Read Aramaic Peshita 1 Kings 10 Bible Online

1 Kings 10 - Aramaic Peshita bible

1 Kings 10

¹ܘܡܲܠܟܲܬ̣ ܫܒ̣ܵܐ ܫܸܡܥܲܬ̤ ܫܸܡܥܹܗ ܕܲܫܠܹܝܡܘܿܢ ܘܲܫܡܹܗ ܕܡܵܪܝܵܐ.

²ܘܐܸܬܲܬ̤ ܠܲܡܢܲܣܵܝܘܼܬܹܗ ܒܐܘܼܚ̈ܕܵܬ̣ܵܐ: ܘܐܸܬ̣ܵܬ̤ ܠܐܘܿܪܸܫܠܸܡ ܒܚܲܝܠܵܐ ܣܲܓ̇ܝܼܐܵܐ ܕܛܵܒ̣: ܘܓܲܡ̈ܠܹܐ ܕܲܛܥܝܼܢܝܼܢ ܒܸܣܡܹ̈ܐ ܘܕܲܗܒ̣ܵܐ ܣܘܿܓ̣ܵܐܐ ܕܛܵܒ̣: ܘܟܹܐܦܹ̈ܐ ܛܵܒ̣ܵـ̈ـܬ̣ܵܐ. ܘܐܸܬ̣ܵܬ̣ ܠܘܵܬ̣ ܡܲܠܟܵܐ ܫܠܹܝܡܘܿܢ: ܘܢܲܣܝܵܬܹܗ ܒܟ݂ܠ ܡܸܕܸ̇ܡ ܕܐܝܼܬ̣ ܗ̄ܘ̣ܵܐ ܒܠܸܒܹ̇ܗ.

³ܘܚܵܘܝܵܗ̇ ܫܠܹܝܡܘܿܢ ܟܠܗܹܝܢ ܡܸܠܹ̈ܐ: ܘܡܸܕܸ̇ܡ ܠܵܐ ܐܸܬ̣ܟܲܣܝܼ ܡ̣ܢ ܡܲܠܟܵܐ ܕܠܵܐ ܚܵܘܝܵܗ̇.

⁴ܘܲܚܙܵܬ̤ ܡܲܠܟܲܬ̣ ܫܒ̣ܵܐ ܟܠܵܗ̇ ܚܸܟ݂ܡ̱ܬܹܗ ܕܲܫܠܹܝܡܘܿܢ: ܘܒܲܝܬܵܐ ܕܲܒ̣ܢܵܐ.

⁵ܘܡܹܐܟܲܠ ܦܵܬ̣ܘܿܪܹܗ: ܘܡܵܘܬܲܒ̣ ܥܲܒ̣ܕܵܘ̈ܗܝ: ܘܲܩܝܵܡ ܡܫܲܡܫܵܢܵܘ̈ܗܝ: ܘܲܠܒ̣ܘܼܫܲܝ̈ܗܘܿܢ: ܘܫܵܩܵـ̈ـܘܵܬܹܗ: ܘܲܠܒ̣ܘܼܫܲܝ̈ܗܘܿܢ: ܘܲܥ̈ܠܵܘܵܬܹܗ ܕܡܲܣܸܩ ܗ̄ܘ̣ܵܐ ܒܒܲܝܬܹ̇ܗ ܕܡܵܪܝܵܐ. ܘܠܵܐ ܐܸܫܬܲܚܪܲܬ̤ ܒܵܗ̇ ܬܘܼܒ̣ ܪܘܼܚܵܐ.

⁶ܘܐܸܡܪܲܬ̤ ܠܡܲܠܟܵܐ: ܫܲܪܝܼܪܵܐܝܼܬ̣ ܗܘ̤ܵܐ ܦܸܬ̣ܓ̣ܵܡܵܐ ܕܫܸܡܥܹ̇ܬ̣ ܒܐܲܪܥܝ: ܥܲܠ ܦܸܬ̣ܓ̣ܵܡܲܝ̈ܟ ܘܥܲܠ ܚܸܟ݂ܡ̱ܬ̣ܵܟ݂.

⁷ܘܠܵܐ ܗܲܝܡܢܹܬ̣ ܠܦܸܬ̣ܓ̣ܵܡܹ̈ܐ ܥܕܲܡܵܐ ܕܐܸܬܹܝܬ̣ ܘܲܚܙܲܝ̈ ܥܲܝܢܲܝ̈ ܘܗܵܐ ܠܵܐ ܚܵܘܝܼܘ ܠܝܼ ܦܸܠܓܵܐ. ܐܵܘܣܸܦܬ̇ ܚܸܟ݂ܡ̱ܬ̣ܵܐ ܘܛܵܒ̣ܬ̣ܵܐ ܥܲܠ ܛܸܒܵܐ ܕܫܸܡܥܹ̇ܬ̣.

⁸ܛܘܼܒܲܝܗܹܝܢ ܠܢܸܫܲܝ̈ܟ: ܛܘܼܒܲܝܗܘܿܢ ܠܥܲܒ̣ܕܲܝ̈ܟ ܗܵܠܹܝܢ ܕܩܵܝ̇ܡܝܼܢ ܩܕ݂ܵܡܲܝܢ ܐܲܡܝܼܢܵܐܝܼܬ̣: ܘܫܵܡ̇ܥܝܼܢ ܚܸܟ݂ܡ̱ܬ̣ܵܟ݂.

⁹ܢܸܗܘܹܐ ܡܵܪܝܵܐ ܐܲܠܵܗܵܟ݂ ܒܪܝܼܟ݂: ܕܲܨܒ̣ܵܐ ܒܵܟ݂ ܘܐܵܘܬ̇ܒ̣ܵܟ݂ ܥܲܠ ܟܘܼܪܣܝܵܐ ܕܝܼܣܪܵܝܹܠ. ܡܸܛܠ ܕܲܪܚܸܡ ܡܵܪܝܵܐ ܠܝܼܣܪܵܝܹܠ ܠܥܵܠܲܡ: ܘܥܲܒ̣ܕܵܟ݂ ܡܲܠܟܵܐ: ܕܬܸܥܒܸ̇ܕ݂ ܕܝܼܢܵܐ ܘܙܲܕ̇ܝܼܩܘܼܬ̣ܵܐ.

¹⁰ܘܝܸܗ̄ܒ̇ܬ̤ ܠܡܲܠܟܵܐ ܫܠܹܝܡܘܿܢ: ܡܵܐܐ ܘܥܸܣܪܝܼܢ ܟܲܟ̇ܪܹ̈ܐ ܕܕܲܗܒ̣ܵܐ: ܘܒܸܣܡܹ̈ܐ ܣܘܿܓ̣ܵܐܐ ܕܛܵܒ̣: ܘܟܹܐܦܹ̈ܐ ܛܵܒ̣ܵـ̈ـܬ̣ܵܐ: ܘܠܵܐ ܐܸܬ̣ܵܘ ܐܲܝܟ݂ ܒܸܣܡܹ̈ܐ ܗܵܢܘܿܢ ܬܘܼܒ̣ ܕܝܸܗ̄ܒܲܬ̤ ܡܲܠܟܲܬ̣ ܫܒ̣ܵܐ ܠܲܫܠܹܝܡܘܿܢ.

¹¹ܘܐܵܦ ܣܦܝܼܢܹ̈ܐ ܕܚܝܼܪܵܡ ܛܥܲܢ ܕܲܗܒ̣ܵܐ ܡ̣ܢ ܐܵܘܦܹܝܪ: ܘܐܲܝܬ̇ܝܼ ܡ̣ܢ ܐܵܘܦܹܝܪ ܩܲܝܣܹ̈ܐ ܕܩܹܣܘܼܬ̣ܵܐ ܣܘܿܓ̣ܵܐܐ ܕܛܵܒ̣: ܘܟܹܐܦܹ̈ܐ ܛܵܒ̣ܵـ̈ـܬ̣ܵܐ.

¹²ܘܲܥܒܲܕ݂ ܡܲܠܟܵܐ ܫܠܹܝܡܘܿܢ ܩܲܝܣܹ̈ܐ ܕܩܹܣܘܼܬ̣ܵܐ ܬܲܨܒ̇ܝܼܬ̣ܵܐ ܠܒܲܝܬܹ̇ܗ ܕܡܵܪܝܵܐ: ܘܲܠܒܹܝܬ̣ ܡܲܠܟܵܐ: ܘܟܲܢܵܪܹ̈ܐ: ܘܩܝܼܬ̣ܵܪܹ̈ܐ: ܠܲܡܫܲܒ̇ܚܵܢܹ̈ܐ. ܠܵܐ ܐܸܬ̣ܵܘ ܐܲܝܟ݂ ܗܵܢܘܿܢ ܩܲܝܣܹ̈ܐ ܕܩܹܣܘܿܬ̣ܵܐ: ܘܠܵܐ ܐܸܬ̣ܚ̄ܙܝܼܘ ܥܕܲܡܵܐ ܠܝܵܘܡܵܢܵܐ.

¹³ܘܡܲܠܟܵܐ ܫܠܹܝܡܘܿܢ ܝܲܗ̄ܒ̣ ܠܡܲܠܟܲܬ̣ ܫܒ̣ܵܐ ܟܠ ܡܸܕܸ̇ܡ ܕܲܨܒܵܬ̤ ܘܫܸܐܠܲܬ̤: ܣܛܲܪ ܡ̣ܢ ܡܸܕܸ̇ܡ ܕܝܲܗ̄ܒ̣ ܠܵܗ̇: ܐܲܝܟ݂ ܐܝܼܕ݂ܵܐ ܕܡܲܠܟܵܐ. ܘܐܸܬ̣ܦܲܢܝܲܬ̤ ܘܐܸܙܲܠ̄ܬ̤ ܠܐܲܪܥܵܐ ܗ̤ܝ ܘܥܲܒ̣ܕܹ̇ܝ̈ܗ̇.

¹⁴ܘܲܗܘ̤ܵܐ ܡܲܬ̣ܩܵܠ ܕܲܗܒ̣ܵܐ ܕܥܵܐܹ̇ܠ ܗ̄ܘ̣ܵܐ ܠܲܫܠܹܝܡܘܿܢ ܒܫܲܢ̄ܬܵܐ ܚܕ݂ܵܐ: ܫܸܬ̣ܡܵܐܐ ܘܸܫܬ̇ܝܼܢ ܘܫܸܬ̣ ܟܲܟ̇ܪܹ̈ܐ ܕܕܲܗܒ̣ܵܐ.

¹⁵ܣܛܲܪ ܡ̣ܢ ܐ̄ܢܵܫܵܐ ܐܘܼܡܵܢܹ̈ܐ: ܘܬܹܐܓ̣ܪ̈ܵܬ̣ܵܐ ܕܬܲܓܵܪܹ̈ܐ: ܘܟ݂ܠܗܘܿܢ ܡܲܠ̈ܟܹ̇ܐ ܕܥܲܪ̈ܒ̣ܵܝܹܐ ܘܫܲܠܝܼܛܵܢܹ̈ܐ ܕܐܲܪܥܵܐ.

¹⁶ܘܲܥܒܲܕ݂ ܡܲܠܟܵܐ ܫܠܹܝܡܘܿܢ ܡܲܐܬܹ̇ܝܢ ܣܲܟ̇ܪ̈ܝܼܢ ܕܕܲܗܒ̣ܵܐ ܣܢܝܼܢܵܐ: ܘܫܸܬ̣ ܡܵܐܐ ܡܢ̈ܝܼܢ ܕܕܲܗܒ̣ܵܐ ܐܲܣܸܩ ܥܲܠ ܣܲܟ̇ܪܹ̈ܐ ܚܕ݂ܵܐ.

¹⁷ܘܲܬ̣ܠܵܬ̣ܡܵܐܐ ܡܓܲܢ̈ܝܼܢ ܕܕܲܗܒ̣ܵܐ ܣܢܝܼܢܵܐ: ܘܲܬ̣ܠܵܬ̣ܡܵܐܐ ܡܸܢ̈ܝܼܢ ܕܕܲܗܒ̣ܵܐ ܐܲܣܸܩ ܥܲܠ ܡܓܲܢܵܐ ܚܕ݂ܵܐ. ܘܣܵܡ̣ ܐܸܢܹܝܢ ܡܲܠܟܵܐ ܒܹܝܬ̣ ܥܵܒ̣ܵܐ ܕܠܸܒ̣ܢܵܢ.

¹⁸ܘܲܥ̣ܒܲܕ݂ ܡܲܠܟܵܐ ܟܘܼܪܣܝܵܐ ܕܫܸܢܵܐ ܪܲܒܵܐ: ܘܩܲܪܡܹܗ ܕܲܗܒ̣ܵܐ ܡ̣ܢ ܐܵܘܦܹܝܪ.

¹⁹ܘܲܥܒܲܕ݂ ܠܟ݂ܘܼܪܣܝܵܐ ܫܬܵܐ ܕܲܪ̈ܓ̣ܝܼܢ: ܘܪܹܫܹܗ ܕܟ݂ܘܼܪܣܝܵܐ ܓܠܝܼܠ ܡ̣ܢ ܒܸܣܬ̇ܪܹܗ: ܘܐܝܼ̈ܕ݂ܵܗܵܬ̣ܵܐ ܡܸܟܵܐ ܘܡܸܟܵܐ ܒܕ݂ܘܼܟ̇ܬ̣ܵܐ ܕܡܵܘܬ̇ܒ̣ܵܐ: ܘܲܬ̣ܪܹܝܢ ܐܲܪ̈ܝܵܘܵܢ ܩܵܝ̇ܡܝܼܢ ܡܸܟܵܐ ܘܡܸܟܵܐ.

²⁰ܘܲܬ̣ܪܸܥܣܲܪ ܐܲܪ̈ܝܵܘܵܢ ܩܵܝ̇ܡܝܼܢ ܥܲܠ ܓܹܢ̄ܒ̣ ܫܬܵܐ ܕܲܪ̈ܓ̣ܝܼܢ ܡܸܟܵܐ ܘܡܸܟܵܐ: ܠܵܐ ܐܸܬ̣ܥ̱ܒܸܕ݂ ܗܵܟܲܢܵܐ ܠܟ݂ܠܗܹܝܢ ܡܲܠܟ̇ـ̈ـܘܵܬ̣ܵܐ.

²¹ܘܟ݂ܠܗܘܿܢ ܡܵܐܢܹ̈ܐ ܕܬܸܫܡܸܫܬܹ̇ܗ ܕܡܲܠܟܵܐ ܫܠܹܝܡܘܿܢ ܕܕܲܗܒ̣ܵܐ: ܘܟ݂ܠܗܘܿܢ ܡܵܐܢܹ̈ܐ ܕܒܹܝܬ̣ ܥܵܒ̣ܵܐ ܕܠܸܒ̣ܢܵܢ ܕܕܲܗܒ̣ܵܐ ܣܢܝܼܢܵܐ. ܘܟܸܣܦܵܐ ܠܵܐ ܚܫܝܼܒ̣ ܗ̄ܘ̣ܵܐ ܒܝܵܘܡܵܘ̈ܗܝ ܕܲܫܠܹܝܡܘܿܢ ܡܸܕܸ̇ܡ.

²²ܡܸܛܠ ܕܲܣܦܝܼܢܹ̈ܐ ܕܬܲܪܫܝܼܫ ܐܝܼܬ̣ ܗ̄ܘܲܝ̈ ܠܡܲܠܟܵܐ ܒܝܲܡܵܐ ܥܲܡ ܣܦܝܼܢܹ̈ܐ ܕܚܝܼܪܵܡ. ܚܕ݂ܵܐ ܠܲܬ̣ܠܵܬ̣ ܫܢ̈ܝܼܢ ܐܵܬ̣ܝܵܐ ܣܦܝܼܢ̄ܬܵܐ: ܡ̣ܢ ܬܲܪܫܝܼܫ: ܘܲܛܥܝܼܢܵܐ ܟܸܣܦܵܐ: ܘܕܲܗܒ̣ܵܐ: ܘܦܝܼܠܹ̈ܐ: ܘܩܘܿܦܹ̈ܐ: ܘܛܵܘܣܹ̈ܐ.

²³ܘܝܼܕܒ̣ ܡܲܠܟܵܐ ܫܠܹܝܡܘܿܢ ܡ̣ܢ ܟܠܗܘܿܢ ܡܲܠ̈ܟܹ̇ܐ ܕܐܲܪܥܵܐ: ܒܥܘܼܬ̣ܪܵܐ ܘܲܒ̣ܚܸܟ݂ܡ̱ܬ̣ܵܐ.

²⁴ܘܟ݂ܠܗܘܿܢ ܡܲܠ̈ܟܹ̇ܐ ܕܐܲܪܥܵܐ: ܒܵܥܹ̇ܝܢ ܠܡܸܚܙܵܐ ܐܲܦܵܘ̈ܗܝ ܕܲܫܠܹܝܡܘܿܢ: ܘܲܠܡܸܫܡܲܥ ܚܸܟ݂ܡ̱ܬ̣ܵܐ ܕܝܲܗ̄ܒ̣ ܐܲܠܵܗܵܐ ܒܠܸܒܹ̇ܗ.

²⁵ܘܡܲܝܬܹ̇ܝܢ ܓܒܲܪ ܩܘܼܪܒܵܢܹܗ: ܡܵܐܢܹ̈ܐ ܕܕܲܗܒ̣ܵܐ: ܘܡܵܐܢܹ̈ܐ ܕܟܸܣܦܵܐ: ܘܲܠܒ̣ܘܼܫܹ̈ܐ: ܘܙܲܝܢܵܐ: ܘܒܸܣܡܹ̈ܐ: ܘܪ̈ܲܟ݂ܫܵܐ: ܘܩܵܪ̈ܘܿܟܹܐ: ܘܟ݂ܘܼܕܲܢ̈ܘܵܬ̣ܵܐ ܟܠ ܫܢܵܐ ܒܲܫܢܵܐ.

²⁶ܘܟܲܢܸܫ ܡܲܠܟܵܐ ܫܠܹܝܡܘܿܢ ܡܲܪ̈ܟ̇ܒ̣ܵܬ̣ܵܐ ܘܲܦܪ̈ܵܫܹܐ: ܘܲܗ̤ܘܲܝ ܠܹܗ ܐܵܠܹܦ ܘܐܲܪܒܲܥܡܵܐܐ ܡܲܪ̈ܟ̇ܒ̣ܵܬ̣ܵܐ: ܘܲܬ̣ܪܸܥܣܲܪ ܐܲܠܦ̈ܝܼܢ ܦܲܪ̈ܵܫܝܼܢ. ܘܲܫܒܲܩ ܐܸܢܹܝܢ ܠܡܲܪ̈ܟ̇ܒ̣ܵܬ̣ܵܐ ܒܩܘܼܪ̈ܝܵܐ: ܘܡܸܢܗܹܝܢ ܥܲܡ ܡܲܠܟܵܐ ܒܐܘܿܪܸܫܠܸܡ.

²⁷ܘܝܲܗ̄ܒ̣ ܡܲܠܟܵܐ ܫܠܹܝܡܘܿܢ ܟܸܣܦܵܐ ܒܐܘܿܪܸܫܠܸܡ ܐܲܝܟ݂ ܟܹܐܦܹ̈ܐ: ܘܐܲܪ̈ܙܹܐ ܝܲܗ̄ܒ̣ ܐܲܝܟ݂ ܫܲܩܡܹ̈ܐ ܕܒܲܦܩܲܥܬ̣ܵܐ ܣܘܿܓ̣ܵܐܐ. ܘܡܲܦܩܵܢܵܐ ܕܪ̈ܲܟ݂ܫܵܐ ܕܲܫܠܹܝܡܘܿܢ ܡ̣ܢ ܡܸܨܪܹܝܢ: ܘܐܲܓ̣ܪܵܐ ܕܬܲܓܵܪܹ̈ܐ ܕܡܲܠܟܵܐ ܢܵܣܒܝܼܢ ܙܸܒ̣ܢܵܐ ܒܲܕ݂ܡܲـ̈ـܝܵܐ.

²⁸ܘܣܵܠܩܵܐ ܗ̄ܘ̣ܵܬ̣ ܡܲܪܟܲܒ̣ܬ̣ܵܐ ܡ̣ܢ ܡܸܨܪܹܝܢ ܒܫܸܬ̣ܡܵܐܐ ܕܟܸܣܦܵܐ ܘܣܘܼܣܝܵܐ ܒܲܡܵܐܐ ܘܚܲܡܫܝܼܢ. ܘܗܵܟܲܢܵܐ ܟܠܗܘܿܢ ܡܲܠ̈ܟܹ̇ܐ ܕܚܹܬ̣ܵܝܹ̈ܐ: ܘܡܲܠ̈ܟܹ̇ܐ ܕܐܲܕ݂ܘܿܡ ܒܐܝܼܕܲܝ̈ܗܘܿܢ ܐܲܝܬܝܼܘ ܣܘܿܓ̣ܵܐܐ.