Read Aramaic Peshita 2 Samuel 5 Bible Online

2 Samuel 5 - Aramaic Peshita bible

2 Samuel 5

¹ܘܐܸܬ̣ܵܘ ܟܠܗܘܿܢ ܫܲܒ̣ܛܹ̈ܐ ܕܒܹܝܬ̣ ܝܼܣܪܵܝܹܠ ܠܘܵܬ̣ ܕܵܘܝܼܕ݂ ܠܚܸܒ̣ܪܘܿܢ: ܘܐܸܡܲܪܘ ܠܹܗ: ܗܵܐ ܒܸܣܪܵܟ݂ ܚܢܲܢ ܘܓܲܪܡܵܟ݂.

²ܐܵܦ ܡ̣ܢ ܐܸܬ̣ܡܵܠܝ ܘܐܵܦ ܡ̣ܢ ܡܢܵܬ̣ܡܵܠܝ ܟܲܕ݂ ܫܵܐܘܿܠ ܗ̄ܘ̣ܵܐ ܡܲܠܟܵܐ ܥܠܲܝܢ: ܐܲܢ̄ܬ̇ ܗ̄ܘ̣ ܡܲܦܸܩ ܗ̄ܘܲܝܬ̇ ܘܡܲܥܸܠ ܠܝܼܣܪܵܝܹܠ. ܘܐܸܡܲܪ ܠܵܟ݂ ܡܵܪܝܵܐ ܕܐܲܢ̄ܬ̇ ܬܸܪܥܸܐ ܠܥܲܡܝ ܝܼܣܪܵܝܹܠ: ܘܐܲܢ̄ܬ̇ ܬܸܗܘܸܐ ܡܕܲܒܪܵܢܵܐ ܥܲܠ ܥܲܡܝ ܝܼܣܪܵܝܹܠ.

³ܘܐܸܬ̣ܵܘ ܟܠܗܘܿܢ ܣܵܒܹ̈ܐ ܕܝܼܣܪܵܝܹܠ ܠܘܵܬ̣ ܡܲܠܟܵܐ ܠܚܸܒ̣ܪܘܿܢ: ܘܐܲܩܝܼܡ ܠܗܘܿܢ ܡܲܠܟܵܐ ܕܵܘܝܼܕ݂ ܒܚܸܒ̣ܪܘܿܢ ܩܝܵܡܵܐ ܩܕ݂ܵܡ ܡܵܪܝܵܐ. ܘܲܡܫܲܚܘ ܠܕ݂ܵܘܝܼܕ݂ ܕܢܲܡܠܸܟ݂ ܥܲܠ ܝܼܣܪܵܝܹܠ.

⁴ܒܲܪ ܬܠܵܬ̣ܝܼܢ ܗ̄ܘ̣ܵܐ ܫܢ̈ܝܼܢ ܕܵܘܝܼܕ݂ ܟܲܕ݂ ܐܲܡܠܸܟ݂: ܘܐܲܪܒ̇ܥܝܼܢ ܫܢ̈ܝܼܢ ܐܲܡܠܸܟ݂.

⁵ܒܚܸܒ̣ܪܘܿܢ ܐܲܡܠܸܟ݂ ܥܲܠ ܕܒܹܝܬ̣ ܝܼܗܘܼܕ݂ܵܐ: ܫܒܲܥ ܫܢ̈ܝܼܢ ܘܸܫܬܵܐ ܝܲܪ̈ܚܝܼܢ: ܘܒ̣ܐܘܿܪܸܫܠܸܡ ܐܲܡܠܸܟ݂ ܬܠܵܬ̣ܝܼܢ ܘܲܬ̣ܠܵܬ̣ ܫܢ̈ܝܼܢ ܥܲܠ ܟܠܹܗ ܝܼܣܪܵܝܹܠ ܘܲܝܗܘܼܕ݂ܵܐ.

⁶ܘܐܸܙܲܠ ܡܲܠܟܵܐ ܕܵܘܝܼܕ݂ ܘܓܲܒ̣ܪ̈ܵܘܗܝ ܒܐܘܿܪܸܫܠܸܡ: ܥܲܠ ܝܵܒ̣ܘܿܣܵܝܹ̈ܐ: ܝܵܬ̣ܒܲܝ̈ ܐܲܪܥܵܐ. ܘܐܸܡܲܪܘ ܠܕ݂ܵܘܝܼܕ݂ ܠܡܹܐܡܲܪ: ܠܵܐ ܬܸܥܘܿܠ ܠܗܵܪܟܵܐ: ܐܸܠܵܐ ܐܸܢ ܐܲܥܒܲܪܬ̇ ܥܘܼܝܼܪܹ̈ܐ ܘܲܚܓ̣ܝܼܪܹ̈ܐ: ܘܐܸܡܲܪܘ ܠܵܐ ܢܸܥܘܿܠ ܕܵܘܝܼܕ݂ ܠܗܵܪܟܵܐ.

⁷ܘܐܸܚܲܕ݂ ܕܵܘܝܼܕ݂ ܠܡܸܨܪܘܿܬ̣ ܨܸܗܝܘܿܢ: ܗ̤ܝ ܗ̄ܝ̣ ܒܪܝܼܬܹܗ ܕܕ݂ܵܘܝܼܕ݂.

⁸ܘܐܸܡܲܪ ܕܵܘܝܼܕ݂ ܒܝܵܘܡܵܐ ܗܵܘ̇: ܟܠ ܕܢܸܡܚܸܐ ܠܝܵܘܿܣܵܝܵܐ: ܘܲܕ݂ܢܸܩܪܘܿܒ̣ ܒܣܲܟ̇ܪܵܐ ܠܲܥܘܝܼܪܵܐ ܘܠܲܚܓ̣ܝܼܪܵܐ: ܣܵܢܹܐ ܢܲܦ̮ܫܹܗ ܗ̄ܘ̣ ܕܕ݂ܵܘܝܼܕ݂: ܡܸܛܠ ܗܵܢܵܐ ܐܵܡܪܝܼܢ: ܥܘܼܝܼܪܵܐ ܘܲܚܓ̣ܝܼܪܵܐ ܠܵܐ ܢܸܥܘܿܠ ܠܒܲܝܬܵܐ.

⁹ܘܝܼܬܸܒ̣ ܕܵܘܝܼܕ݂ ܒܡܸܨܪܘܿܬ̣ ܗ̤ܝ ܗ̄ܝ̣ ܨܸܗܝܘܿܢ: ܘܲܩܪܵܗ̇ ܩܪܝܼܬܹܗ ܕܕ݂ܵܘܝܼܕ݂: ܘܲܒ̣ܢܵܐ ܕܵܘܝܼܕ݂ ܚܕ݂ܵܪܹ̈ܝܗ̇ ܡ̣ܢ ܠܓ̣ܵܘ.

¹⁰ܘܕ݂ܵܘܝܼܕ݂ ܐܵܙܹܠ ܘܝܵܪܹܒ̣: ܘܡܵܪܝܵܐ ܐܲܠܵܗܹܗ ܨܒ̣ܵܐܘܼܬ̣ ܥܲܡܹܗ.

¹¹ܘܫܲܕܲܪ ܚܝܼܪܵܡ ܡܲܠܟܵܐ ܕܨܘܿܪ ܐܝܼܙ̈ܓܲܕܹܐ ܠܘܵܬ̣ ܕܵܘܝܼܕ݂: ܘܩܲܝܣܹ̈ܐ ܕܐܲܪ̈ܙܹܐ: ܘܐܘܼܡܵܢܹ̈ܐ ܕܩܲܝܣܵܐ: ܘܐܘܼܡܵܢܹ̈ܐ ܕܟܹܐܦܵܐ ܕܐܸܣܬ̣ܵܐ. ܘܲܒ̣ܢܵܘ ܒܲܝܬܵܐ ܠܕ݂ܵܘܝܼܕ݂.

¹²ܘܝܼܕܲܥ ܕܵܘܝܼܕ݂ ܕܐܲܬ̣ܩܢܹܗ ܡܵܪܝܵܐ ܡܲܠܟܵܐ ܥܲܠ ܝܼܣܪܵܝܹܠ: ܘܐܸܬ̇ܬ̇ܪܝܼܡܲܬ̤ ܡܲܠܟ̇ܘܼܬܹܗ ܥܲܠ ܥܲܡܹܗ ܝܼܣܪܵܝܹܠ.

¹³ܘܲܢܣܲܒ̣ ܬܘܼܒ̣ ܕܵܘܝܼܕ݂ ܕܪ̈ܘܼܟ݂ܬ̣ܵܐ ܘܢܸܫܹ̈ܐ ܡ̣ܢ ܐܘܿܪܸܫܠܸܡ: ܡ̣ܢ ܒܵܬܲܪ ܕܐܸܬ̣ܵܐ ܡ̣ܢ ܚܸܒ̣ܪܘܿܢ ܘܐܸܬ̣̱ܝܼܠܸܕ݂ܘ ܠܕ݂ܵܘܝܼܕ݂ ܬܘܼܒ̣ ܒ̈ܢܲܝܵܐ ܘܲܒ̣̈ܢܵܬ̣ܵܐ.

¹⁴ܘܗܵܠܹܝܢ ܫܡܵܗܹ̈ܐ ܕܲܒ̣̈ܢܲܝܐ: ܕܐܸܬ̣̱ܝܼܠܸܕ݂ܘ ܠܹܗ ܒܐܘܿܪܸܫܠܸܡ: ܫܵܡܘܿܥ: ܘܫܵܒ̣ܘܿܒ̣: ܘܢܵܬ̣ܵܢ: ܘܲܫܠܹܝܡܘܿܢ.

¹⁵ܘܝܘܼܟ݂ܵܒ̣ܵܪ: ܘܐܹܠܝܼܫܵܥ: ܘܲܢܦܵܓ̣: ܘܢܦܝܼܠ.

¹⁶ܘܐܹܠܝܼܫܡܲܥ: ܘܐܹܠܝܼܕܲܥ: ܘܐܹܠܝܼܦܠܲܛ.

¹⁷ܘܲܫܡܲܥܘ ܦܠܸܫ̈ܬܵܝܹܐ ܕܲܡܫܲܚܘ ܠܕ݂ܵܘܝܼܕ݂ ܕܢܲܡܠܸܟ݂ ܥܲܠ ܝܼܣܪܵܝܹܠ: ܘܲܣܠܸܩܘ ܟܠܗܘܿܢ ܦܠܸܫ̈ܬܵܝܹܐ ܠܡܸܒ̣ܥܵܐ ܠܕ݂ܵܘܝܼܕ݂. ܘܲܫܡܲܥ ܕܵܘܝܼܕ݂: ܘܲܢܚܸܬ̣ ܠܹܗ ܠܡܸܨܪܘܿܬ̣.

¹⁸ܘܲܦܠܸܫ̈ܬܵܝܹܐ ܐܸܬ̣ܵܘ ܫܪܵܘ ܒܥܘܼܡܩܵܐ ܕܓܲܢ̄ܒܵܪܹ̈ܐ.

¹⁹ܘܲܫܐܸܠ ܕܵܘܝܼܕ݂ ܒܡܵܪܝܵܐ: ܘܐܸܡܲܪ: ܐܸܣܲܩ ܥܲܠ ܦܠܸܫ̈ܬܵܝܹܐ: ܡܲܫܠܸܡ ܐܲܢ̄ܬ̇ ܠܗܘܿܢ ܒܐܝܼܕ݂ܝ. ܘܐܸܡܲܪ ܠܹܗ ܡܵܪܝܵܐ: ܣܲܩ: ܡܸܛܠ ܕܒ̣ܐܝܼܕܲܝ̈ܟ ܡܲܫܠܸܡ ܐ̄ܢܵܐ ܠܗܘܿܢ.

²⁰ܘܐܸܬ̣ܵܐ ܕܵܘܝܼܕ݂ ܠܲܒ̣ܥܸܠ ܦܲܪܨܝܼܡ: ܘܲܡܚܵܐ ܐܸܢܘܿܢ ܬܲܡܵܢ ܕܵܘܝܼܕ݂. ܘܐܸܡܲܪ ܕܵܘܝܼܕ݂: ܬܪܲܥ ܡܵܪܝܵܐ ܠܲܒ̣ܥܸܠܕܒ̣ܵܒ̣ܵܘ̈ܗܝ ܩܕ݂ܵܡܲܝ ܐܲܝܟ݂ ܬܘܼܪ̱ܥܬ̣ܵܐ ܕܡܲܝ̈ܵܐ: ܡܸܛܠ ܗܵܢܵܐ ܩܪܵܐ ܫܡܹܗ ܕܐܲܬ̣ܪܵܐ ܗܵܘ̇ ܒܥܸܠ ܦܲܪܨܝܼܡ.

²¹ܘܲܫܒܲܩܘ ܬܲܡܵܢ ܦܬܲܟ݂ܪ̈ܲܝܗܘܿܢ: ܘܲܫܩܲܠܘ ܐܸܢܘܿܢ ܕܵܘܝܼܕ݂ ܘܓܲܒ̣ܪ̈ܘܗܝ.

²²ܘܐܵܘܣܸܦܘ ܬܘܼܒ̣ ܦܠܸܫ̈ܬܵܝܹܐ ܠܡܸܣܲܩ: ܘܲܫܪܵܐܘ ܒܥܘܼܡܩܵܐ ܕܓܲܢ̄ܒܵܪܹ̈ܐ.

²³ܘܲܫܐܸܠ ܕܵܘܝܼܕ݂ ܒܡܵܪܝܵܐ. ܘܐܸܡܲܪ ܠܹܗ ܡܵܪܝܵܐ: ܠܵܐ ܬܸܣܲܩ: ܐܸܠܵܐ ܗܦܘܿܟ݂ ܠܵܟ݂ ܡ̣ܢ ܒܸܣܬܲܪܗܘܿܢ: ܘܬ̣ܵܐ ܥܠܲܝܗܘܿܢ ܡ̣ܢ ܠܘܼܩܒܲܠ ܒܵܟ݂ܝܼܡ.

²⁴ܘܡܵܐ ܕܲܫܡܲܥܬ̇ ܩܵܠܵܐ ܕܲܗܠܲܟ݂ܬ̣ܵܐ ܒܪܹܫܹܗ ܕܛܘܼܪܵܐ ܕܒ̣ܵܟ݂ܝܼܡ: ܗܵܝܕܸܝܢ ܬܸܬ̣ܥܲܫܲܢ: ܡܸܛܠ ܕܗܲܝܕܹܝܢ ܢܵܦܹܩ ܡܵܪܝܵܐ ܩܕ݂ܵܡܲܝܟ: ܠܡܸܡܚܵܐ ܠܡܲܫܪܝܼܬ̣ܵܐ ܕܲܦܠܸܫ̈ܬܵܝܹܐ.

²⁵ܘܲܥܒܲܕ݂ ܕܵܘܝܼܕ݂ ܗܵܟܲܢܵܐ ܐܲܝܟܲܢܵܐ ܕܦܲܩܕܹܗ ܡܵܪܝܵܐ: ܘܲܡܚܵܐ ܠܲܦܠܸܫ̈ܬܵܝܹܐ ܡ̣ܢ ܓܒܲܥ ܘܲܥܕܲܡܵܐ ܠܡܲܥܠܵܢܵܐ ܕܓ̣ܵܕ݂ܵܪ.