Read Aralle-Tabulahan 1 Petrus 4 Bible Online

1 Petrus 4 - Aralle-Tabulahan bible

1 Petrus 4

¹Dahi Kristus ungngolai kamadahhaang naonge tuhoi yaling inde di lino. Dianto anna pahallu toukoa' dio umpamatoho inahammu lambi' sadia tumokoa' dio ungngolai kamadahhaang. Aka' menna-menna naaku madahha aka' Puang Yesus Kristus, ya' bahtuanna naboling umbabe dosa.

²Dahi, akinna tuhokangkoa' yaling inde di lino, damong untuhu'i lolo pampemalanna hupatau, ampo' diare' tuhu'i pa'elo'na Puang Alataala.

³Aka' samangnga' allona si umbabe sinnoa ang nababe tau ang dake' ungnginsang Dehata. Donetoo tasampa'a' keromu, si untuhu'ikoa' pampemala kalaemu, si ma'malango-langokoa', si ma'rame-rame lolokoa', si samangkamahoinnakoa' anna si menombakoa' pano di dehata lino.

⁴Ampo' dinoa nakapusa'imokoa' yato solamu aka' dangnga' si umposolai yaling umbabe ingkänna yatoo ang tasampa'. Dianto anna sika napakauho-uhokoa'.

⁵Ampo' la lambi'mi tempona la sika pahallu untimba' pekutananna Puang Alataala didiona yato pembabe karakenaii. Aka' tokang Puang Alataala la unghohto' pembabena ingkänna tau, noa ang tuhoke', noa ang mateng.

⁶Dianto anna dipepainsangnging yato Kaheba Mapia pano di tau ang puha mate. Nasuhung anna dipanoai, aka' moi sika mateng di mentolinona, sinnoa ang dahi pano di ingkänna tau, ampo' la tuhoke' di mendehatanna situhu' pa'elo'na Puang Alataala.

⁷La lambi'mi katämpä'anna lino sibaha ingkänna ihsinna. Dianto anna pahallukoa' madaka sibaha matoho inaha anna malakoa' ma'sambayang.

⁸Ang handang pahallu, dianto sikalemuikoa' mesa anna mesa sitonda sangkalebu inaha, aka' ponna ke sikalemuiingkea' solata, ya' la tainsang toe' siampungngi mesa anna mesa.

⁹Sipotosulekoa' mesa anna mesa anna daumpomämmäng.

¹⁰Ingkännaingkea' pantang untahimbo pebea ang sisenga'-senga' yaho mai di Puang Alataala. Dahi mahasa ke tapake manahpai yato pebea yaling ungkalemui tau senga', hapanganna:

¹¹menna-menna nabea pengkähängang ma'ho'ba, ya' pahallu untula' Bahtakaranna Puang Alataala. Anna menna-menna nabea pengkähängang ungkalemui tau senga', ya' pahallu napanoa umpake kamatohoang ang sule yaho mai di Puang Alataala. Lambi' yaling di ingkänna siamo Puang Alataala la dipudi ungngolai Puang Yesus Kristus, aka' Dianto ang ma'kuasa anna sihatang dipamatande lambi' sapano-panona. Aming.

¹²Oa' solasohong ang kukalemui, mengekoa' ungngolai kamadahhaang ang sinnoa maluhsunna api anna malaia' disändä'i kamatohoanna kapampetahpa'ammu. Ampo' daumpusa'a' anna daumpihki'i ungngoatee, ”Liba' maho yato kamadahhaangki' andana tau senga'.”

¹³Ampo' diare' pamasannangngia' inahammu aka' puhang untahimbo taha yaling di kamadahhaang ang puha naolai Kristus. Mengkalao yatoo la kahsi liukoa' ke dipalanda'mi kamatandeanna.

¹⁴Ponna ke napakauho-uhokoa' tau aka' untindo'koa' Kristus, setonganna kehongko'koa', aka' bahtuanna puhamokoa' untahimbo Inaha ang matande, dianto Inaha Maserona Puang Alataala.

¹⁵Ampo' daaa' ahai di alla'-alla'mua' ang la didahha aka' papateang, bahtu' maboko, bahtu' ma'maho-maho, bahtu' umpentamai ang tala napentamai.

¹⁶Ampo' ponna ke didahhakoa' aka' to Sahanikoa', ya' daummasili. Pa'kuhhu'sumanga'koa' dai' di Puang Alataala aka' inang to pentindo'nakoa' Puang Yesus Kristus.

¹⁷La lambi'mi tempona kaha-kahanna ingkänna tau la nahohto' Puang Alataala. Anna kita'mia'too ang la handang dolu nahohto'. Anna ponna ke kita'ia' inde änä'-änä'na la nahohto', ya' londo puhaete'ne' pano di tau ang dai umpetahpa' yato Kaheba Mapia ang sule yaho mai di Puang Alataala.

¹⁸Aka' aha tiuki' yaling di Suha' Masero naoatee, ”Moi tau ang maroho pengkerona masuhsang dipasalama', ya' la londoke'ne' pano di to karake pembabena anna tau ang dai tuhu'-tuhu'ang dai' di Puang Alataala!” [10]

¹⁹Dahia', solasohong, ponna ke ahakoa' madahha situhu' pa'elo'na Puang Alataala, ya' behoi katuhoammu dai' di Puang Alataala To Metampa. Aka' inang la napasundung yato pa'dandianna mating di dioa'. Anna daa ummali'-mali'angngia' membabe mapia.