Read Aralle-Tabulahan Yudas 1 Bible Online

Yudas 1 - Aralle-Tabulahan bible

Yudas 1

¹Pano di ingkänna tau ang natambai Puang Alataala mendahi petauanna. Nakalemuikoa' Puang Alataala, Ambeta, anna nadakaikoa' Puang Yesus Kristus. Hao mai di kodi' Yudas, arinnaä' Yakobus, anna mesaä' sabua'na Puang Yesus Kristus.

²Ke la malai tuhtuang nabeakoa' Puang Alataala behena, kamasahkeanna anna pa'kalemunna.

³Oa' solasohong ang kukalemui, dolu inang kupahtuyu la kuuki'ingkoa' mating suha' didiona kasalama'ang ang tatahimbo sibaha-baha. Ampo' dinoa ang sihatang kusa'ding dianto la kuuki' suha' mating anna malai kupamatoto' inahammu lambi' malakoa' untolla' yato ingkänna ang umbali pepakuhu ang tahpa'. Pihsang supu Puang Alataala umbea inde pepakuhu pano di petauanna anna sundung.

⁴Aka' aha tau ang dake' ungnginsang Dehata, ang mahta-mahta tama di alla'-alla'ta. Si napihki' naoatee, ”Dai maaka ke membabe karakeingke, aka' la naampungngiingke Puang Alataala aka' mana' pa'kalemunna.” Sika umbahoi Tomarayanta anna Dehatanta ang mesa supu, dianto Puang Yesus Kristus. Ampo' masaeng anna tiuki'i didiona katallangang ang la naolai inde tau ang noa.

⁵Setonganna ungnginsammia' indee ingkänna ang mane kutula'. Ampo' moinnakato noa, kupemala la ungkalehai umba noa Dehata untahungkung ingkänna tau ang si membabe karake. Dolu to Yahudi napabeba' Dehata di hao mai di Mesir. Ampo' puhai yatoo aha di alla'naii ang dai mampetahpa', lambi' napatei piha di hao di ongeang makä'däng.

⁶Kalehaii yato malaeka' dolu yaho di suruka. Aha piha di alla'naii ang dai tontong umbabe pengkähängang ang nabea Dehata, ampo' umpellei ongeanna. Lambi' napungo Dehata yato malaeka' umpake hante ang dai la mala bohtu, mane natutu'i tama di mesa ongeang ang malilling. Sika dipungo lolo yaling, lambi' sule tempona la natahungkung Dehata yato di Allo Panghohto'ang.

⁷Kalehai toine' Bohto Sodom anna Gomora dolu sibaha yato sangngaka-sangngaka bohto ang nasidungku'ing. Ihsinna yato bohto membabe sinnoa yato malaeka' langngena'. Sika umbabe ma'kahupa-hupa pembabe tasampa' ang mekarakei, lambi' yato bohtona natallangngi Puang Alataala umpake api. Tahungkunnaii mendahi pohapangang pano di ingkänna tau, anna mala dipasihapang apinna nahaka ang dai la pi'de, ang la dipantahungkungngi ingkänna tau karake.

⁸Yato tau karake dolu sinnoa siang inde mai tau ang si mampakuhu loseng anna ungngangka'-angka' kalaenaii napobua' pangngipinna. Aka' sahing membabe tasampa' ungkärähko'i kalaena anna sahing ungngita-ita naung kakuasaanna Puang Alataala, noa toi si untula' tahuhu ingkänna to ma'kuasa ang matande. [1]

⁹Ampo' moi kalaena Mikhael, to pambahananna semalaeka'ang masero, daine' bahani untula' tahuhu Pongkahana setang. Naonge anna matei Nabi Musa, siba'ding inde Mikhael anna Pongkahana setang untula' didiona la naaka yato bahkena Musa. Donetoo inde Mikhael dai untula' tahuhu Pongkahana setang umpake kakuasaang kalaena. Supung naoate pano, ”Ke la nakambahoingko Dehata!”

¹⁰Ampo' indene' to pampakuhu ang si ma'loseng-loseng si untula' tahuhu aka-aka ang ma'kuasa ang dai nainsang. Ang supung nainsang: membabe situhu' pampemalanna toboe', sinnoa olo'-olo' ang dai ma'pihki'. Anna katämpä'anna la sika tallang napobua' yato pembabenaii.

¹¹La masuhsa liu pano diii! Aka' sika umpensinnoai ta Kain ang papateang dolu. Sika untindo' pembabena ta Bileam, aka' moinnakato anna sika nainsangngi naoatee tahuhu yato ang la nababe, ampo' tontong nababe aka' mailu pano di doi'. Sika umbali Puang Alataala sinnoa ta Korah dolu, lambi' sika la natahungkung mate Puang Alataala sinnoa ang dahi pano di ta Korah.

¹²Naonge anna ma'himpungkoa', ya' inde to pampakuhu ang si ma'loseng-loseng si mande sibaha-bahakoa' sihapang solamu, ampo' mepakasili yato pembabenaii. Si ma'so'bäng-so'bäng ke mandei yato di pa'himpungang anna umpihki' supu kalaena. Sika sinnoa ke malillingngi kalane ampo' dasiang kene' aka' nasau pepahi. Sika sinnoa poang kayu ang puha dilelleng lambi' dang keuhaka': ke lambi'mi tempona keboa, ya' daine' keboa aka' mateng anna malahsong.

¹³Pembabena ang mepakasili landa' liu sinnoa buhana bombang ang mähäng di le'bo'. Sika sinnoa bintäng ang unsamba langi', lambi' ke ditindo'i, ya' la sähsä' lalang tau. Inde to pampakuhu ang si ma'loseng-loseng la natahungkung Puang Alataala tama di ongeang ang malilling si'da-si'da lambi' sapano-panona.

¹⁴Henokh, mesa peampoanna Adam lapi' kapitunna, ma'tula' lohpo' didiona inde mai tau. Naoatee, ”Itai! Mengeng la sule Dehata naposolai ma'sa'bu-sa'bu to pentindo'na ang masero. [2]

¹⁵La umpahehsa ingkänna hupatau, anna yato ingkänna ang si mampa'bali la natahungkung aka' pembabe karakenaii. La natahungkung yato ingkänna ang dai tuhu'-tuhu'ang dai', anna la nabala' yato ingkänna tula' tahuhunnaii.”

¹⁶Inde to pampakuhu ang si ma'loseng-loseng si momämmäng lolo anna si unsalla tau senga'. Sika si untuhu'i pampemala karakenaii. Si malängkä' inaha anna sanda-sanda si natula' ang si nababe, anna si unse'de' tau senga' anna malai sika ullambi' kauntungang.

¹⁷Ampo' dioa', solasohong ang kukalemui, kalehaii yato ang naoa dolu rasulna Puang Yesus Kristus, Dehatanta.

¹⁸Sika naoate mating, ”Ke la lambi'mi Allo Panghohto'ang, ya' la aha tau ang si ungngita-ita naung kapampetahpa'anta. Dai sika la untuhu'i Puang Alataala, ampo' la untuhu'i pampemala karakena.”

¹⁹Dianto inde mai tau ang si umpasisähä'-sähä' kamesaanna hupatau. Nakuasai pampemala inahanna toboe', aka' daine' aha Inaha Masero yaling di inahannaii.

²⁰Ampo' dioa', solasohong ang kukalemui, sipamatoto' lolokoa' yaling di kapampetahpa'ammu sibaha solamu, aka' masero liu yato pepakuhu ang tapetahpa'. Pa'sambayang lolokoa' situhu' petehtena Inaha Masero.

²¹Yaling di katuhoammu pengkero lolokoa' ang la sihatang pano di tau ang nakalemui Puang Alataala. Anna empeii yato pebehe ang la nabeakoa' Puang Yesus Kristus ke suleng, dianto katuhoang ang lambi' sapano-panona.

²²Ponna ke ahake' tau ang bata-bata inahanna, ya' paitaii pa'kalemummu pano.

²³Ponna ke ahai tau ang ungkebo'i kapampetahpa'anna, ya' tehtei sumule sihapang umpasalama'o tau yaling mai di api. Noa tunne' pano di tau ang si untuhu'i pampemala karake, paitai toine' pa'kalemu, ampo' madakakoa' anna dakoa' natumäng dosanna. Paitaii pa'kalemu pano di to madosa ampo' kahiri'ine' dosannaii, pasihapangngi kaya' karähko' ang dang diaku dipake.

²⁴Pudii Puang Alataala, aka' ma'kuasa medakai anna dakoa' la manaho, lambi' dai la aha kasalaammu anna la kahsi liukoa' ke nabahamokoa' tama di olona ang matande.

²⁵Mesa supu Puang Alataala. Dianto ang mepasalama' ungngolai Puang Yesus Kristus, Dehatanta. Sihatang dipamatande anna dipakeangka', aka' Dianto ang untokei ingkänna kamatohoang anna kakuasaang mengkalao dolu, dinoa anna lambi' sapano-panona. Aming!