinnakato yato peneneammua' haling sika ungngande roti manna di hao di ongeang makä'däng, ampo' tontong sika ungngolai kamateang.

⁵⁰Ampo' daine' noa yato andeang ang tuhung yaho mai di suruka. Tau ang ungngande yato andeang daine' la mate.

⁵¹Kodi'mito indee andeang ang mepatuho ang tuhung yaho mai di suruka. Inde andeang ang kuoaing dianto bale ang sule yaling mai di Kalaeku ang kubea pano di to lino. Kupanoa anna malai ingkänna tau ang mangngande la tuho lambi' sapano-panona.”

⁵²Yato ingkänna to Yahudi sibehta-behta naoatee, ”Umbane' are' indo la noa tau la mebea bale ang sule yaling mai di kalaena diande?”

⁵³Ma'tula'mi Puang Yesus pano diii naoaintee, ”Kutula'ingkoa' setonganna ponna ke dakoa' ungngande baleku, Kodi' inde Änä' to Lino, anna ungngenu' hahaku, ya' inang dakoa' la ungngampui katuhoang ang setonganna.

⁵⁴Pano di tau ang ungngande baleku anna ungngenu' hahaku, ungngampui nei' katuhoang sapano-panona anna la kupatuho sumule ke katämpä'annang lino.

⁵⁵Aka' baleku dianto supu andeang ang setonganna, anna hahaku dianto supu uhai dienu' ang setonganna.

⁵⁶Menna-menna ang ungngande baleku anna ungngenu' hahaku la tohho yaling di Kalaeku anna la tohho touä' Kodi' yaling di kalaena.

⁵⁷Tuhoä' aka' Ambeku ang mansuoä' mentama inde di lino, aka' Dianto kasuleanna katuhoang. Ya' la noa tunto nei' ingkänna tau ang ungngande baleku la tuho aka' Kodi'.

⁵⁸Kodi'mito indee andeang ang tuhung yaho mai di suruka. Dä' sinnoa yato andeang ang hali naande peneneammua', aka' moinnakato anna sika naandei ampo' tontongke' ungngolai kamateang. Ampo' tau ang ungngande inde andeang ang kuoaing la tuho nei' lambi' sapano-panona.”

⁵⁹Noanto inde ang naoa Puang Yesus naonge mengei mampakuhu yaling di pa'sambayangang di hao di Bohto Kapernaum.

⁶⁰Tahpana sika nahingngi to pentindo'na yato tula'na Puang Yesus, ya' mai'ding di alla'na ang mangngoatee, ”Inde pepaturunna makahha' si'da-si'da! Dai aha ang la mambela mantuhu'i!”

⁶¹Nainsang toboe' Puang Yesus naoatee to pentindo'na momämmäng aka' unghingngi pepaturunna. Lambi' ma'tula' naoatee, ”Tisikurakakoa' dio unghingngi yato tula'ku lambi' pemalakoa' umpellei kapampetahpa'ammu?

⁶²Ya' akangnga'ne' la umbabe ke ungngitamä'a' Kodi' Änä' to Lino sumule dai' di ongeangku ang inang kukasulei dolu?

⁶³Setonganna Inaha Maseroetee' ang mebea katuhoang, tadiaete' kamatohoanna hupatau. Ingkänna inde ang kutula' mating di dioa' dianto tula'na Inaha Maserona Puang Alataala anna mala dioatee: tula' ang mepatuho.

⁶⁴Moinnakato noa aha siake'a' yaling di alla'-alla'mu ang dai mampetahpa'.” (Natula' noa inde Puang Yesus aka' inang nainsammi mengkalao dolu menna yato tau ang dai mampetahpa' anna menna ang la mambalu'.)

⁶⁵Nalombungngike' tula'na naoatee, ”Dianto suhunna anna kuoaingkoa'tee: dai aha moi poro la mesa tau ang la mallumbaä' ke dai Kalaena Ambeku mampama'tantu.”

⁶⁶Mengkalao donetoo, ya' mai'ding di alla'na to pentindo'na ang mampensähä'i anna dang naaku mentindo'.

⁶⁷Mekutanang Puang Yesus pano yato di sampulo derua pahsikolana naoatee, ”La mao turakakoa' dio umpelleiä'a'?”

⁶⁸Mentimba'mi ta Simon Petrus naoatee, ”O Puang, umba salangkang la kiola? Aka' yato tula'mu dianto tula' ang la mebaha pano di katuhoang sapano-panona.

⁶⁹Anna inang kiinsammi anna kipetahpa' kioatee Dionto To Masero ang nasuo Puang Alataala mentama inde di lino.”

⁷⁰Naoa bunte Puang Yesus, ”Darakae' Kodi' tobou Ko ang mampilleikoa' to sampulo deruakoa'? Ampo' moinnakato noa yatoo, aha mesa di alla'mua' setang!”

⁷¹(Ang nahoa inde tula'na Puang Yesus, dianto ta Yudas, änä'na ta Simon Iskariot. Aka' moinnakato anna mentama toine' di kamesaanna sampulo derua pahsikolana, ampo' inang nainsammi Puang Yesus naoate dianto ang la mambalu'.)