Read Aralle-Tabulahan Yohanes 9 Bible Online

Yohanes 9 - Aralle-Tabulahan bible

Yohanes 9

¹Menge mellao Puang Yesus, ungngitang mesa tau ang buta suka' dahinna.

²Mekutanang pahsikolana pano di Puang Yesus naoatee, ”O Tuang, akana butae' indo tau suka' dahinna? Ahanaraka aka' kasalaanna toboe', bahtu' kasalaannaraka to baha'na anna noai?”

³Natimba'mi Puang Yesus naoatee, ”Tadia aka' kasalaanna, tadia toi kasalaanna to baha'na; ampo' nasuhung butai anna malai tandaang kakuasaanna Puang Alataala yaling di kalaena.

⁴Ingkänna pengkähänganna To mansuoä' pahallua' tapembabeing akinna mabayake'. Aka' mengeng la bengi anna dai tau mala mengkähäng.

⁵Akinna dinnekä' di lino Kodi'mito ang mendahi ballo ang la umballoi ingkänna to lino.”

⁶Puhai ma'tula' Puang Yesus, ya' mentingkurung naung di tampo, mane napasiuyä'i lambi' menghehsä' anna naalai napapano di matanna yato to buta

⁷anna naoaintee, ”Laomo pendeä' pano di Limbeng Siloam.” (‘Siloam’ bahtuanna: to disuo.) Ya' le'ba'mi inde to buta do mendeä'. Tahpana sumule, ya' paitang yato to buta, ampo' le'ba'mine' Puang Yesus.

⁸Tahpana nasiita-itai sola bohtona anna tau senga' ang si mangngita dolu kapalau-lau, ya' situla'-tula'mi naoatee, ”Diarakate' inde tau ang si biasa taitaa' mohko' kapalau-lau?”

⁹Ahang piha tau ang mangngoatee, ”Tungka diantoo.” Ampo' aha toe' piha ang mangngoatee, ”Tadiaete'. Ahanaete' sinnoa hupanna.” Ya' ma'tula' tubunne' kalaena yato tau naoatee, ”Kodi' si'dantoo.”

¹⁰Sika nakutanaing naoaintee, ”Umbae' noa anna pake malao paita?”

¹¹Natimba'mi naoatee, ”Tau ang disanga Yesus ungngala sai'di' tampo anna napapenghehsä'i, mane napapanoingkä' di matangku. Mane nasuoä' mao mendeä' pano di Limbeng Siloam. Ya' do mendeä' si'damä'. Puhai yatoo, ya' malamä' paita.”

¹²Sika nakutanai bumi naoatee, ”Ya' umbang yato tau?” Natimba'mi naoatee, ”Ya' dante' kuinsang.”

¹³Donetoo sipatu allo katohhoang naongei Puang Yesus umpapenghehsä' tampo ang napake umpapennenne' yato to buta. Dianto anna dibahang yato to buta dolu ang mennenne'mi pano di olona to Farisi aka' sika pemala napahehsa.

¹⁵Mekutanang yato to Farisi pano, didiona umba noa anna malai paita. Ya' mentimba'mi naoatee, ”Yato tau umpapenghehsä' tampo mane napadehke'i pano di matangku. Puhai yatoo, maomä' kudeä'i, ya' malamä' mennenne'.”

¹⁶Ahang sangngaka-sangngaka di alla'na to Farisi ang mangngoatee, ”Daete' sule yaho mai di Puang Alataala yato tau, aka' dai umpa'käyyängngi allo katohhoang.” Ampo' aha toe' piha ang mangngoatee, ”Ya' umbanne' noa mesa to madosa la mala umbabe tanda ang mepusa'-pusa' sinnoa ang nababe?” Donetoo kende'mi kasibehtaang di alla'naii.

¹⁷Sika mekutana salang yato to Farisi pano naoaintee, ”Dahi umba dio noa pihki'mu didiona yato tau?” Mentimba'mi naoatee, ”Dianto mesa nabi.”

¹⁸Ampo' yato sangngaka-sangngaka to pambahananna to Yahudi dai napetahpa' ke inang buta si'dai yato tau mengkalao dolu, dinoarang mane mennenne'i. Dianto anna sika napapetambaing to baha'na yato tau,

¹⁹anna mekutanai pano naoaintee, ”Tahpa' si'daraka inde änä'mu inang buta mengkalao dahi? Dahi umba noa anna malai paita dinoa?”

²⁰Mentimba'mi yato to baha'na naoatee, ”Ahana inang änä'ki' indee anna inang buta mengkalao dahi.

²¹Ampo' dai kiinsang umba noa anna malai paita dinoa anna datoi kiinsang menna ang mampapennenne'. Kutanai toboia' dio, aka' käyyämmi nei' anna nainsang tubunne' aka ang la natula'.”

²²Nasuhung ma'tula' noa yato to baha'na, aka' mahea' pano di to pambahananna to Yahudi, ang puhang sipahtuyu-tuyu la ullahang tau mentama di pa'sambayangang ang ungngakui Puang Yesus naoatee, ”Dianto To Dilanti' la Mepasalama'.”

²³Dianto anna ma'tula'mi supu yato to baha'na naoatee, ”Kutanai toboia' dio pano, aka' käyyämmi nei' anna nainsang tubunne' aka ang la natula'.”

²⁴Ya' sika untambai salang yato tau ang buta dolu anna naoaintee, ”Pa'tula'o dinoa di olona Puang Alataala didiona aka ang setonganna. Kiinsang kioatee yato tau ang mampabono'o mesa to madosa.”

²⁵Mentimba'mi naoatee, ”Ponna ungngoaa'tee ‘Madosa yato tau,’ ya' danto ko kuinsang. Supung kuinsang kuoatee butaä' dolu ampo' paitamä' dinoa.”

²⁶Sika mekutana bung naoatee, ”Aka nababe pano di dio lambi' malao paita?”

²⁷Mentimba'mi naoatee, ”Puhamokoa' kutula'ing ampo' daia' ungngaku umpehingngii. Akana la pemala burakoa' ditula' salaing? Pemala turakakoa' dio mendahi to pentindo'na?”

²⁸Ya' sika nasitungo-tungoing anna naoaintee, ”Dio tobou dio to pentindo'na. Kami' to pentindo'naang kami' Musa!

²⁹Kiinsang umba noa Puang Alataala puha umpa'karai Musa, ampo' didiona yato tau, daine' kiinsang hambu apinna.”

³⁰Mentimba'mi naoatee, ”Kukapusa'ikoa' la dai ungnginsang hambu apinna anna ungngitangnga' aka ang nababe pano di kalaeku.

³¹Tainsangnga' umba noa Puang Alataala dai umpehingngii to madosa, ampo' pano di tau ang mampa'käyyängngi anna ang mampembabeing ingkänna pangngelo'na napehingngii nei'.

³²Mengkalao dolu dake' aha tahingngia' mesa tau la mala umpabono' to buta ang buta mengkalao dahi.

³³Ponna dai sule yaho mai di Puang Alataala yato tau, ya' daete' mala la umbabe aka-aka siamo.”

³⁴Sika naoamintee, ”Aka? Dio inde mesao to madosa si'da-si'da mengkalao dahi. Lungkang la umpaturuang?” Donetoo sika nahambai siang yaling mai di pa'sambayangang.

³⁵Napekahebang Puang Yesus yatoo. Pihsananna maong do napeäng anna nakutanaii naoaintee, ”Umpetahpa'rakako Änä' to Lino?”

³⁶Mentimba'mi naoatee, ”Mennakae' ne ang dioaing, Tuang? Painsangngiä' anna malai kupetahpa'.”

³⁷Ma'tula'mi Puang Yesus pano naoatee, ”Dai ungngita kale yato ang ungngoaing, ampo' mengemo sipa'kara dinoa, aka' Kodi'mite' indee.”

³⁸Mentimba'mi yato tau naoatee, ”Kupetahpa', Puang.” Puhai naoa, ya' malimuntu'mi di tingngayona menomba.

³⁹Naoa buminte Puang Yesus, ”Inde kasuleangku tama di lino dianto anna malaä' manghohto'. Suleä' umpapennenne' tau ang ungnginsang kalaena buta, sibaha umpakalesoing tau ang unsanga kalaena paita anna malai nainsang naoate buta di mendehatanna.”

⁴⁰Yato tula'na Puang Yesus nahingngi sangngaka-sangngaka to Farisi ang di hao donetoo, lambi' sika mekutana pano di Puang Yesus naoatee, ”Ponna noa nee, ya' unsanga touang kami' to buta?”

⁴¹Sika natimba'mi Puang Yesus naoaintee, ”Ke la dakoa'ne' inang unsanga kalaemu paita di mendehatanna, ya' mala dioatee dakoa' kekasalaang. Ampo' aka' unsangakoa' kalaemu paita, lambi' tontongkoa' kekasalaang.”