Read Aralle-Tabulahan Filemon 1 Bible Online

Filemon 1 - Aralle-Tabulahan bible

Filemon 1

¹Pano di solasohongki' Filemon ang kisibahaing mengkähäng. Noa tunne' pano di solasohonta ta Apfia anna ta Arkhipus ang tasibahaing mengkähäng kahha' yaling di kapampetahpa'ang sibaha ingkänna to Sahani ang si ma'himpung diting di dasammu. Hao mai di Paulus, to yaling di tahungkung aka' umpepainsangngingkä' kaheba didiona Kristus Yesus, sibahaang solasohonta ta Timotius.

³Ke la malai ullambi'o behe anna kamasahkeang yaho mai di Ambeta, Puang Alataala anna Puang Yesus Kristus, To Pepasalama'ta.

⁴Daliu lengka' kutula' sangammu, Filemon, ke ma'kuhhu'sumanga' bumä' dai' di Puang Alataala yaling di sambayang,

⁵aka' puha kuhingngi umba noa umpesi'da-si'dai mampetahpa' dai' di Puang Yesus anna pa'kalemummu pano di ingkänna petauanna.

⁶Kusambayangngi anna malai kamesaang ang unsa'ding sibaha solamu to mampetahpa' la tuhtuang matoto' anna la tuhtuang ungnginsang ingkänna behe ang puha nabeaingkea' Kristus.

⁷O solasohongku Filemon, kahsi liuä' kuhingngi umba noa pa'kalemummu pano di petauanna Puang Alataala lambi' tiala liu inahangku aka' samai to mampetahpa' umpasuhaka asang liu.

⁸Kodi', mesa to baha' ang tontongke' ditahungkung aka' untindo'ä' Kristus Yesus, aha ang la kupalau mating. Setonganna mala kupahe' tomande'o aka' kakamuä' yaling di kapampetahpa'ang, ampo' moinnakato noa, aka' pa'kalemummu ang kainsangang anna aka' kupakamayao, ya' malauä' supu mating.

¹⁰Palaungku mating dianto didiona ta Onesimus ang kupoänä' yaling di kapampetahpa'ang, aka' dinne di tahungkung kupainsangngi didiona Puang Yesus lambi' mampetahpa'.

¹¹Dolu dai kekuna di kalaemu, ampo' dinoa dai dio supu naongei kekuna [1] ampo' kekuna tou ko pano di kalaeku.

¹²Dinoa indee tau ang kupakamaya la kusuoingko mating sumule.

¹³Setonganna pemalakä' kupamasae dinne naposolaiä' sihapang bala'mu lella'ä' ditahungkung aka' umpepainsangngingkä' Kaheba Mapia.

¹⁴Ampo' dai kuaku membabe ke dai aha kasibohtuanta. Masannang liuä' ke unnä' inahammu tubung dio, daone' la kukehke'i.

¹⁵Umbai' diante' suhunna napensähä'io sämpäi' anna malai sibaha lolokoa' lambi' sapano-panona.

¹⁶Dinoa tadiang sabua' pälli' kale, ampo' mendahing siullu'ta ang dikalemui. Kusa'ding si'da-si'da tama di kalaeku, londonang dio, sihapang sabua' noa toi sihapang mesa solasohong yaling di Puang Yesus.

¹⁷Dahi, ponna ke unsanga liuä' solasohommu yaling di kapampetahpa'ang, tahimboi inde ta Onesimus sumule sihapang kodi' ang untahimbo.

¹⁸Ponna ke inang ahae' kasalaang ang nababe diting bahtu' keindang, kodi'dang ang la mantangkung asangnging.

¹⁹Dahi mapia kuuki' kalaeku done indee dianto: Kodi' Paulus la mambaya' asangnging indanna. Anna dao mangki' la kupakaleha didiona indammu pano di kodi', dianto katuhoammu ang bakahu mendahi to Sahani.

²⁰O solasohong, kalemuiä' babeingkä' indee aka' siullu'ingke yaling di Kristus. Ke la malai, umpasuhakaä'.

²¹Suha' inde kuuki' aka' kuinsang la umpembaberintee' samai ang kupalau. Anna kuinsang la mai'di puhake' ang la umbabe.

²²Mesake' ang pahallu kupalau, aka' kuhannuang natahimboete' Puang Alataala sambayammua' lambi' natehteä' sumule mating. Ke la malai ungkalemuiä' anna tohho sängkäkä' di dasammu ke donentoo.

²³Salama'na are' ta Epafras ang kusibahaing dinne di tahungkung aka' untindo' Kristus Yesus.

²⁴Salama'na toi solaku ang kusibahaing mengkähäng dianto: ta Markus, ta Aristarkhus, ta Demas anna ta Lukas.

²⁵Pa'kalemunnarang Puang Yesus Kristus ang la mambehekoa'.