Read Aramaic Peshita 1 Kings 1 Bible Online

1 Kings 1 - Aramaic Peshita bible

1 Kings 1

¹ܘܡܲܠܟܵܐ ܕܵܘܝܼܕ݂ ܣܐܸܒ̣ ܘܥܲܠ̣ ܒܲܫܢܲـ̈ـܝܵܐ: ܘܲܡܟܲܣܹܝܢ ܗ̄ܘ̣ܵܘ ܠܹܗ ܒܲܠܒ̣ܘܼܫܹ̈ܐ ܘܠܵܐ ܫܵܚܹ̇ܢ.

²ܘܐܸܡܲܪܘ ܠܹܗ ܥܲܒ̣ܕܵܘ̈ܗܝ: ܗܵܐ ܥܲܒ̣ܕܲܝ̈ܟ ܩܕ݂ܵܡܲܝܟ: ܢܸܒ̣ܥܘܼܢ ܠܡܵܪܝ ܡܲܠܟܵܐ ܥܠܲܝܡܬ̣ܵܐ ܒܬ̣ܘܼܠܬܵܐ: ܘܲܬ̣ܩܘܼܡ ܩܕ݂ܵܡ ܡܲܠܟܵܐ: ܘܬܸܗܘܹܐ ܠܹܗ ܡܫܲܡܫܵܢܝܼܬ̣ܵܐ: ܘܬܸܫܟܲܒ̣ ܒܥܘܼܒܵܟ݂: ܘܢܸܫܚܲܢ ܠܡܵܪܲܢ ܡܲܠܟܵܐ.

³ܘܲܒ̣ܥܵܘ ܥܠܲܝܡܘܼܬ̣ܵܐ ܕܫܲܦܝܼܪܵܐ ܒܟ݂ܠܹܗ ܬܚܘܼܡܵܐ ܕܝܼܣܪܵܝܹܠ: ܘܐܸܫܟܲܚܘ ܠܐܲܒ̣ܝܼܫܲܓ̤ ܫܝܼܠܘܿܡܵܝܬܵܐ: ܘܐܲܝܬ̇ܝܘܼܗ̇ ܠܡܲܠܟܵܐ.

⁴ܘܲܥܠܲܝܡܬܐ ܫܲܦܝܼܪܵܐ ܗ̄ܘ̣ܵܬ̣ ܛܵܒ̣: ܘܲܗܘܵܬ̣ ܠܡܲܠܟܵܐ ܡܫܲܡܫܵܢܝܼܬܐ ܘܲܡܫܲܡܫܵܐ ܠܹܗ ܠܡܲܠܟܵܐ: ܘܠܵܐ ܝܲܕ݂ܥܵܗ.

⁵ܘܐܲܕ݂ܘܿܢܝܼܵܐ ܒܲܪ ܚܲܓ̇ܝܼܬ̣ ܡܸܬ̣ܪܵܘܪܲܒ̣ ܘܐܵܡܲܪ: ܐܸܢܵܐ ܐܲܡܠܸܟ݂ ܘܲܥܒܲܕ݂ ܠܹܗ ܡܲܪ̈ܟ̇ܒ̣ܵܬ̣ܵܐ ܘܦܲܪ̈ܵܫܹܐ: ܘܚܲܡܫܝܼܢ ܓܲܒ̣ܪ̈ܝܼܢ ܕܪܵܗ̇ܛܝܼܢ ܗ̄ܘ̣ܵܘ ܩܕ݂ܵܡܵܘܗܝ.

⁶ܘܠܵܐ ܟܐܵܐ ܒܹܗ ܐܲܒ̣ܘܼܗܝ ܡ̣ܢ ܝܵܘܡܵܘ̈ܗܝ: ܘܐܸܡܲܪ ܠܹܗ: ܡܸܛܠ ܡܵܢܵܐ ܗܵܟܲܢܵܐ ܥܵܒܹܕ݂ ܐܲܢ̄ܬ̇. ܘܐܵܦ ܗ̤ܘ ܫܲܦܝܼܪ ܗ̄ܘ̣ܵܐ ܒܚܸܙܘܹܗ ܛܵܒ̣: ܘܠܹܗ ܝܼܠܕܲܬ̤ ܒܵܬܲܪ ܐܲܒ̣ܫܵܠܘܿܡ.

⁷ܘܲܗܘ̤ܵܘ ܦܸܬ̣ܓ̣ܵܡܵܘ̈ܗܝ ܥܲܡ ܝܘܿܐܵܒ̣ ܒܲܪ ܨܘܿܪܝܼܵܐ: ܘܥܲܡ ܐܲܒ̣ܝܼܬܲܪ ܟܵܗܢܵܐ. ܘܲܡܥܲܕ̇ܪܝܼܢ ܒܵܬܲܪ ܐܲܕ݂ܘܿܢܝܼܵܐ.

⁸ܘܨܵܕ݂ܘܿܩ ܟܵܗܢܵܐ: ܘܲܒ̣ܢܲܝܵܐ ܒܲܪ ܝܘܿܝܵܕ݂ܵܥ: ܘܢܵܬ̣ܵܢ ܢܒ̣ܝܼܵܐ: ܘܫܲܡܥܝܼ: ܘܕܲܥܝܼ: ܘܓܲܢ̄ܒܵܪܹ̈ܐ: ܕܕ݂ܵܘܝܼܕ݂: ܠܵܐ ܗ̄ܘ̣ܵܐ ܒܵܬܲܪ ܐܲܕ݂ܘܿܢܝܼܵܐ.

⁹ܘܕܲܒܲܚ ܐܲܕ݂ܘܿܢܝܼܵܐ ܥܵـ̈ـܢܵܐ ܘܬ̣ܵܘܪܹ̈ܐ ܘܲܡܦܲܛܡܹ̈ܐ ܥܲܠ ܟܹܐܦܵܐ ܕܙܲܚܠܬ̣ ܕܥܲܠ ܓܹܢ̄ܒ̣ ܥܹܝܢ ܩܵܨܪܵܐ. ܘܲܩܪܵܐ ܠܟ݂ܠܗܘܿܢ ܐܲܚܵܘ̈ܗܝ ܒ̈ܢܲܝ ܡܲܠܟܵܐ: ܘܲܠܟ݂ܠܗܘܿܢ ܕܒܹܝܬ̣ ܝܼܗܘܼܕ݂ܵܐ: ܘܲܠܥܲܒ̣̈ܕܲܝ ܡܲܠܟܵܐ.

¹⁰ܘܲܠܢܵܬ̣ܵܢ ܢܒ̣ܝܼܵܐ ܘܠܲܒ̣ܢܵܝܵܐ ܒܲܪ ܝܘܿܝܵܕ݂ܵܥ: ܘܲܠܓܲܢ̄ܒܵܪܹ̈ܐ ܕܕ݂ܵܘܝܼܕ݂. ܘܠܲܫܠܹܝܡܘܿܢ ܐܲܚܘܼܗܝ ܠܵܐ ܩ̣ܪܵܐ.

¹¹ܘܐܸܡܲܪ ܢܵܬ̣ܵܢ ܢܒ̣ܝܼܵܐ ܠܒܲܪܬ̣ ܫܒܲܥ ܐܸܡܹܗ ܕܲܫܠܹܝܡܘܿܢ: ܠܵܐ ܫܡܲܥܬ̇ܝ ܕܐܲܡܠܸܟ݂ ܐܲܕ݂ܘܿܢܝܼܵܐ: ܘܡܵܪܲܢ ܡܲܠܟܵܐ ܠܵܐ ܝܼܕܲܥ̣.

¹²ܗܵܫܵܐ ܬܵܝ ܐܸܡ̱ܠܟܹܟ݂ܝ ܡܸܠܟܵܐ: ܘܦܲܠܸܛܝ ܢܲܦ̮ܫܹܟ݂ܝ ܘܢܲܦ̮ܫܵܐ ܕܲܒ̣ܪܹܟ݂ܝ ܫܠܹܝܡܘܿܢ.

¹³ܙܸܠܝ ܥܘܿܠܝ ܠܘܵܬ̣ ܡܲܠܟܵܐ ܕܵܘܝܼܕ݂: ܘܐܸܡ̇ܪܝ ܠܹܗ: ܠܵܐ ܐܲܢ̄ܬ̇ ܡܵܪܝ ܡܲܠܟܵܐ ܝܼܡܲܝܬ̇ ܠܐܲܡܬ̣ܵܟ݂: ܕܲܫܠܹܝܡܘܿܢ ܒܪܹܟ݂ܝ ܢܲܡܠܸܟ݂ ܒܵܬܲܪܝ: ܘܗ̤ܘ ܢܸܬܸ̇ܒ̣ ܥܲܠ ܟܘܼܪܣܲܝ. ܡܸܛܠ ܡܵܐܐ ܐܲܡ̣ܠܸܟ݂ ܐܲܕ݂ܘܿܢܝܼܵܐ.

¹⁴ܘܥܲܕ݂ ܐܲܢ̄ܬ̇ܝ ܡܡܲܠܠܵܐ ܬܲܡܵܢ ܩܕ݂ܵܡ ܡܲܠܟܵܐ: ܐܸܢܵܐ ܐܹܬܹܐ ܒܵܬ̣ܪܹܟ݂ܝ: ܘܐܸܫܲܡܠܸܐ ܡܸܠܲܝ̈ܟ̇ܝ.

¹⁵ܘܥܸܠܲܬ̤ ܒܲܪܬ̣ ܫܒܲܥ ܠܘܵܬ̣ ܡܲܠܟܵܐ ܠܩܲܝܛܘܿܢܵܐ. ܘܡܲܠܟܵܐ ܣܐܸܒ̣ ܛܵܒ̣: ܘܐܲܒ̣ܝܼܫܲܓ̣ ܫܝܼܠܘܼܡܵܝܬܵܐ ܡܫܲܡܫܵܐ ܗ̄ܘ̣ܵܬ̣ ܠܡܲܠܟܵܐ. ܘܒܸܪܟܲܬ̤ ܒܲܪܬ̣ ܫܒܲܥ ܘܣܸܓ̣ܕܸ̇ܬ̣ ܠܡܲܠܟܵܐ.

¹⁶ܐܵܡܲܪ ܠܵܗ̇ ܡܲܠܟܵܐ: ܡܵܠ ܠܹܟ݂ܝ ܒܲܪܬ̣ ܫܒܲܥ.

¹⁷ܐܵܡܪܵܐ ܠܹܗ: ܡܵܪܝ ܡܲܠܟܵܐ: ܝܼܡܲܝܬ̇ ܒܡܵܪܝܵܐ ܐܲܠܵܗܵܟ݂ ܠܐܲܡܬ̣ܵܟ݂: ܕܲܫܠܹܝܡܘܿܢ ܒܪܹܟ݂ܝ ܢܲܡܠܸܟ݂ ܒܵܬܲܪܝ: ܘܗ̤ܘ ܢܸܬܸ̇ܒ̣ ܥܲܠ ܟܘܼܪܣܲܝ.

¹⁸ܘܗܵܫܵܐ ܗܵܐ ܐܲܕ݂ܘܿܢܝܼܵܐ ܐܲܡ̣ܠܸܟ݂: ܘܐܲܢ̄ܬ̇ ܡܵܪܝ ܡܲܠܟܵܐ ܠܵܐ ܝܼܕܲܥ̣ܬ̇.

¹⁹ܘܕܲܒܲܚ ܬܵܘܪܹ̈ܐ ܘܲܡܦܲܛܡܹ̈ܐ ܘܥܵـ̈ـܢܵܐ ܣܘܿܓ̣ܵܐܐ. ܘܲܩ̣ܪܵܐ ܠܟ݂ܠܗܘܿܢ ܒ̈ܢܲܝ ܡܲܠܟܵܐ: ܘܠܲܐܒ̣ܝܼܬܲܪ ܟܵܗܢܵܐ: ܘܲܠܝܘܿܐܵܒ̣ ܪܲܒ̇ ܚܲܝܠܵܐ: ܘܲܠܢܵܬ̣ܵܢ ܢܒ̣ܝܼܵܐ: ܘܠܲܒ̣ܢܵܝܵܐ ܒܲܪ ܝܘܿܝܵܕ݂ܵܥ. ܘܠܲܫܠܹܝܡܘܿܢ ܥܲܒ̣ܕܵܟ݂ ܠܵܐ ܩ̣ܪܵܐ.

²⁰ܘܐܲܢ̄ܬ̇ ܡܵܪܝ ܡܲܠܟܵܐ: ܥܲܝܢܵܘ̈ܗܝ ܕܟ݂ܠܹܗ ܝܼܣܪܵܝܹܠ ܥܠܲܝܟ ܗ̄ܘ̣: ܕܲܬ̣ܚܵܘܸܐ ܐܸܢܘܿܢ ܡ̇ܢ ܢܸܬܸ̇ܒ̣ ܥܲܠ ܟܘܼܪܣܝܹܗ ܕܡܵܪܝ ܡܲܠܟܵܐ ܡ̣ܢ ܒܵܬ̣ܪܹܗ.

²¹ܘܡܵܐ ܕܲܫܟܸܒ̣ ܡܵܪܝ ܡܲܠܟܵܐ ܠܘܵܬ̣ ܐܲܒ̣ܵܗܵܘ̈ܗܝ ܒܲܫܠܵܡܵܐ: ܐܸܗܘܹܐ ܐܸܢܵܐ ܘܒܹܪܝ ܫܠܹܝܡܘܿܢ ܚܲܛܵܝܑܝܼ̈ܢ.

²²ܘܥܲܕ݂ ܗ̤ܝ ܡܡܲܠܠܵܐ ܬܲܡܵܢ ܩܕ݂ܵܡ ܡܲܠܟܵܐ: ܘܢܵܬ̣ܵܢ ܢܒ̣ܝܼܵܐ ܐܸܬ̣ܵܐ.

²³ܘܚܵܘܝܼܘ ܠܡܲܠܟܵܐ ܘܐܸܡܲܪܘ ܠܹܗ: ܕܗܵܐ ܢܵܬ̣ܵܢ ܢܒ̣ܝܼܵܐ ܐܸܬ̣ܵܐ. ܘܥܲܠ ܩܕ݂ܵܡ ܡܲܠܟܵܐ: ܘܲܢܦܲܠ̣ ܥܲܠ ܐܲܦܵܘ̈ܗܝ ܥܲܠ ܐܲܪܥܵܐ ܘܲܣܓܸܕ݂.

²⁴ܘܐܸܡܲܪ ܢܵܬ̣ܵܢ: ܡܵܪܝ ܡܲܠܟܵܐ ܐܲܢ̄ܬ̇ ܐܸܡܲܪܬ̇ ܕܐܲܕ݂ܘܿܢܝܼܵܐ ܢܲܡܠܸܟ݂ ܒܵܬܲܪܝ: ܘܗ̤ܘ ܢܸܬܸ̇ܒ̣ ܥܲܠ ܟܘܼܪܣܲܝ.

²⁵ܕܲܢܚܬ̣ ܝܵܘܡܵܢܵܐ: ܘܕܲܒܲܚ ܬܵܘܪܹ̈ܐ ܘܲܡܦܲܛܡܹ̈ܐ ܘܥܵـ̈ـܢܵܐ ܣܘܿܓ̣ܵܐܐ. ܘܲܩ̣ܪܵܐ ܠܟ݂ܠܗܘܿܢ ܒ̈ܢܲܝ ܡܲܠܟܵܐ: ܘܲܠܪ̈ܲܒܲܝ ܚܲܝܠܵܐ: ܘܠܲܐܒ̣ܝܼܬܲܪ ܟܵܗܢܵܐ. ܘܗܵܐ ܐܲܟ݂ܠܝܼܢ ܘܫܵܬܹ̇ܝܢ ܩܕ݂ܵܡܵܘܗܝ: ܘܐܵܡ̇ܪܝܼܢ ܢܸܚܹܐ ܡܲܠܟܵܐ ܐܲܕ݂ܘܿܢܵܝܵܐ.

²⁶ܘܠܝܼ ܕܐܸܢܵܐ ܥܲܒ̣ܕܵܟ݂: ܘܲܠܨܵܕ݂ܘܿܩ ܟܵܗܢܵܐ: ܘܠܲܒ̣ܢܵܝܵܐ ܒܲܪ ܝܘܿܝܵܕ݂ܵܥ: ܘܠܲܫܠܹܝܡܘܿܢ ܥܲܒ̣ܕܵܟ݂ ܠܵܐ ܩ̣ܪܵܐ.

²⁷ܐܹܝܢ ܡ̣ܢ ܩܕ݂ܵܡܲܝܟ ܡܵܪܝ ܡܲܠܟܵܐ ܗܘ̤ܵܐ ܦܸܬ̣ܓ̣ܵܡܵܐ ܗܵܢܵܐ: ܘܠܵܐ ܚܵܘܝܼܬ̇ ܠܥܲܒ̣̈ܕܲܝܟ ܡ̇ܢ ܢܸܬܸ̇ܒ̣ ܥܲܠ ܟܘܼܪܣܝܹܗ ܕܡܵܪܝ ܡܲܠܟܵܐ ܡ̣ܢ ܒܵܬ̣ܪܹܗ.

²⁸ܘܲܥ̣ܢܵܐ ܡܲܠܟܵܐ ܕܵܘܝܼܕ݂ ܘܐܸܡܲܪ: ܩܪܵܘ ܠܝܼ ܠܒܲܪܬ̣ ܫܒܲܥ. ܘܥܸܠܲܬ̤ ܩܕ݂ܵܡܵܘܗܝ: ܘܩܵܡܲܬ̤ ܩܕ݂ܵܡ ܡܲܠܟܵܐ.

²⁹ܘܝܼܡܵܐ ܠܵܗ̇ ܡܲܠܟܵܐ ܘܐܸܡܲܪ: ܚܲܝ ܗ̄ܘ̣ ܡܵܪܝܵܐ ܕܲܦܪܲܩ̣ ܢܲܦ̮ܫܝ ܡ̣ܢ ܟܠ ܥܵܩܵܐ.

³⁰ܐܸܠܵܐ ܐܲܝܟܲܢܵܐ ܕܝܼܡܝܼܬ̣ ܠܹܟ݂ܝ ܒܡܵܪܝܵܐ ܐܲܠܵܗܵܐ ܕܝܼܣܪܵܝܹܠ: ܘܐܸܡ̇ܪܹܬ̣ ܕܲܫܠܹܝܡܘܿܢ ܒܪܹܟ݂ܝ ܢܲܡܠܸܟ݂ ܒܵܬܲܪܝ: ܘܗ̤ܘ ܢܸܬܸ̇ܒ̣ ܥܲܠ ܟܘܼܪܣܲܝ: ܗܵܟܲܢܵܐ ܐܸܥܒܸ̇ܕ݂ ܝܵܘܡܵܢܵܐ.

³¹ܘܒܸܪܟܲܬ̣ ܒܲܪܬ̣ ܫܒܲܥ ܥܲܠ ܐܲܦܹ̈ܝܗ̇ ܥܲܠ ܐܲܪܥܵܐ: ܘܣܸܓ̣ܕܲܬ̣ ܠܡܲܠܟܵܐ: ܘܐܸܡܪܲܬ̤ ܢܸܚܹܐ ܡܵܪܝ ܡܲܠܟܵܐ ܕܵܘܝܼܕ݂ ܠܥܵܠܲܡ.

³²ܘܐܸܡܲܪ ܡܲܠܟܵܐ ܩܪܵܘ ܠܝܼ ܠܨܵܕ݂ܘܿܩ ܟܵܗܢܵܐ: ܘܲܠܢܵܬ̣ܵܢ ܢܒ̣ܝܼܵܐ: ܘܠܲܒ̣ܢܵܝܵܐ ܒܲܪ ܝܘܿܝܵܕ݂ܵܥ. ܘܐܸܬ̣ܵܘ ܩܕ݂ܵܡ ܡܲܠܟܵܐ.

³³ܘܐܸܡܲܪ ܠܗܘܿܢ ܡܲܠܟܵܐ: ܩܘܼܡܘ ܕܒܲܪܘ ܥܲܡܟ݂ܘܿܢ ܠܥܲܒ̣̈ܕܹ̇ܐ ܕܡܵܪܟ݂ܘܿܢ: ܘܐܲܪܟܸ̇ܒ̣ܘ ܠܲܫܠܹܝܡܘܿܢ ܒܹܪܝ ܥܲܠ ܟܘܿܕܲܢܬܵܐ ܕܝܼܾܠܝ: ܘܐܵܘܒ̇ܠܘܼܗܝ ܠܫܝܼܠܘܿܚܵܐ.

³⁴ܘܢܸܡܫ̄ܚܘܼܢܹܗ ܬܲܡܵܢ ܨܵܕ݂ܘܿܩ ܟܵܗܢܵܐ ܘܢܵܬ̣ܵܢ ܢܒ̣ܝܼܵܐ: ܕܢܲܡܠܸܟ݂ ܥܲܠ ܝܼܣܪܵܝܹܠ. ܘܲܩܪܵܘ ܒܫܝܼܦܘܿܪܵܐ: ܘܐܸܡܲܪܘ: ܢܸܚܹܐ ܡܲܠܟܵܐ ܫܠܹܝܡܘܿܢ.

³⁵ܘܣܲܩܘ ܒܵܬ̣ܪܹܗ: ܘܢܹܐܬܹܐ ܘܢܸܬܸ̇ܒ̣ ܥܲܠ ܟܘܼܪܣܲܝ: ܘܗ̤ܘ ܢܲܡܠܸܟ݂ ܒܵܬ̣ܪܝ. ܠܹܗ ܦܩܲܕܹ̇ܬ̣ ܕܢܸܗܘܹܐ ܡܲܠܟܵܐ ܥܲܠ ܝܼܣܪܵܝܹܠ ܘܥܲܠ ܝܼܗܘܼܕ݂ܵܐ.

³⁶ܘܲܥܢ̣ܵܐ ܒܢܵܝܵܐ ܒܲܪ ܝܘܿܝܵܕ݂ܵܥ: ܘܐܸܡܲܪ ܩܕ݂ܵܡ ܡܲܠܟܵܐ: ܐܵܡܹܝܢ: ܗܵܟܲܢܵܐ ܢܸܥܒܸ̇ܕ݂ ܡܵܪܝܵܐ ܐܲܠܵܗܵܐ.

³⁷ܘܐܲܝܟ݂ ܕܲܗܘ̤ܵܐ ܡܵܪܝܵܐ ܥܲܡ ܡܵܪܝܼ ܡܲܠܟܵܐ: ܗܵܟܲܢܵܐ ܢܸܗܘܹܐ ܐܵܦ ܥܲܡ ܫܠܹܝܡܘܿܢ: ܘܢܵܘܪܸܒ̣ ܟܘܼܪܣܝܹܗ ܡ̣ܢ ܟܘܼܪܣܝܹܗ ܕܡܵܪܝ ܡܲܠܟܵܐ ܕܵܘܝܼܕ݂.

³⁸ܘܲܢܚܸܬ̣ ܨܵܕ݂ܘܿܩ ܟܵܗܢܵܐ: ܘܢܵܬ̣ܵܢ ܢܒ̣ܝܼܵܐ: ܘܲܒ̣ܢܵܝܵܐ ܒܲܪ ܝܘܿܝܵܕ݂ܵܥ: ܘܩܲܫܵـ̈ـܬܹܐ: ܘܲܕ݂ܫܵܕܹ̇ܝܢ ܒܩܸܠ̈ܥܹܐ ܘܐܲܪܟ̇ܒ̣ܘܼܗܝ ܠܲܫܠܹܝܡܘܿܢ ܥܲܠ ܟܘܿܕܲܢܬܵܐ ܕܡܲܠܟܵܐ ܕܵܘܝܼܕ݂: ܘܐܵܘܒ̇ܠܘܼܗܝ ܠܫܝܼܠܘܿܚܵܐ.

³⁹ܘܲܢܣܲܒ̣ ܨܵܕ݂ܘܿܩ ܟܵܗܢܵܐ: ܘܢܵܬ̣ܵܢ ܢܒ̣ܝܼܵܐ ܩܲܪܢܵܐ ܕܡܸܫܚܵܐ ܡ̣ܢ ܡܲܫܟ̇ܢܵܐ ܘܡܲܫܚܘܼܗܝ ܠܲܫܠܹܝܡܘܿܢ. ܘܲܩܪܵܘ ܒܫܝܼܦܘܿܪܵܐ: ܘܐܸܡܲܪܘ ܟܠܹܗ ܥܲܡܵܐ ܢܸܚܹܐ ܡܲܠܟܵܐ ܫܠܹܝܡܘܿܢ.

⁴⁰ܘܲܣܠܸܩܘ ܟܠܹܗ ܥܲܡܵܐ ܒܵܬ̣ܪܹܗ. ܘܥܲܡܵܐ ܪܵܒ̣ܥܝܼܢ ܒܲܪ̈ܒ̣ܝܼܥܵܐ: ܘܚܵܕܹܝܢ ܚܲܕ݂ܘܼܬ̣ܵܐ ܪܲܒ̇ܬ̣ܵܐ. ܘܐܸܨܛܲܪܝܲܬ̤ ܐܲܪܥܵܐ ܒܩܵܠܗܘܿܢ.

⁴¹ܘܲܫܡܲܥ ܐܲܕ݂ܘܿܢܝܵܐ ܘܟ݂ܠ ܕܲܡܙܲܡܢܝܼܢ ܗ̄ܘ̣ܵܘ ܠܹܗ ܟܲܕ݂ ܓܲܡܲܪܘ ܠܡܹܐܟܲܠ. ܘܟܲܕ݂ ܫ̣ܡܲܥ ܝܘܿܐܵܒ̣ ܩܵܠܵܐ ܕܫܝܼܦܘܿܪܵܐ. ܐܸܡܲܪ ܡܵܢܵܘ ܩܵܠܵܐ ܗܵܢܵܐ: ܕܲܩܪܝܼܬ̣ܵܐ ܐܸܫܬܲܓ̣ܫܲܬ̤.

⁴²ܘܥܲܕ݂ ܗ̤ܘ ܡܡܲܠܸܠ: ܘܗܵܐ ܢܵܬ̣ܵܢ ܒܲܪ ܐܲܒ̣ܝܼܬܲܪ ܟܵܗܢܵܐ ܐܸܬ̣ܵܐ. ܘܐܸܡܲܪ ܠܹܗ ܐܲܕ݂ܘܿܢܝܼܵܐ: ܥܘܿܠ ܡܸܛܠ ܕܓܲܢ̄ܒܵܪ ܚܲܝܠܵܐ ܐܲܢ̄ܬ̇: ܘܛܵܒ̣ܬ̣ܵܐ ܡܣܲܒܲܪ ܐܲܢ̄ܬ̇.

⁴³ܘܲܥܢ̣ܵܐ ܢܵܬ̣ܵܢ ܘܐܸܡܲܪ ܠܐܲܕ݂ܘܿܢܝܼܵܐ: ܫܲܪܝܼܪܵܐܝܼܬ̣ ܡܵܪܲܢ ܡܲܠܟܵܐ ܕܵܘܝܼܕ݂ ܐܲܡ̣ܠܸܟ݂ ܠܲܫܠܹܝܡܘܿܢ.

⁴⁴ܘܫܲܕܲܪ ܥܲܡܹܗ ܡܲܠܟܵܐ: ܠܨܵܕ݂ܘܿܩ ܟܵܗܢܵܐ: ܘܲܠܢܵܬ̣ܵܢ ܢܒ̣ܝܼܵܐ: ܘܠܲܒ̣ܢܵܝܵܐ ܒܲܪ ܝܘܿܝܵܕ݂ܵܥ: ܘܲܠܩܲـ̈ـܫܵܬܹܐ: ܘܠܲܕ݂ܫܵܕܹ̇ܝܢ ܒܩܸܠܥܹ̈ܐ. ܘܐܲܪܟ̇ܒ̣ܘܼܗܝ ܠܲܫܠܹܝܡܘܿܢ ܥܲܠ ܟܘܿܕܲܢܬ̣ܵܐ ܕܡܲܠܟܵܐ.

⁴⁵ܘܡܲܫܚܘܼܗܝ ܬܲܡܵܢ ܨܵܕ݂ܘܿܩ ܟܵܗܢܵܐ: ܘܢܵܬ̣ܵܢ ܢܒ̣ܝܼܵܐ: ܕܢܸܗܘܹܐ ܡܲܠܟܵܐ ܒܫܝܼܠܘܿܚܵܐ. ܘܲܣܠܸܩܘ ܡ̣ܢ ܬܲܡܵܢ ܟܲܕ݂ ܚܵܕܹܝܢ: ܘܚܸܕ݂ܝܲܬ̤ ܟܠܵܗ̇ ܩܪܝܼܬ̣ܵܐ. ܗ̤ܘ ܗ̤ܘ ܩܵܠܵܐ ܕܲܫܡܲܥܬ̇ܘܿܢ.

⁴⁶ܘܐܵܦ ܝܼܬܸ̇ܒ̣ ܫܠܹܝܡܘܿܢ ܥܲܠ ܟܘܼܪܣܝܵܐ ܕܡܲܠܟ̇ܘܼܬ̣ܵܐ.

⁴⁷ܐܵܦ ܐܸܬ̣ܵܘ ܥܲܒ̣ܕܵܘ̈ܗܝ ܕܡܲܠܟܵܐ ܠܲܡܒܲܪܵܟ݂ܘܼܬܹܗ ܠܡܵܪܲܢ ܡܲܠܟܵܐ ܕܵܘܝܼܕ݂: ܘܐܸܡܲܪܘ: ܢܲܛܐܸܒ̣ ܡܵܪܝܵܐ ܐܲܠܵܗܵܟ݂ ܫܡܹܗ ܕܲܫܠܹܝܡܘܿܢ ܡ̣ܢ ܫܡܵܟ݂: ܘܢܵܘܪܸܒ̣ ܟܘܼܪܣܝܹܗ ܡ̣ܢ ܟܘܼܪܣܝܵܟ݂. ܘܲܣܓܸܕ݂ ܡܲܠܟܵܐ ܥܲܠ ܡܲܫܟ̇ܒܹܗ.

⁴⁸ܘܐܵܦ ܡܲܠܟܵܐ ܗܵܟܲܢܵܐ ܐܸܡܲܪ: ܒܪܝܼܟ݂ ܗ̄ܘ̣ ܡܵܪܝܵܐ ܐܲܠܵܗܵܐ ܕܝܼܣܪܵܝܹܠ: ܕܝܲܗ̄ܒ̣ ܠܝܼ ܒܪܵܐ ܝܵܘܡܵܢܵܐ ܕܢܸܬܸ̇ܒ̣ ܥܲܠ ܟܘܼܪܣܲܝ: ܘܥܲܝܢܲܝ̈ ܚܵܙ̈ܝܵܢ.

⁴⁹ܘܲܕ݂ܚܸܠ̣ܘ ܟܠܗܘܿܢ ܓܲܒ̣ܪܹ̈ܐ ܕܲܡܙܲܡܢܝܼܢ ܗ̄ܘ̣ܵܘ ܠܐܲܕ݂ܘܿܢܝܼܵܐ: ܘܩܵܡ̣ܘ ܘܐܸܙܲܠ̣ܘ ܓܒܲܪ ܠܐܘܼܪܚܹܗ.

⁵⁰ܘܐܲܕ݂ܘܿܢܝܼܵܐ ܕܚܸܠ̣ ܡ̣ܢ ܩܕ݂ܵܡ ܫܠܹܝܡܘܿܢ: ܘܩܵܡ̣ ܘܐܸܙܲܠ̣: ܘܐܸܚܲܕ݂ ܓܵܘܣܵܐ ܒܩܲܪ̈ܢܵܬ̣ܵܐ ܕܡܲܕ݂ܒ̇ܚܵܐ.

⁵¹ܘܐܸܬ̣ܚܵܘܝܼ ܠܡܲܠܟܵܐ ܫܠܹܝܡܘܿܢ ܕܗܵܐ ܕܚܸܠ̣ ܐܲܕ݂ܘܿܢܝܼܵܐ ܡ̣ܢ ܩܕ݂ܵܡܲܝܟ: ܘܐܸܚܲܕ݂ ܓܵܘܣܵܐ ܒܩܲܪ̈ܢܵܬ̣ܵܐ ܕܡܲܕ݂ܒ̇ܚܵܐ. ܘܐܸܡܲܪ: ܢܹܐܡܸܐ ܠܝܼ ܝܵܘܡܵܢܵܐ ܡܲܠܟܵܐ ܫܠܹܝܡܘܿܢ: ܕܠܵܐ ܢܸܩܛܘܿܠ ܠܥܲܒ̣ܕܹ̇ܗ ܒܚܲܪܒܵܐ.

⁵²ܘܐܸܡܲܪ ܫܠܹܝܡܘܿܢ: ܐܸܢ ܢܸܗܘܹܐ ܒܲܪ ܚܲܝܠܵܐ: ܠܵܐ ܢܸܦܸܠ ܡ̣ܢ ܣܲܥܪܵܐ ܕܪܹܫܹܗ ܥܲܠ ܐܲܪܥܵܐ. ܘܐܸܢ ܒܝܼܫܬܵܐ ܬܸܫܬ̇ܟܲܚ ܒܵܬ̣ܪܹܗ ܢܡܘܼܬ̣.

⁵³ܘܫܲܕܲܪ ܡܲܠܟܵܐ ܫܠܹܝܡܘܿܢ: ܘܐܲܝܬ̇ܝܹܗ ܡ̣ܢ ܡܲܕ݂ܒ̇ܚܵܐ. ܘܐܸܬ̣ܵܐ ܘܲܣܓܸܕ݂ ܠܡܲܠܟܵܐ ܫܠܹܝܡܘܿܢ. ܘܐܸܡܲܪ ܠܹܗ ܫܠܹܝܡܘܿܢ: ܙܸܠ ܠܒܲܝܬܵܟ݂.