Read Aralle-Tabulahan 3 Yohanes 1 Bible Online

3 Yohanes 1 - Aralle-Tabulahan bible

3 Yohanes 1

¹Pano di Gayus ang kupakamaya, anna ang kukalemui si'da-si'da. Hao mai di kodi', pebulle ada'.

²O solasohongku ang kupakamaya, kupa'sambayangngingko anna malai masahke lolo anna malino katuhoammu yaling di ingkänna sia sinnoa kamasahkeanna anna kamalinoanna inahammu.

³Kahsi ponalaä' tahpana sule inde dinne sangngaka-sangngaka solasohonta natula'ingkä' didiona katontongammu umpentokei katahpa'anna Puang Alataala, aka' si membabeo situhu' katahpa'ang yatoo.

⁴Dai aha nasinnoaing kakahsiangku ke aha boi kupelele kuoatee membabeng änä'-änä'ku situhu' katahpa'ang.

⁵O solasohongku ang kupakamaya, dai aha ummali'-mali'ang si ungkalemui solata to mampetahpa' ang si lempäng diting, moinnakato anna dakangkoa' siinsang.

⁶Anna puhang natula' pano di jumaa'ki' dinne yato pa'kalemummu. Ke la malai tontong loloo ungkalemui diting tau ke mengkalaoi anna malai dai aha kakuhangang yaling di pellaoanna. Ponna ke umpanoai, yato pembabemu la sipäto'mi di hao di olona Puang Alataala.

⁷Aka' yaling di pellaoanna umpakaheba sanganna Puang Yesus Kristus, dai aha aka-aka siamo la natahimbo di hao mai di to taungnginsang Puang Alataala.

⁸Dahi kita' to mampetahpa', la pahalluingkea' ungkalemui yatoii anna malai mangngala taha toingkea' kita' yaling umpakaheba katahpa'ang.

⁹Ahang suha' kuuki' mating di jumaa', ampo' daloloang naakui yato ta Diotrefes ang si pemalane' handang ma'kuasa.

¹⁰Dahi ponna malaä' lambi' mating, mane kupamalesoing jumaa' yato tula' tahuhu ang napalele didioki'. Anna dai dia supu yato si nababe, ampo' datoe' naaku untahimbo solata to mampetahpa' anna dai umpabei jumaa' untahimbo yatoii. Anna ponna ke ahai ang untahimbo yato solata, ya' si naalai yaling mai di jumaa'.

¹¹O solasohongku ang kupakamaya, daa umpensinnoai tau ang membabe karake, ampo' la umpensinnoaio tau ang membabe mapia. Menna-menna umbabe kamapiaang, tau yatoo änä'-änä'na Puang Alataala. Ampo' menna-menna si umbabe kakarakeang, tau yatoo daine' ungnginsang Puang Alataala.

¹²Anna yatone' ta Demetrius natula' mapia asanne' tau. Anna pembabenantoo umpatandaang kamapiaanna, aka' situhu' katahpa'anna Puang Alataala. Anna kami' toi unsa'bi'i didiona kamapiaanna, anna ungnginsammi ungngoatee tahpa' tula'ki'.

¹³Moinnakato anna mai'dike' la pahallu kutula'ingko, ampo' dai kuaku kupayaling asang inde di suha',

¹⁴aka' mopahtuyuä' la baha' mating anna malai sitingngayoingkea' ma'tula'.

¹⁵Kuhannuang la tontongngo masahke anna malino. Salama'na toi mating ingkänna solata dinne. Anna la umpalambi' toingkä' salama'ku pano di simesa-mesa solata diting.