Read Aralle-Tabulahan Yohanes 7 Bible Online

Yohanes 7 - Aralle-Tabulahan bible

Yohanes 7

¹Puhai yatoo kalao-laong Puang Yesus di hao di Galilea. Dai naaku tohho di hao di Yudea aka' menge nasipeäng-peängngi to pambahananna to Yahudi la napatei.

²Donetoo marungku'mi pa'rame-rameanna to Yahudi ang disanga pa'rame-rameang Mebansuli-suli.

³Naoaminte arinna, ”Pelleing inde bohto anna maoo pano di Yudea umpepaitaing pano di pahsikolamu aka ang si umbabe.

⁴Aka' mesa tau ang pemala kainsangang daete' nababe membuni aka ang mala nababe. Ampo' napepaitarinte' pano di olona tau mai'di. Dahi ponna ke umbabeo ang mepusa'-pusa', ya' do pepaitaing di olona ingkänna tau di lino. Daumpembuni.”

⁵(Aka' datuke'ne' sika mampetahpa' yato arinnaii.)

⁶Natimba'mi Puang Yesus naoatee, ”Dake' lambi' tempoku mao dai' di Yerusalem, ampo' dioa' dio aha loloa' tempomu mao dai'.

⁷Dakoa' dio nakahiri' to lino, ampo' Kodi' nakahiri'ä', aka' kusa'bii umba noa pembabe karakena.

⁸Diare' laomokoa' dio dai' ullumba pa'rame-rameang. Kodi' dä' Ko la mao aka' dake' lambi' tempoku.”

⁹Noanto inde tula'na Puang Yesus pano di arinna anna tohhoine' di hao di Galilea.

¹⁰Tahpana le'ba'i arinna dai' di pa'rame-rameang, mengkalu'du tunne' Puang Yesus namesa-mesa le'ba' melola dai'.

¹¹Menge mellao yato pa'rame-rameang, mengene' yato to pambahananna to Yahudi umpeäng leleng Puang Yesus naoatee, ”Umbarea'ne' naongei?”

¹²Laona tubunne' yato tau mai'di sikuti'-kuti' untula' Puang Yesus. Aha ang mangngoatee, ”Tau mapia.” Ampo' aha toe' ang mangngoatee, ”Tadia tau mapia, aka' diaete' ang umpasähsä' lalang hupatau.”

¹³Ampo' dai aha moi poro la mesa tau ang bahani napekäyyängngi ma'tula' moinnakato nasa'ding mapia, aka' mahea' pano di to pambahananna to Yahudi.

¹⁴Tahpana lehang matängngäng yato pa'rame-rameang Mebansuli-suli, ya' suleng Puang Yesus anna mentamai yato di tähämpä' Dasang Ada'na Puang Alataala mampakuhu.

¹⁵Ya' pusa' asammi yato ingkänna to pambahananna to Yahudi anna sika naoaitee, ”Akana pake malae' inde tau manähäng liu anna dae' aha mahsikola?”

¹⁶Mentimba'mi Puang Yesus pano diii naoatee, ”Inde pepakuhungku tadia pepakuhu Kalaeku, ampo' pepakuhunna ang mansuoä' sule.

¹⁷Tau ang pemala ungnginsang pangngelo'na Puang Alataala la nainsang naoatee inde pepaturungku sule yaho mai di Puang Alataala, dai sule yaling mai di Kalaeku tobou Koo.

¹⁸Tau ang mampakuhu situhu' pihki' kalaena, dianto tau ang pemala supu undaka' kakeangka'ang kalaena. Ampo' tau ang undaka'ing kakeangka'anna ang mansuo, dianto tau ang tahpa' tula'na anna dai aha pa'bulitu' yaling di inahanna.

¹⁹Darakate' puhamokoa' natula'ing Nabi Musa pahentana Puang Alataala? Ampo' daia' ungngaku umpehingngii. Anna dinoa pemalakoa' umpateiä!”

²⁰Ma'karang yato tau mai'di naoatee, ”Tahta'o! Pake mennaraka Dio la mampateio?”

²¹Natimba' bung Puang Yesus naoatee, ”Mesa supu pengkähängang ang kubabe di allo katohhoang ampo' dia tubungnga' dio umpopusa'.

²²Nabeakoa' atohang Nabi Musa didiona kapotilleang lambi' moi di allo katohhoang untillemokoa' tau. Setonganna yato atohang inang mengkalaoete' di hao mai di peneneantaa' dolune' andana Nabi Musa.

²³Dahi ponna mesa tau malae' ditille di allo katohhoang situhu' atohanna Nabi Musa, ya' akana keaha'koa' ke umpabono' si'da-si'daä' tau di allo katohhoang?

²⁴Daunghohto'a' tau senga' situhu' aka ang landa' ungngita, ampo' hohto'i situhu' katahpa'ang anna kapara-paraang.”

²⁵Donetoo ahang sangngaka-sangngaka to Yerusalem situla'-tula' naoatee, ”Tadiarakate' Diang inde tau ang pemala sika napatei?

²⁶Itarea', menge tomande' beba' ma'tula' anna dai aha moi la mesa tau ang bahani mansängkäi. Darakate' nainsang si'da-si'dang to pambahanantaa' naoatee, Dianto inde To Dilanti' la Mepasalama'?

²⁷Ampo' situhu' ang tainsangnga' dai aha mesa tau ang mangnginsang didiona kasuleanna To Dilanti' la Mepasalama', anna indene' tau tainsangnga' nei' umba nakasulei.”

²⁸Donetoo menge mampakuhu Puang Yesus yaling di Dasang Ada', ya' ma'tula'mi napekäyyängngi naoatee, ”Ungnginsang si'daraka umba kukasulei? Ampo' setonganna inde kasuleangku tadiaete' baha inahangku, ampo' nasuhung suleä' aka' aha ang mansuoä', anna Yato ang mansuoä' tahpa' si'da-si'da ampo' daia' ungnginsang.

²⁹Kuinsang Kodi' menna yato To Maroho, aka' Dianto ang kukasulei anna Dianto ang mansuoä' sule.”

³⁰Donetoo yato tau mai'di sika pemala la unsahka Puang Yesus, ampo' dai aha moi la mesa tau ang mangnganti aka' dake' lambi' tempona.

³¹Ampo' aha sia tunne' mai'di tau ang mampetahpa' anna ma'tula'i naoatee, ”Ponna ke hapang mane la sulei yato To Dilanti' la Mepasalama', ya' umbai inang daete' la umbabe tanda ang mepusa'-pusa' londo puha nei' andana ang nababeng inde tau.”

³²Yato to Farisi unghingngi tau mai'di sibehta-behta didiona Puang Yesus. Lambi' mopahtuyu sibaha kapala-kapala imang anna unsuoi yato sangngaka-sangngaka to pandaka Dasang Ada'na Puang Alataala do unsahka Puang Yesus.

³³Ma'tula'mi Puang Yesus pano di tau mai'di naoatee, ”Sämpäi'dang supu la yalingngä' di alla'-alla'mua'. Dang masae anna la sumulemä' dai' di Dia ang mansuoä' sule.

³⁴La maokoa' sikapeäng undaka'ä' ampo' dä'a' aha la ullambi', aka' yato ongeang ang la kuongei daia' dio mala umpentama.”

³⁵Sikutana-tanaing yato sangngaka-sangngaka to Yahudi naoatee, ”Umbarakae' are' indo la naola anna la dae' mala diita? La aharakae' pahtuyunna mao pano di bohto makahao di alla'na tau senga' ang tadia to Yahudi anna mampaturui di hao?

³⁶Aka bahtuanna indo naoatee, ‘La maokoa' sikapeäng undaka'ä' ampo' dä' aha la ullambi',’ anna ‘Yato ongeang ang la kuongei daia' dio mala umpentama’?”

³⁷Tahpana lambi' allo ang handang katämpä' yato di pa'rame-rameang, bahtu' mala dioatee allo ang handang matanna, ke'de'mi Puang Yesus di alla'-alla'na tau mai'di anna mekohai naoatee, ”Menna ang mahähäng, maio lumbaä' anna kupaenu'o!

³⁸Pano di tau ang mampetahpa' pano di Kodi' aha Bahtakara Dehata ang naoatee, ‘Yaling mai di inahanna la loleng timbu ang la mebea katuhoang.’ ”

³⁹(Ang napihki' Puang Yesus lambi' ma'tula' noa indee, dianto Inaha Masero ang la natahimbo ingkänna tau ang mampetahpa' pano. Aka' yato Inaha Masero dake' aha dipatuhungnging aka' dake' tiängkä' dai' di suruka Puang Yesus sitonda kamatandeang.)

⁴⁰Aha sangngaka-sangngaka tau ang umpehingngii yato tula'na Puang Yesus anna sika naoaitee, ”Ahana inang Diante' indee yato Nabi ang didandi la sule.”

⁴¹Aha piha ang mangngoatee, ”Umbai' Diante' inde To Dilanti' la Mepasalama'!” Ampo' aha sia tunne' ang mangngoatee, ”Pake umbanne' la noa To Dilanti' la Mepasalama' la sule di hao mai di Galilea?

⁴²Aka' yaling di Suha' Masero aha tiuki' naoatee To Dilanti' la Mepasalama' la sule yalingngete' mai di peänä'anna Tomaraya Daud di hao mai di Bohto Betlehem, bohtona Tomaraya Daud.”

⁴³Donetoo kende'mi kasibehtaang di alla'na tau mai'di didiona Puang Yesus.

⁴⁴Aha sangngaka-sangngaka di alla'-alla'na pemala la unsahka Puang Yesus, ampo' moi mesa tau dai aha mangnganti.

⁴⁵Tahpana sumule yato to pandaka Dasang Ada'na Puang Alataala ang sika nasuo do unsahka Puang Yesus, ya' sika mekutanang yato kapala-kapala imang anna sangngaka-sangngaka to Farisi naoatee, ”Akana daia' umbaha sule?”

⁴⁶Mentimba'mi yato to pandaka naoatee, ”Mane diangki' unghingngi mesa tau mampakuhu noa yatoo!”

⁴⁷Mekutana bung yato to Farisi naoatee, ”Umbai' nabulingngi tumokoa' dio pepakuhunna!

⁴⁸La aharaka di alla'na to pambahanantaa' bahtu' kita' to Farisi ang mampetahpa' pano?

⁴⁹Kusanga dai la aha! Ampo' inde pano ingkänna tau ang dai ungnginsang Atohanna Musa lambi' mampetahpa' pano, ahana inang la tilaka nei'!”

⁵⁰Di alla'na yato sangngaka-sangngaka to Farisi aha ang disanga Nikodemus. Inde Nikodemus dianto ang hali umpellambi'i Puang Yesus. Ma'karang pano di solana naoatee,

⁵¹”Oa' solasohong, situhu' Atohanna Musa ang tainsangnga', dai mala ditahungkung mesa tau ke dake' dihingngi anna diinsang aka ang sala nababe.”

⁵²Sika natimba'mi naoaintee, ”To Galilea turakako dio? Pahehsa manahpao Suha' Masero, lambi' la ungnginsang ungngoatee daete' aha mesa nabi la sule di hao mai di Galilea!”

⁵³Donetoo ingkänna tau sumule asammi pano di dasannaii.