Read Aralle-Tabulahan 1 Petrus 2 Bible Online

1 Petrus 2 - Aralle-Tabulahan bible

1 Petrus 2

¹Dahi, solasohong, pakahaoi ingkänna hupanna kakarakeang sibaha ingkänna kara pa'bulitu' anna kakalasiang. Daumpa'kasuehe anna dauntula'-tula' tahuhu tau senga'.

²Sinnoa mesa änä' malea-leake' unnaha-naha uhai susunna indona, ya' la noa tumokoa'to dio pahallu unnaha-naha uhai susu mendehatanna, ang dai aha hau-haunna, dianto Bahtakaranna Dehata, lambi' mengkalao yato di Bahtakaranna Dehata, la sundung yato katuhoanna sungnga'mu lambi' salama'.

³Dahi patontong loloi unnaha-naha Bahtakaranna Dehata aka' puhangnga' unsändä' anna ungnginsammia' ungngoatee mapia liu Dehata.

⁴Anna dioa', solasohong, maikoa' lumba Dehata, [3] ang dipasihapang batu ang tuho. Inde batu natibe hupatau aka' sika nasanga dai kekuna. Ampo' napillei anna napakeangka' Puang Alataala mendahi batu esengang matoto' yaling di dasanna.

⁵anna mala toukoa' dio napadahi batu ang tuho ang la napake umpake'de' dasang di mendehatanna. Yaling yato di dasang la mendahikoa' imang masero ang la menomba dai' di Puang Alataala yaling di mendehatanna. Anna inde penombaammu la natahimbo Puang Alataala aka' sikentemokoa' Puang Yesus Kristus.

⁶Yaling di Suha' Masero dolu yato To Pepasalama' ang la sule dipasihapang batu ang napillei Puang Alataala, ang naoatee, ”Pehingngii! Puha kupillei mesa batu masuli'. Kupatoko yaho di Tanete Sion mendahi batu esengang yaling di dasangku. Menna-menna ang mampetahpa' pano yato di batu dai la manaho inahanna.” [4]

⁷Yato To Pepasalama' sinnoa mesa batu ang inang masuli' pano di dioa' ang mampetahpa' pano. Ampo' ingkänna tau ang dai mampetahpa' pano inang la ditahungkung, lambi' la sundung yato ang tiuki' yaling di Suha' Masero dolu ang naoatee, ”Yato batu natibe to pedasang. Ampo' setonganna yato batu mendahing batu esengang yaling yato di dasang.” [5] Anna

⁸”Yato batu mendahing batu ang naonge sika titero bahtu' batu ang sika napengkanahoi.” [6] Sika titero aka' dai naaku umpetahpa' Bahtakaranna Dehata, lambi' ditahungkung situhu' yato pahtuyunna Puang Alataala pano diii.

⁹Ampo' dioa' solasohong, puhakoa' napillei Puang Alataala. Napadahikoa' imang ang si umbabe pengkähänganna Tomarayanta. Puhamokoa' napatani mendahi petauanna ang masero lambi' naampui tubumokoa' dio. Napanoa anna malakoa' umpainsangngi ingkänna tau didiona pembabena ang ma'kuasa, aka' puhamokoa' natambai yaling mai di kamalillingang, mentama di kamabayaanna.

¹⁰Dolu dakangkoa' naampui, ampo' dinoa naampuimokoa'. Dolu dake'a' ungnginsang pa'kalemunna, ampo' dinoa ungnginsammia'.

¹¹Oa' solasohong ang kukalemui, katuhoanta yaling inde di lino sihapangngingkea' to sule, bahtu' tau ang lempäng kale, aka' tohhoingkea' di alla'-alla'na tau ang dake' ungnginsang Dehata. Dianto anna kupakaenga'koa' kuoatee: dauntuhu'i pampemala karakena inahammu, aka' yato pampemala karake umpa'bali katuhoammu di mendehatanna.

¹²Aha tau ang dai ungnginsang Dehata anna dianto yato ang si mampakauho-uhokoa' anna ang si mantanda'koa' naoatee karake babemu. Dianto anna pahallukoa' madaka yaling di pembabemu anna malai sika naita lolo kamapiaammu. Katämpä'anna la sika naita yato pembabe mapiammu lambi' sika la umpudi Puang Alataala di allo kasuleanna.

¹³Tuhu'-tuhu'angkoa' pano di ingkänna to ma'pahenta di mentolinona, aka' dianto pa'elo'na Dehata. Tuhu'-tuhu'angkoa' pano di tomaraya, dianto pongkaha ang handang mayahoang di alla'-alla'na hupatau.

¹⁴Tuhu'-tuhu'angkoa' pano di tuambahsa', aka' dianto ang napake tomaraya untahungkung to pembabe karake anna umpudi tau ang membabe mapia.

¹⁵Aka' dianto indee pa'elo'na Puang Alataala, lambi' mengkalao di pembabe mapiammu damokoa' la natanda' tau ang dai ungnginsang Puang Alataala.

¹⁶Setonganna kita'a' to Sahani damingkea' naposabua' dosa. Bahtuanna, beba'mingkea' aka' puhamingkea' nalahpa' Puang Alataala di hao mai di kakuasaanna dosa. Ampo' daa yato kabeba'ammu diang la umpolalang umbabe kakarakeang. Ampo' diare' tuhu'i pa'elo'na Puang Alataala, aka' inang sabua'nakoa'.

¹⁷Pakeangka'koa' ingkänna tau, kalemuikoa' solamu to mampetahpa', tuhu'-tuhu'angkoa' dai' di Puang Alataala anna pakeangka'koa' tomaraya.

¹⁸Oa' ingkämmu sabua', tuhu'i anna pakeangka'koa' pongkahamu, daa ang mapia supu pengkerona anna marota'. Ampo' moi pongkaha ang makahha' pengkerona pahallua' untuhu'i.

¹⁹Ponna ke ahai di alla'-alla'mu ang nadahha pongkahamu, moinnakato anna dai aha kasalaanna, anna ke natähängngi ungngolai yato kamadahhaang aka' umpihki' lolo pa'elo'na Dehata, ya' la umpamasannang Puang Alataala.

²⁰Daumpihki'i ungngoatee la napudikoa' Puang Alataala ke sa'bara'koa' ungngolai kamadahhaang aka' pembabemu ang karake. Ampo' ang la umpamasannang Puang Alataala, dianto ke sa'bara'koa' ungngolai kamadahhaang aka' pembabemu ang mapia.

²¹Aka' dianto suhunna lambi' natambaikoa' Puang Alataala: anna malai mapiaa' pembabemu moinnakato anna ungngolaikoa' kamadahhaang. Aka' Kristus hali ungngolai kamadahhaang aka' dioa' anna Dianto yatoo ang mendahi pohapangang ang pahallu untindo'i.

²²”Dai aha umbabe dosa moi poro la pihsang anna dai aha ma'loseng-loseng.” [7]

²³Sika natändoi ampo' dai nabala'. Sika nadahha, ampo' daine' aha nabala' napakahea'i. Supung umbeho katuhoanna dai' di Puang Alataala ang si umbohtu kaha-kaha anna dai si mampasise'la-se'la.

²⁴Kalaena Puang Yesus ang umbulle tahungkunna dosanta yaling di Kalaena naonge anna dipateii yaho di kayu sitambeng, lambi' dipabeba'ingkea' di hao mai di kakuasaanna dosa anna tuhoingkea' untuhu'i pa'elo'na Puang Alataala. Anna dianto yato bila'na ang mampabono'koa'.

²⁵Dolu sinnoakoa' domba ang sähsä' lalang. Ampo' dinoa sumulemokoa' pano di to Pangkambi' ang mandakai sungnga'mu.